تعليمات مليء DS-157 ...... سهلة ولكن بعض الاعظاء لايزال يطلب المساعدة

[BaghdadGhost]

يلة ....... نبدي

اول شي هذه الاستمارة تملا و تقدم الى السفارة الاميركية بغية الحصول على COM (موافقة رئيس البعثة الدبلوماسية). التقديم يكون علبريد الالكتروني و اكيدد بالاضافة الى وثائق اخرى.

ملي الاستمارة.........
تملا هذه الاستمارة فقط من قبل مقدم الطلب الرئيسي (لا زوجة ولا زعاطيط)

1. الاسم الاخير (حسب ما مكتوب بالجواز اذا مكتوب اسم الجد هوه الاسم الاخير واذا مذكور اسم العشيرة فهو الاسم الاخير ) مثال: جنفاص مناتي عتيوي (بهاي الحالة الاسم الاخير هو عتيوي) ....  واذا جنفاص مناتي البكة (البكة اسم العشيرة وهو الاسم الاخير).
2. اسمك
3. الاسم الكامل باللغة الانكليزيه (مينكت بالعربي لان تصميم الاستماره بي خطا).
4. الفخذ او العشيرة
5. الاسم الكامل (زوج او زوجة)
6. اسم الاب الكامل
7. اسم الام الكامل
8. الاسم الكامل والعنوان ورقم الهاتف للشخص او المنظمة في اميركا (اذا ماكو اكتب N/A)
9. ذكر كل البلدان الي دخلتها في العشر سنين الماضية (مع ذكر السنة)
10. ذكر كل البلدان الي صدرولك جواز سفر
11. هل حصل و فقدت جواز سفر او سرق منك
12. من دون ذكر العمل الحالي, اذكر اخر شغلتين اشتغلتهن (الاسم.... العنوان ....رقم الهاتف..... العنوان الوضيفي... اسم مرؤسك في العمل..... تاريخ التوضيف )
13. ذكر كافة المنظمات الرسمية و الاجتماعية و الخيرية التي تنتمي او انتميت اليها و التي تعمل حاليا او عملت معها.
14. هل لديك اي تدريب او مهارات ذات تخصص, مشتملا على التسلح او المتفجرات او نووي او بايولوجي او خبرة كيميائية , اذا كان الجواب نعم , تكتب مختصر.
15. هل قمت باداء خدمة عسكرية, اذا نعم , ذكر البلد و فرع الخدمة و الرتبة او المنصب و التخصص العسكري وتواريخ الخدمة.
16. هل كنت جزأ من اي نزاع مسلح من قبل, بصفة ضحية او مساهم؟ اذا الجواب نعم اذكر تفاصيل اشتراكك.
17. ذكر كل المؤسسات التعليمية الي ترتادها او ارتاديتها , مشتملا على المعاهد المهنية و غير مشتمل على الاعداديات. (اسم المؤسسة..... العنوان او رقم الهاتف..... مجال الدراسة....تواريخ الالتحاق)
18. هل قمت بالتحضير للسفر؟ اذا نعم اذكر معلومات كاملة عن دليل رحلتك مشتملا على تواريخ المغادرة او الوصول و معلومات الرحلة و اي اماكن معينة ستقوم بزيارتها و  شخص للاتصال به عند الحاجة لكل مكان تستقر فيه.
19. جذب ماكو 19 ههههههههههه


ارجوا من الاخوة الاعضاء عدم التردد في تصليح معلوماتي او اضافة اي شي ولكن يجب ان تكون النية مساعدة بقية الاعضاء

 
 

[baghdadi02]

شكرا لك اخي العزيز على هذه المعلمات القيمة.
ولكن ارجو اذا سمحت توضيح حالتين وهما
الاولى هل تملا الاستمارة وهي موجودة على الحاسبة؟ واذا تم مل هذه الاستمارة كيف يتم ارسالها الكترونيا فانا قمت بمل هذه الاستمارة ولكن عندما اغلاقها لغرض ارسالها كمرفق اجد ان المعلومات قد اختفت!!
ام يتم سحبها اي طباعتها ثم ملاءها وبعدين عملها سكانر وارسالها
مع فائق شكري
baghdadi02

[BaghdadGhost]

اخي العزيز

اكو هواي حلول ولكن كلها وقتية

وبما نك ناوي تباشر بالدوخة مال ملي الاستماير وحته لا تواجهك هاي المشكلة من جديد بغير استماير

