ملاحظات مهمة جدا من اعظاء وصلوا لامريكا حديثا...موضوع للنقاش والاطلاع

[vincenzo]

اخواني واخواتي الاعضاء المحترمون
انقل لكم ببعض التصرف بعض ردود وقصص وصول او\و سفر اثنين من اخواننا الاعزاء التي ذكروها في موضوع ارشيف الSIV المثبت
ولعلمي ان الكثير من الاعضاء وخصوصا غير المقدمين على هذا البرنامج لا يدخلون لهذا الموضوع لضيق وقتهم او لاسباب اخرى
ولاعتقادي ان ما انقله هنا مفيد للجميع فقد نقلت (مع الاعتذار للاخوة الثلاثة الذين ستاتي اسمائهم في سياق الحديث) ما رايته مهما جدا لاطلاع الجميع
وقد ذكرت استنتاجا شخصيا في النهاية
ارجو عدم الرد بالشكر وانما بالراي والمعلومة


حداد السيوف:
أخواني الاعزاء واخواتي العزيزات

بتاريخ 26-5-2009 توجهنا صباحا الى موقف سيارات الوفود في مدخل المطار حيث التقيت بشخص من المنظمه من اجل سلامة الكل لا اريد ذكر اسمه وقد قام بتوزيع (؟؟؟) تاخذه باليد معك عندما تدخل بمطار بغداد يكون مصدرك لكي تعرف من مسافر معك وكذلك هذا ال (؟؟؟؟ ) سوف يساعد المنظمة على ايجادك في المطار ,, اخوان اني مردت اكول شنو ال ؟؟؟ لان اني احرص على سلامات الكل
المهم بعده متستلمون ال ؟؟؟ ترحون تصعدون بكيه النفر ب 10000 دينار عراقي الى داخل المطار وتتفتشون حوالي 3 الى اربع مرات
طبعا التكتات تكون على شكل ورقه A4  ومطبوعه بالاسود والابيض
تدخل للمطار انت وجنطتك تلكه جماعه كومه لجوء ومهاجرين شايلين مثل ما انت شايل وهو ال  ؟؟؟ راح تعرف انه انت وياهم بعدهه تروحون تخلصون الاجراءات والجنط
وتنتظرون بالمطار
طبعا المطار من جوه صاير يخبل
الوقت للانطلاق من بغداد 11:30 ووصلنا الساعه 01:00
طبعا صباحا
دخلنا ال عمان واني الوحيد الي على الكاونتر مخلوني ادخل كلولي اسمك مألوف انت داخل هنا قبل
كوتلهم يمعودين .... تالي طلعوا رايدين فلوس اني شسويت اخويه انت وين كنت ووين رايح وليش تريد تروح وانت جاي ال عمان قبل
اني كوتلهم يابه اني فيزة وكيفكم
نسيت شغله جدا مهمه
انتوا اول متنزلون راح تلكون جماعة من ال اي او ام بالمطار بالمدخل كبل بس يشوفوكم شايليه هاي الشغلة الي كوتلكم بيهه الي هيه؟؟؟؟ اي راح ياخذوكم وياهم
المهم نرجع ال سالفة الكاونتر
تالي خلاني الظابط الاردني ادخل وبعدهه اني وزوجتي انتظرنا بفندق عاليه
ملاحظه احنا جنطنا انتشحنن من بغداد مباشرة لنيويورك
بحيث مستلمناهم
بحيث دايما خلي وياك ملابس احتياطيه
المهم لكينا الملابس بمريكا بالمطار
المهم بتنا بمطار عاليا وبعدهه اجانه الباص 8 صباحا وتوجهنا للمطار وبعدين طرنا ال امريكا
12 ساعه بالجو
ونزلنا واول منزلنا نفس الحاله موظف ال اي او ام تلكانه
ولو هي كانت موظفه كولش حلوة هسه تشوفوهه وتذكروا كولش حلوة بس مو تشوفوهه وتضحكون هههههههههههههه لا والله خوش بنيه

المهم بعدها تنتظرون الاجراءات
توكفون بالكاونتر
تسلمون البكج الي تستلمو بالسفارة ويه الفيزه
يفتحهه الضابط
يكولك انت الكرين كارد مالتك راح يسلم ال كذا عنوان اوكي لو لا ؟
لان انت منطي هيجي عنوان
اني بصراحة كوتله اي عادي
ماعرف لو كايله لا كان يصير اغير لو لا ما عرف
المهم  بعدها يكولك بصم بايد اليمنى الكترونيا
وتدخل
تاخذك الموظفه الى غير مكان تسوي غير اجراءات
طبعا اني لان رايح الكونيتكت والسبونسر ينتظرني في باب المطار خلوني اطلع
اما الي بوسطن او غير ولايه لازم يباتون
طبعا اني عل مطار كندي , نيويورك
وهنا الصدمه ------------------------------------- امريكا هل هي جنة الله على الارض
عندما دخلت امريكا كأنها مدينة الاحلام
حيث الخضار والطبيعه والنظافه
الله الله الله
والله بشر وعايشين احلى حياة

المهم رحت للشقه وبتت اني وزوجتي
واليوم رحنا انسوي رقم الضمان الاجتماعي والموظفه كالت 7 ايام الى 10 ايام ويكملون الاجراءات
وغدا اذهب لالتقي بالمنظمة الي هي تعبانه يعني بالجذب ما اجوي للشقه حتى يشوفوني
فراح ياخذني ال سبونسر ال هم باجر
وان شاء الله بالتفصيل الممل احجيلكم شراح يصير على الكرين كار من ابد الاجراءات
اخواني يمكن بحياتي مكنت متحمس للشغل مثل هسه
وان شاء الله كلكم توصلون بالسلامه واي شي اني بالخدمه

اخوكم حداد السيوف

وفي رد اخر لحداد السيوف:
بالنسبة للوزن وبصراحة اني قبل لا اسافر اجتني رسالة من ال اي او ام تقول انه الجنطة الكبيرة 20 كيلو والهاند باك 5 كيلو
فأني قبل السفر جبتلي ميزان وظليت اوزن الجنط الى ان سويتهم فت
بس غلطت بشغله مهمة
انه ياجماعة تكدرون تشيلون 2 هاند باك كل شخص بيكم
ام الخمسه كيلو تروح بالشحن والثانية تشيلهه وياك ومحد منتبه عل هاي الفقره
او يمكن اني مجنت اعرف الى ان تفاجأت
بس اكو عائلة عراقية جابت وزن فوك المطلوب ب 40 كيلو ههههههههههههههههههه ووكعت خطية براس ابو ال اي او ام    --------------------- بس مشوهم وهم بالمناسبة لاجئين وليسوا اس اي افي ولو هو ماكو فرق بس للتوضيح فقط

