كنـــــاس الشـــوارع
كالولنه راح صدام كلنا راح نرتاح __________ ما ندري هوه جان رحمة من الفتاح
شو هوه راح شيطان أجا بمكانه __________ كل واحد بيهم أبليس وجايب أخوانه
شفت أبليس اليوم كاعد ديبجي __________ كتله لك انته شبيك لك فدوة احجي
كال ما أصير بعد أبليس من ضاع دفتري ______ بي جدول الاعمال وصار عند الجعفري
لا شفنه منهم شي ولا حملة أعمار _________ تالي متالي بهالزمن يحكمنا واحد عار ؟؟
هم جان أكو بانزين وحصه تموينية _________ وجنا احنا بس انخاف من العسكرية
الحصه صارت صابونه كل خمس شهور _______ شنسوي بيها إذا البوري مكسور ؟
النفط جان صدام يوزعه بمزاجه ___________ هسه النفط يا ناس ما عاد اله حاجه
أبحرك الاعصاب احنا اندفي البيوت _________ بمكان ما نحرك خشب انسوي بيه تابوت
كبل .. اليموت يا ناس جثته يدفنوها ________ وهسه اليموت يا عيني بشارع يذبوها
كلشي ما زاد بها البلد بس زادت الكبور ______ لهسه ما شفنا اللحم بس شفنا الساطور
والكهرباء يا عيني ما ينذكر طاريها _________ ابحجة الازمات بحساب كاز ما بيها
المبرده اليوم صارت قفص للطيور __________ وسويت الثلاجه لهدومي كنتور
صبرنا وصبرنا طال والصبر لله ______________ كافي ضحك علناس مصخوها مو بله ؟
ما ننتظر منكم شي لأن انتو غربان__________ حمدا لله والشكر لربنا الرحمن
أترك التعليق لكم
تقبلوا تحياتي
منقووول
