،،، ܐܵܚܘܼܢܘܵܬܹܐ ܝ̄ܘ̄ܚ ،،،
ܡܘܼܬܒܼܵܐ ܕܥܲܡܡܵܢ ܡܼܢ ܟܲܠܕܵܝܵܐ ܣܸܪܝܵܢܵܝܵܐ ܐܬܼܘܼܪܵܝܵܐ
ܫܩܸܠܠܹܗ ܠܝܵܬܹܗ ܕܦܵܣܹܥ ܒܸܨܒܼܘܼܬܲܢ ܡܼܢ ܗ̇ܘ ܨܘܼܠܦܵܐ ܕܥܲܡܡܵܢ ܚܲܝܵܐ
ܠܦܘܼܬܼ ܗܵܢ ܙܸܕܩܲܝ̈ܢ ܢܵܡܘܼܣܵܝܹ̈ܐ ܕܝܼܬܠܲܢ ܒܥܲܦܪ̈ܲܝܢ ܢܲܗܪܹܝܢܵܝܵܐ
ܕܡܵܛܹܝܚ̈ ܠܢܝܼܫܵܐ ܥܲܡ ܟܠ ܬܸܓܼܡܹ̈ܐ ܒܐܸܛܪܵܐ ܕܐܲܬܼܪ̈ܲܝ̄ܢ ܥܝܼܪܵܐܩܵܝܵܐ،،،
ܠܹܐ ܝ̄ܘܲܚ̈ ܩܲܠܝܼܠ ܘܠܵܐ ܒܵܨܘܼܪܹ̈ܐ ܫܡܵܢ ܢܩܝܼܪܵܐ ܓܲܘ ܬܲܫܥܝܼܬܼܵـܐ
ܕܝܼܘܲܚ̈ ܒܢܘܼܢܹ̈ܐ ܕܗܵܢܵܐ ܐܲܬܼܪܵܐ ܣܵܗܕܵܗ̇ ܥܲܠܲܝ̄ܢ ܡܕܝܼܢܵܝܘܼܬܼܵܐ
ܠܵܐܡܨܝܼ ܢܟܼܝܼܠܹ̈ܐ ܕܡܲܟܠܝܼ ܠܫ̈ܒܼܝܼܠܲܝ̄ܢ ܘܠܵܐ ܠܡܹܐ̈ܙܲܠܬܲܝ̄ܢ ܐܘܼܡܬܵܢܲܝܬܼܵـܐ
ܫܸܡܫܵܐ ܕܚܲܝܵܢ ܗܲܪ ܒܸܕ ܙܲܪܩܵܗ̇ ܠܦܵܬܼܵـܐ ܕܐܲܪܥܵܐ ܒܟܼܠ ܙܲܗܝܘܼܬܼܵܐ،،،
ܐܲܚܢܲܢ ܝܼܘܲܚ̈ ܘܲܪ̈ܕܹܐ ܣܡܘܼܩܹ̈ܐ ܡܲܥܛܹܪ̈ܵܢܹܐ ܡܢ̄ ܪܹܝܚܵܐ ܕܓܲܢܬܼܵـܐ
ܨܘܼܪ̈ܬܲܝ̄ܢ ܬܠܝܼܬܼܵـܐ ܠܦܵܬܼܵـܐ ܕܫܡܲܝܵܐ ܒܐܘܼܦܩܵܐ ܕܬܹܒܹܷܝܠ ܒܗ̇ـܝ ܦܲܐܝܘܼܬܼܵܐ
ܚܙܹܐܡܘܼܢ ܟܡܵܐ ܝ̄ܘܲܚ̈ ܪ̈ܘܝܼܚܹܐ ܒܚܘܼܒܵܐ ܪܘܼܚܵܢܵܝܵܐ ܘܬܠܝܼܬܼܵܝܘܼܬܼܵܐ
ܡܛܠ ܚܢܵܢܲܝ̈ܢ ܝܼܠܹܗ ܢܒܼܝܼܥܵܐ ܡܼܢ ܗ̇ܘ ܙܩܝܼܦܵܐ ܕܡܫܝܼܚܵܝܘܼܬܼܵܐ،،،
ܒܲܣܵܐ ܣـܪܲܒܼܬܵـܐ ܠܗܵܩܘܼܝܵܬܲܝ̄ܢ ܡܢ̄ ܥܲܦܪ̈ܲܝܢ ܓܒܼܝܼܠܵܐ ܒܩܲܕܝܼܫܘܼܬܼܵܐ
ܠܵܐ ܚܵܫܒܼܝܼܬܘܼܢ ܕܦܲܝܫܹܝܚ̈ ܬܒܼܝܼܪ̈ܐ ܩܲܕ̄ܡ ܦܘܼܣـܩܵܢܹ̈ܐ ܕܠܵܚܘܼܫܘܼܬܼܵܐ