وعن اخونا المتالق سبع صنايع:
اليوم احجيلكم سالفة زغيرونة نقلهه اليه اليوم اخوية حداد السيوف

راح البارحة على السوشيال وكمل كلشي وخلال عشر ايام يستلم الرقم بعدين اخذ كفيله وراح للمنظمة الي اسمهه IRIS المهم يكول اول مطبينة كعدونة بغرفة وشغلونة فلم ساعتين على المكادية مال المنظمة وشلون همة اكثر الناس يحتاجون المساعدات طبعا كلهم امريكان
المهم اخونة الحداد وصلة الباص وافتهم الغرض من الفلم بعدين خيروة خيارين
الاول

1- ينطوة 400 كاش ويدفعون فلوس الايجار والماء والكهرباء الي هيه بحدود  1100 لمدة 8 اشهر عدا الفودستامب الي هوة بحدود 250 للنفر والميدكل لمدة 8 اشهر
ها شلون عرض حلو بـــــــــــــــــــــــــــــــــــــــــــــــــــــس دقيقة السالفة بيهه دالغة!!!!!!!!!!!
هنالك شرط واحد زغيرون للحصول على هذا العرض وهو ان توافق على اول عمل تعرضه المنظمة عليك
زين خوش حجي شكو بيهه اشتغل بس من تشتغل شراح يصير؟؟؟
راح تنكطع كل هاي السوالف الفوك عدا الفود ستامب والضمان الصحي لمدة 8 اشهر
هم زين اكعدلي اشكم شهر  علما يلكولي شغل والله كريم
لالالالالالالالالالاللالالالالالالالالالالالالالالالا ياحبيبي الشغل جاهز وبالفعل عرضوا على الحداد
يعني شوفوا الدهاء همه صحيح عرضوا يدفعولة ايجار 8 اشهر وراتب زين بس همه كلشي مدفعولة لحد الأن ولكولة شغل يعني كلشي مراح يدفعون      شلونكم بهاية

المهم الشغل شنو  حدقجي بالبلدية ماشي الشغل مو عيب بس الحداد بية ربو وميكدر على هاي الشغلة يعني رفض يعني اي مساعدات مراح اتشملة من المنظمة؟؟؟؟؟؟؟؟؟؟؟؟
كبل لا انسة الشغل جزئي من 10-12 دولار بالساعة مو كل الاسبوع  يعني بالشهر 1400

2-الحل الثاني امام الاخ الحداد هو الحصول على المساعدات الحكومية من ال DSS  واللي هية
الفود ستامب 8 اشهر بحدود 250 دولار للنفر
الميدكل 8 اشهر
الكاش اللي هو 470 دولار  تدفع 150 للايجار والباقي المنظمة مجبرة تدفعلك الباقي والكهرباء والمي من المتبقي من ال470

المنظمة طلبت من الحداد انه ميقدم على الحكومي ويقدم عليهم والسبب واضح لأن بالاول ميدفعون كلشي اذا يلكون شغل وميكدر يرفضة وهمة الريدي لكولة شغل بس مو على مرامة ورفضة
بس الثاني غصبا ما عليهم يدفعولة بقية الايجار ووصل الامر ان يهددوة انه يرفعون تقرير الى الدي اس اس ويكلولهم رفض الشغل علمود مينطوة المساعدات

الحداد استنتج انهم ميحبون جماعة الاس اي في وميحبون اي شي يجي من طرف الجيش لان الجيش يروح يحارب ويجيب لاجئين

اتصوروا كعد الصبح لكة ايميل من المنظمة يكولولة ها شكلت تشتغل لو لا
طبعا بالنسبة لزوجتة رح يدخلوهه دورة انكليزي والشغل الوحيد المتوفر الهه هو تنظيف فنادق

ارجو ان اكون نقلت الصورة لأخوتنة بشكل واضح واذا اكو خطا اكيد الاخ  الحداد يدخل يصلحلي واتمنى من خلال هيجي تجارب تخلون فد استتراتيجية وخطة من هسة وكلمن يكول اني شريد من امريكا
اني عندي هواية افكار بس تعبت وان شاء الله بغير مرة نسولف بيهه
وسلاــــــــــــــــــــــــــــــــــــــــــــــــــ مــــــــي للكل


وعن سبع صنايع ايضا:
اذا تسجل على الحكومي راح ينطوك 470 دولار  بالشهر انت تدفع 150 للايجار ولنفرض الباقي 500 المنظمة اتدفعة شكد يبقالك 320 تدفع فرضا 120 للكهرباء والمي يبقى200 مصرف جيب هذا الحجي لمدة اربعة اشهر
هذا الحجي ميصرف للمنظمة ليش لأن انت اذا سجلت على المنظمة فماراح يدفعون ايجار اذا لكولك شعل وهمة بعد ما كايل يا الله لكولة شغل ميناسبة ورفضة يعني ميستحق مساعدات ويسببله مشاكل ويه الحكومي وما الك حق ترفض اول شغل يعني هو بالخيار الاول ميدفعولة اي فلس وبالثاني  يدفعولة 3200 دولار ليش لان ايجارة 950 همة يدفعولة 800 بالشهر والباقي علية من 470 دولار بالشهر وتضرب 800 في 4 اشهر تطلع 3200 دولار وهذا الحجي ميصرفلهم

وهذه قصة وصول اخونا سيف المشهداني:
السلام عليكم اخواني واحباب قلبي والله شاهد مشتاقلكم واعتذر عن التاخير لاكنني مريت بضروف اشويه متعبه وراح اشرحلكم بتفصيل الممل بس حبيت توضيح طبعا اخويه ابو الانوار لا تزعل مني بس دزيتلك ايميل قبل كم يوم وكلت سلملي على الولد بس الضاهر ما وصلك المهم اشلونكم كلكم مشتاق اسمع اخباركم واحجي وياكم واني اخوكم ما انسه فضلكم عليه بكل حرف كملتوة وفدتوة الي واني اخوكم ما اتحمل كل هذه البسامير ههههه مو شبوحه الغالي

