موضوع الهجرة الخاصة لامريكا رجاءا استفسار فقط

[توب التوب]

اولا اشكر كل الذين ساهموا بمعلوماتهم المفيدة في هذا الموقع و خصوصا الاخ جوزيف كوندا

عندي سوال ، فانا قد عملت مع الامريكان كمترجم و بعدها تركت العراق و اقمت في سوريا نظرا للظروف المعروفة لديكم و حين سمعت عن موضوع هجرة المترجمين لامريكا ذهبت الى السفارة الامريكية و هناك اخبروني بان اقدم كافة مستمسكاتي الى عنوان بامريكا و قمت فعلا بالموضوع و ارسلت الرسالة و اتاني الرد على الايميل بانه شروط التقديم هي ان يكون لديك ورقة تثبت بانك قد اشتغلت مع الامريكان لمدة سنة على الاقل و لديك هوية مترجم و لديك ورقة توصية من جنرال بالجيش الامريكي و بالفعل قد ارسلنا جميع هذه الاثباتات و لكن الجواب رجع لنا برسالة ايميل بانه جميع المتطلبات قد كمل ما عدا ورقة التوصية لانها موقعة من ملازم و ليس من جنرال كما يريدون.
و بعد كل المحاولات للحصول على التوصية من ضابط فقد باءت بالفشل لعدم تمكني من العودة للعراق و كذلك عدم معرفتي لمكان الوحدة حاليا. و عالرغم من اني قد اعطيت السفارة ايميلات جميع الضباط و العسكريين الذين اعرفهم في الوحدة فلم يستطيعوا ان يحصلوا منهم على رد و كذلك انا.
و اخيرا اخبروني بان موضوعك متوقف لحين الحصول على تلك الورقة اي ورقة التوصية و من جنرال و الى ذلك الحين لن تتحرك معاملتك.
ارجو معرفة اذا كانت لديك اي حل لمشكلتي و اذا كان التقديم من السفارة الامريكية في الاردن يتطلب نفس الشروط لاني قد سمعت بانهم لا يريدون سوى هوية الامريكان
و اذا تعرفون شنو المطلوب عمله لاحصل على شيء على العلم باني قد قدمت قصتي الى اليو ان و صارلي هنا بسوريا سنة و نصف بدون نتيجة من الامم المتحدة و لا من السفارة الامريكية و لا من اي مكان.
شكرا

[chaos]

الســـــــــــلام عليكم شلونك حبي توب التوب شخبارك ان شاء الله بخير
حبي بالنسبة الشغلتك ماكو اسهل منها وبرنامج الهجرة او اللجوء ميطلبون اي  توصية  من جنرال اهم شي اذا عندك Employment Verification والمدة مالتة 12 شهر تكدر بكل سهولة اتقدم على برنامج الهجرة الخاصةsiv ومني الك كل الموفقية ويوم سفرك انشاء الله



وياك حـــــــــمودي الكـــــــــرادي 

[untitled.man]

اخوية العزيز chaos
حبه حبه على الولد ولا تخلي يتوه، هو مترجم، والمترجمين لازمهم ورقه تزكيه من جنرال مثل ما ذاكر هو، بس اني وانت جنه موظفين بشركات لذلك ما طلبوا منه تزكيه جنرال، بس مع ذلك رادوا تزكيه من شخص امريكي... مو لو مو مو!!!

اخي العزيز توب التوب...
تره سالفتك كلهه معتمده على ورقة التزكية، ومالهه علاقة لا بالسفارة اللي بعمان ولا باي مكان، لانه قانون التقديم على برنامج الهجره للعاملين مع القوات الامريكيه هو واحد بكل مكان.
فلازم تحصل التزكيه من جنرال، ومو بس هذا، وانما تأكد على هذا الجنرال انه في حال الاتصال بي من قبل برنامج الهجرة بخصوص قضيتك انه يجاوبهم وما يغلس، لانه (بتصوري الشخصي) حصول الموافقة كلهه تعتمد على جواب صاحب الريكومنديشن، واكيد اذا الشخص ما عنده سوابق بعد التحقق من خلفيته وتاريخهه.

