بشرى ساره للاخوان الذين ينتظرون موعد سفر في مصر

[الخالدي الاصيل]

بشرى للاخوان في مصر الذين ينتظرون موعد سفر ولم يبلغهم احد حيث اخبرنا موظف في iom مصر بان هناك 26 كيس تم تحديد السفر لهم يوم 29-9 ولم يتم تبليغهم لحد الان وسوف يتم تبليغهم الاسبوع المقبل بعد اجراء الترتيبات النهائيه لسفرهم مع منظمة الصليب الاحمر ودعائي للجميع بالموفقيه
اخوكم الخالدي الاصيل

[alfaras]

بالتوفيق لاخوانه الي راح يجيهم موعد سفر وان شاء الله تفرج على المنتضرين قولو امين  وشكرا لاخونه الخالدي على هذا الخبر الحلو

اخوكم
alfaras

[همر]

والله ياخويه اني منتضر موعد سفر بس من قريت الموضوع اشو بردت وضليت ارجف




  همر مصر

[الخالدي الاصيل]

اخي العزيز همر ليش بردت وكمت ترجف اكيد مشغل السبلت هههههههههه ان شاء الله توصل لامريكا بالسلامه وتتدفى وتسقر وتتوفق كول امين
دعائي للجميع بالموفقيه
اخوكم الخالدي الاصيل

[mayada2009]

والله اني هم مثل همـــــــــــــــــر 

[الخالدي الاصيل]

عيني مياده وهمر طفوا التبريد تره بردت مصر هاي الايام ههههههههه ياربي موفقين ان شاء الله
اخوكم الخالدي الاصيل

[همر]

يمعود اشسويت بينه بهليل كمت اصفط غراضي بالجنطه هههههههههههههههه




همر

[ريم عبد]

والله يابه حقكم احنا انضل ننتضر شوكت ايصير السفر بس من اتصير صدك راسا يبدي المغص ههههههههه
اخوان عاد هاي بس تشمل جماعة مصر يعني  جماعة بغداد ممشمولين
الهم الله
اختكم ريم

[كمال الشاطيء]

السلام عليكم اخي الخالدي ان شاء الله هناك 27 كيس طالع سفر يوم 29 تسعه واني منهم وممكن الاخوان يرحون يوم الاحد الى الصليب الاحمر لاكمال معاملاتهم وايضا يوجد دوره ثقافيه ليوم السبت والاحد
لاصحاب اغلب اكياس يوم 29 ومن الله التوفيق

مع تمنياتي للاخوان المنتظرين موعد سفر ان يكون يوم السفر قريب

[يوجد امل]

شكرا جزيلا اخواني على هذه الاخبار الحلوة
ان شاء الله الموفقية للجميع وان شاء الله كل اللي ينتظر موعد سفر يسمع قريبا الموعد
سلام الله معكم
اخوكم يوجد امل

[ethan texas]

 عيني اخوية الخالدي الاصيل اني شفت الموضوع  اصابيعي جلبت  وبردت وخالتي هم قرت الموضوع  وبردت وكمزت من القنفة  الف رحمة على والديك ويارب بشارة خير للجميع يارب

والله يا اخوية الخالدي اذا صار موعد سفري يمكن اجي اطش ويهلية يم باب بيتك 

بالموفقية للجميع يارب وانشاء الله قبلي يطلع عكعك واخوية همر وفيت 2009 وخاصة الاخت ام يلدا


اخوكم جوزيف

[ملك الغربة]

اخوان السلام عليكم ......
شنو جماعة سوريا نايمة عليهم الطابوكة يظلون نايمين مثل اهل الكهف ههههههه
المهم تمنايتي للجميع ان تنفتح عليهم واحنة بشهر الخير
اخوكم المحب ملك الغربة

[ايات]

اخي خبر جميل وان شاء الله كلمن ينتظر سفر يخابروا والله يسهل عليهم ويوصلون بالسلامة ..........اختكم ايات

[Vet2009]

اخواني اعضاء منتدانا في مصر ........ السلام عليكم

   بشرك الله بالخير اخي الخالدي الاصيل " انت حقا اصيل " ، فقد ادخلت السرور الى الكثير من منتظري تحديد موعد السفر ، فبارك الله بك و ليجعله الله في ميزان حسناتك. اتمنى الموفقة و السفر القريب لجميع اخواني منتظري تحديد موعد السفر.

vet2009

[الخالدي الاصيل]

اخي العزيز vet2009 انت الاصيل وموفق ان شاء الله وتحقيق الاماني
اخي العزيز جوزيف ان شاء الله يوم السفر انت وخالنك ورحم الله والديك
اخي العزيز همر ان شاء الله انت وياهم مسافر
اختي ايات ان شاء الله بالموفقيه وتحقيق الاماني
اخي العزيز كمال ان شاء الله توصل بالسلامه
اخي العزيز يوجد امل ان شاء الله تفرح دائما
اختي مياده ان شاء الله يوم اللي توصلين بالسلامه وتحقيق الاماني
اخي العزيز الفارس الله يفرجها عليك
اخواني كل اعضاء المنتدى ياربي الله يوفقكم بالدنيا والاخره وتحقيق الاماني

