الله عليه الي يدخل ويشوفني شريد ويساعدني بجواب.... وشكرا

[زيوس]

اخواني و اخواتي الافاضل...

ارجو ان يكون الجميع بخير و بصحة جيدة وعيد سعيد و كل عام وانتم بخير مقدما و ان شاء الله تحقيق الاماني لكل العراقيين وبالاخص الشرفاء في هذا المنتدى الكريم....

انا مقدم على الiom من شهر السابع 2008  ولحد هذي اللحظة مقابل مرة وحدة فقط وهذي المقابلة صارت بشهر الخامس 2009 وماكو شي لحد هسه . علما انه الشخص الي بالمقابلة قال بلكي شهرين او ثلاث اشهر ويدزون علينا للمقابلة مال المحلفين .... و ماكو شي
بس انا سالت هذا الشخص انه شكد النسبة المئوية للسفر الى امريكا (الشغلة تصير لوما تصير) قال هي نسبة عالية تقريبا 70% يعني خلي نكول اكو امل شوية

اسئلة رجاء...
1. هل توجد حالة مماثلة لحالتي ؟ يعني تاخذ هيج فترة طويلة؟
2. هل مسالة السفر تعتمد على قصة التهديد الي الشخص يرويها اثناء المقابلة؟ علما اني ما تكلمت عن تهديد فعلي ولسبب بسيط انه اني من اكذب انكشف بسرعة وبالاضافة لهذا الشي ترة صعبة واحد يتكلم عن شي هو ممقتنع بيه مو تمام..... فهل هذا الشي يخليني طابك باخر السرة ؟
3. ولو هي المسالة مو قياس بس شكد عادة تطول شغلة جماعة ال iom ؟
4. اذا المسالة كلها تنلغي يعني اني ما انقبلت... يدزولي خبر يعني مثلا يابة انت ما انقبلت او شي من هالقبيل؟
ملاحظة: قد يسال واح من الاخوة انت ليش ما تدزلهم رسالة حتى تفتهم شنو الوضع؟ والجواب هو اني دزيت رسالة ولحد هذي اللحظة ماكو جواب.

هنت : hint : احنا اني و زوجتي واطفال اثنين... اذا كان لعدد الافراد اي تاثير يذكر على الموضوع.....

مع خالص شكري وتقديري لكل من سيساهم بالاجابة

واعتذر على اطالتي و شكرا جزيلا

اخوكم زيوس

[المتوكلة]

 مرحبة اخوي  صبرا جميلا المساءلة كلها يرادلها صبر   وكل من راح  ينطيك جواب على قدر معلوماته  بس الي ارجو منك لا تياءس  يعني  مو تعوف المساءلة لان طولت ,  بس اسعى دائما بالسؤال عن طريق الاتصال بيهم  او الذهاب اليهم للمنظمة مباشرة  لا تستحي من حقك تعرف كل شي متعلق بملفك  بس ما اعرف انت مقدم بمصر ؟ لان  على سبيل المثال اني مقدمة من شهر 12 -2008 بس مكملة كل الشغلات بس منتظرة الامنية لزوجي   اذا اصبر اصبر وجاهد وحاول ومتشوف الا ومتصلين بيك يكولون عندك حلفين او فحص طبي  اذن التوكل على الله الافضل عزيزي زيوس وكل عام وانت بخير  اختك المتوكلة من مصررررررررر

[ابو خالد]

اهلا بك اخوي الغالي ابو زيوس ونحن نرحب بك اخو معنا وكل عام وانت بألف خير بالنسبه الى اسئلتك

1. هل توجد حالة مماثلة لحالتي ؟ يعني تاخذ هيج فترة طويلة؟
الجواب نعم اكو هواي حالات مماثله لحالتك عادي وانشالله يخابروك هذا الشهر لان عندي صديق هم اتأخرو عليه 5 شهور وامس خابروه على المقابله
2. هل مسالة السفر تعتمد على قصة التهديد الي الشخص يرويها اثناء المقابلة؟ علما اني ما تكلمت عن تهديد فعلي ولسبب بسيط انه اني من اكذب انكشف بسرعة وبالاضافة لهذا الشي ترة صعبة واحد يتكلم عن شي هو ممقتنع بيه مو تمام..... فهل هذا الشي يخليني طابك باخر السرة ؟
الجواب مو شرط انك تبالغ بنوع التهديد خير الكلام ماقل ودل المهم ان وجودك بالعراق بيه تهديد على حياتك وانشالله ماتطبك على السره
 
3. ولو هي المسالة مو قياس بس شكد عادة تطول شغلة جماعة ال iom ؟
4. اذا المسالة كلها تنلغي يعني اني ما انقبلت... يدزولي خبر يعني مثلا يابة انت ما انقبلت او شي من هالقبيل؟

الجواب اكيد يدزولك خبر ويتصلون عليك

ملاحظة: قد يسال واح من الاخوة انت ليش ما تدزلهم رسالة حتى تفتهم شنو الوضع؟ والجواب هو اني دزيت رسالة ولحد هذي اللحظة ماكو جواب.
الجواب اهم شي الصبر والله كريم

هنت : hint : احنا اني و زوجتي واطفال اثنين... اذا كان لعدد الافراد اي تاثير يذكر على الموضوع.....
ماكو تأثير بالنسبه لعدد الاطفال واكو ناس عدهم 6 اطفال واكو عدهم طفل واحد ماكو مشكله
وانشالله اجبتك بالشكل المطلوب واهلا بيك

[زيوس]

 والله على راسي اخي ابو خالد والاخت المتوكلة وشكرا جزيلا على هذي الكلمات الدافئة المليئة بمشاعر الاخوة والله يحفظكم..