ܟܡܵܐ ܕܚܲܦܪ̈ܝܼܬܘܼܢ ܬܚܘܼܬܼ ܐܲܩܠܵܬܲܝ̈ܢ ܗܲܪ ܒܸܕ ܟܵܠܹܝܚ̈ ܒܐܲܡܝܼܢܘܼܬܼܵܐ
ܒܝܼ ܚܘܼܝܵܕܵܐ ܒܝܼ ܕܪ̈ܲܥܢܵܢܲܝ̄ܢ ܒܫܸܡܵܐ ܕܐܘܼܡܬܲܝ̈ܢ ܡܵܪ̈ܡܹܝܚ ܐܵܬܼܵܐ،،،
ܐܝܼܬ̈ܠܲܝ̄ܢ ܝ̄ܠܝܼܦܹ̈ܐ ܘܐܲܦ ܡܲܠܦܵܢܹ̈ܐ ܘܣܵܦܪܹ̈ܐ ܡܗܝܼܪܹ̈ܐ ܒܣܲܦܪܵܝܘܼܬܼܵܐ
ܕܡܵܨܝܼ ܣܵـܝܡܝܼ ܫܲܦܝܼܪ ܣܸـܪ̈ܛܹܐ ܒܟܼܠ ܦܸܬܼܓܼܵܡܹ̈ܐ ܒܟܼܠ ܚܲܫܚܵܬܼܵـܐ
ܒܪܸܢܝܵܐ ܪܘܝܼܚܵܐ ܦܵܪ̈ܣܝܼ ܟܬܼܵܒܹ̈ܐ ܘܪܵܒܵܐ ܡܠܘ̇ܐܹܐ ܒܝܲܕ ܡܲܪܕܘܼܬܼܵܐ
ܗܲܕܟܼܵܐ ܝܼܠܹܗ ܪ̈ܡܙܲܝ̄ܢ ܢܩܝܼܪܵܐ ܒܟܼܠܲܝܗ̈ܝ ܠܘ̇ܚܹ̈ܐ ܒܟܲܫܝܼܪܘܼܬܼܵܐ،،،
ܫܩܘܼܠܗ̄ܘܼܢ ܛܘܼܦ̮ܣܵܐ ܝܵܐ ܫܲܝܦܵܢܹ̈ܐ ܡܢ̄ ܛܲܟܼܣܹ̈ܐ ܥܒܼܝܼܪ̈ܐ ܕܒܲܪܒܪܵܝܘܼܬܼܵܐ
ܟܡܵܐ ܕܢܘܼܣܝܸܢܠܗ̄ܘܼܢ ܕܫܲܝܦܝܼ ܠܫ̈ܡܵܝ̄ܢ ܒܝܼ ܢܸܣܝܘ̇ܢܲܝܗ̈ܝ ܢܦܸܠܗ̄ܘܼܢ ܒܗܲܘܬܼܵܐ
ܬܵܡܵܐ ܦܸܫܠܗ̄ܘܼܢ ܩܒܼܝܼܥܹ̈ܐ ܛܡܝܼܪ̈ܐ ܓܲܘ ܕܲܚܝܼܚܵܐ ܕܥܲܡܛܵܢܘܼܬܼܵܐ
ܘܫ̈ܡܵܝ̄ܢ ܕܢܸܚܠܹܗ ܒܐܘܼܦـܩܵܐ ܚܹܐܪܵܐ ܥܲܡ ܙܲܗܪܝܼܪ̈ܐ ܒܫܵܪܝܼܪܘܼܬܼܵܐ،،،
ܐܵܦܸܢ ܕܝܼܘܲܚ̈ ܡܠܲܬ ܙܥܘܼܪܬܵܐ ܫ̈ܡܵܝ̄ܢ ܝܼܠܹܗ ܓܒܼܘܼܪܵܐ ܘܪܵܡܵܐ
ܡܐܲܝܟܼ ܗܵܢ ܒܲܪ̈ܩܹܐ ܟܹܐ ܓܲܪ̈ܓܸܡܵܚ ܕܫܲܓܼܫܵܗ̇ ܐܲܪܥܵܐ ܘܒܵܪܹܗ ܩܝܵܡܵܐ
ܩܵܠ ܩܘܼܝܵܡܵܝ̄ܢ ܦܵܐܹܫ ܫܡܝܼܥܵܐ ܐܲܦ ܓܲܘ ܬܗܘ̇ܡܵܐ ܒܥܘܼܡܩܵܐ ܕܝܲܡܵܐ
