شلون مزاجك اليوم؟؟؟؟؟

[athraa2009]

اجمل تحية لعيون اغلى اصدقاء .....

حبيت انه نتشارك بكتابة حالة مزاجنا كل يوم يعني اول  متدخل للمنتدى اكتبلنا عن مزاجك يعني فرحان زعلان ضايج والى اخره وياريت تكتب النا السبب ومو شرط تكتب حالة مزاجك بالكتابة ممكن تعبر عنه بصورة او شعر او مقطع من اغنية......

وراح ابدي اني اول ومزاجي اليوم تنطبق عليه اغنية قاسم السلطان
شلونك ليش تسألوني مامرتاح تشوفوني ليل يروح ويرجع ليل واني مدمعات عيوني 

اتمنى اشوف مشاركاتكم الحلوة

ولكم مني كل الود
اختكم
عذراء

[زهرة القرنفل]

هلا والله

عاشت الايادي اولا

وثانيا راح اشارك موضوع حلو

مزاجي اليوم عادي لازين ولا موزين

وعلى كولة اليسا

صعب اقول على اي حاكة بحسها ومش معقول اوصف مشاعري دي كلها

[دكلص]

موضوع حلو  اختنا عذراء عاشت ايدج
 

وطبعا اني اليوم مزاجي كلش موزين والسبب هوة يومية جاي ينسحب عضور من اسرتنا 

واليوم انسحبت اختنا عبير الحب منهيج اني هواية مزاجي موزين اليوم



واكول 


مرات اشوفك حلم مرات اشوفك طيف يل بييك برد الشتا يل بيك حر الصيف

[الجوهره]

حبيبتي عذراء تسلمين على هذا الموضوع الحلو وفعلا الواحد كل يوم مزاجه شكل يوم فرحان يوم زعلان
وحلو لما الواحد يدخل يعبر عن مزاجه تسلمين ياورده

وانا اليوم مزاجي على كولت اخوانا المصرين كويس و الحمدلله على كل حال

واتمنى لكي الموفقيه حبيبتي عذراء


    الجوهره

[ابو خالد]

اوووووووه عفيه ورده اختنا الغاليه عذراء مبدعه والله وعاشت ايدج على الموضوع

انا اليوم الحمدلله مزاجي رايء على الاَخر يعني رايق
فراح اكول هاي الاغنيه مالت عبداللحليم حافظ

على شان احنا مع بعضينا
واول مره لوحدينا
ولا حدش يبص علينا
غيــــــــــــــــر ضحكة البنا وعنينا

[YOSRA]

موضوع كلش حلوة حبيبتي عذراء عاشت ايديك
واتمنى لك الابداع والتميز والتالق في كل شئ .

وبصراحة مزاجي اليوم مو زين حزينة ومقهورة
من الي ديصير بالمنتدى لان داحس اكو اعضاء
ظل خاطرهم من بعضهم بس مديبينوها بس اني احس بيهم .
هذا هو مزاجي مع احساسي اليوم .
والله يبعد اي حزن عنكم ويفرحكم انشاء الله .


مع كل حبي لك
اختك ومحبتك يسرى

[athraa2009]

منورين ورود ومشكورين على المشاركات الحلوة وانشالله دائما امزجتكم عال العال.....

وبالنسبة الموضوع الانسحاب اتمنى كل عضو ناوي ينسحب يفكر بأخوانه واصدقائه الي تعودوا عليه وحبوا وميخسر قلوب تحبه ويبتعد عنهم بلحظة غضب وبالنسبة الاختنا عبير واخيرا قررت تبقى وهذا الشي ايجابي ودفعة معنوية النا وانشالله منفترق ابد ....

اما بالنسبة المزاجي اليوم يعني الحمد لله مروقة بدون سبب كعدت الصبح الجو مطر يمنا واني احب المطر هواية واحس بالامل لما يجي المطر

[زهرة القرنفل]

مزاجي اليوم حلوووووووووو لان البارحة سمعت صوت البلبل وهو يغردلي

[الجوهره]

هلا والله بيكم يااحلى اخوات واخوان
والله ياعذراء اليوم مزاجي نص ونص على كولت نانسي عجرم

حبيبي قرب بص وبص بص زعلان ازعل نص و نص نص
لحسن حبعد ابعد اه ونص وحتبقى انت اكيد خسران
مفيش حاجه تكي كده اهدى حبيبي كده
وارجع زي زمان

   الجوهره

[ابو خالد]

اليوم مزاجي الحمدلله عال العال ..لان اليوم فتحت المنتدى وشفت مواضيع حلوه الى اخونا كيتار والحمدلله راجع النا بقوه  واكو عضوه جديده روتانا هم جاي تشارك وتعلق حلو وانشالله الى الامام ونحن في تقدم

واليوم اغني هاي الاغنيه

حبك بحر ماله حدود... واسمك بكلبي موجود
وانتظرك طول العمر... واكظي عمري كله وعود

[athraa2009]

امممممممم مزاجي اليوم جان عادي قبل ماادخل للمنتدى بس لما دخلت شفت هواية مواضيع فكاهية وخفيفة دم مثل موضوع القشب  وضحكتني وحسيت نفسي مرتاحة هسة الحمد لله

[زهرة القرنفل]

هلو شلونكم احباب
مزاجي اليوم حلو

واغنية اليوم

حلو حبك الي حلو خوفك علية

[ابو خالد]

هلو احبابي شلونكم اليوم والله مزاجي اليوم مو كلش زين لان لابتوبي مادري شبيه اشو من افتح الشاشه يكوم يلمض مثل نجماتي شلون تلمض ومادري شنو القصه وانقهرت لان زوجتي كامت تضحك علي وتكول هذا لابتوبك الي خابصنه بيه وراح اغني هاي الاغنيه اليوم

شالو ..مابعد نلكاهم
هما الي نسونا ...شلون ننساهم
راحو لغير احباب حبهم طلع جذاب

[زهرة القرنفل]

اشو اليوم جان مزاجي زين نمت وكعدت صار مزاجي مو زين ابد وهسة اني مزعوجة

[ابو خالد]

سلامتج اوتافيا قبل شويه مزاجك زين خاف طكوج عين ههههههههه عندج العافيه انشالله

[الجوهره]

هلا والله بيكم وبمزاجكم هههههههه والله اليوم مزاجي مش ولا بد من ورا بنتي لان خبصتني وهي تكولي درسيني درسيني حتى مللتني كتلها هاي دروس تقوي وهشكل لو جامعة شلون ماتخليني اشوف دربي
والله يعني هههههههههههه
سلامتك حبيبتي زهرة القرنفل خير شبيه مزاجك هاي بس نمتي وكعدتي وصدك على كولت ابوخالد خاف طكوك عين سلامتك من الاه