عزيزي ابو خالد كلامك مطمئن واشكرك بلكي اسمع منهم خبر خلال هذي الفترة ان شاء الله

الاخت المتوكلة اني مقدم على iom بغداد واعجز عن شكرج على تشجيعج الي والحقيقة فعلا اني بديت استسلم للامر الواقع واشيل الموضوع من دماغي بس الشي الي يحفزني اكثر هو دخولي بهذا المنتدى الي بيه ناس امثالكم ... طيبين.. ويشجعون الشخص انه يستمر للاخير....

اتمنى لكم التوفيق وبوركتم

زيوس

 

[اوراس اورو]

عزيزي زيوس

وضعك جداً طبيعي والقصص والحالات المشابهة لحالتك كثيرة بس انت شوية قلق وتعبان من الانتظار وطبعاً نحن متفهمين لوضعك بس ان شاء الله تسمع خبر زين على الايام القريبة القادمه واحب اذكرك انه انت عبرت المراحل الصعبة وماباقي الا السهلة ومن الله التوفيق لك وللجميع...

ملاحظة : صير سبع زيوس واترك القلق وسمعنا اخبارك الحلوة ياوردة ..مع تحيات اخوك اوراس .

[القرش]

                                 السلام عليكم

اخي العزيز اكوا هوايه مثل حالتك وهم انتظروا هوايه وهسه كلهم سافروا ..هي مسألة وقت وانت كل اسبوع اتصل على المنظمه وشوف وين وصلت قظيتك ..بس اني اكول تنتظر وتصبر وان شاء الله تفرج عليك قريبآ واتمنالك الخير والموفقيه .

ابو انس
شيكاغو

[العربيد الأزرق]

اخي العزيز زيوس اني اعرف ناس قدموا الى اي او ام بشهر العاشر 2008 و قابلوا بشهر 11 و قابلوا وراها همين ورة 9 اشهر تقريبا فأنت لا تقلق ترة اذا هم لا سامح الله رافضيك يبلغوك رئسا كول يا الله و ما عندك غير الصبر

[زيوس]

الاخوان اوراس و العربيد والقرش

 كلكم ورود وربي يوفقكم لخدمة الناس و الله يسمع منكم و هذا الكلام مطمئن بشكل رهيب واعتقد انه الحظ يدخل بهاذي المسالة ايضا وان شاء الله التوفيق للجميع

اقسم ان كلمات الشكر غير كافية لرد جميلكم ولكن نسال الله ان يوفقنا ونرد ولو جزء بسيط من هذي المساعدة

بس سؤال واعتقد اني طرحته قبل يومين والاخ العربيد جاوبني

يعني اكو داعي اقدم على siv علما اني مستوفي الشروط ؟ بس اني كلت هسه عليش هذي الهوسة كلها وبعدين يدزون علينا ال iom بس لا النوب اطبق المثل القائل .... لا ابو علي و لا مسحاته.. هه هه هه

وان شاء الله خير و شكرا مرة ثانية
زيوس

[محمد زيونه]

اخي  ماعندك  غير الصبر  اكو  هوايه  مثل  حالتك

والحمد الله  سافرو  وأستقرو


اصببر    ولاتكطع الأمل

وضل  أتصل  بيهم  كل  يوم  أحد  وان شاء الله  تسمع  اخبار  تفرحك

طبعا اكو معلومه  مااعرف  صحيحه  لو  لا

اكو ناس  جوارينه  هم  نفس  حالتك  صارلهم  اكثر  من  شهرين من  قابلو  وهمه   عائله  من عشر  نفرات

ودينتضرون مقابله  محلفين


مخابرين  قبل  يومين  على الاي  او  ام  كايللهم الموضف  اللجنه  مو  هنا  بشهر  11  تجي  وتبدي  مقابلات المحلفين  والله علم  صدك  لو  جذب  هذا الخبر


الله  كريم  ان شاء الله  يخابروك  بأقرب  وقت



تحياااااااااتي الكـ

[العربيد الأزرق]

اخي العزيز اذا انت اتكول انه مستوفي شروط اس اي في ليش متقدم احسن لأن اذا اتروح الى امريكا راح اتحصل على الكرين كارد بسرعة مثل جماعتي الي وصلوا و بعد بقت يمك

[زيوس]

الاخ محمد زيونة اشكرك هواي وراح انتظر وما عندي شي غير الانتظار وبلكي الله الكلام مال جيرانكم صحيح وما بقى شي على شهر ال11 والله كريم وشكرا لتشجيعك حبيبي وبارك الله بيك

اشكرك حبي العربيد والله انا يمكن راح اسوي هيج بس الحقيقة كنت خايف انه تقديم ال iom يتضارب مع ال siv يعني اقصد ميصير واحد يقدم على الاثنين سوية لكن بعد البحث والتمحيص اكتشفت ان ممكن واحد يقدم على الاثنين عادي. واعتقد ضروري يكون عندي جواز G فلذلك لازم اطلع واحد لان عندي S وما اعتقد يريدونه بالتقديم .