اخواني اني وصلت امريكا والحمد لله والشكر لاكن سفرتي جدا صعبه كانت وافتريت 3 ولايات والان استفقريت في ال باسو تكساس ...
طلعت وكما تعرفون من بيروت نزلت عمان ترانزيت ساعه في عمان يشوفون الفيزة ويجيكوها ويشوفون الفايلات بس ما يفتحوها مال السفاره بس للتاكيد طرت من عمان ال نيويورك مطار jf كيندي طبعا 12 ساعه طيران والاطفال تعبو جدا اني ما نمت الرحله جدا متعبه نزلت في مطار نيويورك رحت على الكاونتر سلمت اوراقي للشرطي محترم جدا اتشاقه ويه الاطفال كلي اكتب العنوان كتبته الي هو في نيويورك رجل صديق ابي عربي الاصل امريكي الجنسيهكلي اخذ منك بصمات للاصبع انا وزوجتي وصور عن الكومبيورت المهم كلي تروح على كاونتر لاخ وهذا بقيت فيه حوالي 3 ساعتات لان شرطيه وحده تمشي معامله معامله وجان اكو اهواي هنود المهم خلصت الحمد لله طلعت وكان في استقبالي ابي والرجل الامريكي طلعنا من المطار مطار جدا كبير ميكن بكد بغداد طلعنا نيوريورك جدا جميله وخضار وكلشي حلووو بس اجاني فد شعور ما اعرف شنو هو اشويه اختنكت ماعرف ليش ايجوز بس اني هيج حاله المهم طلعنا بقيت في نيويرك في بيت صديق ابي طبعا اهلي في تكساس مستقريين لاكن عمل ابي متوقف حاليا لمده شهر كلت خل اشوف نيويرك شفت نيويورك ما فادتني الايجارات غاليه والشغل ما متوفر اكو مناطق في نيوروك الي هيه بيها الايجارات اشويه مناسبه جدا مقرفه لان بيها اغلبيه سود مو لانهم سود لاكن تكثر بيها الجرائم صدكوني امريكا بيها جرائم كثيرة ومنطاق مقرفه لاكن ان شاء الله ربي يحميكم كلكم المهم عندي اصدقاء في نيوجيرسي رحت يمهم اليوم الثاني نيو جيرسي منطقه اغلبيه للعرب والاتراك يعني مشاكل صدكوني هذا هو الكلام لا تتصورون امريكا وصلت وخلاص ارض الاحلام امريكا بلد القانون القانون فوق الجميع بلد المساعدات لاكن توجد فئم من الشعب الامريكي تعبانه جدا ويبيعون امهم وابوهم على المخدرات رحت نيو جيرسي على اساس ادور شقه طبعا الشقق لا تختلف عن نيويورك غاليه ومعضمهم ما يقبلون اذا وياك اطفال كلت خل اشوف شغل الشغل في نيو جيرسي اما مطاعم او مقاهي او عمل يعني يدوي اناي ما اهتم كلشي اشتغل كلت ميخالف الفلسطينيين مسيطرين على الوضع واشويه ايضوجون من العراقيين لان يعرفون احنه ضد النضام الشابق اكو عنصريا بلشغهحصلت على عمل بسيط جدا وكلت ميخالف امشي اموري وطبعا مع واحد عربي نصحوني كالو معضم الي تعمل معهم في العرب ما ينطون فلووس اني ضجت كلش وبدئت اعصابي تتعب لان اطفال وتعرفون الوضع المهم اني الحمد لله اهلي وياي بس هم رادو يشوفوني كلشي حته اني اقرر هاذا كله واني ما رحت سويت لا سوشيل ولا فوت ستامب كلت خل استقر في ولايه وبعدين اسويها واحسن شي سويته انو اني ما قدمت على هاي مال مساعدات وتحديد الولايه لان اكو ولايات ما تكدر تعيش بيها من كل النواحي المهم كلت لهم اروح تكساس وين ما اهلي عايشين اجيت والحمد لله في تكساس في ال باسو ولكيت شقه وقدمت على المساعدات منا وانطوني بدل ايجار يعني حتى اذا ما تقدم من العراق على المساعدات تلكاها موجوده كدامك انطوني او حسبولي مال ثمانيه اشهر كل شهريين اروح استلم شيك من المنضمه كملت مال سوشيل سكيورتي كملت مال فوت ستامب بقى بس العمل ادور وان شاء الله الكه لان هاي الولايه او المنطقه ارحم بهواي من الباقيين  انصحكم ان اول الايام لا تتضجورون واكد على لازم واحد يستقبلكم يدليكم الاماكن يبحث معكم عن عمل لان العمل في امريكا لازم معارف وسؤال يعني مو كاعد ويجيك مثل العراق هم اكو واسطات ومحسوبيه في العمل لاكن هنا بلد القانون وحقوق الانسان ميتركون واحد وخصوصا المهاجريين والاجئين وخصوا الي عنده اطفال كل الوسائل يوفروها له اني الي شفته في هذه الولايه تخبلوا لمن شافو اطفال كالو راح نوديهم روضات وحضانات وراح نوفر لهم الحليب وراح نعمل لهم كل شي واذا انته وزوجتك ما تعرفون انكليزي ندخلكم دورات لاكن لانسان في بلد غريب لازم يفكر بل مستقبل المساعدات لمده ثمانيه اشهر والفوت ستامب كل 6 اشهر تروح تعمل مقابله تسئلك اشتغلت تكول لها لا تجدده لك 6 اشهر اخرى وهكذا انصح اي يريد يروح لولايه نيويورك الشغل ما متوفر كلش لاكن جميله جدا انصح الي يروح لنيوجيرسي ولايه العرب والنفاق والعصابات احذركم منها انصحكم بكلفورنيا تكاساس وان شاء الله ربي يوفقك الجميع واتمنى ان تكونو اعذرتموني لان هذه قصتي والحمد لله صارلي حوالي اسبوع او اكثر بس اخذت انطباعات عن معضم الولايات لا تستغربون عندما تنزلون في المطار وتختنكون هذا الي صار معي بس كولو يا الله افتحها بوجهي ويسر لي امري وان شاء الله ربي يحرس الجميع ويوفقكم كلكم اخواني اي سؤال اني خادم الكم واكرر اني اسف عن الانقطاع بس والله ما عندي وقت ابد واليو نصبت الحاسبه الخاصه مالتي وفتحت اول موقع هو موقع الحب والاخوة اشكر كل الي ساندوني والي راح يكتوبون ردود والي ساعدوني بكل حرف ويارب تسهل جميع اموركم ويا ابو نور اني ما انساك بس انته راح تجي وتشوف بعينك بس اتمنى انو مايصير مثل الي صار وياي اتمنى ان اول ما تنزل الطياره كل الامور تسهل الك وللجميع اخوكم وخادم المنتدى دوما سيف من تكساس