         الجوهره

[YOSRA]

هاي شلونكم اني مزاجي اليوم فوك النخل لان القمر اكتمل
واني الشئ الي اتفاءل به بالحياة من وانا صغيرة هو القمر
وما اعرف ليش .واتمنى للجميع مزاج حلو دائما وربي يزيل كل
هم عنكم ويد الرب معكم .
مع كل حبي للجميع وقبلاتي لصاحبة الموضوع الرائعة  
اختكم ومحبتكم يسرى

[زهرة القرنفل]

هلو شلونكم

مزاجي اليوم معكر ومرهقة كلش

وداكول ااااااااااااااااااه

والله ياجوهرة ماادري شبيا اشو احس بوجع بكل جسمي وتعبانة حيل ماادري ليش يمكن عين ابو خالد صابتني او شكد مااحجة عني بالتقشيب ههههه

[athraa2009]

هاي يا ورود منورين

منورة لبي يسرى واني هم احب منظر اكتمال القمر بس يكولون صار خسوف القمر هالليلة بس مشفته ؟؟

سلامتج اوتافيا معندج الا العافية وهاية اكيد التعب من عملية التجميل الي سوتلج اياها الجوهرة 

اني مزاجي اليوم حلو واحس روحي متفائلة وانشالله خير

[الجوهره]

هلا بيكم يااحلى اعضاء والله اليوم مزاجي رايق رايق والف الحمدلله
وسلامتك اوتافيا من العين والتقشيب


                 الجوهره

[ابو خالد]

هلو شلونكم احبابي انا اليوم الحمدلله مزاجي تمام
وسلامتج اوتافيا من العيون وانا لاتخافين مني عيوني بارده وعندج العافيه كلشي ولا اوتافيا شعدنا غيرج
وانشالله مزاج الجميع رايـــــــــــــــــــــق

[زهرة القرنفل]

ترة  ياجماعة اختكم مزاجها كلش سيء اليوم وماادري شبيا

مادري شبيا ياربي

[athraa2009]

اني اليوم نعسااااااااااانة وخاملة ماعرف شبية

وسلامتج اوتافيا انشالله غيمة صيف وتزول ويتعدل مزاجج بأسرع وقت

[ابو خالد]

شنو خير هاي شبيكم اوتافيا وعذراء مزاجكم مومضبوط  انشالله مزاجكم دوم رايــــــــــق


انا والله اليوم مزاجي برتقالي لان زوجتي عافتني وراحت يم صديقتنا بالمستشفى وطاحت مسؤلية الجهال براسي

[YOSRA]

حبيبتي عذراء ما شفت المشهد حرامات فاتني مشهد خسوف القمر

اني اليوم مزاجي مو زين كلش حزينة لان اكو انسان ابتعد عني

.

[زهرة القرنفل]

شكرا حياتي عذراء والله ستجاب الج  والى ابو خالد

اليوم مزاجي حلو

حياتي يسورتي يسرى شبيج انشاءالله تفرحين لبي انتي

[الجوهره]

هلو شلونكم حبايبي الحلوين وانا الوم مزاجي متعكر حيل ليش مااعرف هههههههههه


          الجوهره

[ابو خالد]

انا اليوم مزاجي نص نص لان اليوم انكطع النت عندي وضجت وماعرفت السبب وبعدين طحت بالعله طلع الواير مكطوع والحمدلله سويته وانا اصلا يوم الجمعه اتكئب لان السوق والمحلات يمنا معزله بهذا اليوم وبالنسبه الى اختي يسرى لاتضوجين واكو مثل يكول ياريت تكون عني بعيد بس تكون سعيد وانشالله يرجعلكم من جديد

[YOSRA]

حبيبتي اوتافيا الله شكد حلو كلتي اسمي يسورتي الله الله
هاي شكد محد كايلي هذا الاسم بس اختي جانت تصيحين به
وهسى هي بالعراق واني هواية مشتاقة الها موووووت
صدكيني دمعتيلي عيوني .

وشكري وتقديري الك اخي الغالي ابو خالد شكرا لمشاعرك الطيبة
دائما احس وكانك تعرف شبيه كل واحد منا واكيد ياريت كل بعيد يكون سعيد .

اتصور عرفتو شلون مزاجي اليوم ؟؟؟؟؟

[زهرة القرنفل]

ولايهمج يسورتي  بعد من هسة اني اختج واني اصيحج يسورتي واني هم اشتاقيت لخواتي الي بالعراق والخارج

مزاجي اليوم حلو

[rotana]

شكرا عذراء موضوع حلو اكيد مزاجي اليوم متعكر سني ديوجعني واليوم وباجر ماكو دكتور 

بس مع هذا انا كاعدة اسمع اغنية سيف شاهين  ما انساك لا ما انساك كل عمري اظل اهواك

                                                          روتانا

[الجوهره]

هلو شلونكم شخباركم اليوم مزاجي لابئس بيه يعني ماشي حاله والحمدلله 


                الجوهره

[زهرة القرنفل]

مزاجي اليوم نص نص

[ماهر الراوي]

اختي العزيزة دائما عذراء ...شكرا لموضوعك الجميل والرائع والممتع ..

اني اليوم وبروجوعي لاجمل اسرة اكيد راح يكون مزاجي رايق وممتع ...شكرا عذراء مرة اخرى

[الجوهره]

هلا ومية هلا برجعت اخونا ماهر وحمدلله على السلامه

انا اليوم مزاجي بين بين يعني لامتعكر ولا مبسوط والحمدلله على كل حال


           الجوهره

[ابو خالد]

انا اليوم مزاجي الحمدلله كويس اوي اوي اولا ..لان رجع اخونا ماهر النا من جديد
وثانيا لان اليوم ام خلودي سوتلي اكله هنديه احبها

[روزماري]

تسلمين عذراء عزيزتي على موضوعج الي ملينا حس وجمالية وأعذريني على تأخيري في المشاركة


أنا عن مزاجي لليوم لأباس به دافي يعني لا حار ولا بارد

[زهرة القرنفل]

مزاجي جيد اليوم

[الجوهره]

مزاجي مزاجي مزاجي متقلب ساعه زين وساعه مش ولا بد ههههههههه


            الجوهره

[YOSRA]

هاي شبيكم يا غالين اشو كلكم  الصور مالتكم دموع ليش ؟؟
الله يبعد عنكم كل دموع الحزن يارب وتكون ايامكم افراح ومسرة

اني اليوم مزاجي يعني مثل مايكول عمر ذياب انا عايش ومش
عايش . يعني زين ومو زين .

[ابو خالد]

انا اليوم احمدالله مزاجي كويس وزين وجاي اضحك ومرتاح وتنطبق علي هاي المقوله

اضحك والعله بكلبي خفيا

[روزماري]

مزاجي اليوم مثل الحيران

[hananesho]

اني اليوم مزاجي الحمد الله ونشكر الله على كل كلشي...