اشكركم واشكر الاخوة الي جاوبوني وان شاء الله يوفق الجميع 

[دانةزيونة]

السلام عليكم اخي العزيز مثل ماكالوا الاخوة  يرادلها صبر وانا مثل حالتك بل اصعب بكثير لان احنة قدمنة على iomمن شهر الثالث او الرابع 2008ممتأكدة بالضبط وكانت المقابلة الثانية بشهر التاسع2008 وبعد تسعة اشهر يالة قابلنة المحلفين بس الحمدلله بعون الله الصبر هو مفتاح الفرج انشالله اخوية العزيز تقابل والله يوفقكم وعلى فكرة عائلتي بكد عائلتك احنة هم اربعة ومن الله التوفيق                                                                                                                                                   اختك دانة زيونة

[زيوس]

الاخت دانة اشكرك جدا

واقدر جوابج و مثل مذكرت انه انتو شباب تخلون عند الواحد امل والله يخليج بس ممكن سؤال ؟

يعني انتم هسه حاليا بامريكا لو تنتظرون فد شي ؟

بس احب اقارن حالتي وياكم اذا ماكو مانع.

وممكن بعد سؤال صغير: احنا انحدد الولاية لو ال iom هم الي يحددون؟ مو عن شي بس تعرفين انه لازم الواحد يرتب وضعه لان اذا الشغلة بيه كفيل وما اعرف شنو اذن اني لازم ارجع انسق اموري من جديد مع بعض الاخوة الامريكان الي اني مشتغل وياهم . واحد من ذولي ساكن بولاية واشنطن .

ولو طولت هواي و اعتذر طبعا

بس اني من سالني بالمقابلة عندك اقارب بامريكا ؟ جاوبت لا . زين بعد ما اطلعت هسه انه من الضروري انه يكون عندك واحد هناك حتى ما تدوخ . اذا الله سهل وصارت المقابلة الثانية مال المحلفين يصير ارجع واكول انه انا عندي صديق هناك ؟ مو اخاف يكولولي بابا انت وين جنت نايم!!

مع خالص شكري وتقديري

اخوكم زيوس

[دانةزيونة]

السلام عليكم اخي العزيز احنة بلغونا بوصول الموافق الامنية والحمدلله وبعون الله باقيلنة ختم الملف وبالنسبة لتحديد الولاية فأذا ماعندك كفيل المنضمة تحددلك الولاية واذاعندك بلغهم بعنوان الكفيل وانشاءالله تطلعلك الولاية الي تتمناها والله يوفقك ويتصلون بيك انشالله تسافر باقرب وقت                                                                                                                                                        اختك دانة 

[العربيد الأزرق]

اختي دانة هل سبق و عملتي مع الأمريكان قبل؟ لو على الأمم مقدمين انتوا؟

[زيوس]

الاخت دانة رجاء

اعتذر عن كثرة الاسئلة بس لفتت انتباهي فد جملة (ان شاء الله تطلعلك الولاية الي تتمناها)

يعني انت تتمنيلي حياة سعيدة هو هذا قصدج؟

لو اذا ما عندي كفيل المنظمة راح تخليني بولاية موزينة؟ يعني اكو هيج احتمال؟

(هل توجد حرية في اختيار الولاية اذا لم يملك الشخص اي كفيل)
وشكرا جزيلا الله يوفق الجميع
وان شاء الله تسافرون عن قريب

زيوس

[دانةزيونة]

السلام عليكم في البداية احب اقول لاخي زيوس بالتأكيد كنت اعني بالولاية الي تتمناها اقصد بيها الحياة السعيدة الك ولعائلتك ومو قصدي ابدا انو المنضمة راح تحددلك ولاية مو زينة لان هنا\ اقصد تحديد الولاية \كل شخص وحظة واني بصراحة ماعندي معلومات وافية عن شغلة الولايات بس الاخوة الاعضاء ماشاءالله هم اعرف مني بهذه المسألة وارجع واكلك اذا عندك كفيل بلغ المنضمة حتى يخلوك يمة واني حاضرة لاي سؤال اذا اعرفة مستحيل ابخل بي على احد .بالنسبة لسؤال اخي العربيد نعم اشتغلنا بشركة كان لها ارتباط بقوات التحالف  اتمنى لكم كل التوفيق انشاءالله                                                                                                                                                    اختكم دانة

[زيوس]

شكرا جزيلا اخت دانة واني ممنون منج وتعبتج هواية ونسال الله ان يوفقنا واياكم

تحياتي الحارة زيوس