اخوكم الخالدي الاصيل

[الخالدي الاصيل]

اخي ملك الغربه ان شاء الله تنشال الطابوكه من اهل سوريا ويطلعون من الكهف باسرع وقت وان شاء الله يتحول اسمك من ملك الغربه الى ملك التوطين
دعائي للجميع بالموفقيه
اخوكم الخالدي الاصيل

[mayada2009]

الخالدي فدوة العيونك اذا همه يريدونه انسافر بهالوقت زين شوكت واحد يحضر نفسه وهمه الى هسه مكايلينه على موعد السفر انته تكول 29 / 9 عزه هسه احنه 12 / 9 يعني الباقي من الوقت 16 يوووم يبوووو عليه لا بايعين غراض ولا محضرين شي فدوه العينك كلي شلووووون راح تصير ركضة كربلاء مو لو مومو

احتك ميادة / مصر

[الخالدي الاصيل]

تسلمين اختي مياده وتسلم ان شاء الله عيونج اني حالي مثل حالكم يعني هم منتظر ان شاء الله فاقتراحي ان نتصل بال IOM خلال الاسبوع الجاي ونستفسر منهم ويارب تكونين انتي وياهم
دعائي للجميع بالموفقيه
اخوكم الخالدي الاصيل

[ميس ميساء]

  سلام عليكم......
هذا الخبرمال الاخ الخالدي سطرنة فوك سطرتنة خلانة من هسة احسلي نشتري جنط
احسلنة بالمناسبة مال الجنط هل يمكن ان نشتري جنطة مال سفرهاي الطولانية الي تنفتح
ام السحابات نشترية لو بس المستطيلة ؟؟؟؟؟؟؟؟؟ تنصحونة انخابرهم يوم الاحد لونتضر همة يحنون علينة
شكرا الى اخ الخالدي

[الخالدي الاصيل]

اختي ميس ميساء ضميها للسطره مالتج ليوم السفر والطياره والطريق الطويل وان شاء الله ماكو ابد سطره لاهسه ولا بعدين والله يفرحج ويوفقج وبالنسبه للجنطه الطولانيه ام السحبات فهي مسموح بها وهوايه ناس سافروا واشتروا منها وهي موجوده بالتوحيد والنور بسعر 53 جنيه وبعد الخصم تصير ب 50 جنيه واشتري من هسه كبل متخلص هههههه وطريق السلامه ان شاء الله
دعائي للجميع بالموفقيه
اخوكم الخالدي الاصيل

[abn iraq]

مشكور اخوية على نقل الخبر
اخوانى بالنسبة للجنط اللى موجودة بالتوحيد والنور فهاى جنط خفيفة ومراح تفيد لان احتمال تنفتح من الطريق
اخوانى اكو جنط انى اشتريتهة من العتبة موجودة بالمحلات مال الجنط اللى على الشارع وبالساحة قبل لاتدخل السوق وسعرهة 45 جنية صحيح هى صناعة مصرية لكن تكمة وقماش كلش ثخين وسحاباتهة زينة
همة يسموهة جنطة ادوار اخذو منهة كلش زينة
هسة من ترحون راح يكولولكم سعرهة 80 جنية لكن تتعاملون وياهم وينطوهة ب45 جنية
وتاخذ اغراض كومة وعلى الوزن المطلوب وراح يبقى دور مراح تستعملوة
وتقبلو تحياتى

[Shebo]

شكرا جزيلا أخي الخالدي على الخبر المفرح ربي يفرجها عليك وعلى كل من ينتظر ونخلص بأسرع وقت صارلي شهرين ونص على وصول الأمنية وشهر على ختم الملف وره ختم لملف بعشرين يوم يلا تحول ملفي لقسم لسفريات على أساس ان أكمال الملف لا يعتمد على ختمه وانما توجد اجراءات اخرى ولحد الان مفيش موعد سفر! دنشوف تاليها وياهم

[الخالدي الاصيل]

اخي العزيز شيبو ياربي تسمع اخبار حلوه عن قريب وربي يوفقك ويوفق الجميع ويفرحك ويفرح الجميع
اخوكم الخالدي الاصيل

[مريمانه]

اخويه الخالدي الاصيل.........


هاي شنو شسويت بالناس..ههههههه...نشالله ياربي تكون من ضمنهم.........وياربي هاي الفرحه من صدك تحسوها وتعيشوها باسعد لحظاتها...ونشالله ياربي ماكو اي متاعب وكلمن منتظر موعد سفر نشالله يكون ضمن هذا العدد ونشالله يزيدون العدد اذا اكو ناس اكثر مخلصه كلشي ومنتظره تطير....

 ربي يسعدكم مثل ماسعدتو الباقين.........


 اختك مريمانه

[الخالدي الاصيل]

عيني مريمانه ان شاء الله نفس الطياره احنا وياكم وان شاء الله موفقين بالدنيا والاخره والله يحفظ مريمانه وام مريمانه وابو مريمانه
اخوكم الخالدي الاصيل

[مريمانه]

اخويه الخالدي



نشالله بنفس الطياره الله يسمع من حلكك...ماكو شي بعيد عد الله...ونشالله يحفظلك اهل بيتك وكل عزيز وغالي...سلامي...لام عادل



مريمانه