 الكاتب
|
موضوع: نذر الواوي للعباس !! (شوهد 209 مرات)
|
|
Ahmad Alyasiry
|
نذر الواوي للعباس !! بقلم احمد الياسري *الله بالخير يسولفون اهل كََبل يكولون يوم من الايام اكو واوي جان يتمشى على النهر راد يعبر من جرف للجرف الثاني والكنطره جانت بعيده (الكنطره لاخوانه البريكية يعني جسر زغيرون ) فتعاجز الواوي كالك شعدي عابر من ذيج الصفحة خل ادخل بالنهر وعلى كيفي مسايس لمن اوصل للجرف الثاني يكلك الماي جان خنياب (وخنياب لاخوانه البريكية والاوزية يعني طافح زايد ) حتى فدعة الخزعلية الشاعرة عدها بيت تمدح بيه ابوها (تكوله يعكازتي والماي خنياب ) يعني والماي زايد عن حده الطبيعي , سالفتنا الواوي اتعاجز فطب بالماي بعده ما طاب اخذه الماي وغرك فيكولون الواوي بنص الماي صاح ادخيلك يبو فاضل العباس خلصني من هالطلابة وقسم بالله بس اخلص وما اغرك الك نذر تغار عنبر يالعباس (اتغار يعني طنين عنبر ) فيكولك من قدرة الله الله استجاب دعوته وشويه بده يتحرك يم الجرف ،، من شوية اتحرك صاح الواوي بعلو صوته , يالعباس تره بس اتطلعني الك طن عنبر!! _نقصهن طن_اشويه اتقرب على الجرف كاله يبوفاضل الك خمس وزنات يعني نص طن شويه صاح الك وزنه يبو فاضل بس اطلع الى ان قرب كلش من الجرف صاح الك كًفتين الى ان وصل الجرف وطلع فصاح يبو فاضل ولله فشله كفتين وانت ابو راس الحار والمقام الجبير انذرلك كفتين (يعني ستين كيلو) ما ترهم يا مولاي !! المهم طلع الواوي من النهر والنذر مالته للعباس اتكنسل شوية شوية .وره جم يوم راح الواوي لبيته لكـــاه محترك فصاح الحكولي يا ناس احترك بيتي فواحد من ربعه كاله ( يبو الويو) خويه خاف عليك نذر وما موفيه كاله اي ولله السالفه كيت وكيت كاله شلون تنذر للعباس وما توفيه شوف شلون العباس شور بيك وحرك بيتك فالواوي لوتي ما سكت كالهم بويه عليمن يحركني العباس هو جاب جيسه وما اطيته كفتين عنبر اني ناذر بس العباس ما يريد شسويله،،،,فصار مثل ياهو بمربهيج موضوع يكولك مثل نذر الواوي للعباس , شاهد سالفتنه هسه واوية السياسة العراقية ماشاء الله عليهم شكثرهم وما يخلصون وبس سقط صدام فزعوا علينه فرد فزعه،،،( واوية ايران) اليردون يسوون العراق مقاطعه تابعه لعمي نجادي الصارلة اثلاثين سنه ما مزين لحيته , (اواوية ابن سعود) عبدلله اللحيته جنها الهلال الاحمر وتكول العراق مال شيب الخلفه ملك طابو مسجل باسم ابوه ويريده . او ( واوية الفيدراليات )والنفط اليردون يعبرون مطيتهم على ظهر الديمقراطية ,,, حتى يعلنون دولتهم وما عدهم مانع يتحالفون وي الشيطان مثل ما اتحالفت بعض احزابهم وي صدام سابقا على اخوتهم وابناء جلدتهم’ ,,او( واوية العلمانية الحديثة) الطبوا بجيب امريكا وبس اتمكنوا ظلوا يشتمون بامريكا الخلصت شعب كامل من ظلم صدام وكام يلعبون على الحبال لحد ما اتحالفوا الاسلاميين عليهم وكنسلوهم بمساعدة ايران بالانتخابات الماضية كوة مروة،، وظلوا يفترون بفنادق الدول الصديقه يدورون على مبادرات وينذرون انذور للعباس مثل واوينا , وظل العراق تايه وجراحه تنزف بين ابناءه الطلعوا واويه حاطين سجاجينهم ويكطعون