[الجوهره]

مزاجي متعكر ومعدله تحت الصفر والحمدلله والشكر


            الجوهره

[روزماري]

مزاجي اليوم صامتة

الله بلعد عنج ياجوهرة أي حزن او تعكير ويهدي بالج حبيبتي

[hananesho]

اني مزاجي اليوم جنت شوية ضايجة ما اعرف شنو السبب

[rotana]

ليش عزيزتي حنان ضايجة والدنيا ما تسوى افرحي افرحي لبي ذبي وراج ومعليج

 وتذكري دائما انو اكو ناس يحبوج هواية      وانا احب اهديلج اغنية يارا صدفة 

                                                                     روتانا

[sandy 88]

هلو لبي حنان ليش ضايجة عزيزتي شوفيلج شي والتهي بيه
ترى اني هم اليوم جنت شوية ضايجة بس هسه مزاجي كلش زين ولا كأنه جنت ضايجة
ما ادري يمكن طبيعتي هيجي انسى بسرعة وما اخلي شي بقلبي
حنان تدرين شتسوين اذا عندج قصة معينة اقريها وراح تنسين وشوية كعدي بالحديقة
واني راح ادزلج مجموعة نكت عالخاص



         قبلاتي 
     ساندي(نجمة المنتدى)

[ɱЯ.ŠɧДЯǾkəəή]

ثانكس عذورة عاللعبة الحلوة
مزاجي اليوم

تعبان مممم

[ماهر الراوي]

اني مزاجي متعكر وتعبان ...بس ما استسلمله لازم اتفائل...

[روزماري]

مزاجي صمت قاتل

[hananesho]

اشكر ج اختي العزيزة روتانا يا وردة واني اشكر الناس الي يحبوني

والله لا يحرمني منهم واشكرج حياتي على الاغنية الحلوة اكيد الدنيا ما تسوى شي

واني هم راح اهديلج احلى صورة

[hananesho]

شكر ا لبي ساندي الوردة على كلامج الحلو والله لا يحرمني من هيجي خوات عزيزات

واشكرج على كل شي وراح اسوي مثل ما كلتي حياتي .

  وانشاء الله اليوم يكون مزاجي احسن من البارحة

[الجوهره]

هلو حبايبي الحلوين انا اليوم مزاجي عال العال والحمدلله والشكر تسلمين اختي الغاليه روزماري على كل كلمه طيبه لانك  تحملين قلب طيب
ويارب يبعد الحزن عنكم وانشالله دوم فرحانين يارب

[ابو خالد]

انشــــــــــالله اصدقائي الحلوين مزاجكم دايماَ توب ومرتاحين

وانا اليوم مزاجي الحمدلله تمااام وايوم راح اغني هاي الاغنيه اشو احبها ودايماَ ارددها

يا عشكنه             فرحة الطير اليرد لعشوشة عصاري
يا عشكنه             ويا عناكيد العنب ونحوشهه عصاري
كاعنه فضة وذهب واحنه شذرهه
ويا حلاة العمر لو ضاع بعمرهه
يا عشكنه يا عشكنه يا عشكنه

ايدي بيدك عالمساحي الدنيا تموز وشمس
وليلي اضوا من صباحي والوكت زفة عرس وانتم كملو الباقي

[زهرة القرنفل]

مزاجي متعكر

[sandy 88]

 هلو لبي اوتافيا ولا يهمج لبي مو بس انتي مزاجج معكر
اني هم انضميت لنفس القائمة لان مزاجي كلش معكر



       تحياتي
    ساندي(نجمة المنتدى)

[ماهر الراوي]

واكيد اني هم معكر فوووووووووول..........

[الجوهره]

خير خير سلامتكم انشالله من المزاج المتكر ويارب يصفي بالكم
تريدون الصدك انا هم مزاجي اليوم نص ونص بس الله كريم انشالله

[ابو خالد]

يامعودين هاي شبيكم اليوم مزاجكم متعكر هاي كله من وره الحبيات عوفوها تعكر المزاج ههههههه شربو عصير ليمون حتى يروق دمكم


انا اليوم الحمدلله مزاجي حلو يعني مو تحسدوني لان انتم مزاجكم متعكر

[YOSRA]

اليوم راح اعبر عن مزاجي بهاي الاغنية لان كثير احبها
للفنان صابر الرباعي



الله على الدنيا خانت ليالينا
مرة تضحكنا ومرة تبكينا  

ان مرة صفيتلك كم مرة ما تصفى
تبخل و ما تدي تحرمنا من اللهفة
نصبر و بنداري في قلوبنا الشكوى
و نقول يا دنيا يا دنيا على البعد ما نقوى

مرة تضحكنا ومرة تبكينا  
الله على الدنيا خانت ليالينا
مرة تضحكنا ومرة تبكينا
الله على الدنيا

الشكوى ما تنفع يا اهل الله
الله يصبرنا
و شوفة الاحباب اي والله تجبر خواطرنا
متى القلوب تهين بعد الجفا ترتاح
يا دنيا ملينا يا دني اجراح فوق جراح

مرة تضحكنا و مرة تبكينا  
الله على الدنيا


اختكم المحبة لكم دائما
يــــــــــــــســـــــــــــرى

[hananesho]

شلونكم يا احلى اعضاء المنتدى اليوم اني مزاجي شوية احسن

1_  لان اليوم الاخت العزيزة  ساندي دزتلي هواية نكات عل الخاص واشكرها من كل قلبي

2_لان اني اليوم صرت عضو مميز  ههههههههههه  وشكرا للجميع .

[sandy 88]

 صباح الورد اني مزاجي اليوم كلش زين الحمد الله
ههههههه هاي شنو ابو خالد حبيات مو ؟؟؟؟؟؟ بس اني شربت عصير تفاح وصرت زينة
على الجايات اجرب الليمون

 _ حبيبتي حنان اولا احب اشكركٍ عالوردة الحلوة  وثانيا تدللين لبي اني مسويت شي
    وثالثا الف الف مبروك تستاهلين تكونين عضو مميز يا وردة


          تحياتي القلبية
       ساندي(نجمة المنتدى)

[ابو خالد]

صدك مبروك ياحنان صرتي عضوه مميزه وروزماري هم صارت عضوه مميزه والله انا خايف لان راح توصلولي بنجومكم ...وشدعوى عليج ساندي تدزين نكات على الخاص ليش ماتخلينه على العام حتى نضحك وياكم يالله بس تستاهل اختنا حنان

[YOSRA]

حبيبتي حنان اني ميحتاج اباركلج لان اول وحدة باركتلج
بس يلى ميخالف هم مبروك بس على شرط تعوفين حرف الكاف
بحاله ههههههههههههههههههههههه.