الحل الامثل هو ان تشتري سيدي برامج يكون بي ادوب اكروبات بروفشنل 8 وتنصبة لان هذه البرنامج مو تبيعي بالتعامل مع فايلات البي دي اف

واني الممنون

[iraqgsm]

واذا دزيت كلشي مطلوب للكوم يوم 4-11 بعد اشكد تتوقع احصل على جواب حتى لو رفض على الاقل تعرف راسك من رجليك
و شكرا مقدما لجميع المساهمين

[BaghdadGhost]

اخي العزيز عراق جي اس ام

يعني تقصد صار 23 يوم وماكو رد
اخي العزيز .... ترة مسالة طبيعية واكو غيرك طولوا اكثر
ثاني شي ليش تفول علة نفسك وتكول رفض

تفائلوا بالخير تجدوه وان شاء الله يوصلك الرد

[iraqgsm]

مشكور اخوان الله يبشركم بالخير

[koka75]

  ممنون اخوية شبح بغداد عالمعلومات القيمة --وانت مو بس شبح بغداد انت شبح العراق كله --هههههه-
      شباب باركولي وصلني كتاب التوصية ونشالله انشالله باجر بعون الله راح ادز البيانات الى السفارة الامريكية بالعراق يعني الخطوة الاولى --- باركولي شباب-- وشكرا لكل الاعضاء-
اخوكم
خوخة

[maitham70]

شكرا حبي شبح بغداد
فعلا اني اتبعت هذه التعليمات والترجمة ومليت الفورم وارسلته والحمد لله

شكرا مره ثانيا ياشبح

[BaghdadGhost]

عراقي ,,,,,,

خوخه ,,,,,

ميثم ,,,,,

تسلمون عالمرور ,,,,

[vincenzo]

حيييييييييييييييييييل
هاي شبح انته من السبعينات هيجي شمعة تحترق وتملي استمارات هههههههههه
كوكه صديقي بس لا يدزولك اوتوربلاي احلى من اللي دزولياه واغار وازعل من عدهم

[عامر حمد]

اخويه عاشد ايدك على هاي المعلومات بس سؤال واحد فقط بقه مين نكدر انحصل على هاي الستماره

[shaklawe]

حبيبي منا تفتحها هية PDF

http://www.state.gov/documents/organization/79964.pdf

وتسويها خزن save as


وتمليها

وتتمتع بالذهاب الى بلد مال اوادم

تحياتي


شقلاوي

[ابو عبد الله التكساسي]

بص شوف الشبح بيعمل اييييه

 والللللله مشتاقلك كلش



باقي على الوداع 4 ايام

[Marwanjasim]

اخي شبح بغداد اكو فقرة مفتهمتها الى حد الان وهيه رقم3 full name (native alphabet) شنو يقصد بيها بالعربي لو بالانكليزي

[vincenzo]

حسب لغتك ال native
اذا لغتك الام كوري مثلا...تكتب اسمك الكامل بالكوري

[ابو عبد الله التكساسي]

اكلك ابو الفناجينسوات واذا اني من مقاديشو بيا لغه راح اكتب الاسم

[vincenzo]

بالمقاديشي

[BaghdadGhost]

1000 شكر لكل الاخوة الي اشتركو بالموضوع و بارك الله بيكم ,,,,,,

[BaghdadGhost]

بعض الاخوه قاموا بسوالي على تعليمات ملئ الاستمارة ,,,, لذلك قمت بالرد لرفع الموضوع

[علي الحلي]

خي اني حاولت ان املي الاستماره بس الفقره الثالثه الي بيها تكتب اسمك بلغتك اني لغتي العربيه واللغه العربيه ما اكدر اكتب بيه يعني شلون

[BaghdadGhost]

حبيبي علي الحلي ,,,,,


مو اني عدلت المشاركه قبل فترة ,,,,, لان جيكت الاستمارة و شفت انه مينكتب بيهه ,,,, لذلك بالتعليمات اني كتبت بان تكتب الاسم بالانكليزي ,,,,,, همه يعرفون اكو غلط بتصميم الاستمارة ,,,,,

يعني خصم الحجي ,,,, اكتب الاسم بالانكليزي حسب الجواز ,,,,

[marwan.aqrawi]

عاشت ايدك على هذه المعلومات المفيدة

[علي الحلي]

اخي اشكرك على السؤال الرائع وكذالك كل من ساهم بهذه الاجوبه
بس اذا امكن احد الاخوه عنده برنامج ادوب اكروبات بروفشنل 8 لأن دورة عليه وما حصلته او يكدر يسوي مرفق ويا الرد حتى يستفاد من البرنامج الاخوه الي ما موجود عدهم


