اخواني وأخواتي
احب اشكر كافة المساهمين على مشاركاتهم المفيدة والقيمة
اني مقدم تقديم مباشر على المنظمة الدولية للهجرة عمان IOM عن طريق برنامج ال USRAP الخاص بالعاملين مع القوات متعددة الجنسيات والحكومة الامريكية مع ذكر انو اني نقلت ملفي من بغداد نتيجة لظروف خاصة مريت بيها...هذا جدول بمقابلاتي لحد الان:
المقابلة الاولى: 10/12/2009
المقابلة الثانية: 10/19/2009
أما بالنسبة لمقابلة هيئة المحلفين فبعدني مسويتها بس كلولي المفروض انو تتم بين شهر ال11 وال12 وأعتقد خلال ال11 لأن الي صديق يشتغل بالمنظمة وكلي انو المقابلات راح تصير بشهر ال11 وتندز بال12
المفروض من اللي سمعته انو الاجراءات بعمان تكون مدتها اقصر من مصر والعراق وتتراوح بين 6 الى 12 شهر
طبعا كادر المنظمة اشخاص محترمين جدا على كافة المستويات...متفهمين, ,صبورين, ينطوك كل الوقت والاهتمام والدعم اللي تحتاجه وكل ما ادزلهم ايميل بنفس اليوم او اقصى شي ثاني يوم يتصلون بيه هاتفيا ويردون على استفساري من جنت ببغداد ولحد الان...اكو موظفة اسمها (ديما) وهي اللي قابلتني ثاني مره فد انسانة محترمة ومتفهمة لاعلى مستوى وممكن تساعد بس طبعا مثل مذكرت كادر المنظمة اللي شفتهم كلهم اشخاص محترمين وممكن طلب المساعدة منهم.
طبعا هذا الفرع للمنظمة صاير بمنطقة اسمها (تلاع العلي) ويمكن الاتصال بيه عن طريف الهاتف: 065902280 أو عن طريق البريد الالكتروني
ammaninfocenter@iom.intاكو بعض المشاكل اللي واجهتني احب اتطرقلها واشارك طرق معاملتي الها وهذا موضوع اتمنى انو الكل يشاركوني بيه لان اني واحد من الناس اللي حيرتني كثير من المشاكل ولا تزال بعضها فاتمنى انو الكل يشارك تجاربه مو بس على صعيد اجراءات اللجوء ولكن على صعيد الامور المهمة الاخرى مثل طرق التحصيل على فيزة دخول واقامة اثناء فترة العملية او البروسس بالنسبة للي مقدمين خارج العراق او اساليب المعيشة الاقتصادية مثل السكن وما الى ذلك لان اكو كثير من المتقدمين اللي يعانون من هاي الامور واعتبر نفسي واحد منهم.
اول عقبة واجهتني هيه فيزة الدخول الى الأردن...ومن خلال تجربتي اكو طريقتين لتحصيل الفيزا من بغداد:
الطريقة الاولى: التقديم عن طريق فروع مكاتب الTNT وهي شركة بريد مفوضة من قبل السلطات الاردنية لتقديم ومتابعة التأشيرات الخاصة بالعراقيين الراغبين بالدخول الى المملكة
طريقة التقديم: يقوم المتقدم بالذهاب الى احد فروع الشركة لغرض عمل استمارة تقديم مع ذكر السبب الذي تريد من اجله دخول الاردن
ملاحظة: ممكن انو تكتب سبب الدخول هو لغرض اجراء مقابلة تتعلق بطلب لجوء الخ... بس البعض ميريدون يكتبون هذا الشي خوفا من الجماعات الارهابية اللي تستهدف العاملين مع الجيش والحكومة الامريكية...على العموم في حال قررت انو تكتب هذا السبب اذكر وياه رقم ملفك في حال ارادت السلطات الاردنية التأكد من صحة كلامك.
المستمسكات المطلوبة: الجواز+نسخة مع عدد من الصور ما اذكر بالضبط بس اعتقد صوره وحده عالعموم انت اخذ اكثر للاحتياط.
فترة المعاملة: من 40 الى 50 يوم
التكلفة: 25 الف دينار عراقي كمعدل
الطريقة الثانية: وهو عرض من طيران الملكية الاردنية لامكانية استحصال فيزا للعراقيين الراغبين بدخول المملكة.
