فد يوم من الايام وفي قديم الزمان جان اكو قريه مسيحيه وبيها ناس بسطاء ومؤمنين وما جان بيها لا كنيسه ولا قس ثابت بس جان يجيلهم مرتين بالسنه قس وبالاعياد يقيم القداسات والصلوات ويوعض وبعدين يروح
فد يوم من الايام طلبوا اهل القريه من المختار ان يرسل رساله الى المطران يطلب منه ان يجي ويزورهم ويتفقدهم بالقريه لأن ما عدهم كنيسه ولا قس ..وجانت معلوماتهم كلش بسيطه عن الدين فدز هذا المختار رساله للمطران وصلت الرساله ليد المطران وقراها ولبى الدعوه واجا للقريه من مكان بعيييد كلش واجا على ظهر سفينه .. استقبلوه اهل القريه بكل حفاوه وتقدير واحترام ...
فاقام بيها ايام عديده يتفقدهم ويقيم بيها القداسات والصلوات ويعلم ويوعض ووعدهم ببناء كنيسه الهم ..
فقبل ما تخلص ايامه حتى يرجع لمكانه لقضاء اشغاله في المدينه.. اجا رجال من اهل القريه كلش بسيط وطلب ان يقابل المطران فسمحوله ان يدخل ؟؟
المطران::ها ابني كول شتريد ؟؟
الرجال :: سيدنا اريد منك اتعلمني بعض الصلوات لأن اني اعرف صلاة وحده وحيده.. واصليها بالشغل .. وبالبيت ووين ما اروح..
المطران::اي وشتكول بالصلاة شتصلي ؟؟ سمعني ؟؟
الرجال ::اني اكول من اصلي ... يااااارب ارحمني حتى ارحمك ... ياااارب ارحمني حتى ارحمك ..!!!
المطران::وهو يضحك من بساطته...ههههه .. شلون اتكول هيجي ابني ؟؟ ميصير ..احنا محتاجين لرحمة ربنا شلون احنا انكوله حتى ارحمك ؟؟؟!!هو ما محتاج رحمتنا احنا اللي محتاجين لرحمته ..
الرجال :ك لعد علمني شلون اصلي سيدنا ؟؟؟
فكام علمه بعض الصلوات مثل ابانا الذي والسلام الملائكي الخ .. وحفظهن وكام رددهن على مسامع سيدنا المطران .. وكاله المطران :: عفيه ابني اريدك كل يوم اتصلي وما تنسى صلواتك ..
الرجال :: زين سيدنا اني اشكرك ..
اجا اليوم اللي بيه لازم يروح المطران المكانه لقضاء اشغاله بالمدينه .. فودعوه اهل القريه الى ان وصل السفينه صعد بيها ويلوح الهم ويباركهم والناس همينه كامت اتلوح بيديها مع السلامه والله وياك سيدنا عود زورنا ..
فاجا هذا الرجال اللي قابل سيدنا المطران وهو يركض من بين الناس يريد يقابل المطران ويحجي وياه ...شافه من بعيد بالسفينه .. كام ركض عليه عل ماي يركض ويركض وهو يصرخ للمطران ,و سيدناااااا سيدنااااا ... وينك اني نسيت الصلوات اللي علمتني اياها شلون اصلي ؟؟؟
الناس اللي بالسفينه شافوه ... واتعجبوا منه .. هاي شلون يركض عل ماي ؟؟؟!!!
لفتوا انتباه المطران لهذا الشخص فنظر عليه شافه يركض عل ماي .. فكامت دموع المطران تنزل .. وصرخ عليه وكال :: ها ابني شتريد ؟؟؟
الرجال :: سيدنا الصلوات اللي علمتني اياها نسيتها شلون اصلي هسه ذكرني ..
المطران من السفينه ::والدموع في عينيه ..روح ابني روح صلي مثل ما جنت اتصلي كبل على نيتك .. وصلاتك مقبوله شلون ما اتصلي ... صلاتك مقبوله يا قديس ..
سمع الرجال ارتاح ورجع ركض عل ماي الى ان وصل الساحل بدون ان يغرق .. وعبالك جان يمشي عل ارض !!!!
وهاي القصه ليست منقوله ابدا سمعناها من الناس الكبار .. وسألناهم وهاي القصه حقيقيه ؟؟
كالوا:: احنا همين سمعناها من ابائنا واجدادنا .. بس ما ممكن جانوا يكذبون علينا .. وهي حقيقيه ..
فماذا ننتفع من هذه القصه وماذا نتعلم من هذا الرجل ؟؟
تحياتي