وهذا رد اخر لاخونا العزيز سيف:
وهاذا الي صار وياي بلمنضمه
كلي ابو المنضمه راح اسوي لك دورة اعلمك اشلون تحجي لمن نلكالك شغل وتقابل ويه مسؤلك ولمن تشتغل راح تنطكع عليك المساعدات مال ايجار وابنفيتس ويبقى عندك المديك والفوت لان عندك اطفال اشكد يبقى ما اعرف وهمه مو غشمه ايكلك هاذا شغل واشتغل انته جاي هنا تشتغل بس اكيد العمل الي يناسبك والشهاده الي تحملها هم اتاثر انصكم بترجمه جميع الشهايد والوثائق الدراسيه تبقى المساعدات لان عندي اطفال الي ماعنده اطفال تنكطع عليه كلها وهاذا الي شايفه ويه والولد الي هنا اشتغلوا كطعو عليهم كلشي واذا تبطل بعد ماعليهم بيك واذا ما شتغلت لمده ثمانيه اشهر فقط المساعدات وبعدها اشتغلت او لا هم معليهم اني بلنسبه الي انطوني لان ما مقدم على منضمه من بغداد انطوني مال شهرين مساعدات وايجار الف وثمانيمئه دولار لمده شهرين والشهريين الي بعدها نفس الشي هم اروح استلمه شيك والاربع اشهر الي بعدها تكون مو نفس المبلغ تكون اقل واذا بعد الاشهر الثمانيه اشتغلت او لا يكطعوها منكم بس تبقى الفوت ستامب كما ذكرت سابقا لان عندي اطفال كل 6 اشهر اروح اقابل تجدد الي لان عندي اطفال

رد اخر لسيف لاحد السائلين:
حبيبي الغالي اتمنى من الله ربي يسهل امرك وتقابل وتفيز وتجي امريكا ارض القانون وحقوق الانسان
حبيبي اني انصحك وماعرف انته بكيفك عوف هاي مال مساعدات وتعال اهنا لكلفورنيا وصديق يعرف هيا الامور مال سوشيل اتروح من الصبح للسوشيل تملي استمار وتنطيها راح تنطيك ورقه تكلك خلال 10 ايام يوصل السوشيل تاخذ الورقه وتروح للمنضمه الي اكيد الكل يعرفوها هناك انا بلنسبه الي اهل والعراقيين الي هنا يندلوها  راح يكلك وين عايش هسه كله ويه صديقي وماعندي افلوس اجر راح يقومون بمساعدتك حسب التعليمات الي هم عندهم اعيد واكرر كل ولايه نضامها يختلف ما اكدر اكلك شي اني ما اعرفه بس دير بالك تروح نيوجيرسي هاذا الي اكدر اساعدك بيه اخوك وخادمكم المطيع سيف


 اخونا العزيز سيف سوه خطوة كلش عملاقة للاسباب التالية:

1- سافر على حسابه لان هية بركبته اول وتالي فليش ميخلص منهه من هسه ويتجنب التاخير المابيه داعي من جانب ال IOM اللي مابيهم داعي لابو ال SIV اللا المفلس تماما

2-راح يفتر بالولايات بمزاجه ومحد يفرض عليه وين يروح ومثل منعرف انه ماكو هناك سلابة على الطرق اللي بين الولايات ...مو؟

3-طبعا بهالطريقة هو مستلم الفلوس مال الوصول الغير قابلة للرد FEDERAL WELCOME GRANT (هو ما كايلهه بس بطريقة غير مباشرة من سولف على ال1800 دولار) وبعدين من تعجبه فد ولاية او مدينه يقدم على الويلفير  WELFARE بيهه اللي ينطونه سكن وفود ستامب ومديكيد ويساعدوه على ايجاد عمل

وكخلاصة فنصيحتي لكل جماعة ال SIV خصوصا هو ان يعتبرون منظمات اعادة التوطين كوسطاء غير مفيدين لان هناك اللي يسال ميتيه وهاي نصيحة محامية لاخونا اوديسيوس اللي المنظمة كلشي ما سوتله ولعبو بيه طوبة وهم من ما قراته من لعبة المنظمة على اخونا حداد السيوف

[محبكم]

شكرا لك اخي العزيز على هذا الموضوع المفيد والمتعب في انجازة وتجميعة
طبعا اعتقد هواية رح يستفاد منة الاخوة الجدد انشالله
تمنياتي لك بالموفقية

[BaghdadGhost]

كل الحب و الوفاء للاخوة سبع صنايع و حداد السيوف و سيف المشهداني لتفانيهم و للمجهود الي بذلوه لاجل ايضاح الصورة ...... و للاخ فجنزو للاهتمام اكثر بالاعضاء الجدد و لترتيب هذا الموضوع الي يتمركز على فترة السفر ,,, الوصول ,,, و التعامل الاولي مع المنظمه .........

بالفعل الموضوع كشف للعيان الطريقة الملتويه الي تحاول بيهه بعض المنظمات التعامل مع اللاجيء او المهاجر..... و عن قريب ان شاء الله راح يجي اخ عزيز علينا و يشرحلكم الي صاربالفترة الاخيرة معه بالتفصيل و راح تتفاجاؤن من الطريقة الي تعاملت بها المنظمه معه (اتعس من الي شافة سيوفي الورد) ........

ان شاء الله التوفيق للجميع و شكرا مرة ثانيه ......