[athraa2009]

هاي حبايبي شلونكم مشتاقتلكم هواية ومزاجي اليوم حاااااااااااااااااايرة الابعد الحدود

حايرة والشوك بين عيوني 

[زهرة القرنفل]

مزاجي حلو اليوم بس الحلو مديحجي ويانا؟

[نـور]

عاشت الايادي على الفكرة الجميلة

ومزاجي اليوم

ضاااايج اشوية

[الجوهره]

مزاجي اليوم هادي مثل البحر الله يستر بس لاتصير عواصف ههههههههههه

[sandy 88]

 اني مزاجي اليوم كلش زين الحمد الله والشكر


     
           تحياتي
     ساندي(نجمة المنتدى)
 

[ابو خالد]

انا اليوم كلش ضايج لان ماطلعلي حرف ال((ك)) وطلع لساندي وساندي ماكالت احبك الى اي شخص وضجت ههههههههههه

[YOSRA]

اني اليوم مزاجي هادئة وفرحانة والفرح دينبع من داخل قلبي
ويركص على دقاته الحلوة واليوم ضحكت ضحكة من قلبي اكيد
حتى عيوني دمعت دموع الفرح اكيد واتمنى للجميع مثل هاي الفرحة .
مع كل حبي لكم
يـــــســـــــــــرى

[ابو خالد]

بالعافيه اختي يسرى على الضحكه الحلوه وانشالله ايامك كلها ضحك وسعاده


انا والله اليوم صدك فرحان لان رحت للاقامه ومددولي الاقامه مالتي كم شهر لان كنت خايف ماينطوني تمديد لان كالو هاي الايام متصعبين بس الحمدلله هانت

[sandy 88]

 هههههه ابو خالد الوردة ارجع للموضوع وشوف كلمة احبك اللي كتبتها

[ابو خالد]

شفتها كاتبتها احبك وحدرها كلمة ساندي ههههههههه يعني ما هاديتها الى اي شخص

[زهرة القرنفل]

مزاجي كلش عال اليوم

[ابو خالد]

مزاجي اليوم الحمدلله كويس لان والدتي اتصلت علي  من العراق وكالت راح اجي يمك كم يوم وانا فرحان

[الجوهره]

الحمدلله اليوم مزاجي رايق

[hananesho]

اليوم مزاجي يعني عادي لافرحانة ولا حزينة .

[زهرة القرنفل]

مزاجي اليوم مو رايق

[زهرة القرنفل]

وهسة مزاجي صار بعد اكثر مو رايق

[نـور]

اليوم مزاجي نص ونص زين

[ماهر الراوي]

مزاجي اليوم مع مزاج احبائي الاعضاء واعتقد مزاجهم كلش حلو وانشالله يبقى دائما حلو ورايق يا رب لذالك اني هم مزاجي حلو ورايق لان احنة اسرة واحدة مو لو مو مو ...

[YOSRA]

اليوم مزاجي ولو تعبانة شوية بس فرحانة ..
لان بعد يومين راح يوصل انسان قريب علي
هواية وراح اشوفه وطبعا صارلي سنة ونص
ما شايفته والله يفرح الجميع اكثر واكثر .

[الجوهره]

اليوم مزاجي كلش عادي والحمدلله والشكر

[ابو خالد]

color=purple][/color]انشالله يااختي يسرى تلتقين بجميع احبابك

انا اليوم مزاجي كان شويه متعكر وبعدين ضربته اوتي وكويته وصار مضبوط والحمدلله

[زهرة القرنفل]

مزاجي اليوم كلشششش حلو والحمدلله يارب

[روزماري]

هايات ولاسلامات للجميع وتهاني وتبريكات ألي ولحنونة أختي صرنا مميزات وانشالله نعبر للألف نجمة يلا حنان عليهم هههه

 واليوم راح أعبر بمزاجي بهل أغنية

لديانا حداد

ياهل العشق دلوني وين الصبر ينباع

لشري الدمع لعيوني

[نـور]

اليوم المزاج


كووووول


تحياتيــ

[زهرة القرنفل]

مزاجي اليوم عادي

[الجوهره]

هلو شلونكم وشلون مزاجكم هااي شنو روزماري اليوم الاغاني كلها مال ديانا حداد وفعلا حلوات كولش

وانا اليوم مزاجي كلش عااادي وهادئ بعض الشي

[د.الهام 1949]

عذراء موضوع جميل سلمت يداكي

وكل يوم مزاجي جميل لان كنت اتقرب كم من بعيد لكن اليوم مزاجي اجمل لان شاركت معكم



امك الهام

[ابو خالد]

اهلا بيك اختنا الغاليه د.الهام وانا جدا سعيد بمشاركتك معنا

وانا اليوم مزاجي الحمدلله مضبوط لان اليوم شاركت معنا اخت جديده وبنفس الوقت اليوم دزولي تمن عنبر من العراق وانا احب تمن العنبر

[YOSRA]

اليوم مزاجي فرحانة بس قلبي مكسورة الفرحة به
فرحانة لان اخويا راح يوصل اليوم النا بالسلامة .
يجوز راح اغيب من المنتدى لفترة لان راح ننشغل
هاي الايام هواية راح اشتاق الكم هووووووووواية

.

[sandy 88]

  حبيبتي يسرى اكيد كلنا راح نشتاقلج واتمنى ان تمضي لحظات سعيدة
ويا اخوج اللي كلنا نعرف شكد تحبيه والله يخليكم لبعضكم

بالنسبة الي جان مزاجي زين اليوم بس قبل شوية صار مو زين
لان ضيعت فرصة سفر ل جنيف لمدة 3 اشهر 




            ساندي

[ابو خالد]

والله يحز بنفسنا حيل ان نفارقك يااختي يسرى حتى لو كانت ايام بس العذر وياج واخوج هم اله حق بيج ولاتغيبين عنا كثير لاننا احنا هم اخوانج والنا حصه بيج وحاولي لاتعوفينا مره وحده من تصير عندك فرصه شاركي معنا وانشالله نغر عينك بلقاء اخيك والله يسعدكم ويلم شملكم


اختي ساندي حسافه والله الفرصه الي راحت منج وانشالله رب العالمين يعوضك بغيرها

[روزماري]

مزاجي لليوم لابأس رأيقة ولكن حسيت بضيق من أجل أختي ساندي حبيبتي لابأس الأيام أمامك والفرص كثيرة ولعله خير حبيبتي لا تسأمي أبدا

[ابو خالد]

اووووووووه مزاجي اليوم فول اوبشن ومرتاح جدا والحمدلله

واليوم جاي اسمع اغنية كاظم الساهر((تتبغدد علينا واحنا من بغداد))

[الجوهره]

