ارض السواد
بالاول
ومن كثر ما ببلادي ناس
سموها ارض السواد
وهسه
ومن كثر ماحزنت الناس
البست بس السواد.
الحزن ببلادي صنعه
نعيش بيها،
من زغرنه
واحنه بس ضيم وحزن
نرضعه ونشربه كاس.
لو تريد تغني امي
تجيب طاري موتة اختي
والبچي ومشعة الراس
ولو عصر گامت تصلي
تفتكر اول حملهه
اللي انكتل وهو شباب.
الليل لو رادت تنامه
تذكر ايام العذاب
ولو مشت للجيران تسياره
تذكر ايام الزياره
تلطم حسين الشهيد
وتنعي العباس واخباره.
لمريم العذرا تعنت
على الصليب صلبو عيسى
مريم ومريم تلاگن
هاي ابنهه بالرصاص انكتل
واخته نتلوها نتل
وذيچ ابنهه ذاك هالشايل صليبه
وينظر بعينه الحبيبه
امه تبچي وهو ينزف
ودمه راح وي الاساس.
لو بنينه البيت احنه
يبقى دمنه بكل صريفة
وجامع يواسي كنيسة
من عهد اشور احنه
وثورة الزنج العنيفة
كل عراقي صار دمه
حنة بايدين الخليفة
كرادنه شافو ظلم
صار للعام حديثه
يهودنه سبوهم سبي
سفروهم حتى جنسيتهم خذوها
والبقو عاشو بنص التهايم
والحجي الماله اساس
واحنة من ذاك اليوم احنه
حمه ومحمد وزلخه والياس
ويحيى المعمد الناس
بسجن واحد، قبر واحد، لبس واحد
اسود وشيبة الراس
رزاق عبود