[vincenzo]

اكلك شبح شو هايه صورتك الجديدة اللي ما لايكه صارلهه كم يوم انكطمت وبقه منهه بس REVIEW

المهم ما اعرف ليش استنتجتوا انه الموضوع اللي هو مجرد اعادة ترتيب كلمات اخوانا التلاثة واستنتاج بسيط هو يهم الاعظاء الجدد
بالعكس هو يهم العتيكين واللي على سفر قريب
او بالاحرى يفيد الكل عدى الواصلين
وحتى يفيد بتقرير اختيار الولاية للجماعة اللي مجلبين بالمساعدات وما مقتنعين باستنتاجي وكلام الاخوان

[اوركي]

فنزو اخوية العزيز هليام نشط اشو بلحظة صرت العضو المميز اظاهر غشيت بالاجابة .. شكرا اخي فنزو على هذه المادة السمة من اخوة اعزاء واتمنى من الاخوة الذين يريدون الذهاب واللجوء ان يستفادوا بشكل مباشر وحي لهكذا معلومات وتجارب قيمة .
شكرا مجددا وتستاهل التميز والحضور .
اوركي

[سيف المشهداني]

عاشت ايدك حبي على مساعده اخوتك واخوتنا الجدد وان لا يدوخون مثل ما احنه دخنا هسه عدنا الساعه 3 الصبح واني كاعد ... ليش ماعرف اشو ببغداد بس تخلي راسك تنام ينفجر يمك صاروخ ما تحس هههههههه
المهم اخوتي ذوله المنضمات حسب ولد قال لي انه مو لسواد عيوننا وهمه يكرهون جماعه ال siv كرة مو طبيعي ماعرف ليش وهاي صارت ويايه اشلون لمن طبيت للمنضمه تلكاني واحد مكسيكي رحب بيه وسوالياها جنه ونخدمك ونوفرلك لمن فتح الجوازات شاف الفيزة اتغير لون بشرته ولو هو اصفر دوما جان ايحولني على بنيه وياه وهيه مشت بشغلتي ليش؟؟؟
جماعه اللجوء اخوانا طبعا ياخذون عليهم المنضمه طبعا ياخذون على كل نفر 1000 دولار اتعاب يعني ايروحون يستقبلوهم من المطار ايعلموهم انكليزي يكعدوهم ببيوت رخيصه ويحسبوها عليهم ضعف من هاي المور عمي انغوووله اشبيكم انتووو لعد اشلون احتلووا العالم ؟؟؟؟ انغوله لو لا بس احنه لا نحجي انكليزي وعايشين ويه الامريكان اقل واحد بينا سنه وعاجنيهم وخابزيهم وعلى حسابنا فا ينطوهم بس يمكن على كل فرد 200 دولار فا ما تصرفله الابن ال .... المهم اتمنى من ربي ان اكون قد وفقت لرسم الصورة الكامله واعيدد واكرر ابد لا تتردد ان تجي لارض امريكا ارض القانون واحترام حقوق الانسان وعلى كوله الحجي والدي يكول محد يموت من الجوع هنا في امريكا وشكرا اخوكم سيف من تكساس بس بعدني ما ركبت حصااان ههههههه

[سيف المشهداني]

شكرا حبي فنجيزو على تشجيع الي يا ورده وقلبي صار اكبر من الستيس هسه يارب تسهل امورك وتجي وترتاح وتنفتح بوجهك وبوجه كل من يقرء هذه الحروف يا رب احنه عراقيين خويي قلب على قلب

[ماجلان]

.

[أبــو دجـــلة]

السلام عليكم

أغاتي الكريم ..  vincenzo

تحياتي .. إن كنت تتقبل الشكر أو لا تتقبله , رضيت أم لا ترضى , بالمروءة أو بالقوة
لشخصكم اللطيف شكري الجزيل وإمتناني .. لأعادة تفعيل تجارب أخوتنا الكرام هناك
وحتى يتمعن بها أكبر عدد من أهلنا العراقيين ويطلع عليها ويتزود بخلاصاتها
أخي الفاضل ..
لا ننسى .. بحنكة الشخص الذي يصل الى أمريكا وما حمل معه من المعرفة المكتسبة
من المنتدى أو ممن يحيط به من الناس وما سمع .. سيكون قادر على أحتواء ما يعترضه
من العقبات .. وبفضل الكرماء من أخوتنا الذين وصلوا وما يكتبوا لنا من تجاربهم وأنطباعاتهم
أصبحنا نلم ببعض الألمام المعرفي عن الظروف التي سوف تحيط بنا .. عند الوصول
العقبات والعراقيل إن وجدت من بعض المنظمات .. يجب أن تهز من أملنا وعزيمتنا
وإنها بضعة أشهر وتنقضي .. مثلما أنقضى حيز من رحيق العمر في ديار القلق  
أكرر شكري الجزيل .. مع تقديري

أخي الكريم .. حداد السيوف
أخي الودود .. سيف المشهداني
أخي الفاضل .. سبع صنايع

تحياتي .. بوركتم وسلمكم الحافظ من غدر البشر ولدغ الحشر وكلل حياتكم بالنجاحات والتوفيق
كل ما تكتبوه في المنتدى هو ذخيرتنا ومؤونتنا المؤمنة لنا في مقبل الأيام
لكم الشكر الجزيل .. متمنياً لكم تحقيق ما تصبوا اليه , مع تقديري

أخوكم .. أبـــو دجــــلة

**
 

[النورس الحزين]

موضوع  يستحق التثبيت شكرا للمجهود الذي بذل فيه لمساعدت الاخرين
كع تمنياتي لكم بالثبات على الدين وتحقيق الاماني

[show]

 شكرا اخي فنسنت على جمع هذه المعلومات القيمه جدا و اشوفها ملخص مهم لمعظم الواصلين الجدد لامريكا تجارب جديده ومعلومات جديده و مهمه ومفيده جدا

اشكر كذلك الاخوه
حداد السيوف
سيف المشهداني
سبع صنايع

لحرصهم الواضح لوصول المعلومه الدقيقه لكل الاخوه

بالتوفيق للجميع

[سبع صنايع]

يمعود فنشينزو

هاي وين لكيت هذا الموضوع وشلون لميته
تدري هسة بديت اصدق انت حديقة ههههههههههههههه وعندك وقت

المهم بارك الله بيك وان شاء الله الاخوة يستفادون منه
تحياتي

[roea]

مشكور أخوية vincenzo

فعلا زبدة لتجارب مفيدة
شكرا على تجميعها و أفادة الجميع بها

أختك روية

[MAGGIC]

اخواني الاعزاء
بالبدايه اشكر شكر جزيل للاخ vincenzo على التعب الي تعبه بتجميع هذا الموضوع
واشكر الاخوان جميعا على المداخلات الرائعه