عنوان مكتب الملكية الاردنية: بغداد - فندق الميرديان هاتف: 7901431478. ايميل:
لbaggarj@rj.comالمستمسكات المطلوبة: الجواز + عدد من الصور شخصية
فترة المعاملة: من 7 الى 10 ايام
التكلفة: يشترط التقديم شراء تذكرة طيران ذهاب و اياب الى الاردن. تبدأ اسعار التذاكر من 750 دولار امريكي للشخص الواحد
ملاحظات مهمة جداز يرجى الانتباه:
اولا: في حال رفض الطلب في كلا الطريقتين تقوم المنظمة الدولية للهجرة بمساعدتك للدخول الى الاردن. (يرجى الاتصال بالمنظمة لتفاصيل أدق)
ثانيا: هناك امكانية لاسترجاع مبلغ تذكرة الاياب عند وصولك عمان (راجع الشركة للتفاصيل)
ثالثا: هناك بعض المكاتب ممن يقومون بشراء التذكرة لك ولكن مع اخذ نسبة ربح قد تتجاوز المئة دولار للشخص الواحد...اني من ناحيتي رحت مباشرة للشركة.
العقبة الثانية اللي واجهتني هيه ايجاد سكن مناسب بعمان. هالفترة بالذات الموسم خف فالاسعار قلت واكو كثير من الخيارات المتاحة. وعلى حسب علمي اسعار ايجارات الشقق تبدأ من 100 دينار اردني علما ان الدولار الاميركي يساوي حاليا ما يقارب 0.7 دينار الاردني
اما بالنسبة للفنادق واللي عالاغلب راح تكون محطتك الاولى باول كم يوم الى ان تلكا السكن اللي يناسبك فأكو فندق اسمه فندق قصر علاء صاير بمنطقة اسمها جبل اللويبده ممكن تتحصل غرفة بيه بحدود 15 دينار أردني لليلة الوحده وطبعا الغرف بيه نظيفة ومكيفة اما للحالات الضعيفة جدا فأكو فندق بمنطقة اسمها وسط البلد واللي ممكن تتمشالها من فندق قصر علاء اسمه (فندق الملك غازي) سمعت انو هذا ارخص شي بس مو كلش متأكد واحب انوه انو اكو مكتب للملكية الاردنية قريب في حال ردت تسترجع مبلغ تذكرة الاياب من دون تكلفة مواصلات بس يرادله حيل.
اما الاموره داجة فد مره فبيتي دائما مفتوح للشرفاء من ابناء العراق
العقبة الثالثة وهي موضوع تصريح الاقامة في الاردن. عند الدخول تقوم السلطات الاردنية بمنحك شهر اقامة قابلة للتجديد...هذا بالنسبة للدخول من مطار الملكة علياء الدولي من غير مكانات بصراحة ما اعرف...يقوم مكتب الهجرة والجوازات في المطار باستيفاء مبلغ 10 دنانير أردنية رسوم تاشيرة.
اذا رغبت بالبقاء لاكثر من شهر واحد فيمكنك مراجعة اقرب مركز امني تابع لمنطقتك وبالنسبة الي واني ساكن بمنطقة اسمها الجبيهه/دوار المنهل المركز الامني المسؤول وهو مخفر أبو نصير طلب مني انو اسوي فحص طبي بمركز فحص الامراض الصدرية في منطقة الكاردنز والفحص كلفني 20 دينار أردني بعدين المخفر حولني لغير مركز أمني جددولي شهرين واستفسرت عن امكانية التجديد بعدها كالو لازم تراجع دائرة الهجرة والحدود اذا ردت تجدد اكثر.
بعدها راجعت مكتب المفوضية العليا المستقلة لشؤون اللاجئين بعد ما نصحوني بيه المنظمة الدولية للهجرة وحصلت منهم وثيقة حماية مدتها 6 اشهر ومن اللي كلولياه هاي الوثيقة تخول صاحبها انو يبقى بالاردن بشرط عدم مخالفة الانظمة والقوانين الاردنية...بالاظافة لهذا المفوضية تقدم عدد من الخدمات منها الرعاية الطبية والمساعدات المادية لذوي الحالات الضعيفة مع امكانية الحصول على فرصة توطين في بلد ثالث
بالنهاية نصيحة احب اقدمها لكل المتقدمين بطلب لجوء انو دير بالكم والكذب...اكو البعض اللي يظن انو اخفاء أو ادعاء بعض الأمور راح يقوي فرصتك وهذا شي ابدا مو صحيح وصدكوني عن خبرة تره الجماعة ميسألوك سؤال اذا ميعرفون او راح يعرفون بالظبط شنو اجابته الصحيحة عن طريق مصادرهم الخاصة وثق انو عدهم افضل انو تكول اي شي ولا تكذب لانو اذا اكتشفوا اي كذبة منك ولو جانت تافهه راح يشككون بمصداقيتك و راح يتأكدون بالتفصيل من كل شي انت كلته وهذا راح ياخذ وقت كلش طويل مع احتمال قوي انو يتم رفض طلبك وهذا احد أسباب تأخير بعض المعملات...وانتوا بعد بكيفكم.
اتمنى انو هاي المشاركة كانت مفيدة وبالمناسبة هاي اول مشاركة الي بهذا المنتدى واني حاضر لاي مساعدة او استفسار فيما يخص المواضيع اللي تطرقت الهه بهاي المشاركة
تحياتي
