محكمة صدام..والدجيل
بيدي اللي غِدَر
والزمن لليوم شايل چذب
وما لملم جروحي
وذاك اللي صُبَر
مال بدمع ،وصاح بعشگ
يا وردة قحط فوحي
وهذا اللي عِثَر
بحزامه قرطاس وقلم
وبحزام الوطن گبري
وبلايه شمع روحي
وين الثمر!
شفت البلح مهموم
ونوح السعف همسه مثل نوحي
حادي السمر
وبمحكمة صدام ضاع الوتر
وبوجه الأمس غربان
وناموسة أثم طافت على صروحي
وفوگ الشجر
علگوا أهوال وجُرم
وبخيط الدجيل ابتدوا!
ويا شمس بشليلة قهر بوحي
هذا الفجر
سموه عدل وفاتِحة امجاد
وشهود الورق ما نفخن ضروحي
جف الحبر
وماجفن الآهات
وذاك الزنى بجبالي وسفوحي
كسر بجبر
ملعون،وميزان عَدْله سَحِل
كافي وجع والخيل
ما صهلن بسوحي
سمعوا الخبر
حُكم اللي هِدَم داره وما خجل
وطاف بصبح وبليل
وبخشَش بمتاعي وطموحي
عرّة بشر
ولازم يشوف الويل
وبذرة برد بروح الشعب
مغروسة وبروحي
صدام القذر
وخوفي رَسِم موته بعجل!
والمحكمة تاليها تمويه
ويا حكمة جلجلي ولوحي!
وهذا قدر
باچر يصيحون،ولا حلبچة ولا انفال
ولا معارك غربلت دوحة وطن
وداحت وسَط دَوحي
وماكو نظر
عن ثوبه نستفهم العريان
هدماته كومة محن
ومنشورة بسطوحي
ننطر ظَفر
مو مسلسل محكمة وأفلام
ومعروضة بصالة بطر
وياهيبة الميزان تعللي وروحي
منفى وهجر
والمنفى منفى الروح
أنهوا المحكمة بجنحة لأبو عدّاي
وانا المجرم المتهم بجروحي!!
فاتن نور
05/12/01
[/font][/b]
