منتدى الهجرة واللجوء > مواضيع بعد السفر
كل ما يهم الاطباء المهاجرين الى الولايات المتحده و كندا
House:
عزيزي thairsadi77
اذا اختاريت طريق المعادله بامريكا يعني طريق الاختصاص السريري والبورد الامريكي فبهاي الحاله ماكو فرق اذا كنت مكمل بورد التخدير بالعراق او ممكمله, همه يعتبرونا كلنا عدنا بس بكلورويوس ومهما كنت ماخذ اختصاصات من خارج امريكا ماراح تاكل عدهم وهم يرجعوك تمتحن ستيبات البيسك والكلنيكال حالك حال المتخرج جديد.
اما مسئلة التسجيل فعادي تكدر تسجل وتدفع الرسوم وتمتحن اذا كنت جاهز للامتحان وراح تلكي تفاصيل الموقع وطريقة التسجيل مشروحه ببداية هذا الموضوع. وانته مادامك خريج كلية طب فعادي تمتحن الستيبات تلاثتها وتقدم عالماجنك بس ماعتقد التخدير يتحصل بسهوله لخريجي كليات الطب غير الامريكيه واغلب جماعتنا يقدمون لو باطنيه لو طب اسره ويبقى التوفيق من رب العالمين.
House:
اختي سدرةالمنتهى
مادامج طالبة طب فمن حقج ان تقدمين على امتحان المعادله الامريكيه وتمتحنين ستيب 1 و 2 خصوصا انتي عابره صف ثالث يعني تستحقين ان تمتحنين الستيبين بعد التسجيل بالموقع ودفع الرسوم وبعد الاستعداد لكل امتحان ودراسة مواده والتحضير لكل ستيب بشكل جيد لان المهم هو ليس فقط النجاح وانما يريدون درجات عاليه بكل ستيب حتى يكونلج فرصه للمنافسه على الماتجنك. لكن هنا راح ماتكدرين تكملين بعد هالخطوه لانك ما انهيتي دراسة كلية الطب وماتخرجتي منها الى الان, وبهالحاله ماراح تستفادين من امتحانات المعادله حتى لو اجتازيتيها ونجحتي بيها لان هالامتحانات مسموحه للاطباء وكذلك لطلاب الطب لكن للتقديم على الماتجنك يشترط ان تكونين متخرجه من كلية الطب.
اما سوالك عن طبيعة وتكلفة دراسة الطب بامريكا فهذا شي انتي ماراح تحتاجيه انشالله لان اذا تفكرين تدرسين طب من اول وجديد بامريكا فهمه ماراح يسوولج نقل وانما راح تبدين من صف اول وراح يطلبون منج اقل شي سنتين كليه بامريكا هاي اذا تساهلو واخذو بنظر الاعتبار الخمس سنوات الطب الي درستيها واذا اعتبرو ساعات مناهجها تعفيج من بعض المواد, والا يجوز يكولولج نريد اربع سنوات يونفيرستي وبعدها اربع سنوات مديكال سكول بامريكا وهذي شروط القبول بيها ابدا مو سهله والتنافس عليها شديد وتكلفتها خياليه وشغلة دفاتر بالسنه الوحده.
لهذا يا عزيزتي انتي في غنى عن هذا كله والافض الج ان تروحين لامريكا وتحصلين الكرين كارد وتبقين على اتصال بكليتج وتحاولين ترتبين امورج وياهم باي شكل من الاشكال بحيث ترجعين تكملين السنه الباقيتلج من كلية الطب حتى تكونين طبيبه معترف بيها ومؤهله للتنافس على مقاعد البورد الامريكي بعد اجتيازج لامتحانات المعادله وباقي شروط التقديم والي اهم شرط بيها ان تكونين طبيبه ومتخرجه. اتمنى اكون فدتج باللي اعرفه واتمنالج التوفيق اختي.
House:
اخويا ابو كرار
هنه طريقين لا ثالث لهما لتخصص الاطباء الاجانب بامريكا, اما تختار طريق المعادله التقليدي يعني تمتحن كل الستيبات وتقدم عالماتجنك وهذا هو الطريق الوحيد للتخصص بالفروع السريريه بامريكا. او اذا ماتريد طريق المعادله والبورد فبهالحاله مثل العراق اكو طريق الماجستير والدكتوراه يعني الطريق الاكاديمي بس هذا الطريق يكون فقط في الاختصاصات غير السريريه يعني فروع البيسك مو الكلنكال. وهنالك امثله وتجارب على هالطريقين مشروحه ببداية هذا الموضوع, وان شاء الله موفق عزيزي.
ابو كرار المهاجر:
مشكور الاخ هاوس على تعاونك وعلى وقتك اللي بذلتة من اجل الاجابة على اسئلتنا وجعلها الله في ميزان حسناتك
wesamy:
اني عندي فرصة الدراسة في المانيا وتعلم اللغة هناك وعندي لجوء على الاي او ام بعد حوالي 6 اشهر اسافر.اذا احد يفيديني ويقولي اي امتحان اصعب امتحان المعادلة الامريكي لو الالماني ؟؟ وشكرا
تصفح
[0] فهرس الرسائل
[#] الصفحة التالية
[*] الصفحة السابقة
الذهاب الى النسخة الكاملة