واحب اضيف تجربه 2 من الاصدقاء الذين وصلو لولايه ميزوري قبل كم شهر ولكن على iom
الاول  اقصد الشخص الاول من وصل ودته المنضمه للشقه شافها جدا تعبانه وغير مؤثثه والجيران حذث بلا حرج تعارك وياهم طبعا وصل يوم الجمعه من تعارك كال مااقبل بهذة الشقه ولديه اطفال 2 وزوجته وكال الهم راح تنيموني على الكاع المهم صدمه من صدمه بعدين اجت اخته الي صارلها 7 سنين في ميزوري فطلبت من المنضمه ان تاخذة وياها للبيت كم يوم لحد مايلكوله الشقه الجديدة من قبل المنضمه طبعا المنضمه ماقبلت ليش بعدين اكول
المهم اقتنعو بالاخير ان اخته تاخذة وياها خلال هذة اليومين السبت والاحد الولد صار شاطر ولكه شقه بنص البلد وفوق محلات تجاريه صغيرة ولايوجد بقربها اي شقه يعني لوحدة وتتكون من 3 غرف نوم وملحقاتها اتصل بصاحب الشقه واتفقو ان الايجار يكون 500 $ وصاحب الشقه قال تعال يوم الاثنين استلم طبعا الشقه مؤئئه نص المهم يوم الاثنين راح للمنضمه وكال الهم لكيت شقه ماقبلو بس سوة عركه جبيرة وكلهم شكد تدفعون للشقه القديمه كالو 500 كلهم اذا مو اكثر مثل متدفعون هنا دفعو هناك شنو طلع الفلم
ان الشقه القديمه 300% وهمه ضاربين 200% وبعدين اضطرو ياجروله الشقه الجديدة ومايقفصون شي من الفلوس اتعرف على امريكيه بعد فترة وعرفت اهلها على اهله وصارو اصدقاء بالمناسبه تدرون هاي الامريكيه كملت تاثيث الشقه ومجانا ويوميه تروحلهم وايدها مو فارغه حتى هيه دلته وساعدته على معرفه برامج مساعدات متنوعه هو مايدري بيها ......

الثاني كال انه ماتعاركت ويه المنضمه رحت للشقه مالتي وضليت لمدة اسبوعين ومن جوة العبايه كان يدور على شقه ثانيه ولكاها بعد اسبوعين وتحول بيها والمنضمه ماعاندت ويا

القصد ممكن الانسان ياخذ الي يريدة بذكاء وحكمه وبدون مشاكل ويكون على حذر لان صديقي كال شكو عربي او عراقي بالمنضمات يشتغل ( عدا الطيبين ) مايريد الخير للعراقيين الي وصلو جديد ونفس الحاله ديرو بالكم من هذوله الي اصولهم افريقيه مثل الصومال و السودان والاسيويين هم مو راحه الي ديشتغلون بالمنضمات


تقبلو مروري واسف للاطاله

[عاشق تراب العراق]

اخوووووووووووووووان عاشت ايدكم و بارك الله بكل واحد شارك بكتابة هذا الموضوع الرائع و المفيد جداجداجدا

[vincenzo]

صديقي سبع
والله لا حديقة ولا اكو وكت
بس احنة متعودين على نمط تجارب نقراهه بالمنتدى من اخوانه اللي يوصلون وكلهه تقريبا نفس الشي الى ان كتبتولنه انتو هذا الحجي اليخبل
واني كانت عندي هيجي قناعات من زمان بس محبيت اختلف واذكرهه الى ان الاخوان سولفوهه فكلت خلي هم انزل وجهة نظري وهم تجارب الجماعة
واهم شي اكون توفقت ووسعت طريقة تفكير جماعتنه

[BlackIceberg]

السلام عليكم

احب اشكركم عله هاي المعلومات المهمه حيل و ان شاء الله التوفيق للجميع . و مثل ما كال الاخ ماجك اكو بعض العرب و العراقيين عدا الطيبين همه اللي ينخاف منهم العاملين بهاي المنضمات لان الي تجربه وياهم و كم واحد مر عليه من تساله و لمجرد السؤال يجاوب عبالك رايح البيته و دتزاحمه بخبزته.
المهم اخوكم بعده بالعراق و ان شاء الله طالع بعد 3 اسابيع لكاليفورنيا فاذا احد من عدكم عده نصيحه او معلومات للي يعيش اهناك اكون شاكر اله جدا جدا .

[ayoka]

اخويه العزيز فنجز شنو هالابداعات وفوكاها بتصرف دمرهم واني راح اغنيلك فوت بيها وعالزلم خليها . ورده فنجز يوم الالك ويوم الالي والطليان عليا لو انام على الرصيف هاي امريكا اتمنالك كل خير ورده ومن توصل اريدك اتسولفنا وعلى كوله اخونا الشبح عود مو تكطع . سلامي

[vincenzo]

هو اني من هسه بديت اكطع  هههههههههههه

[Sasy]

الاخ العزيز vincenzo شكرااا على هذا الموضوع اني من الناس الي رح اسافر على حسابي الخاص بس احصل الفيزه وجانت عندي هوايه اسأله وانت وفرت عليه من تجارب الاخوه الاعزاء
ياريت كلمن يسافر يحجيلنه تجربيته بالسفر ومع الحياة والمنظمه ويستمر مو يجي عضو يحجي حجايه ونزعل وننسحب من المنتدى ومنفكر بالناس الي محتاجه هاي التجربه مالتنه كلنه خوان وكلنه محتاجين مساعده وماكو واحد بينه مسمعله كلمه تغثه بس الف عين لجل عين تكرم

تقبل تحياتي
اختكم
ساسي

[iraqgsm]

فنسنزو سولفلي اكو تقدم بقضيتك ومشكور

[vincenzo]

ليش هو اني اصلا اكو عندي قضية
مو على ايدك ههههههههه
بس اني اكلك الشركة دزتلي EV مصوكر من فرجينيا قبل اسبوع ما بيه اي شائبة وانشاء الله هالايام ابدي منين ما انته انتهيت هههههههههه او منين ما انته بديت قبل خمسطعش سنه هههههههههه
الله كريم ولا تسرع يابابا فنحن بانتضارك وفي الحجلة الندامة
حبيبي اراكجسم

[iraqgsm]

عمي هذا الخبر يخبل ايه يا الله هذا والله اللي اريد اسمعة

طبعا كل مرة اريد اسالك بالمواضيع وواحد من الكتاكيت يكببهاعركة

اخوية مبروك واني اخوك اي شي اني بخدمتك

[NOOR 2]

ممتاز اخي الغالي فجنوز

موضوع رائع جدا

اخوك  NOOR 2

[الصفار الحسيني]