ܦܵܣܘ̇ܥܝܵܬܲܝ̄ܢ ܒܝܼ ܫܘܼܘܫܵܛܵܐ ܒܟܼܠ ܐܝܼܩܵܪܵܐ ܦܵܣܥܝܼ ܠܩܲܕ̄ܡܵܐ،،،
ܝܵܐ ܒܢܲܝ̈ ܐܘܼܡ̈ܬܲܝ̄ܢ ܟܦܘܼܫܘܼܢ ܒܚܘܼܒܵܐ ܪܘܼܚܵܢܵܝܵܐ ܒܟܼܠ ܨܸܦܝܘܼܬܼܵܐ
ܒܲܣܵܐ ܡܢ̄ ܐܵܢܵܐ ܘܐܵܢܵܝܘܼܬܼܵܐ ܘܡܼܢ ܦܘܼܠܵܓܼܵܐ ܕܠܲܝܬܠܹܗ ܬܝܵܡܬܵـܐ
ܬܹܐܡܘܼܢ ܐܲܣܪ̈ܲܚ ܠܒܵܝ̄ܢ ܘܗܲܘܢܲܝ̄ܢ ܒܝܼ ܚܘܼܝܵܕܵܐ ܒܚܲܕ̄ ܬܲܚܡܲܢܬܵـܐ
ܕܫܵܡܸܛ ܘܦܲܪܦܸܣ ܗ̇ܘ ܥܸܠܕܒܼܵܒܼܵܐ ܕܒܵܥܹܗ ܠܫܡܲܛ̈ܬܲܝ̄ܢ ܒܟܼܠ ܩܸܫܝܘܼܬܼܵܐ،،،
ܠܐܝܼܡܵܢ ܒܗܵܘܹܝܚ̈ ܓܕܝܼܠܹ̈ܐ ܒܫܲܘ̈ܦܲܝ̄ܢ ܡܼܢ ܐܸܚ̈ܕܵܕܹܐ ܒܐܲܡܝܼܢ ܪ̈ܚܝܼܩܹܐ
ܠܵܐ ܣܲܦܪ̈ܝܼܬܘܼܢ ܡܢ̄ ܐܿܢܵܫܹ̈ܐ ܐ̄ܚܹܪ̈̄ܢܹܐ ܡܼܢ ܢܘܼܟܼܪ̈ܵܝܹܐ ܫܲܩܠܵܚ̈ ܙܸܕܩܹ̈ܐ
ܐ̄ܬܹܐܡܘܼܢ ܕܲܪ̈ܫܵܚ ܠܥܲܣـܩܘܼܝܵܬܲܝ̄ܢ ܕܫܵܪܹ̈ܝܚ ܠܩܸܛܪܹ̈ܐ ܕܝܼܠܲܝܗ̈ܝ ܩܡܝܼܛܹ̈ܐ
ܩܵܐ ܕܒܵܗܪܸ̈ܢܵܚ ܓܲܘ ܡܲܫܛܵܚܹ̈ܐ ܒܢܘܼܗܪܵܐ ܨܡܝܼܚܵܐ ܡܐܲܝܟܼ ܙܲܠܝܼܩܹ̈ܐ،،،
ܐ̄ܬܹܐܡܘܼܢ ܟܼܠܲܢ ܦܲܫܛܹܝܚ̈ ܒܫܒܼܝܼܠܵܐ ܒܚܲܕ̄ ܬܲܓܼܠܝܼܬܼܵـܐ ܒܫܸܡܵܐ ܕܫܠܵܡܵܐ
ܡܢ̄ ܟܼܠ ܫܘܼܬܼܐܵܣܹ̈ܐ ܡܢ̄ ܟܼܠܲܝܗ̈ܝ ܓܲܒܹ̈ܐ ܕܠܵܐ ܦܘܼܪܫܘܼܢܝܵܐ ܡܢ̄ ܟܼܠ ܚܲܕ̄ ܬܘܼܚܡܵܐ
ܡܛܠ ܝܼܘܲܚ̈ ܬܚܘܼܬܼ ܚܕܵܐ ܐܵܬܼܵܐ ܪܫܝܼܡܬܵܗ̇ ܒܓܲܘܢܵܐ ܣܡܘܼܩܵܐ ܕܸܡܵܗ̇
ܐܵܚܘܼܢܘܵܬܹܐ ܝ̄ܘ̄ܚ̈ ܒܢܲܝ̈ ܚܲܕ̄ ܐܲܬܼܪܵܐ ܒܢܲܝ̈ ܚܕܼܵܐ ܐܘܼܡܬܼܵـܐ ܒܢܲܝ̈ ܚܕܼܵܐ ܝܸܡܵܐ،،،
ܥܲܒܼܕܝܼܫܘܼܥ ܣܵܗ̄ܕܵܐ ܝܘܼܚܲܢܲܢ