العراقي في امريكا

[Aram2003]

لقدشاهدناالكثيرمن المواضيع عن تعامل العراقيين مع بعضهم في المهجرلاتبشر في غالبيتهم بخيرحتى ان احدالاخوان ذكرفي موضوعه بان عمارته مليءه بالعراقيين لايكاد حتى السلام بينهم فهل هذا صحيح ولماذا العراقي كريم مع الغريب وغريب مع العراقي نتمنى عند وصولنا لامريكا ن نلتقي بالعراقي الذي سيعوضنا عن اهلنا في العراق   

[زيونة]

و الله يا أخي أعتقد أنو الموضوع مبالغ به كل مكان بي الزين و المو زين فهذا الكلام فية أجحاف بحق العراقيين , وهذا صاحبك ابو العمارة مال عراقيين يمكن موضوعة بي مشكلة بس وين ؟؟؟ الله أعلم صح أكو بعض الاشخاص يدورون مشاكل و هذا طويل و هذا قصير هههههههههههههه بس الطيبين هم هواية .
مع الشكر .

[rafid82]

أخي الكريم أرمان
طبعا اني بعدني  مارايح لامريكا بس اهلي كلهم هناك اخي وين مااتروح اكو الزين واكو مو الزين اكو العراقي الزين واكو العراقي اللي حتى وهو هناك اول مايسألك انت من ياعمام  فأخي نعم وين ماراح اتروح راح تلكه هيج نماذج بس هذا لايعني الكل مو زين لا بالعكس واكبر دليل هذا المنتدى كاعد اتشوف شلون الكل يساعد الاخر
بس للاسف اكو اشخاص من تروح هناك تبقى ادور على المشاكل و هذا شلابس و هاي البنية شلابسه وانت من ياعشيرة وانت ش  لو  س    للاسف   
بس هناك اهلي يقولون اللي الكل راح اتفيدك بامريكا حتى لو كان يهودي وخاصة من ناحية الشغل
اخوك رافد

[alfaras]

اذا خليـــــــــــــــــــــــــــــــــت قلبـــــــــــــــــــــــــــــت

اخوكم
alfaras

[anwarchalabi]

اخي صاحب الموضوع
ماكو اي سبب يخلي العراقي يتواصل مع العراقي الاخر في اميركا,او ماكو اي سبب يخلي العراقي يتجبب من العراقي الاخر في اميركا,ليش بالضروره انو يبني علاقات مع العراقيين ببلد غريب او يقطعها,هل هذا لان همه عراقيين,ما يعني كلمه عراقي؟؟؟ دين؟قوميه؟مذهب؟ايدولوجيه...... كلمه عراقي و سوري و هندي لم يضعها الرب......احنا اللي وضعناها....العراقي ما يتمييز عن الاميركي و الهندي والصيني بأي شي.....الصله الي تخلي كل الاجناس والقوميات والجنسيات و الاديان متشابهه انو احنا كلنا بشر و كلنا عايشين على كوكب الارض,فماكو اساس يفاضل بين العراقي و غيره...خصوصا ببلاد الغرب

انور الجلبي

[ريم عبد]

اخي انور
انت الحجي الي كلته صحيح يعني احنا نتعامل ويه الشخص بموجب اخلاقه وتعامله ويانه مو بموجب الاوراق الي يحملها واذا الشخص اخلاقه حلوه ومريح بالتعامل راح تنسى شنو اصله وفصله واذا اخوك جان تعامله فض وياك فاكيد مترتاح بالتعامل وياه واتفضل الغريب عليه
بس سؤال يطرح نفسه ياترى اليهود هم هذا رايهم؟؟؟؟؟؟؟؟
اختكم ريم

[ابو يونس]

جرب اتشوف غير العراقيين هل علاقاتهم وطيدة بالشكل اللي يجب ان  تكون بين العراقيين ....

[مازولا]

الاخ العزيز ماجلان ... على كيفك يمعود ... يعني الواحد من يكتب موضوع مو يكعد و يكابل الكومبيوتر ... على كيفك عيني ... اذا كان الاخ ارام بالعالم العربي فهسه الساعه عشرة الصبح يعني يجوز ليهسه مكاعد من النوم ... اني ادري اخ ماجلان انت تريد تضحك وياه ... هههههه ... اخوك مازولا.

[الخالدي الاصيل]

اللاناء ينضح بما فيه وكل واحد ونفسيته وتربيته

[الضايع]

أؤيد الاخ انور في كل ماقاله لانه الاصل بالانسان التعامل وليس هوية بلده

[anwarchalabi]

الاخت ريم
احنا ماكو داعي نسأل اذا اليهود هم هيج رأيهم
ماكو داعي لاننشوف غيرنا شدا يسوون,المهم احنا شنو نسوي
الاخ ابو يونس
ما فهمت قصدك,,لو توضح كلامك لان الفكره ما وصلت
اخوان
اني كاعد بطرطوس ع الساحل السوري
هناك تعرفت على عدد كبير من العراقيين
هوه عددهم قليل بس اني اعرفهم كلهم
والله الخلقني وخلقكم ماكو واحد منهم يشفي القلب
يعني الصديق اذا ما تجي منه الزينه ع الاقل ما تجي منه الشينه
الشين الكاه منهم(اللي اعرفهم مو الكل)بدون سبب
يعني اذيه بشكل
و بعد سنتين ع وجوده بطرطوس
بس عراقي واحد عندي علاقه بيه
اما علاقاتي كلها بالسوريين
هذا مثل
وانتوا قيسوا
انور الجلبي

[القرش]

                             السلام عليكم

اخويه العزيز هم نرجع ونكول اصابعك مو كلها سوى ..واكيد اكوا الزين واكوا الشين وان شاء الله ماتحتاج لاحد والله ييسر امورك واني مبدائي بالحياة هو (سوي زين وذب بالشط ) يعني سوي لربك مو للعبد .