بكيفهم واليكتب يكول ليش عمي هيج كالوله ضد الوطنية, والبعثيه ما كاعدين راحه مثل الزنابير وين ما تمشي وراك (جماعة هله يا صكر البيدة ) شردنا وعبرنا المحيطات وبعدنة ما مخلصين منهم ـ وبعدهم يفترون ورانه هذوله هم واوية من نوع خاص المهم ، وسالفة الواوي صاحبنا تنطبق على اخوانه بجبهة التوافق السنية , من انسحبوا من الحكومة والعالم كله يعرف سبب انسحابهم هو الارهابيين الي صاروا وزراء بترشيح الجبهة وعلى رأسهم قاتل ابناء مثال الالوسي وزير التعليم السابق الي من رفع عليه دعوة مثال الالوسي شرد من العراق وتسبب بازمة انسحاب جبهة التوافق من الحكومة وجبهة التوافق لغطمت السالفة عود احنه ما سحبنا وزراءنا علمود نحميهم! لا احنه ضد حكومة المالكي،، اتدور طكت فضيحة ابن عدنان الدليمي شيخ الكتله الي طلعت السيارات المفخخه من بيته,, المالكي هم كعد وياهم كالهم بوية ميخالف شنو مطاليبكم كاموا يتفيكون ويحطون شروط تعجيزية ويحشمون بالكتل على اسقاط الحكومة وقشمرولك كتله العراقية وخلوهم يتناطحون بيناتهم وسووا حلف غير ضمني مع وزراء الكتله الصدرية المنسحبين اصلا, المالكي شاف مابيها مجال الشغلة خلاهم براحتهم راح اتفق وي جماعات الصحوة ان يرشحولة بدلاء , وخلالك الجبهه طايره بالهوة ونذورها للعباس كلساع تنقص شي لحد ما هذاك اليوم اعلنت الجبهة علني عودتها للحكومة من دون ان يتحقق اي شرط من شروطها بس شافوا المالكي بلش بتفكيك المليشيات وحرمان الاحزاب العدها مليشيا من الانتخابات الجاية والشغله بعد مابيها يمة ارحميني بدلوا كًير واتحولت حكومة المالكي من حكومة صفوية عميلة الى ايران الى وطنية يجب المشاركة بيها . من شور بيهم العباس وحرك بيتهم كالك انصير وي الحكومة احسن لان خاف بعد يومين يفككنه المالكي خصوصا نار تنور الصولات انتقلت من البصرة لمدينة الصدر ووصلت الموصل ،كالك خاف يعلسنه لان احنه مليشيا سياسية الها علاقة واضحة بمليشيات عسكرية ,الشغلة بعد مابيها مجال عيوني والعنده نذرللعباس يوفيه خل يوفيه من هسه احسنله’كبل لا يحرك العباس بيته ، البارحه علني طلعت الحكومة واتهمت ايران بالادلة بضلوعها باحداث مدينة الصدر،،ولو علي الدباغ جر ابريك من شاف وفد الائتلاف انحصر بمضيف اخوالنه السباه الايراني ،وكالك خل نشتغل سياسة خاف نتمزلك بصراع امريكا وايران والدور اهل العمايم يعوفون امريكا ويجلبون بزياجنه وهمه قبل يومين كاتليلهم جم صياد على الحدود البحرية في الجنوب ومحد فك حلكة ،بس ما اخفى لا هوه ولا الائتلاف علاقة ايران بالجماعات المسلحة وتدريبها للجماعات الخارجة عن القانون , انتهى زمن التدغدغ وكلمن حاط العفطية مالته ويفتر بشوارعنه ويذبح بشبابنه وبعد يومين اتوقع كل الي اشتركوا بقتل ابناء الشعب حتى من الكتل السياسية الي سووا الانتخابات غطاء يغطون بيه المطلوبين والمجرمين ,انشوفهم انشالله بنفس المحاكم الي حاكمت المجرم صدام ابن صبحة وعلي كيمياوي ,وما تفيد بعد انذور الواوية للعباس لان العباس ابو فاضل يايقبل نخوة المجرمين والمتأمرين على العراق . *مدير تحرير جريدة العراقية الصادرة بسدني |
|
|
|
|
|
 |
