أسكتوا..أسكتوا ولكم بسكم عاد..بسكم طائفية.....
هذا يصيح اني سني وهذي تصيح اني شيعيه
من ياوكت صارت الناس تحجي بالمذهبية.....
گول اني عراقي وانتِ..أنتِ گولي انه عراقيه
بيا شرع بيا دين بيا دنيا صار البشر ينكتل عالهوية....
لا والله ما صار ولادار هالظلم وهالهمجية
بالشوارع..بشوارع بغدادنه الحبيبة الجثث مرميه....
من اسأل واگول ليش انكتلوا هالناس يگلك ماندري هذوله مجهولي الهويه
ولكم غابة..خوما بغابة صرنه..لا والله حتى الغابة ما بيها هالوحشية....
ناس تكتل بناس..ليش ما يدرون..بحجة گال السيد وگال الشيخ وهاي هيه
ناس تتفرجلي الجزيرة وناس تتفرجلي العراقية....
وناس تكره ناس عالخالي بلاش بعد ما جانوا عايشين ابيت واحد سويه
اذا انتوا هيجي زلم وسباع وماخذتكم الحميه....
هذاك وينه الامريكي يصول ويجول بأرضنه ومحد يوگف بوجه وگفة قويه
العالم تسأل..يگلك العراق كله زلم وسلاح واليقاتل الامريكي بس (1) بالميه؟...
لعد وين راحت الزلم الخشنة وين راحت الغيره العربيه
شگللهم... اگللهم ناس تذبح ناس بالشوارع؟ أگللهم هم ذوله البقيه !!!.....
شريد اجاوب؟..اگللهم خلف الله على التخلف وخلف الله على الطائفيه؟
صار ياهو اليجي يگول اني للجنة وانت للنار مو صارت هيته هي....
ما فكرت بيوم القيامة شتگول لربك؟..تگله ربي سامحني اني معليه؟
ما ادري اضحك ما ادري ابجي ما ادري اسكت واگول اني سويت العليه...
احجي والحجي شيفيد دام اكو ناس مصرة ترجع لعصر الجاهليه
منقول للامانه