أني أحب أضيف على هذا الموضوع تجربتي ويه المنظمة

بعد أن عرضت علينا المنظمة برنامج الـ Matching Grant (طبعاً بعد اسبوع من وصولنا) وليس أول وصولنا
وشرحت الموظفة البرنامج وإنه لازم نوقع على قبولنا البرنامج والي يكول لازم نوافق على أول عمل يلكولنيا وإلا تنقطع علينا المساعدات.
طبعاً إحنا رفضنا البرنامج لأن أني وزوجتي عدنا أمراض مزمنة، خاصة زوجتي تعاني من الربو الشديد. وقلنا لهم نحن لا نريد أن تكون علينا نقطة من أولها فيما لو رفضنا العمل الذي قد يكون غير مناسب.
فثارت ثائرة الموظفة وانزعجت لماذا لا نقبل بهذا البرنامج، وجاءت المديرة المسؤولة لتحاول أن تقنعنا بالبرنامج، ولكننا اصرينا على الرفض، فقالت في هذه الحالة سنحول ملفكم على الولفر.
ولكن صار تاريخ تسجيلنا على الولفر بعد تقريباً عشرة أيام من وصولنا (يعني طيروا علينا المنظمة راتب 10 أيام، فيما لو سجلونا على الولفر من أول وصولنا)
الحاصل بعدها المنظمة حتى تلقيح مقبلوا يلقحون الأطفال عدهم، كفيلنا خلف الله عليه أخذنا لمركز صحي بعيد نوعاً ما لكي نجري التلقيح هناك.
والله كفيلكم المنظمة منطتنا شي غير مبلغ الولكم واللي هم صار عليه إشكال في البداية، لأن ما سلمولنيا كله. و4 (دواشك) إحنا دفعنا فلوس نقلهن. وهسة كلما نسألهم عن شغلة يكلون إنتو مو رفضتوا البرنامج اللي قدمنالكميا ورحتوا على الولفر روحوا على دائرة الولفر وسألوهم، لأن علاقتكم انقطعت بينا.
وللعلم فقط أني كفيلنا نقلنا قبل ما نجي لأمريكا من المنظمة الأفريقية إلى منظمة كاثوليك جاريتي على أساس هي أحسن وتساعد اللاجىء هواية أكثر من المنظمة الأفريقية، على أساس حتى تساعد بتوفير بعض قطع الأثاث وغيرها من شغلات للأطفال.
ولو مبقينا على الأفريقية يمكن جان استفادينا منها أكثر (خاصة إنه الأفريقية عارضة إنه تدفعلنا شهر إيجار مجاناً إذا بقينا على هاي المنظمة. بس كفيلنا كال لا الكاثوليك تقدملكم أكثر)
الحاصل إحنا المنظمة كلشي ما ساعدتنا، الله ينطي لكفيلنا هو وفرنا هواية شغلات من عنده.

حتى سألنا موظفة المنظمة مؤخراً عن دورات سمعنا بيها وكنالها إحنا محترفين على برامج الكومبيوتر بس اريد ندخل دورات علمود ناخذ شهادة من أمريكا ونشتغل بيها. جان اتكول إنتو ما عدكم كيس وركر عدنا علمود يساعدكم. اللي كللكم على هاي الدورات خلي هو يساعدكم.

آسف على الإطالة

أخوكم الصفار الحسيني

[ماجلان]

.

[الصفار الحسيني]

تحياتي أخي ماجلان

صحيح البرنامج يمكن يكون جيد بالنسبة إلي بس أني مردت أصير بموقف إنه أرفض الشغل اللي تلكي المنظمة وبعدين يصير شي ضدي لأن أني وافقت على البرنامج.

عموماً الوضع الآن استقر والحمد لله، خاصة بعد أن داوموا الأولاد في المدارس.

وكفيلي ما قصر ويانا، وساعدنا كثيراً في المعاملات.

تحياتي للجميع

[ماجلان]

.

[Abo Rami]

اخوان السلام عليكم والله يكون بعونه وعونكم
الي انريده من الاخوان ان يكون هناك دليل لكيفية التعامل مع المنظمات لانه الظاهر الشغلة عويصة ومثل ما افتهمنا من الاخوان اذا رفضت راح يترتب عليها شغلات واذا قبلت راح يكومون يزاغلون عليك ارجوا انه تسووه مثل الدليل (شنوا حقوق الواصلين لهناك وشنوا الي مفروض يقبلوه ويرفضوه اذا طلب منعدهم) بالمختصر شنو يترتب على المنظمه وشنوا يترتب علينه ظ علما اخوكم على برنامج ألSIV  وحاليا في بحر الظلمات (في انتظار المقابلة والفحص الطبي) على كولت الشبح سلامي اله ولكل الاخوان الاعزاء في SIV وشكرا لادارة المنتدى وجميع الاخوة والاخوات العزيزات
ابو

[vincenzo]

اغاتي ابو رامي الورد
عندي مقترح لجنابك الكريم ممكن يجنبك الانتضار لتحقيق مقترحك الصعب التحقيق نسبيا لكون معضم الاعضاء اما ينقطعون او يقللون زياراتهم للمنتدى بعد وصولهم بفترة الى وطنهم الجديد معذورين
تكدر تتبع موضوع ارشيف الاس اي في مالة اخونا شبح بغداد وتلاحظ الاعضاء اللي يوصلون وتدور على ردودهم اللي بعد وصولهم مباشرتا حتى تعرف شنو اللي صار وياهم بعد وصولهم من الناحية اللي تفضلت بيهه لان اعتقد انه هواي من الاعضاء القدماء يمكن حضرتك ما سامع بيهم لان انقطعوا من زمان واني كل اللي سويته انه اعدت تجميع تجارب كم عضو مهمة جدا برايي بس اكو العشرات غيرهه
اكو مكان ثاني
وهو موضوع مثبت جدا مهم وطويل نسبيا اعتقد عنوانه تجارب وخبرات الاعضاء في الولايات المتحدة او شي من هالقبيل وهذا الموضوع من اهم المواضيع المثبته بهالاتجاه وهم بيه هواي اقتباسات من مواضيع اعضاء كثيرين بمختلف الفترات اللي اشتغلت بيهه البرنامجين المتاحة النه حاليا

[Abo Rami]