اختي الغاليه يسرى يحز بنفسنا تفاركينا وانشالله نشوفك على خير ويارب يوصل اخوك بالسلامه وتقضين وياه اجمل الاوقات يارب
حبيبتي ساندي انتي بعدك وانشالله تعوضيها بفرصه احسن منها واتمنى لكي التوفيق يارب
والحمدلله اليوم مزاجي ريلكس وهادي

[نـور]

اختي العزيزة يسرى اكيد افراكك علينا عزيز واتمنى ان ترجعيين لنا بأقرب وقت وانشاء الله اخوج يوصل بالسلامه وتفرحيين بشوفته

واختي العزيزة ساندي اكيد الفرص اهواية والجايات هم اهواية و اتمنى ان تكون عليج خير

واني اليوم مزاجي زين

تحياتيــ

[زهرة القرنفل]

مزاجي اليوم موزين راسي يوجعني
حياتي ساندي كل مانع خير لاتضوجين ويسرى لبي مو تغيبين هواية عنا راح نشتاقلج والف الحمدلله بالسلامة وصول اخوج

[sandy 88]

  شكرا  احبتي لمواساتكم الي ( ابو خالد ويسرى والجوهرة واوتافيا والعراقي الغيور)
الله لايحرمني منكم هو صوجي لان جتي فترة اهملت الرسائل اللي تجيلي عالايميل
هههه والسبب الثاني عندي 3 ايميلات واحد شخصي خاص للعمل وواحد للعائلة والاصدقاء
 وواحد للناس الغربة لذلك راحت علية يلا ميخالف كل مانع بيه خير

 بالنسبة لليوم الصبح جان مزاجي سيء بس الظهر بال 3 تحسن



 
             تحياتي
       ساندي(نجمة المنتدى)

[hananesho]

مزاجي اليوم كلش تعبانة .
واحب اكللكم وردتنا يسرى تسلم عليكم هواية وتكول اني مشتاقة الكم
واحد واحد ومزاجها  فرحانة وزعلانة بنفس الوكت لان هي بعيدة عنكم
وانشاء الله ترجع عن قريب .

اختكم حنان

[ابو خالد]

الله يطمنك اختي حنان على اختنا يسرى وانشالله ترجع النا بأقرب فرصه وسلام حار لها امانه توصلينه الها


انا اليوم مزاجي الحمدلله مبسوط وجاي اسمع اغنية محمد عبدو الاماكن

[زهرة القرنفل]

سلامتك حنونة
ومزاجي اليوم حلو

[الجوهره]

سلامتك من التعب حنونه الغاليه والله يطمنك لان طمنتينا على اختنا الغاليه يسرى وانشالله نشوفها على خير وسلامه يارب

وانا اليوم مزاجي عادي بالابيض والاسود هههههههههههه ماكو الوان

[روزماري]

شكرا حبيبتي حنونة على سماع أخبار يسرا وسلميلي هوايا عليها وبلغيها سلامي الحار


ومزاجي اليوم جميل جدا

[ابو خالد]

انا اليوم مزاجي مو مضبوط لان الكهرباء طافيه صارلها فوك الساعه وراح يخلص الشحن مال الجهاز وذكرونا اليوم بالعراق على انقطاع الكهرباء

[زهرة القرنفل]

مزاجي يعني مو كلش زين

[ɱЯ.ŠɧДЯǾkəəή]

ليش اوتافيا خير

مزاجي وحيد

[الجوهره]

اليوم مزاجي جيد لابئس بيه

[روزماري]

مزاجي اليوم نعسانة ههههههه

[نـور]

اليوم مزاجي زين


تحياتيـــ

[زهرة القرنفل]

مزاجي زين بس يكون احسن لمن ترجع يسرى وحنان لان حنان هم ماكو ليششششششش

[الجوهره]

والله اليوم مزاجي متقلب ساعه زين وساعه مو زين ليش ماادري

[زهرة القرنفل]

مزاجي اليوم كلش تمام

[ابو خالد]

اليوم مزاجي الحمدلله كويس وزين لان رجعت اختنا يسرى وشاركت اليوم وبنفس الوقت  اليوم جابولي رطب من البصره وجاي اكل رطب مكانكم فارغ

[روزماري]

مزاجي اليوم دوخةودوران وحاسة حالي بسفينة هو صح شعور حلو وموحلو وانشالله عارض ويزول

[ماهر الراوي]

مزاجي حلو اكيد لان خطي صار زين وكدرت ارجع واشارك وياكم

[YOSRA]

شكري ومحبتي لكم احبتي شكر من اعماق الاعماق لكم
لانكم شاركتموني فرحتي بوصول اخي الغالي الينا
اتمنى لكم اطيب المنى وربي يجمع كل بعيد باهله
واحبابه ويلم شمل الجميع لان جمعت الاحباب لها
فرحة كبيرة لا توصف بكل الكلام .
واكيد اني مزاجي اليو عرفتوه فرحانة هواية هواية
وربي يديم الفرحة للجميع .

انشاء الله يا ماهر دائما يكون خطك زين وتشاركنا بالمواضيع
لان رائيك يهمنا اكيد وكلامك دائما يكون جميل ومثل العسل
لان انت فرفورنا الحلو 

[hananesho]

اشكرج يا احلى واحن اخت اوتافيا

واني اليوم  مزاجي حلو  واشكر الله على كل شي

[الجوهره]

الحمدلله مزاجي اليوم حلو ورايق

[زهرة القرنفل]

مزاجي حلووووووووووووووووووو

[YOSRA]

اليوم مزاجي مثل ما تكول اليسا
أجمل أحساس بالكون أنك تعشق بجنون
و ده حالي معاك خلتني أعيش أيام
مليانه بشوق و غرام دوبني هواك
عاشقاك بجنون روحي أنا قلبي المكتوم
كله مناك وياك بعيش أحلى هنا حبيبي أنا يا روحي أنا

يا ويلي يا ناري قلي أزاي داري بشوقي و لهفة
قلبي بقربك حتى و أحنا سوى تتنور سنيني
و بيكبر حنيني قرب مني تعال بحضني و أملي حياتي هوى

غيرني بثواني أحساسي اللي جاني أول مرة أحس بدنيا
حلوة في عيني كدا أيه أتمنى تاني فيه كل الأماني
دنته مليت الدنيا عليي بالأشواق و الهنا
عاشقاك بجنون روحي أنا قلبي المكتوم
كله مناك وياك بعيش أحلى هنا حبيبي أنا يا روحي أنا

 

[زهرة القرنفل]

مزاجي مغيم وممطر احيانا

[نـور]

اليوم زين

تحياتيــ

[روزماري]

مزاجي اليوم صافــــــــــــــــــــــــــــــي

[hananesho]

