السلام عليكم ورحمة الله وبركاته....
تحية طيبة لأعضاء المنتدى المحترمين...
اكتب لكم من استراليا بعد وصولي أليها قبل أربعة أشهر لأعطي بعض المعلومات عن استراليا من خلال تجربتي الشخصية...
1- استراليا جوها مقبول وجميل في اكثر الاوقات,اتشوف اربع فصول باليوم...والطبيعة حلوة اهنا.
2- الحكومة الاسترالية الحالية رائعة جدا في تعاملها مع الناس هنا خاصة اللاجئين.
3- المساعدات التي تعطيها الحكومة للاجئين عن طريق سنترلنك هي (المبالغ بالدولار الاسترالي):
• للبالغين مبلغ 820-900 شهريا وحسب تقدير الحالة...الاطفال 300 شهريا.
• مساعدة للايجار 200 شهريا.
المساعدات تستمر في حالة الدراسة وتقطع في حالة العمل اذا كان الراتب اكثر من مبلغ المساعدات...والسنترلنك حريص جدا بمتابعة الناس حتى لا ياخذون شي من غير حق.
4- المعيشة مناسبة والايجارات غالية.اقل ايجار لشقة بسيطة هو 1000 دولار شهريا.
5- بالنسبة للاجئين فيزة 200 الدولة اتسكنهم بسكن مجاني لمدة شهر وراها لازم يدفعون او ياجرون غير سكن وللفيزة 200 و202 تنطيهم اثاث مقبول يبدؤن بيه حياتهم اهنا,حسب ما سمعت المفروض قيمة الاغراض 5000 دولار استرالي,لكن بالواقع قيمة الاغراض اقل وما اعرف شنو الفلم.
6- بالنسبة للتعلم,باستراليا يطلبون الشهادات ويعترفون بها بشكل غريب,بالنسبة الي رحت لجامعة UTS وبكلوريوسنا العراقي بالهندسة طلع مكافئ وممكن اقدم على ماجستير او دكتوراه لانه عندي ماجستير. الدراسة اهنا كلش اتفيد بالحصول على عمل مناسب ورفع مستواك المعيشي لاحقا بس لازم تعرف اش تدرس لانه من الممكن ان تغير اختصاصك اذا حبيت....والدولة اتشجع الناس على الدراسة.
7- شهادات الخبرة مهمة جدا,ومعترف بيها,ويبقى الحصول على خبرة داخلية وهاي تتحصل من خلال العمل او الدورات الي اتوفرها الدولة من خلال التيف.
8- توفر العمل قل بالنسبة للي مستعجل ويريد يشتغل أي شغلة بعيدا عن شهادته,خاصة شغل السكيورتي سريع وسهل.وارقى شغل هو الطبيب الي يحقله باليوم يشوف 25 مريض ياخذ عن كل واحد 36 دولار (او 26 ما متاكد) من الحكومة,واذا خاص فاكثر....وبعد المجال الطبي وما يلحق بيه بقية الشغلات تقريبا متقاربة بالدخل والي ياثر تميز الشخص.
9- طبعا مراجعة الطبيب مجانية,الحكومة هي الي تدفع للطبيب وتكدر اتشوف 50 طبيب باليوم ومحد يكلك ليش,وممكن اشعة اتكلف مئات الدولات اتسويها بسعر رمزي لانه الدولة تدعم.
10- الاطفال يهتمون بيهم جثير خاصة بالمدراس ويعتبروهم الاستثمار الحقيقي.
11- الحكومة الاسترالية تحترم الخلفيات العرقية لكل فئة وجالية وما تتدخل بعاداتها وتقاليدها بشرط ما اتكون ضد القانون وما اتكون مؤذية للغير,يعني البس الي اتريده ,واتدين بديانتك اشلون ما اتريد محد يجي معاك ما طول ما بيها اذية للمجتمع...ومو ضد القانون.
12- استراليا بلد غني,وقد اثبتت قوة اقتصادها بالازمة الاقتصادية الي ضربت العالم,وكثير من الدراسات خلتها بالمركز الاول من ناحية التعامل الجيد مع الازمة (لحد الان طبعا).
بالنسبة للامور الاجتماعية واسلوب الحياة,فاني عندي نقاط سلبية,وبالتاكيد قصر الفترة وتواجدي باماكن معينة من سدني غير كافية,ولكن هاي نقاط يشتركون بيها معاي كثير من اللاجئين والمقيمين العراقيين ومنها امور تنطرح بوسائل الاعلام يوميا ,وتبقى هاي النقاط مسالة شخصية ويجوز تتغير بالمستقبل,ويجوز غير ناس ما تهتم لهاي الامور,ومن النقاط:
1- انتشار العصابات والجريمة والمخدرات والفساد الخلقي حتى بالمدراس بعكس الصورة الي ابالنا عن استراليا هادئة نظيفة....ومع هذا بالتاكيد هي اقل من غير بلدان بالعالم.
2- انتشار التميز العنصري بشكل واضح,على الرغم من انو استراليا بلد المهاجرين الا ان العنصرية موجودة بقوة.
3- ولانها بلد مهاجرين وناسها لملوم اتحس ماكو رابط استرالي يجمع الناس واتحس قلة بهذا البلد قلبهم عليه,كلمن جاي يستفاد ويبني مستقبله ويجمع افلوس وما يفكر بغير شي,واكثرهم يحولون لبلدانهم الاصلية,والكل اتفكر اتجيب اقاربها وناسها حتى يكثرون هينا ويسيطرون.
4- اغلب الاستراليين مغرورين وشايلين خشمهم,وخاصة الي جايين من بلدان تعبانة وما جانوا شبعانين خبر ,عبالك ملكو الارض وما عليها ما صارو باستراليا....واكو ناس طيبة بكل ملة وبكل مكان.
5- الحياة اهنا ما تشبه الحياة باوربا نهائيا,يعني هوسة وطربكة وضخب دائما واتحس الناس بعدها بعقلية دول العالم الثالث,واني استنتجت انو الناس خاصة بدولنا العربية والدول الاسيوية يحبون استراليا لانه ما راح يفرق عندهم جثير باسلوب الحياة عدا مظاهر التطور المادية...ويمكن هاي نقطة ايجابية عند جثيرين.
6- استراليا بلد متطور,لكن مو متطور جدا مثل بلدان اوربا.
ومع هذا,بالتاكيد تبقى استراليا وحدة من الدول الممتازة للاجئين....وبالمناسبة اهوايا اهوايا عوائل عراقية دا توصل استراليا هاي الفترة.
واعتذر عن الاجابة عن أي سؤال في الوقت الحاضر لانشغالي...مع تحياتي وتمنياتي الطيبة للجميع بالموفقية وراحة البال.
