العراق يبجي بحضن دجلة والفرات ???

[✪KlaRa ALmaRghi✪]

العراق يبجي بحضن دجلة والفرات

دجلة
شبيك يا عراق خضارك صاير أحمر
محتركَ بيك اليابس ويا الأخضر
أشوفك على الجرف كل يوم
مليان حزن مليان هموم
جرحك مبين
وطاغي عليك الألم
ودموع عينك تسيل
على خدك دم

العراق
شحجي شسولفلج يا دجلة
كولشي بيا أندار
ولدي مني وبيه
جرحوني وشعلوا النار
والكبار صاروا صغار
والصغار صاروا كبار
ولدي للأسف تغيروا وصاروا أشرار
مفخخات وأرهاب ونار وعواصف
ومنين ما أباوع لابسين حزام ناسف
ما خلوا كنيسة ما خلوا جامع
وكل بيت بيه شهيد
ونوح وبجي وتناهيد
وصراخ من كل صوب سامع

الفرات

حتى المصارين تتعارك بين ضلوعك
تحمل يا عراق وأمسح دموعك
أعذرهم
الوكت غيرهم
والزمن غدرهم
ترى بعد بيك طيبين
وبيك أهل غيرة ومُحبين
ذولة بحبهُم يضون شموعك
تحمل يا عراق وأمسح دموعك

العراق

يا فرات لو يتعاركون
مو مشكلة نكـَدر نصالحهُم
بس ولدي صارو يكـتلون بعضهُم
أخ يقتل أخو وبالفلوس يغرو
والغني يبوكَـو وبعدين يهججو
والفقير يعدمو وبالشارع يذبو
والناس بالفضائيات تتفرج علينا
واليسوة والـ ما يسوة يتشمت بينا
شلون ما أجر حسرات
وشلون ما أبجي دم
والطيبين مثل حالي
بيهم هم يا بو هم

دجلة

جم أوف تتحمل يا عراق
يا زينة الديرة
لا تكَـَول دجلة ما تحس بيه
لو حجايتها صغيرة
صحيح أنة بس أواسيك
بس بيه الألم بكثر ما بيك
وهم بيه حيرة
لكن أعرف كـَلبك بالصبر تاريخ جبير
وأعرف روحك بالحزن حضارة جبيرة
الأمل موجود
ولابد ولدك لأحضانك يعودون
لآن أنت أبوهم ومعلمهم الغيرة

العراق
الله يصبرنا على الـ ديصير
بأدين ولدي يتغير المصير
كولشي يروح فدوة ألهم
ذولة ولدي وهمي همهُم
آه .. آه
لو بس يتذكرون أيام الخير
شلون جانوا ملتمين
شلون جانوا متخاوين
مسلمين ومسيحين
صائبة ويزديّن
نتقاسم الخبزة سوية
وعشرتنا طيبة وهنية
وكَـَلوبهم تنام بيه
ونتنسم بالعبير
وبجناحي أحضنهم
مثل الطير


الفرات

أبجي وأشكي بأحضاني ياعراق
وأرتاح من حسراتك
وبمكان الآه كـَول يا ألله
لابد تـُفرج والصار بيك تنساه

العراق

الأمل بألله جبير يا فرات وغيرة ما عدنا
راضين أحنا لو هاي قسمتنا
نصبر وهم بعد نصبر
بس مرات أكعد وافكر
أكـَولن ليش عن كل العالم تفرق علتنا
وحك تراب الله الـ منها خلقنا
تعبنا هوايا والله تعبنا
مرة مرتين تلاثة تجربنا
رحمتك يا ربي رحمتك
غلطنا أكيد أحنا غلطنا
ما ننكرعلى خيرنا تبطرنا
بس لخاطر الأنبياء
لخاطر السماء
لخاطر الأبرياء
نترجاك وندعيلك
تفرجها و تسامحنا 




تحياتي ** ام يوسف **

[solanj]

عاشت ايدك اخت كلارا موضوع حلو وكليمات رائعه يسلم يا ورده

[nuhra]

كلمات رووووووووووعة يسلموووووووو

الأمل بألله جبير يا فرات وغيرة ما عدنا
راضين أحنا لو هاي قسمتنا
نصبر وهم بعد نصبر
بس مرات أكعد وافكر
أكـَولن ليش عن كل العالم تفرق علتنا
وحك تراب الله الـ منها خلقنا
تعبنا هوايا والله تعبنا
مرة مرتين تلاثة تجربنا
رحمتك يا ربي رحمتك
غلطنا أكيد أحنا غلطنا
ما ننكرعلى خيرنا تبطرنا
بس لخاطر الأنبياء
لخاطر السماء
لخاطر الأبرياء
نترجاك وندعيلك
تفرجها و تسامحنا 


امين

[Loleeee]

يسلمووووو الايادي كلارا على الكلمات البديعة

[✪KlaRa ALmaRghi✪]

شكراااااااااااااااااا الكم احبابي لردكم الرااائع منورين الموضوع

[dyra 3laya]

كلمات روووعة يسلموو

[سوسن كليانه]

شكرا لبي كلارا عالشعر الحلو عاشيت يدك لبي وصح ماكو اغلى مو الوطن لبي وراح الاخضر ويا اليابس وباعوه بارخص ثمن ومانكدر انكول بس انشالله يرجع مثل قبل واحسن يارب يسلموووووووووو لبي

[✪KlaRa ALmaRghi✪]

منور ايفان الموضوع شكرااااااااااااا لمرورك الحلوووو

تسلمين لبي سوسو ان شاءلله ياربي يرجع احسن واحسن شكرااا للمرور الحلووووووو

تحياتي

[فادي تلسقوفي]

عاشت اليادي على الموضوع ورده

تحياتي فدووو

[✪KlaRa ALmaRghi✪]

شكرااااااااااا فدوووووو منور الموضوع وررده

[احــــلام]

تسلمين والف تحية لمن يحب العراق

[✪KlaRa ALmaRghi✪]

تسلمين اختي منوره الموضوع بوجودج الحلوووووووووووووووووووو