اني اليوم مزاجي مغيم وممطر جدا جدا

[YOSRA]

الله الله من مزاجي اليوم فرحانة هواية لان صرت عمة
لان اخوية صار عندى بنوتة حلوة بس انحرمت من شوفتها
او حتى اشيلهالان اخويا مو ويانا بعيد عنا   

[زهرة القرنفل]

الف مبروك يا يسرى حياتي صرتي عمة واني من زمان عمة وخالة من عمري 10 سنوات

مزاجي اليوم مشمس

[الجوهره]

مـــــــــــــــــــــــــبروك حبيبتي يسرى على البنوته ويارب تتربه بعزكم وانشالله تشوفيها وتكولج عمه شلونج   

مزاجي لابئس بيه الحمدلله على كل حال

حبيبتي عذراء صار الها فتره ماكو عسى المانع خير يارب وترجع النا بالسلامه

[ابو خالد]

مبـــــــــــــــــروك اختي يسرى وتستاهلين تكونين عمه ويارب تلتقين بيها عن قريب وتكبر بأحضانكم وامام عيونكم وتجيك وتكول الك هذا الحلو كاتلني ياعمه فدوه شكد احبه واريد اكلمه انتي شلون عمتي بيا مافتهمتي روحي كولها يمه ياعمه ياعمه هههههههه

وانا اليوم مزاجي الحمدلله كويس ماطول مزاج اختي يسرى كويس وفرحانه لاني افرح والله لفرحكم

[روزماري]

مزاجي اليوم متفائلة وفرحة بسعادة أختي يسرا مبروك يسرا بلقب العمة الجميلة ويارب أتشوفيها وتتربي في أحضانكم ودلالكم

[نـور]

الف مبرووووووك اختي العزيزة يسرى وانشاء الله تشوفيها عن قريب امين


ومزاجي اليوم زين

تحياتيــــ

[YOSRA]

كلي شكر وتقدير لكم على مشاركتكم لي فرحتي واشكر لكم
امنياتكم الحلوة وربي يخليكم ويحفضكم ولا يحرمني منكم ابد
دمتي لي الاخوة المخلصين واني احبكم كثيراااااااااا .
ولا ادري ما اقول لكم من شدة فرحتي بكم اخوتي واخواتي
اتمنى لكم كل الخير ودامت ايامكم بسعادة وهناء .

مزاجي اليوم اكيد بعدني فرحانة وفرحة اكثر من شفت
مشاركاتكم معي بالفرحة شكرا جزيلا .

مع كل حبي واحترامي لكم .

[زهرة القرنفل]

مزاجي جيد

[الجوهره]

مزاجي اليوم جيد لابئس بيه والحمدلله

[زهرة القرنفل]

جيدا جدا

[ماهر الراوي]

مزاجي حلوووووووووووووووو

[YOSRA]

مزاجي اليوم احلى من الحلووووووووو

[الجوهره]

الحمدلله مزاجي هادي

[hananesho]

اني اليوم مزاجي يخبل وفرحانة لان سمعت خبر  كلش حلو ........

  وانشاء الله يارب كلكم تسمعون اخبار حلوة بحياتكم

[زهرة القرنفل]

مزاج اختي اليوم زين
ومزاجي هم زين

[الجوهره]

مزاجي اليوم حيل موشي

[الجوهره]

مزاجي اليوم حيل موشي

[نـور]

اليوم

مزاجـــي زيـــن

تحياتيـــ

[زهرة القرنفل]

مزاجي حلو

[YOSRA]

مزاجي اليوم مو زين لاني تعبانة هواية ومريضة .

[ابو خالد]

اوووووووووه عندج العافيه اختنا يسرى وماتشوفين شر ويبعد عنج الامراض هاي كله من وره الافراط الزايد بالحب بس انتم تعاندون وماتاخذون الحجي والنصيحه عبالكم عدوكم


انا اليوم مزاجي منيـــــح على كولة السوريين والحمدلله والشكر

[روزماري]

مزاجي اليوم رماني

وبصراحة حابة أسأل عن أختنا عذراء أخبارها وينها شكو ماكو وين أراضيها يارب ترجعلنا بألف سلامة وساندي هيا الأخرى ماكو أنشالله نسمع أخبارهم عن قريب

[الجوهره]

ماتشوفين شر حبيبتي يسرى ماعندك الا الالعافيه

اي والله حبيبتي روز عذراء صار الها فتره ماكو عسى المانع خير يارب

وانا اليوم مزاجي كلش ســـــــــــــــــيء

[زهرة القرنفل]

مزاجي سيء

[روزماري]

مزاجي اليوم أعبر بيه من خلال هل كلمات

دنيا بدونك منفى محروق النسمات

لا في سما بتصفا والوقت بحيرات

كل الدنيا منفى .. أنتي العمر الأوفى

أنتي الحب الأصفى وعذاب اللفتات

حامل عطر بلادي ع ثيابي وين مابروح

طاحونة والوادي وصوتك هالمجروح

حامل عطر بلادي شمس عيونك زادي

لون السحر رمادي بكل دنيا مشلوح

اشعاري بإيديى مثل عقودت ياسمين

ببالي غيم بلادي وعيونك هالحلوين

وجهك والأرض وحزني انخلقنا ومش عارفين

سألتك مينك انتي وانا مين ووطني مين

حامل عطر بلادي ع ثيابي وين مابروح

طاحونة والوادي وصوتك هالمجروح

حامل عطر بلادي شمس عيونك زادي

لون السفر رمادي بكل دنيا مشلوح

[نـور]

مزاجي اليوم زيـــــــــــن



تحياتيــــ

[YOSRA]

شكرا حبايبي على كل كلمة وحرف تكولوها
والنعم منكم اني اليوم زينة الحمد الله ومزاجي
عادي زين

[ابو خالد]

انشالله الجميع مزاجهم كويس يارب وانا اليوم مزاجي الحمدلله كويس ومرتاح وشبعان نوم

[الجوهره]

مزاجي اليوم وردي وزين الحمدلله

[زهرة القرنفل]

مزاجي متقلب

[YOSRA]

انشاء تكونون باحسن حال يا احبتي
اني اليوم مو زينة ابد ضايجة وروحي طالعة .

