ملاحظة
هنالك بعض الاضافات على الموضوع لان كل ما اتذكر شي اخوتي دا اعدل واضيفة على الموضوع للاستفادة من عندة لذالك ارجو قراءة الموضوع اكثر من مرة لملاحظة المعلومات الاضافية
وشكرا
الاخوة الاخوات
اني ما اعرف اذا هذا الموضوع سبق التطرق الة بس احب اساعد الناس اللي تجي وماعدهة خبرة بهل موضوع لان كلش ايفيد واني جربتة وصرت خبرة شكد مجنت ادور على سيارة حتة اشتريها وكيف كنت اتعامل وية البائع واتناقش وياة بالسعر
الاغلبية من يجون عبالعهم اسعار السيارات رخيصة مقارنة بالعراق ويجفت ويشتري سيارة عبالة سعرها زين وللاسف هواية اخوان متورطين
واحذر الاخوة من بعض العراقيين اللي يشتغلون ببيع السيارت لان اغلبيتهم ايجيبون سيارات Junk ومدعومة وايصلحوهة بالمكسيك بسعر رخيص وايبيعوهة براس اخوتهم العراقيين اللي ما عدهم معلومات عن كيفية شراء سيارة
احب اشاركم ابعض النصائح
1- من تشتري سيارة اسال التايتل (Title) ورقة ملكية السيارة موجود لو لا ؟ وهل هي باسم الشخص اللي ديبيعهة او لا ؟؟ وحاول اتشوفة بعينك.
* اذا السيارة مدعومة ومصلحة راح تلكة بالتايتل داخل المربع الاحمر مكتوب salvage واذا المربع الاحمر فارغ فمعناها ما مدعومة بس هذا هم ميجزم انه كانت مدعومة ومصلحة (راجع نقطة 3)
* في حالة شراء سيارة يملكها البنك لازم اتروح وية البائع للبنك واتشوف ابعينك انه ديدفع الفلوس الباقية على السيارة لان اكيد هوة مشتريهة بالتقسيط وديدفع فلوسهة وايحول ملكية السيارة رسميا الك وينطيك البنك ورقة تاخذهة لل DMV يلة تكدر تشتريها واتسجلها باسمك (اذا كلك اني اسويها وحدي لا تقبل )
2- تسجيل معلومات السيارة اللي هية رقم البليتة Plate Number ورقم ال VIN Vehicle Identification Number واللي تلكاه يا اما على الدشبول او من تفتح باب السيارة على البودي.
3- بعد ذالك اتروح علة موقع
www.carfax.com واتحط رقم ال VIN واذا اتريد تشتري التقرير مال سيارة في نفس الموقع بس لازم ايكون عندك كردت كارد حتى تكدر تشتري تقرير عن السيارة يحجيلك كل تاريخهة واذا محاب بس اتاكد جم نقطة اكو على السيارة اذا هواية فاعرف السيارة بيهة مشاكل هواية.
*اذا سيارة مال واحد عراقي فمراح ايفيدك التقرير لان العراقي ايصلح يم عراقي وبهيج حالة مراح تلكة اي تاريخ سلبي على السيارة حتة لو كانت مدعومة ومصلحة لان المصلح هو عراقي وهذا ميدخل بالبيانات اللي يجمعهة الموقع لان مرات العراقي يتفق وية اللي صار وياة الحادث بعدم تبيلغ شركة الانشورنس ويتفقون على مبلغ بيناتهم مثل ميصير بالعراق من واحد ايدعمك تاخذة ايروح ايصلحلك سيارتك يم السمكري
4- اسال صاحب السيارة اذا اكو اي غرامات علة السيارة لان يجب ان يكون هو المسؤول عند دفع الغرامات وتكدر تتاكد من الغرامات من موقع DMV بوضع رقم البليتة وال VIN
5- لسكنة ولاية كالفورنيا يجب ان يزودك البائع بنتيجة فحص الانبعاثات من السيارة (Smog Check) ولازم يعبر الفحص بنجاح حتة تتسجل بال DMV وهو المسؤول عن دفع اجور الفحص وليس الشاري (لا تشتري سيارة اذا البائع مينطيك نتيجة الفحص ولازم اتكون النتيجة سارية المفعول لمدة 90 يوم)
6- شغل السيارة واشوف اظوية المحرك على Dash Board اذا اكو واحد ديشتغل او بية مشكلة اسال ليش وخاصة ضوة المحرك وضوة الاير باك
اذا ضوة الاير باك Air Bagمشتغل اعرف انه السيارة صاير بيهة حادث وليكلك اني اودي للديلر واسوي رسيتارت لان هذا ايشكل هواية ومن هالسوالف هاي كلهة كلاوات.
7- نزل راسك جوة السيارة وباوع السيارة اذا مزنجرة من جوة اذن هاي السيارة جاية من ولايات بيهة ثلج وامطار هواية وراح اتكون بيهة مشاكل
8- اغلب العراقيين اللي يجون ايموتون على الياباني واغلب السيارات اليابانية هية 6 سلندر يعني تصرف بانزين
اخي العزيز لازم تعرف السيارة اللي تشتريهة شكد تصرف بنزين لكل ميل بالساعة حتة بعدين لا اتكول اتورطت واشتريت سيارة تصرف بنزين هواية وترجع اتبيعهة
9- النقطة الاهم حتة تعرف شكد سعر السيارة بالسوك وشكد تصرف بانزين وشنو مواصفتهة وشنو مشاكلهة وعطلاتهة اتروح للموقع
www.edmunds.comاو
www.kbb.com10- اسال صاحب السيارة عن نوع البنزين اللي تاخذ السيارة لان اكو 3 انواع من البنزين(الكاز) في امريكا
العادي والوسط والمحسن.