اخي العزيز فنسزو
والله اني من المتابعين للمنتدى منذ فترة طويلة بس بصراحة اني ماردت تكون مشاركاتي الا بالمواضيع الي اعتقد انه مهمه جدا للجميع على الرغم من انه اكثر المواضيع هي بالاغلب مهمه وخصوصا الي تخص الهجرة لامريكا  هذا اولا وتقريبا اني اطلعت على هواي من المواضيع والاخوان الاعزاء مثلك ومثل كل الاخوان اشبعوا المواضيع نقاش حتى صار كل موضوع يحتاج الى منتدى وحده - بس قضية المدارس كانت اله حصة قليلة في نقاشات الاخوان على الرغم من اهمية هذا الموضوع في حياتنا وحياة اطفالنا بالمدى الطويل -وانشاء الله البركة بيكم وباخواننا البقية والي اعتقد كل الخير والبركة بيهم -- انشاء الله

اخوكم ابو رامي

[vincenzo]

صديقي ابو رامي
اذا انت هيجي قديم بمتابعة المنتدى فاكيد تتذكر سلسلة مواضيع استاذنا سلاما للعراق حول المدارس في امريكا بالاضافة الى موضوع زاك13 الدراسة في امريكا وكم موضوع اخرى مشابهه ولو اقل تميزا

[elevator]

شكرا" جزيلا" على التوضيح المفصل

   مع الشكر الجزيل

 أخوك ايليفيتر / مشترك جديد

[السفير80]

شكرا لكل الاعضاء على جهودهم الرائعة

السفير

[chaky44]

السلام عليكم
اخواني احريت المقابلة في السفارة في بغداد يوم 29-12-2009 مع عائلتي الكل 5 نفرات و كان المقابلة سريعة و سهلة و الحمد لله و سالت عن مدة الانجاز و كلي القتصل اطول اسبوعين و ترجع الجوازات الك عبر الدي اج ال
اليوم صار الي 56 يوم و اني انتضر و ماكو شي فما اعرف شنو التالي او مدة الانجاز
علما اني رفضة استلم المساعداة من تاكليف السفر الى اخرة يعني كلش على حسابي مالي علاقة ب اي او ام
الي عندة ايضاح ارجو منة الاتصال على بريدي و النشر عبر هذا الموقع لتستفيد الاخرين
شكرا
rose.group@yahoo.com

[patrairaq]

مررررحبا ششبااب هل يمكن احد ينصحني شنوو الي اسوويه في ولايه نيوريوك ؟؟؟؟؟؟؟ من ناحيه المساعدات والمنظمات

[ابن ميشكان]

الى الاخ vincenzo
انا اعرف بانه ليس انت ولكنك تتكلم عن شخص ما اسميته الحداد فقلت لربما تكون تعرفه انت لتستطيع الاجابه على السوأل
1-توكفون بالكاونتر
تسلمون البكج الي تستلمو بالسفارة ويه الفيزه
يفتحهه الضابط
يكولك انت الكرين كارد مالتك راح يسلم ال كذا عنوان اوكي لو لا ؟
لان انت منطي هيجي عنوان
اني بصراحة كوتله اي عادي
ماعرف لو كايله لا كان يصير اغير لو لا ما عرف
اذا كنت قلت للموظف   لا     فهل هنالك اجرات مفيده لي
2- -الحل الثاني امام الاخ الحداد هو الحصول على المساعدات الحكومية من ال DSS  واللي هية
الفود ستامب 8 اشهر بحدود 250 دولار للنفر
الميدكل 8 اشهر
الكاش اللي هو 470 دولار  تدفع 150 للايجار والباقي المنظمة مجبرة تدفعلك الباقي والكهرباء والمي من المتبقي من ال470

المنظمة طلبت من الحداد انه ميقدم على الحكومي ويقدم عليهم والسبب واضح لأن بالاول ميدفعون كلشي اذا يلكون شغل وميكدر يرفضة وهمة الريدي لكولة شغل بس مو على مرامة ورفضة
بس الثاني غصبا ما عليهم يدفعولة بقية الايجار ووصل الامر ان يهددوة انه يرفعون تقرير الى الدي اس اس ويكلولهم رفض الشغل علمود مينطوة المساعدات
الا يستطيع ان يقوم  برفع دعوى قضائيه عليهم في حال كذبهم
عزيزي هذ هو المضمون وكما قلت لك قلت لنفسي لعلك تعرف الشخص وتسئله
وشكرا

[vincenzo]

هااااا هسه افتهمت بيا موضوع دتسأل
يابة ذولة اهل البيت حداد السيوف وماجلان وحسين وغيرهم بس انت ما ملحك عليهم

1. اذا تكله لا فلازم تنطيه العنوان البديل
بس اني ما افتهمت شنو هالوزه؟؟ يعني ليش تريد ميوصل للعنوان اللي انت ناطيه سابقا بالمعاملة؟؟

2. ماكو داعي للدعاوي لان هو البرنامج هيجي طبيعته
من يلكولك شغل لازم توافق واللا اكو شروط "جزائية" من ضمنهه انه شوية يضيقون عليك
وهو هذا سبب ترتيبي للموضوع بوقتهه قبل سنة تقريبا
حتى ربعنه يعرفون شوراهم هناك

بالمناسبة استمر بقراءة المواضيع القديمة اذا عندك وقت لان كلش هواي راح تستفاد وتتعرف على هواي ناس رائعين جانوا موجودين بهالمنتدى في يوم من الايام

وتدلل واحنه بالخدمة

[ابن ميشكان]

شكرا يا اخ vincenzo
على المعلومات

[ORCA]

هااااا هسه افتهمت بيا موضوع دتسأل
يابة ذولة اهل البيت حداد السيوف وماجلان وحسين وغيرهم بس انت ما ملحك عليهم

1. اذا تكله لا فلازم تنطيه العنوان البديل
بس اني ما افتهمت شنو هالوزه؟؟ يعني ليش تريد ميوصل للعنوان اللي انت ناطيه سابقا بالمعاملة؟؟

2. ماكو داعي للدعاوي لان هو البرنامج هيجي طبيعته
من يلكولك شغل لازم توافق واللا اكو شروط "جزائية" من ضمنهه انه شوية يضيقون عليك
وهو هذا سبب ترتيبي للموضوع بوقتهه قبل سنة تقريبا
حتى ربعنه يعرفون شوراهم هناك

بالمناسبة استمر بقراءة المواضيع القديمة اذا عندك وقت لان كلش هواي راح تستفاد وتتعرف على هواي ناس رائعين جانوا موجودين بهالمنتدى في يوم من الايام

وتدلل واحنه بالخدمة

مشكور اخي

[** AL SHAEEA **]

مشكور اخي vincenzo مجهود رائع