يا اهل الرحم ... وينة اليرحم عماد الطويرجاوي ..!

[Ahmad Alyasiry]

يا اهل الرحم ..
. وينة اليرحم عماد الطويرجاوي ..!

بقلم احمد الياسري* 

الله بالخير  

 
طبعا الصحافة والاعلام العراقي ومنظمات المجتمع المدني خصوصا بعد سقوط النظام اتحدثت عن اغلب شرائح المجتمع العراقي السياسيين والمثقفين والصحفيين والمهجرين والرياضيين والمظلومين والحرامية والمجرمين والشاردين وعلماء الدين ،وهاي المؤسسات اتحدثت عن حقوق وجرائم واختلاسات ومبادرات هاي الشرائح كلها بس اكو شريحة للأن محد جاب طاريها ولا واحد حجه عنها وكأنها عايشه مو بالعراق بالمريخ لو بالمشتري ومحد شايفها ولا واحد عرف ظروفها وهاي الشريحة الي اريد اليوم احجي عن نموذج منها هي شريحة المعوقين العراقيين وبالتحديد معوقين التايهات الي كثروا بالفترة الاخيرة ،وقصدي بمعوقين التايهات همه المساكين الي لا بيها ولا عليها ،يعني يتمشى بشارع السعدون لو بالبياع وانفجرت مففخة لو عبوة ناسفة وطارت عينة لو رجلة لو ايده ،لو اخترع وفقد النطق لو اتخبل وذولة كثروا كلش هواي بعد احتلال عمنه بوش وعمنه ابن لادن وعمنه نجاد العراق ، بحيث يسولفلي ولد صديق من اهل مدينة الصدر في بغداد التقيت بي بسوريا ،يكولي احمد فد يوم جاي من الشغل راجع للبيت وصلت قريب البيت وانفجرت سيارة مفخخة ،فنزلت انقل الجرحى والمصابين يكول ،شلت اثنين مصابين جلب انتباهي واحد منهم كانت رجلة مقطوعة ،يكول يصيح من الالم وبنفس الوقت يكولي لا تحرك السيارة ، فكتله ليش عمي خل الحك اوديك المستشفى كال ما تمشي السيارة اذا ما تجيبولي رجلي !! يكول ويصيح بعلو صوته اريد رجلي ..! يكول فنظرت للمكان شفت رجلين مكطعه هواية ، كلت خل اخذه على كَد  عقلة ((كتله عمي ميخالف بس كلي يا رجل من هاي الرجلين الك ، (اتخيلوا المنظر ) يكول  كالي ذيج ، اشرلي على وحده يكول رحت جبتها ، يكول بعدين افتهمت انه كان يعتقد اذا اخذ رجله للمستشفى راح يرجعوها اله ،فتصوروا وياي شكد اكو ناس بالعراق مثل هذا المسكين ،ومن ينصاب سياسي لو رجل دين تنكلب الدنيا بالعراق والحكومة تلطم والسفارات تستنكر ,, بس للأن ما شفنه واحد استنكر على تعويق انسان عراقي فقير ذنبه انه ما عنده وطن غير العراق وابتلى على عمره من اتمشى بشوارع هذا الوطن حصدته المتفجرات والمليشيات المجاهدة ، والحقيقة السبب الحقيقي وراء كتابتي هذا الموضوع هو انه قبل جم يوم جنت كاعد اتفرج على التلفزيون وبالصدفة درته على قناة البغدادية الي تبث من القاهرة ،وكان طالع برنامج اسمه (ما لا يقال ) والحقيقة افتهمت ان البرنامج يركز على مشاكل العراقيين الي اتعرضوا للسجن او العوق من قبل الامريكان فقط  ،،فعرضوا حالة مواطن عراقي اسمه (عماد ) من اهل طويريج وقصة عماد المسكين انه كان يعيل اطفاله ومرته وخواته وكان يشتغل في بغداد ويجيب الي الله قاسمه للاطفال ،وفي يوم اسود كان عماد راجع الى اهله وبطريق بغداد كربلاء كان اكو رتل دبابات امريكي متعرضين لقصف من قبل مجاميع مسلحة وكام الرتل الامريكي يرمي عشوائي ،والسيارة الي بيها عماد صارت بالنص فرموا الامريكان عليها ومن سوء حظ عماد اجته طلقه بركبته اصابت العمود الفقري وتسببت بأصابته بالشلل الكامل !! يعني لا يحرك ايد ولا رجل بس السانة يتحرك ،وبدة المعاق عماد يسولف سالفته بالتلفزيون والضيم الي شافه بمستشفيات بغداد وكربله بعد ان اتبره منه الاميركان الي همه اساسا مسئولين عن اصابته بس غبر ولد غبر ،هفوه بطلقة عوقته وداروا اوجوهم وراحوا بمكان ما ينقلونه لامريكا يعالجونه ،يسووله معامله طركاعه مثل الاف المرتزقة الي طلعتهم امريكا بحجة مهددين لانهم اشتغلوا مع الامريكان وهمه  اغلبهم كلاوجية وجذابين ،سالفتنا  بدة عماد يشرح قصتة وياريت ما