علي الحلي

[BaghdadGhost]

اخي مروان ,,,,,

انته و الاعضاء تدللون اني  الممنون ,,,,,

اخي علي الحلي ,,,,,,

تدري هذا البرنامج شكد حجمه ,,,, قبل التنصيب تقريبا 500 ميكا ,,, يعني نص كيكا و بعد التنصيب ,, يصير حجمه على القرص الصلب C يصير تقريبا 2 كيكا ,,,, شون الواحد يسويله اتاجمنت رحمه لموتاك ,,,,,

بس تدري وين تلكي ,,,,, بالكلكشنات الDVD ال 4 كيكا او ال 9 كيكا ,,,,, انته بس اسال عليه و همه اهل البرامج يعرفو ,,,,,,,

[silver_d]

تحيه عطره من سماء بغداد
طبعا هالموضوع   قديم كلش بس  بيه افيده كبيره  بس  اكو شوبيه تعديلات اتمنه انو تستفادون منها
طبعا اخويه الغالي  كوست بغداد موضوعك جدا حلوو بس  ناسي  شغلتين وكلش مهمتين بالاخص  بهالوقت بالدقديم بالمراحل  الاولى Ds157
اول شئ هسه هوايه اكو امور  تغيرت  بالوقت مبقت اتخلي  N/A من  يكون عندك غلط لان الجماعه بعد ميرظون عليها  ابد ويرجعون الفورم ويكولك خلي  كلمه  None للسؤال  الي  ميشملك
واما  بالنسبه   للسؤال  رقم " هم ميصير  اتخلي  الاسم مالتك بالانكليزي  لان ديكلك انو خلي  الغه الرسميه مالتك يعني  لغه الام القصد وجماعه خلو كردي  ورجعوها عليهم كالو اكتبوها بالعربيه واما  شغله اخرى اخواني  للمقدمين على الهجره الخاصه بالجديد اتمنه بكل سؤال  ميشملكم انو تشرحون بيه شرح مختصر على سبيل المثال
اكو سؤال  يشمل  الخدمه العسكريه  من يشملك هالسؤال  هالشي  مبيه مجال لازم اتخلي  كل معلوماتك  واما  من ميشملك لازم اتخلي  كلمه None وتشرح مختصر  وتكول  يابه اني  مخادم عسكريه   لان كنت طالب  او ادا من جماعه الحكم الذاتي  هم تشرحها
وسؤال رقم " اكتبو بيه الاسم الكامل كما في الجواز بالعريبه

تحياتي  للكل

[engineermech]

السلام عليكم ورحمة الله وبركاته
اشكر صاحب الموضوع على الطرح الجميل لاهمية الموضوع لكن لدي بعض الاستفسارات اتمنى من صاحب الموضوع والاخوة الاعضاء ممن يمتلكون اي معلومة الاجابة على استفساراتي
1- الاستمارة غير موجودة للاسف الشديد عندما تذهب الى الموقع
http://www.state.gov/documents/organization/79964.pdf
2- الفقرة 3 من الاستمارة تضاربت المعلومات بين كتابة بالعربية والبعض يقول بالانكليزية
3- ممكن شرح ماذا تعني باالفقرة 8 وهل لهل تاثير على مقدم الطلب في حالة انه لا توجد وكما قرات ان البعض يقول يجب ان تكتب none وليس N/A
4-الفقرة 12 اخر شغلتين تقصد بها مع الامريكيين او اي شغلة اخرى مثلا عمل مع شركة عراقية او عقد في دوائر الدولة ممكن توضيح اذا امكن
5-الفقرة 13 هل تقصد بمنظمات كحزب البعث او منظمات مجتمع مدني المتواجدة حاليا بالعراق ممكن الاضاح
6-الفقرة 14 هل تقصد هل تدربت على سلاح الخفيف كلاشنكوف انت تعرف انه في سابق صدام درب طلاب المدارس على هذا السلاح اذا كان هذا المقصود هل اذكر هذا الشي ام اني اسكت عنه لانه لا يوجد دليل عليه
7-الفقرة 17 يعني تقصد الابتدائية والمتوسطة والاعدادية فقط المعاهد والجامعات اذكرها
8- الفقرة 18 هذه الفقرة بصراحة لم افهم المقصود منها ماذا ممكن الايضاح
اشكرك اخي واحوتي واخواتي لمشاركة واسف على الاطالة واكون ممنون منكم لسعة صدركم واجابتكم على استفساراتي
انجنيرميك