ابو انس
شيكاغو

[Aram2003]

شكرالجميع  من علق او انتقدموضوعي وا عتذر اذاجان الموظوع جرح احد ولكن لو قلبتم صفحات المنتدى تشوفون هوايه موا ظيع خصوصاالعراقيين الي يعملون في المنظمة او الذي نصح بعدم شراء سيارةمن العراقي على  كل انامع من ذكركل مكان بيه ازين والموزين
وصحيح مو شرط بس تتعامل ويه اهل بلدك الناس باخلاقه بس اني متاكد انو بالغربه ماكو احلى من لقاء او التواصل مع ا هل بلدك الاول العراق  وبلدك الثاني  انشاءالله  امريكاوالدليل على طيبة العراقيين المواظيع الشيقة والجميلة في هذا المنتدى اكيدالي كتبها عراقي يحب صلحة اخوانه
تحياتي للجميع

[hussein5582]

والله يا اخي العراقين اهل غيره ونخوه و ماكو مثلهم مو كل واحد شافلي عراقي اثنين يحاولون يتامركون و يتفلسفون الواحد براس اللاخ

العراقي يغلط غلطه تكومون الدنيا ومتكعدوه وانى من الناس جنت اكول العراقين شبي حالهم هنا ,,
المشكله مو بالعراقي المشكله بنظرة الناس للعراقي و نظره العراقينن لبعظهم يعني اني متاكد لو العراقين غلط غلطه والامريكي غلط نفس الغلطه والله 90% لحاسبوا العراقي  10000 مره اكثر من ما حاسبوا الامريكي ولنكن واقعين

كام كل واحد شاف شغله تعبانه بامريكا يذبه براس العراقي او العربي او الاجنبي و الامريكي ما عليه عتب ابد ,, صاتر حادث باسياره يكلك الاجنبي كام يكمز والامركي هادي

اغلب العراقين من اجوي لهنا يحاولون يقنعون نفسهم انهم انتصروا الانتصار الاعظم مهما كانت الظروف لذلك يحاول يكسر بالعراق والعراقين وينتقص بيهم علمود بس يبين هو شكد محظزظ انوا طلع من العراقي وخلص من العراقين

[platini]

صحيح اني اتفق مع كاتب مقال العراقي في امريكا لانه الشعب العراقي تاريخيا غير متصالح مع نفسه وفي حالة تناحر ازلي مع  انفسهم اما لو خليت قلبت ووين ما اتروح تلكي الزين والموزين اني مع احترامي لهذه الاراء بس احجولي بالنسبه اشكد مثلا بالعالم تلكي الاغلبية زينة والموزينين اقلية ومعزولين هذا بالنسبه للدول المتحضرة اما العراق والصومال ومصر والدول العربية عموما الشر هو الغالب والخير حالة استثنائية

[anwarchalabi]

ترة العراقيين 90% ارقى ناس ولد اوادم وعشاير وعوائل ........
ابو شهاب الورد كلامك صحيح
بس نسبه 90% هوايه لان لو هاي النسبه صحيحه ما جان صار بالعراق الصار و اللي ديصير
خلينا نفتح عيننا ع الحقيقه
تره الديصير العراقيين دا يسووه مو هنود لو بنغاليين
انور الجلبي

[اوراس اورو]

اخواني الاعزاء ...الحق يزعل بس اني هسة اسولفلكم عن تجربة يعني مو قصة سامعها كنت اشتغل بشركه والشركة بيها عراقيين عندهم جنسية امريكيه يعني اكو بيهم صار 27 سنه برة العراق او اكثر يعني حتى حرب ايران ماشايفها بس سامع عنها بس مع الاسف هذولة اللي اسولف عنهم طائفيين بشكل اكثر من العراقي اللي ماشايف بس العراق ويابة اشسوا بالعراقيين العاديين بهذلوهم يعني فديوم سألت وحدة بيهم كلتلها الله عليج انت جايه للعراق تشتغلين لو تنتقمين من البلد والعراقيين ؟؟؟؟؟وطبعاً ماجاوبت ..بس اللي اريد اقوله من هاي القصة هو انه العراقيين من زمان هم عدهم عنصرية يعني المصلاوي وية المصلاوي وابو البصرة والعمارة يعاملوه كأنه مو بشر وابو بغداد هذولة كلهم مايعترف بيهم وهكذا تستمر القصة هسة دخلت بيها السالفة دينك شنو ؟مذهبك شنو؟يعني حيل تدهور الوضع والعراقيين الي اعرفهم في سوريا والاردن والسويد وامريكا كلمن ينهزم من الثاني واللي وصل قبل سنه يكول للي وصل هسة : عيني رجاءً انت من طريق واني من طريق لانه انت متخلف !!!!!ههههههههههههههه.
وتعذروني لصراحتي وارجو ان لا يزعل احد بس هذا اللي اعرفه شخصياً بدون مبالغة...وشكراً