أبو نواس والتفجير...

أبو نواس والتفجير...

ابو نواس............ خمريات وخمر واشعار.. وما يفارگه كاسه
ما يعرف التفجير وفنونه...............والأرهاب ما دونّه قرطاسه
وشيطان بسترة مفخخة مر صوبه..............وطيّر هوى راسه
واللي آكل لگمة بـ )قدوري)......... تاليها انذبح وتناثرت لحماته

مطعم وشارع وتاريخ....................والداخل بخشخشة خرداته
يرم العظم برغيف...................والچاي ع النار وينتظر هيلاته
ثاري الموت مثل الطيف............بخيوط الفجرمرسومة وجهاته
وتاليها باچة يصير............وشوربة عظم بالدم،معفرّة وغليانه!؟

بارود وكرشة بشر..........وبالصحن فروة راس وضلوع عريانه
والجاني مخمور بفلس.... والميّة عنده، ويّه العدو متحالفة وأعوانه
والعراقي هو الفحم والزيت والناروالصوف والثاروالمنبوذ عرفانه
غربان الزمن،عميان......... والتفجير آية چذب جوى الأبط خافيها

يا بو نواس...والوسواس شايل زود واطيها... وغفلة أنگلب عاليها
نايم السلطان لو محتاربالخناس؟... والحاجب بالذل الشمس ساگيها؟
لو ملتهي بخمسات وبثلاثه منهن شاغل البال وحرگة شعب لاغيها؟
لو أحنه همج اوباش.... وحارسنه نعسان....... وغافي على زناده؟

مسگوف السمچ خوفي يصير تكفير...............بفتوى حقد ومراده!
وفلافل ابو غسان تطهير...... فتح وجهاد بزاد الفقر مجبور واولاده!
وماش ابو مظلوم تزوير..........ردع احتلال بطاسة رزقه وأحفاده!
وشربت الرمان مُغتصب شرير.............والشاري ملعونة أجداده!
ومرگ عدس بالسوگ.......... فتنة وعمالة وخِسّة، وتَجسس إمداده!
وشاميّة ام معتوگ ، ضد التحرر والشعب..........ومزغرده لجلاده!
فجروا زين هاي أرزاق!.. بموت الغلابة تحرير ذخرالبلد وامجاده!
وبيّاعة لبن فجروها مرتين..امريكي بالگفة أظن،لابد ورى أسياده!!
فجروا الفرح بالبلدان،عنتر الأرهاب جوّال مهيوب بسيف ابن شدّاده
وما نسى اسرائيلي يحمي،ودعه وفجّرالخان..... وهذا عُرف إلحاده!
فجروا ببغداد وبعمان...هذي نجاسة فكر منخور..وميت گلب حاميها

وسفة يا بو نواس حزام الظهر مطاط...........والروح البخت حانيها
وشتنفع الوسفات..........وهذا اليوم أهل الضاد...شهگة دمع شاريها
بس الأمل مخزون..... والعين تنطر درب محبوب،وللأرض حاديها

فاتن نور
05/11/11