[ابو خالد]

لاء لاء يايسرتنا ليش ضايجه عندج العافيه يامعوده الدنيا ماتسوى وصرتي عمه وموزين العمات يضوجون

انا اليوم مزاجي والله زين الحمدلله بس اتمنى اختنا عذراء صاحبة الموضوع ترجع لان صار بالي وياها خطيه اكول اخاف صارتلهم مشكله لاقدر الله من ناحية اقامتهم والله يفرج عليها يارب

[الجوهره]

حبيبتي يسرى ماتشوفين شر وترى دموعك غاليه علينا اختي يارب يفرجها عليج

اي والله ابوخالد فعلا صار بالنا ويا عذراء ويارب تكون بخير وترجع النا

وانا الحمدلله مزاجي منيح

[روزماري]

لا لا حبيبي يسرا دموعج غالية وهونيها تهون عزيزتي والله لايضوج احد ولا تنزل دمعة من عيونك أنشالله تروقين وتصيرين عال العال وكليها لله حبيبتي

مزاجي اليوم واوا هههههههه

[ابو خالد]

هازا ليس واوا مزاج مال انتي روزه انسالله مافي واوا يصير زين

انا اليوم مزاجي والله نص نص لان كعدت من النوم لكيت الثلاجه عطلانه وتعال جيب المصلح ورجع المصلح وانا مالي خلك دوخة الراس

[الجوهره]

والله حتى انا مزاجي مو كويس

[YOSRA]

هاي شلونكم شكرا  الكم لان تشاركون الواحد بحزنة
اني اليوم زينة وهسى رجعت من حفلة ومزاجي حلو .

[hananesho]

مزاجي اليوم مو زين لان امي بعيدة عني

[نـور]

اليوم مزاجي نص ونص


تحياتيــــ

[زهرة القرنفل]

اليوم مزاجي جيد

[YOSRA]

مزاجي اليوم زين

[الجوهره]

مزاجي اليوم الحمدلله لابئس بيه ماشي حاله

[YOSRA]

مزاجي اليوم ابد موزين لان دائما تاتي الرياح بما لا تشتهي السفن .

[الجوهره]

سلامتك اختي العزيزه يسرى من الاه وانشالله ربك كريم ويفرجها

وانا اليوم مزاجي لونه رمادي

[★M a r t i n a★]

مزاجي اليوم حلو والحمدلله

[ماهر الراوي]

مزاجي اليوم رائع وملئ بالحب والحيويه....

[YOSRA]

شكرا حبيبتي الجوهرة
مزاجي اليوم حلوووووووووووووووو

[زهرة القرنفل]

مزاجي حلو

[الجوهره]

مزاجي اليوم لابئس بيه والحمدلله والشكر

[hananesho]

مزاجي اليوم كلش حلووووووووووو  لايوصف  اشكركم يا احلى اعضاء

[ابو خالد]

والله انا اليوم مزاجي مو شي متعكر

[YOSRA]

مزاجي اليوم حلو وفرحانة لان عيد ميلاد حبيبتي حنوش 

[★M a r t i n a★]

الحمدلله مزاجي زين اليوم

[زهرة القرنفل]

مزاجي متعكر

[زهرة القرنفل]

مزاجي متعكر اليوم هم

[امير الصمت]

مزاجي اكيد حلو ومرتاح كلش ................

[الجوهره]

مزاجي حلو ورايق والحمدلله على سلامتك اخي العزيز امير الصمت

[ابو خالد]

الحمدلله على سلامتك امير الصمت وانشالله يرجعون النا جميع الاعضاء الغايبين
وانا اليوم مزاجي زين بس شويه عندي الم بضرسي من اعالجه يكون مزاجي مضبوط حيل

[★M a r t i n a★]

مزاجي اليوم مو حلو

[YOSRA]

مزاجي اليوم حلوووو واتمنى للجميع مزاج جميل

[زهرة القرنفل]

مزاجي حلو اليوم

[الجوهره]

مزاجي اليوم لابئس بيه والحمدلله على كل حال

[ابو خالد]

انا اليوم مزاجي الحمدلله زين وكويس والحمدلله رجعت النا اختنا روزماري من جديد ونتمنى الجميع مزاجهم كويس يارب

[YOSRA]

مزاجي اليوم فرحانة لعدت اسباب

[الجوهره]

الحمدلله ان مزاجكم اليوم احسن ويارب دوم فرحانين

وانا مزاجي اليوم عادي مو ملون

[hananesho]

مزاجي اليوم حلو واشكر الله على كلشي

[ابو خالد]

مزاجي اليوم حلو وسكر زياده

[YOSRA]

مزاجي اليوم زين وفرحانة

[★M a r t i n a★]

مزاجي الحمدلله نشكر الله  عليه

[YOSRA]

اليوم مزاجي تعباني بس فرحانة لان طلعنا سفرة ...

[روزماري]

مزاجي اليوم كلش كلش مشتاقة الكم ياأحلى ناس وأشكرك أبو خالد وأني هم مزاجي زين وهادئ وسلام نفسي ومشتاقة جدا ألكم

[الجوهره]

حبيبتي روزماري واحنا هم مشتاقيلك وايد وايد والله لايحرمنا منك ومن كل الاعضاء وربي يحفظكم ويخليكم

وانا اليوم مزاجي منيح

[ابو خالد]

انشالله مزاج الجميع راااايق على الاخر ... ومبروك يسرى على السفره الحلوه
وانا اليوم مزاجي الحمدلله عال عال وفرحان لان ماما وبابا جاين بالطريق من العراق وبعد قليل يوصلون انشالله وصارلي فتره محروم من حنان الابوين وتخيلو اليوم شلون راح يصير عندي حنان هواااااي

[نـور]

اختي العزيزة روزماري احنا هم مشتاااقين الى طلتج الجميلة علينا وانشاء الله ترجعيين النا بأقرب وقت وتنورينا مرة ثانية

والف مبروووك الى اختي العزيزة يسرى على السفر الحلوة

وانشاء الله يا ابو خالد يوصلون بالسلامه والديك و تفرح اهواية بشوفتهم وانشاء الله ميغيبون عنك بعد



مزاجي اليوم زيـــــــــــن



تحياتيــــ

[زهرة القرنفل]

مزاجي زين اليوم

[hananesho]

مزاجي اليوم حلوووووووووو

[YOSRA]

اليوم مزاجي مو زين تعبانة وما مرتاحة ابد

[ابو خالد]

سلامتج اختي يسرى وانشالله مزاجك يتحسن نحو الافضل

انا اليوم مزاجي الحمدلله كلش زين ومرتاح

[hananesho]

اني اليوم مزاجي كلش حلو لان امي وصلت بسلامة وشفتها

[ابو خالد]

الله ياحنان خوش خبر وغرت عينج بشوفة امج والله يلم شملكم يارب وانا تعادلت وياج لان حتى امي اجت يمي

انا اليوم مزاجي حلو ورايق

[YOSRA]

حنوش حبيبي الحمد الله على سلامة الوالدة والله يديم الفرحة بكلبج
ابو خالد الوردة شكرا لكلماتك الحلوة وحمدا الله على سلامة اهلك


اني اليوم مزاجي زين ويسلم عليكم ههههههههه .