[ghost rider]

للمعلومة
رابط الفورم دي اس 157 الموجود في الموضوع اتحول الى
http://travel.state.gov/visa/frvi/forms/forms_1342.html
خامس اختيار
بعد الضغط عليه يحمل مباشرة
وكونوا دقيقين بالاجوبة مالتكم جدا  لان هاي رابع مرة ايرجعولي الفورم ويكلولي بيه اشكال !حتة كمت اكره شوفتة ...والخيار رقم 3 ينكتب بالعربي رجاءا من اخوية شبح بغداد ايصلح المعلومة  لان غلط ..واذا اندز الفورم ايطول اسبوعين او3 او حتى اربعة ..وبعدين ايرجعولكياه ويكلولك عندك نقص لازم تمليه يلة تمشي معاملتك !!
وهذا موقع تحميل الادوبي اكروبات بروفشيونال 9 الرئيسي
التحميل مجانا والاستخدام مجاني لمدة شهر كامل  بس لازم اتسجل (هم مجاني) http://www.adobe.com/products/acrobatpro/tryout.html
معكم معكم !

[Darknessbird]

تحية طيبة للاخوة جميعا
بالنسبة لموضوع كتابة الاسم باللغة العربية حله كالاتي:
1- كما تفضل الاخوة ان يكون برنامج الاكروبات ريدر بروفشنال Acrobat Reader Proffesional  قد تم تنصيبه ويفضل النسخ الحديثة لتجاوز اي مشكلة مقدما وهو متوفر

2- تقوم بتحميل الاستمارة 157 وحفظها على الحاسبة

3- تقوم بملىء المعلومات المطلوبة كما اشار بعض الاخوة ولي بعض الملاحظات وهي كتابة التاريخ بالكامل اينما وجد (يوم-شهر-سنه) وكذلك كتابة كلمة NONE بدل N/A للاسئلة غير المشمول بها

4- تقوم بتحول ملف الاستمارة الى صورة (من pdf الى jpg )وهنا لديك طريقتين الاولى ان تطبع بالطابعة وتعيد سحبها من خلال السكانر وتحصل على صورة من خلاله اذا كان متوفر وجيد كي تكون الصورة واضحة او  بفتح الملف ببرنامج الفوتوب شوب Photoshop حيث يمكن فتح ملفات (pdf) من خلاله وتقوم بكتاية الاسم باللغة العربية به وتقوم بحفظه مرة اخرى

في الحالة الاولى اذا قمت بتحويل الملف الى صورة  تفتح من خلال برنامج الPaint الصورة وتقوم بكتابة اسمك بالعربي في برنامج الPaint وهو موجود في كل نسخ الوندوز وتقوم بالتعديلات المناسبة له لكي يتناسب مع حجم الحقل المطلوب وضع اسمك بالعربي فيه وبعدها تحفظ الملف كصورة ولا ضير في ذلك اي تقوم بارساله كصورة او تقوم بتحويله الى pdf
مرة اخرى من خلال البروفشنال
شكرا وارجوا التصحيح اذا كان هناك اي خطا

[BlindSniper]

شكرا لك اخي العزيز على هذه المعلمات القيمة.
ولكن ارجو اذا سمحت توضيح حالتين وهما
الاولى هل تملا الاستمارة وهي موجودة على الحاسبة؟ واذا تم مل هذه الاستمارة كيف يتم ارسالها الكترونيا فانا قمت بمل هذه الاستمارة ولكن عندما اغلاقها لغرض ارسالها كمرفق اجد ان المعلومات قد اختفت!!
ام يتم سحبها اي طباعتها ثم ملاءها وبعدين عملها سكانر وارسالها
مع فائق شكري
baghdadi02

اخي العزيز اكو برنامج اسمه  NITRO PDF الا شنو برنامج رهيب بيه كافه التعديلات اللي ترغب تسويها على اي استماره بس بيه عيب واحد هو ما يكتب عربي

[BlindSniper]

خي اني حاولت ان املي الاستماره بس الفقره الثالثه الي بيها تكتب اسمك بلغتك اني لغتي العربيه واللغه العربيه ما اكدر اكتب بيه يعني شلون

اخي العزيز امليها بالانكليزي وبعدين اطبعها وبعد ما تطبع اكتب اسمك بقلم حبر وسويلها سكنر ودزها [/size]

[BlindSniper]

