دولار
يوسف شكوانا
لو برايا بشواقا وبسغاذا لذ وراقا
بثر دولار بئراقا خاين مخاي بسباقا
بابا ويما بنكارا وبكول نشواثا بكبارا
بدولار كشقلخ شوهارا وخاين هادخ بئوارا
بابا دجمن دبرونا وخاثا لاكبا اخونا
ما زونيلي اذ زونا لا كسوءخ هم بمليونا
اذ دولار محطيانا كسغذخلي بكول عدانا
كم طامشلن بئسيانا وخاين بشلي كهانا
بنشايا لبابا وساوا وبأايا لبيشا وخراوا
اتيرا بشلي طاوا هم ان بريلي بكناوا
دلا مارا بشلي ايالي شتايا وقمخا وجكاري
كول ما دباري شود باري بس دأمري اتن باري
كخاهخ خاي دراموثا ولبش كدألخ حقوثا
نبيليوخ بكو اودوثا بدولار كقبلخ بلموثا
دولار اويذا تا بساما ودخاهخ خاي دشلاما
بذ زونا قلبلي لساما وبشلي خاين ببلاما
قملي بيشا وعجابا بلطلي مي اورخا دبابا
ولملي بكناوا وسلابا وبشلي مر شما رابا
دولار ماقا دباءخلي وبليلي ويوما خدمخلي
دميثخ اخا بشوقخلي وامن ليبن دنبلخلي
تا اذ دولار ببراكا ولسبثا دقورا بجياكا
مشاري اينن بخشاكا كبايش الن بكخاكا