[hananesho]

شكرا اخي العزيز ابو خالد على كلامك الرائع

والله لايحرمك من الوالدة العزيزة ومن حنانها لان ماكو احن من الام

واشكرج يا احلى يسرى على كلمات الرائعة يا احن قلب.


واليوم مزاجي حلووووووووووووووو

[ابو خالد]

شلونكم احبابي انا اليوم مزاجي الحمدلله زين ويسلم عليكم على كولة اختي يسرى وهاي شنو هاي الايام هواي اعضاء غياب وانا اولهم طبعا هههههه

[YOSRA]

مزاجي اليوم يعني لان دخلت وشفت هواية اعضاء مموجودين
يعني مزاجي اليوم يسلم وما يسلم هههههههههههههه
شوية زعلان لان الغياب صاير هواية وابو خالد ما صدك راسا اخذها
الكلمة يسلم عليكم هههههههههههه .

[hananesho]

مراخي اليوم حلوووووووووووووووو لان شفت العضاء دخلين المنتدى

[YOSRA]

مزاجي اليوم مو زين ابد 

[الجوهره]

هلا بيكم يااغلى اعضاء وانا اسفه على الانقطاع لان ملتهين برمضان وانشالله نتواصل وياكم اكثر الايام الجايه
وانا اليوم مزاجي لونه برتقالي يعني فرش

[★M a r t i n a★]

مزاجي اليوم رايقة

[hananesho]

اني مزاجي اليوم زين

[ماهر الراوي]

اني مزاجي اليوم رايق وحلووووووو بس راح يكون افضل بهوايه من يرجعون احبائنا الغايبين كلهم واولهم صاحبة الموضوع الاخت العزيزة عذرا.... عسى ان يكون المانع خير ويرجعون جميعا باسرع وقت ...

ارق النى

[YOSRA]

انشاء الله يرجعون يا فرفور وهاي انت اول واحد رجعت
تغيب فترة وترجع وانشاء الله ماتغيب بعد لان نسجلك غياب
ههههههههههههههه .

اني مزاجي اليوم وحاليا زين واكل راسي يكول الا تسلميلي
على الكل ههههههههه .

[الجوهره]

الحمدلله اليوم مزاجي كلش حلو وفرحانه وافرح اكثر اذا الاعضاء الغايبين يرجون النا وتكمل العائله الجميله

[★M a r t i n a★]

مزاجي اليوم كلش حلو

[نـور]

اليوم مزاجي زيـــــــن نشكر الله


تحياتيـــ للجميع

[الجوهره]

اليوم مزاجي جيد جدا والحمدلله

[hananesho]

انشاء الله دائما يكون مزاكم حلوووووووووو

واني اليوم مزاجي مو حلو وشوية تعبانة

[YOSRA]

مزاجي اليوم مو زين ....

[ابو خالد]

هاي خير شبيكم ياستار بالله يسرى نعرف مزاجها ليش مو شي لان انحرمت من فد شي عزيز عليها

بس انتي حنان شبيج لالالا موخوش والله ضيجتو خلكي
وانا وياكم على الواهس هم مزاجي موشي

[YOSRA]

مزاجي اليوم حب في حب
واليوم  اخذت حريتي وراح احجي براحتي
هههههههههه

[hananesho]

مزاجي اليوم شوية احسن

[الجوهره]

مزاجي اليوم حلو لابئس بيه الحمدلله على كل حال

[★M a r t i n a★]

شوية مو زينة اليوم

[الجوهره]

مزاجي اليوم شي على شي كويس

[★M a r t i n a★]

مزاجي اليوم احسن شوية

[hananesho]

مزاجي اليوم مريضة وتعبانة شوية.

[ماهر الراوي]

سلامتج اختي العزيزة حنان من كل مرض وتعب ....

اني مزاجي اليوم حلوووووووووووووووو ........

[نـور]

اليوم مزاجي زيـــــــن نشكر الله


تحياتيـــ للجميع

[★M a r t i n a★]

مزاجي اليوم اووووووف مو زين كلش
بس هم نشكر الله

[الجوهره]

سلامات اختي حنان انشالله ماتشوفين شر
يارب يهدي بالك مارتينا

وانا مزاجي اليوم يعني زوين

[YOSRA]

مزاجي اليوم مو زين لان تعبانه

[★M a r t i n a★]

اشكركج جوهرة
مازجي اليوك الحمدلله كلش فرحانة وزينة

[hananesho]

مزاجي اليوم زين والحمد الله على كل شي

[★M a r t i n a★]

الحمدلله ياربي كلش فرحانة

[الجوهره]

اليوم مزاجي مش ولا بد على كولت اخوانه المصريين

[★M a r t i n a★]

الحمدلله كلش زينة

[hananesho]

مزاجي اليوم زين الحمد الله

[ابو خالد]

مزاجي اليوم  كلشششششششششششششش فرحان وطاير من الفرحه

[الجوهره]

مزاجي اليوم كلشششششششششش فرحانه

[YOSRA]

الله يديم الفرحة بحياتكم دائما يارب .

اني اليوم مزاجي ابد مو زين وتعبانه هواية ...

[★M a r t i n a★]

مزاجي اليوم يخبل حلو في حلو

[الجوهره]

عندج العافيه يسرتنا وسلامتج من التعب

انا اليوم مزاجي حيل زين لان اليوم طلعنا وتونسنا وغيرنا جو

[hananesho]

اليوم مزاجي مو زين وشوية ضايجة بس الحمد الله على كل

كلشي.

[ابو خالد]

عندج العافيه اختنا حنان وانشالله مزاجكم دايماُ حلووووو

وانا اليوم مزاجي نص نص

وانشالله مزاجنا يصير حلو برجعة الاعضاء الغايبين واختنا عذراء صاحبة الموضوع والله اننا اشتقنا لها وانشالله امورها تتحسن وتعود لنا من جديد

[★M a r t i n a★]

مزاجي اليوم كلش مرتاحة الحمدلله والشكر

[نـور]

اليوم مزاجي حيل حيل حلوووو لان راح اروح الى احلى محافظة بتركيا اسطنبول منو يجي ؟؟

[زهرة القرنفل]

مزاجي حلو

[★M a r t i n a★]

عراقي نشالله تتونس اريد اجي اشوفها

[ɱЯ.ŠɧДЯǾkəəή]

مزاجي
هففففففففففف

ضوجة

[زهرة القرنفل]

مزاجي منيح بس ما كتير

[ابو خالد]

اووووه العراقي اسطنبول بالعافيه حلوووه راح اجيك انتظرني

انا اليوم مزاجي منيح كتير كتير 

[★M a r t i n a★]

مزاجي اليوم محلو وقلقة

[hananesho]

انشاء الله يارب دائما تكون الفرحة مقابلة وجوهكم الحلوة وتكونون بفرح وسعادة

اني اليوم مزاجي كلش حلو