تحياتي

[ابو عبد الله التكساسي]

السلام عليكم
اخي رجل بلا عنوان اريد اختلف وياك بالراي ..  ليش؟؟
لان هذا القانون انلغى واستبدل بمكانه قانون الهجره الجديد للمترجمين مع القوات الامريكه العسكريه في العراق
الي كاله الاخ كيوس صحيح ميه بالميه واكلك ليش
اول برنامج جان اسمه   SsIV  والي كان يشمل المترجمين فقط والذين لديهم خدمه اكثر من سنه و تزكيه من جنرال ,ورساله التوضيف الصادره من الشركه (( جانت بوكتهه ال 3))
بعدين شافو سالفه الجنرال عاويه حتى للي يشتغل ويا الجنرال استبدلت ب (( المسؤل المباشر)) و ورقه الكوم تستبدل تزكيه الجنرال
والبقيه نفسها مع اختلافات بسيطه من حيث تسعيره الفيزا 400 دولار عالقديم والجديد ما بيه تسعيره
والقديم كليته ميل والجديد كليته ايميل ما عدا المرحله الثانيه .... الخ

وتقبل مروري

[untitled.man]

اخوية العزيز ابو عبدالله...

وعليكم السلام...

الكلام اللي ذكرته حضرتك صحيح... بس مثل متعرف انه البرنامج القديم مال المترجمين انغلق وصار كله ضمن الـ SIV5000. ولكن بقت المتطلبات نفسه واللي هي اثبات التوضيف والباجات وتزكية الشخص الامريكي، بالاضافة الى انه ترسل الطلبات الى السفارة بدلا من نبراسكا (USCIS ).
الكلام هو عن التزكية من الشخص الامريكي، هو شلون يكدر يحصل الكوم اذا ما عنده تزكية؟؟؟
زين مثل ما حضرتك كلت "مسؤوله المباشر"، زين هو مترجم، مسؤوله المباشر مو راح يكون ضابط او على الاقل مثل ما همه يسموهه (Flag Officer)؟؟
بصراحة اني ما عندي خبرة بالرتب العسكرية مالتهم، لذلك ما اعرف منو الضابط ومنو الجنرال، بس هي بكل الاحوال رسالة التزكية مطلوبة، واني مثل ما ذكرت وهذا رأيي الشخصي انه هي العمود الاساس لقبول المعاملة.

تحياتي

[ابو عبد الله التكساسي]

اخي انت تتهمني بالغموض واني حجيي واضح جدا 
هاي شطلعت كل حجايه وكتلي تتهمني بالغموض ...  اي  جلبت

حبي اني وياك هسه متفقين سبب عدم معرفتك بالرتب العسكريه هو الي سوالك اللبس بالموضوع

المسؤل المباشر - هو الي ينطي تزكيه اوليه للتحصيل على الكوم (( خلي نفرض باقي الشروط موجوده ))
الكوم ابروفل - هو الي راح ايحل مكان التزكيه مال الجنرال

لهنا اني وياك ومتفقين وعلى حب الله
هسه نجي عالسمؤول المباشر -  وهو ببساطه بالنسبه للمترجمين يسموه  POC او بيرسون اوف كونتاكت
وهم عاده الاداريين في الوحدات العسكريه الي عدهه مترجمين والمسؤل عن المترجمين يكون هذا الشخص
بالعراقي (( الي يسويلك التايم شيت)) هاي المعلومه مو الك بلا عنوان هاي للجماعه الي مفتهمين السالفه عبالهم الا الكابتن يوقع الورقه

زين شنو رتبته هذا الشخص ابو عبد الله ؟؟
اي رتبه حتى لوجندي مدام متوفره بيه المواصفات مال الشركه
يعني خط ونخاه وفسفوره امريكيه 

تحياتي للجميع
اخوكم ابو عبد الله التكساسي
وانت تتهمني بالغموض

[untitled.man]

عمي ابو عبدالله الذهب...

اني بعد ردك هذا مالي لا حجاية ولا رد...
بس بيني وبينك... اني لا جنت اعرفهه للرتب بالعراق ولا اريد اعرفهه حتى هنا...  خلينه بعيدين عن الجيش... 

عمي صاحب الموضوع...
اخذ الرد مال ابو عبد الله راس مال واتوكل...

[ابو عبد الله التكساسي]

ولعل أذنك ليست لكلماتي، فلا تتهمني بالغموض

احبك يا اخي ومن حبك لاشاك 

[مازولا]

اكولكم ... لو عيوني بيهه شي لو اني مفتهم الشغله غلط ... الاخ توب التوب كاتب الموضوع بتاريخ : أبريل 14, 2008, 06:23:43 pm ... زين ما كان اكو اي جواب لحد ما الاخ كايوس جاوب عليه بتاريخ : ديسمبر 03, 2009, 06:03:57 pm ... عمي الرجال يجوز هسه واصل انتو شنو ذكركم بيه هههههههه ... مع تحياتي ... اخوكم مازولا

[ابو عبد الله التكساسي]

مازولا
والله خربتني ضحك
تدري ما منتبه للتاريخ هع هع هع هع هع هع هع هع هع