شرح قصتة ولله دمرني ! ولله ما خلاني انام ذيج الليلة للصبح كاعد بالبيت وبس ابجي ،اعترف انه قصة هالانسان العراقي الي لا اعرفه ولا يعرفني دمرتني وخلتني  منثول ودايخ بمئات الاشخاص الي قصصهم مثل عماد المسكين ،واكثر جملة اثرت بيه وبكتني بصدق هية كلمة ابنة من سألة( كاله بابا ليش متكووم تلعب وياية )، الله اكبر ،شنو ذنب علاوي ابن عماد يعيش طفولة معوقة وهو يشوف امه دايخه بالعيشة وتتوسل بالفضائيات بلكي الله يهديلها ولد الحلال ويرحموها ، واب عبارة عن  جثة هامدة عدها لسان وتحجي ،شنو ذنب هالمراة الشابة الي تريد تتمتع بشبابها وهي عايشة تحت كنف زوجها تتحول  بين ليله و ضحاها الى ام واب لزوج مشلول واطفال جوعانين  ،والي اثر بيه اكثر كلام زوجته من كالت (هذاك اليوم كان عماد يصيح فاجيت اركض ،كتله شبيك كال الحكيلي هاي البكة كرصتني وتوجعني كرصتها تكدرين تنشيها عني ) لا اله الا الله ،اتخيلوا واحد من عدكم يكعد الصبح يلكه نفسه ما يكدر ينش ذبانه لو بكة عن جسمه شيصير بيه !!!!! الهي بجاه غربة كل غريب ،بجاه كل دم مقدس جرة على تربة العراق ،وكل روح طاهرة حلقت بسماء العراق ارحمنا يا الهي وخلصنا من لعنة الحروب ،خلصنا من لعنة السلطوية والقتال ،خلصنا من السفلة الي يسكرون بدماء الشعب ، خلصنا ياربي من المجرمين الي مجلبين بركابنا من جيل لجيل ،الهي هاي البلدان داير ما دايرنه حايره بونستها وبفلوسها واحنه من دون الوادم نخلص من مجرم نوكع بيد الف مجرم ، الهي هدي نفوسنا وخلينا نتطهر من لعنة النفاق اواحد يريد ياكل لحم الثاني ،،الهي هذا الشعب مسكين ياربي حتى اذا مرتكب جرم اغضب السماء اغفرلة الجرم هذا وانته ارحم الراحمين ياربي ،، لو اكو غيرك نستغيث بيه ويغيثنا جان ما سكتنا ،وهسه اليوم يا قراءنا واستاذتنا وكتابنا  الكرام ، يا اهل الغيرة والنخوة العراقية ،، ان الله لا يغير ما بقوم حتى يغيروا ما بانفسهم ،، ولازم نخلي ايد بأيد ونتعاون حتى الله يرحمنا ،اخوكم عماد محتاج عملية ، حتى يكدر يمشي مرة ثانية واكو ناس كالوا هاي العملية بامريكا تكلف (65الف دولار) وما اعتقد هذا المبلغ خيالي لو مصيبة مقابل احياء جثة هامدة اسمها(( عماد الطويرجاوي)) ،اسئلكم بتراب العراق الي ماكو اقدس منه بالعالم ان متقصرون عن هذا الشاب المسكين ،يا اهل الرحم ارحموا هذا المظلوم ،الي يكدر يدزلة افلوس ليقصر ، الي يعرف جمعية حقوق انسان استرالية وتكدر تساعد هذا المسكين هم ليقصر ، الي يشتغل بوزارة الهجرة بأي دولة  ويكدر يقدمله معاملة هم ليقصر ، ادري يا جمعيات حقوق الانسان باستراليا وباقي دول العالم  شنو شغلكم بس كاعدين تقشمرون بالحكومات  وتضربون بهالفلوس الحلوة واهلكم بالعراق ضالين بيد المجرمين والحرامية ، ارجوكم يا اخواني لتقصرون هسه لو نلم من كل واحد دولار دولار هم جان سوينه العملية للولد ورجع يمشي، هنيالة اليساعد برسم البسمة مرة ثانية على وجوه اطفال هذا المسكين ، يا جوامعنا ياكنائسنا يا معابدنا يا رجال اديانة يا احزابنا اسئلكم بأنتمائكم للعراق ان متقصرون عن هذا المظلوم ،وخاف واحد يكول هذا كرايب الياسري لو يعرفه ،شهد الله ورسوله ما اعرفه وما حركني لكتابة هاي المقالة غير الحالة الانسانية لهذا المسكين وانه انسان عراقي فقط  ، والي يريد معلومات عن الولد يتصل بينا ننطيه رقم قناة البغدادية برنامج (ما لايقال ) وهمه ينطوه رقمه ويسهلوله الاتصال بعماد ،، يا اهل الرحم لا تقصرون اخوكم عراقي مسكين ولا تقصرون عنه ،خل نساعد ولو عراقي واحد احسن ما نظل نبجي على العراق ، لأن الدموع عمرها ما رجعت ميت ولا موتت حي ، ولله منظر عماد واطفاله يبجي الحجر ،يا اهل الرحم.......وينه اليرحم  عماد الطويرجاوي .

* مدير تحرير جريدة العراقية الصادرة بسدني