البنزين العادي اقل سعر الوسط اغلى والمحسن اغلاهم
* في حالة شرائك سيارة تاخذ بنزين محسن يفضل انه تترسهة محسن لان اذا اتحط عادي راح اياثر على المحرك وهذا يودي الى اشتعال فلاش المحرك على الداش بورد
(بالمناسبة ترة امريكا بيهة بنزين زين وبنزين زبالة ) يعني نفس وضعيتنة التعبانة مال عراق من تترس بنزين والسيارة ادك ادفانسارقة بنزين هو من شركة Chevron و Shell
11- اسال صاحب السيارة اذا كان عندة اوراق ثبوتية بتاريخ تصليح السيارة (Maintenance Records) (الامريكان من ايصلحون يم الفيتر مالتهم ينطيهم نسخة مطبوعة عن كل ما صار بالسيارة سواء تصليح او تبديل اجزاء)
وهذا راح ينطيك فكرة عن ماضي السيارة والعطلات اللي بيهة واغلبية الامريكان يحتفظون بهذه الاوراق اني من اشتريت سيارتي عندي اوراق التصليح من سنة الصنع مال سيارة 1999 لحد ال 2009
واول شي تسالة البائع شوكت اخر مرة بدل ال Timing Belt وشكد جانت السيارة ماشية مايلات بهذاك الوكت اللي تم بي تغير ال Timing Belt
هذا الشي مهم بامريكا لان الامريكان يمشون مسافات طويلة بسياراتهم
في حالى معرفة انه كان ال Timing Belt مبدل او لا راح ايساعدك حتة تتعامل بالسعر اذا مكان مبدل او لا فأذا السيارة تحتاج الى صيانة لازم اتنقص من سعر السيارة لان بس تبديل ال Timing Belt بامريكا هو 100 دولار وهذا اقل شي ويعتمد على نوع السيارة طبعا السيارات ال 6 سلندر تصليحهة اغلة من ال 4 سلندر
12- الشراء من الـ auction مزاد السيارات.
coming soon
مثال راح اتكلم عن سيارتي واللي هية
Honda Accord 1999 EX Sedanشلون اقيم واعرف سعر السيارة اللي انعرض علية مناسب او لا
انروح للموقع
www.kbb.comاختار صفحة ال Used Car على اليمين
تحت Search by Category اختار Sedan
راح يطلب منك رقم الزب كود ZIP Code لمنطقة اللي انت ساكن بيهة مثلا 92020
اختار نوع السيارة HONDA
اختار موديل السيارة Honda Accord
اختار سنة الصنع 1999
تختار تقيم سعر السيارة حسب طريقة الشراء
في حالى شراء سيارة من شخص معين تختار الاختيار الوسطاني Private Party Value
اختار موديل السيارة واللي هو ال Honda Accord EX Sedan 4D
ادخل معلومات السيارة للمحرك ونوع الكير وعدد المايلات اللي ماشيتهة السيارة
للهوندا
Engine 4-Cyl. 2.3L VTEC
Automatic
Mileage 141000
في حالة وجود اضافات للسيارة مثل نظام مسجل حديث او سلايد روف وو الخ... ضيف المعلومات جوة بالاختيارات
اضغط Continue
بعد مراح اتكون شايف السيارة اكيد راح اتكون مقيم وضعهة وشلون نظافتهة فتختار احد الاختيارات
وهي اكيد ياما راح اتكون Good او Fair
مثلا راح اخذ Fair
راح اتشوف سعر السيارة فوك بالتلاث حالات اللي انت على اساسها اتقيم السيارة من شفتهة بعينك
على اليسار اختار Specification
راح من خلالهة اتشوف مواصفات السيارة وجم كالون تصرف لكل ميل
Gas Mileage 20 mpg City / 27 mpg Hwy
توضيح فيما يخص صرف البنزين اعلاه:
شنو يعني 20 mpg City و 27 mpg Hwy ؟؟؟؟؟
20 mpg Cityمعناهة انه في حالة السياقة داخل المدينة اللي بيهة اترفك لايت هواية السيارة راح تصرف كالون واحد لكل عشرين ميل تمشي بي السيارة (يعني احسب كل عشرين ميل مشيتة راح يخلص كالون واحد من التانكي مال سيارة)
27 mpg Hwy نفس القاعدة اعلاه في حالة السياقة على الطريق السريع ( الهاي وي) احسب كل سبعة وعشرين ميل تمشي راح تصرف كالون واحد
1 كالون امريكي = 3.78541178 لتر
هالي السوالف مجنة اندورهة بالعراق لان البنزين رخيص بس اهنانا بامريكا مهمة لان البنزين غالي
فلازم الاخوة اللي يشترون سيارة وايدورون اقتصاد لازم ينتبهون على صرف البنزين لكل نوع من انواع السيارات
الأنشورنس Car insurance
coming soon
اذا اتقنت البحث عن سيارة بهذهة الطريقة راح تكدر تتعامل وية البائع واطب بعينة واتناقشة واتخلي ينزل بالسعر ويكره اليوم اللي ايبيع بي سيارة
اسف على الاطالة واذا اكو احد ايحب ايضيف معلومات حتة ايساعد اخوتة اكون ممنون
اخوكم ابو اندرو