شكرا اخي العزيز على هذا الموضوع بس اني احجيلك عن تجربه صارت وياي اني دزيت الاستماره DS157قبل شهر حوالي ومليتها حسب الاصول بس اني على كل حقل ماعندي بيه جواب كتبت N/Aمثل ما نته تكول بس رجعوها عليه وكلولي اكتب NONE بدل N/Aواني همينه صلحت هذا الشي وزديتها وهسه انتظر الرد منهم

[BaghdadGhost]

بعض الاخوة و الاخوات سالني على الخاص على تعليمات مليء هذه الاستمارة لذلك قمت بالاجابة للرفع

[BaghdadGhost]

رفع للاخ MASKOFZORRO

[BaghdadGhost]

للاخ ahmed abbas

[Dollar]

اخي العزيز شبح بغداد ارجوا مساعدتي في هذي المحنة  ds-157 .
اني تخرجت من الكلية وعملت بالمفوضية من 6\9\2004 الى 20\4\2005
ثم من 20\4\2005 الى 6\9\2006 مترجم.
من 7\9\2006 الى 1\2\2008 موظف بالمحكمة.
ثم من 1\2\2008 لحد الأن مترجم.
إذن س 12 بالفورم شلون ينملي?وعملي كمترجم مشمول?

من رخصه اخونه شبح

يكلك Not Including Current Employer, List Your Last Two Employers

يعني ما تذكر الحالي...اخر شغلتين الي هن المحكمه و مترجم سنة 2005.

مو لو اني غلطان.؟

تحياتي

[BaghdadGhost]

أخي هاوك ,,, اسف للتاخر بالرد


ما ذكره الاخ دولار دقيق مئة بالمئة ,,, سوي اللي كالك عليه وبالتوفيق ان شاء الله

[black lion]

خي اني حاولت ان املي الاستماره بس الفقره الثالثه الي بيها تكتب اسمك بلغتك اني لغتي العربيه واللغه العربيه ما اكدر اكتب بيه يعني شلون

اخي بالنسبة للعربي تدرة والله شغلتها جدآ سهله بس ما ادري ليش الشباب ميعرفوها!!!!!!!!!!!!!!!!!!!!

حبي راح اشرحها الك وللشباب علمود اذا بعدك مدازها وأذا دزيتها احتفض بهاي المعلومة للمستقبل لأن راح تفيدك


1 - بعد متكمل كل المعلومات بالأنكليزي  أسوي save as للفورمة على شكل صورة يعني من أسوي save as راح تطلعلك الصفحة مالsave as 'طبعآ الاسم مال الفورمة نفسه والحقل الي جوة الاسمsave as type    بي عدة خيارات أنت تختار حفظ بJPEG  راح تنحفظ الصورة على شكل صورة
2- قبل متفتحها يعني الصورةRight Click على الصورة open with وتختار paint

3- تنفتح عندك الفورمة بهذا البرنامج  تروح على المكان الي مطلوب بي تكتب أسمك بالعربي.

4- أكو بهذا البرنامج على الصفحة اليسرى خيارات تنقر على حرف A

5  ترجع على مكان الاسم بالعربي وسوي مستطيل عن طريق الموس يعني ورة متنقر على الحرف أي بس تنقر على مكان الاسم وتسحب بواسطة الموس راح يصير عندك مستطيل انت تحدد المسافه مالتة

6- تحول الكيبورد للعربي وتكتب أسمك الكامل

7 وراها بس اسد البرنامج راح يكلك Save أكيد راح أتكله yes

8 ,وراها Right Click على الصورة وحولها pdf راح ترجع مثل الاول .

وأدلل


وأخوان أي سؤال عن 157 مضوجكم كولولي راح أخلي هو يضوج منكم وأدللوا خدمة للصالح العام

[black lion]

شكرا اخي العزيز على هذا الموضوع بس اني احجيلك عن تجربه صارت وياي اني دزيت الاستماره DS157قبل شهر حوالي ومليتها حسب الاصول بس اني على كل حقل ماعندي بيه جواب كتبت N/Aمثل ما نته تكول بس رجعوها عليه وكلولي اكتب NONE بدل N/Aواني همينه صلحت هذا الشي وزديتها وهسه انتظر الرد منهم

أخي مثل متفضلت همه يردون None وميردون N/A

وهاي أذا على هذا الخطأ يعني أنت صلحت مثل ميردون,,  وهو هذا الي يردوا

[owenh79]

مرحبا اخواني و اخواتي الاعزاء

ممكن تساعدوني بملأ الأستمارة DS-157 .

1.فقرة رقم ( 8 ) : شنو المقصود بيها ,يعني المقصدود بيها الكفيل لو شنو؟

2.فقرة رقم (9):اذا مسافر سفرات هواية لانه عندي اقامة عمل في بلد ثاني.اذكر كل السفرات و حته الاقامة.و هل تأثر الاقامة على عدم الحصول على فيزة SIV ؟

3.فقرة رقم (10):تكتب العراق .لو يقصد البلدان الي اصدرلتلك جواز غير بلدك الاصلي؟

4.فقرة رقم (13):اني عضو جمعية المترجمين من 2000, اذكرها لو ماذكرها؟

5.فقرة رقم (15):شنو يقصد ب (Branch of Service) , و شنو يقصد ب(Miltary Speciality) ؟

6.فقرة رقم (17):يقصد بيها الكلية, و الاعدادية و المتوسطة و الابتدائية؟ و من تذكرهن, تكتبهن من الاحدث للاقدم؟


8.الفقرة الي ما تشملني اكتب بيها :(NA) لو (None)؟

مع فائق الشكر و التقدير...


اوين

[ســـرى]

هلو اخوية اوين شلونك شنو هالغيبة؟ هسه راح اجاوبك من جواب اخونا علي الشبح باول رد اله بتوضيح الاستمارة وقسم من الاجوبة من عندي:



1.فقرة رقم ( 8 ) : شنو المقصود بيها ,يعني المقصدود بيها الكفيل لو شنو؟

. الاسم الكامل والعنوان ورقم الهاتف للشخص او المنظمة في اميركا (اذا ماكو اكتب N/A)


2.فقرة رقم (9):اذا مسافر سفرات هواية لانه عندي اقامة عمل في بلد ثاني.اذكر كل السفرات و حته الاقامة.و هل تأثر الاقامة على عدم الحصول على فيزة SIV ؟

كل السفرات تكتبها والاقامة مالها علاقة بس انت بأي بلد هسه؟ وتكتب مدة كل سفرة على ما اذكر ايضا لانه اذا باقي بفد بلد اكثر من سنة لازم تطلع منه عدم محكومية ولا ما تأثر لاتخاف.

3.فقرة رقم (10):تكتب العراق .لو يقصد البلدان الي اصدرلتلك جواز غير بلدك الاصلي؟

اذا جوازك بس عراقي تكتب العراق حتى لو بلدك الاصلي


4.فقرة رقم (13):اني عضو جمعية المترجمين من 2000, اذكرها لو ماذكرها؟

بكيفك تريد تذكرها او لا مو شرط.

5.فقرة رقم (15):شنو يقصد ب (Branch of Service) , و شنو يقصد ب(Miltary Speciality) ؟

هاي من اخونا علي برده اعلاه:
هل قمت باداء خدمة عسكرية, اذا نعم , ذكر البلد و فرع الخدمة و الرتبة او المنصب و التخصص العسكري وتواريخ الخدمة. branch تعني فرع الخدمة وmilitary spceiality تعني اذا كان عندك تخصص معين من خدمت بالعسكرية

 
6.فقرة رقم (17):يقصد بيها الكلية, و الاعدادية و المتوسطة و الابتدائية؟ و من تذكرهن, تكتبهن من الاحدث للاقدم؟

اي بالضبط


8.الفقرة الي ما تشملني اكتب بيها :(NA) لو (None)؟

اعتقد قبل كان N/A وهسه صار NONE ما متأكدة بس ارجع اقرا بالتعليمات مال الاستمارة هم شكاتبين وشوف رد الاخوة همين.

[black lion]

اخي بالنسبة لل N/A بعد ميستخدموها وهسه يستخدمون كلمة None وهذا الكلام أكيد لأن صار وياي

[Hassan1983]

السلام عليكم اني متقدم للهجرة على IOM منذ 2009 وكنت اعمل سابقا مترجما مع الامريكان ولكن اقل من سنة  ثم عملت مع شركات امريكية ولم تعطيني الشركات توصيات
ولحد الان لم ينتهي التشييك الامني 
الله يخليكم اكو ان انسانة تقبل تزوجني على الورق او حقيقي وان تكون ايضا متقدمة لهذا البرنامج
لذا نستطيع ضم القضيتين وتسريع العملية
عمري 30 سنة ومطلق ولدي طفلة
ارغب بزواج حقيقي او على الورق
هذا ايميلي من رخصة الادمن

hasan_alsabag@yahoo.com
سهلو امري الله يخليكم
كل من يقرا هذه الرسالة
حسن