الى رشا بنت بغداد والى كل جماعة كولورادو

[سيوف الليل]

السلام عليكم

تكدرين يا رشا ويا اخوان ان تنطوني عيوب ومحاسن هاي الولااية زين اني مهندس شنو فرص عملي هناك وهل فيهاابنية حلوة وهل المنظمات هناك زينة ........ارجوك انطيني معلومات عليها.شكرا

[رشا بنت بغداد]

أخي العزيز
الولاية حلوة بالمدينة وجبالها بس بالشتا حسب ما سمعت حتى البطريق ينشل بس بعد الشتا الجو حلو كانة انت بشمال العراق والاجارات مو غالية كتلك جوة ال 500 تلكة والاثاث حاول لا تصير مثلي كلة جديد اكو محلات هنا تبيع الجديد والمستعمل بفلس ونص هاي عود سهلة ادليك عليها اما بالشغل طبعا حسب حظك اني توصلت انة امريكا حظوظ ممكن واحد عندة دكتوراة وما يلكة ابسط شغلة وواحد لغة ما عندة وراتبة زين والله يزيدة ان شاء الله مو حسد بس هاي امريكا ولا تتصور الشغل ما بي واسطات لا طبعا اغلب الشغلات الزيتة تروح للعرف والي عندة واسطة بس انت المفروض تروح لولاية عندك احد بيها حتى بساعدوك ويفهموك على الاجرءات بامريكا واكو خيار ثاني كاليفورنيا مثلا احلى ولاية بامريكا والاجارات مقاربة لهنا وتلكة شقق مؤثثة وجوها حلو صيف شتا  نصيحتي الك جيك وية معارفك اذا احد منهم يكدر يساعدك يالشغل اتحول يمة المهم هو الشغل مو الولاية واني مثلا ظليت 6 أشهر بفرجينيا احاول وماكو فايدة جيت اهنا صح شغلي بسيط بس قلاتة اكو نتيجة لتعبي برايي لا تجي ولاية ما تعرف بيها احد والشغل على الله ماكو احد يكدر يكلك اذا جيت حتشتغل لو لا اتمنى جوابك حيساعدك بحيرتك مو كتلك يرادلك خيرة
أختك رشا

[Ross son of iraq]

رشاوي اشو جاوبتي عل والولد وعاشت ايدج , بس راح اتموتيه من الندم ميتين مرة كلتيلة لتجي ولتجي , يمعودة خلي الولد ايروح والله عندة واكيد الناس الطيبين الاوادم الي مثلج راح ايدلوه وميخلوه ايتيه, تقبلي المرور اخوج روس ابن العراق

[رشا بنت بغداد]

ههههه لا اني ما كتلة للولد لا تجي بس كتلة الرزق على الله صح لو لا  وهو احسنلة يروح يم صديق ابن اوادم يساعدة واحنا طبعا اخوتة اني بالنسبة الية يومية راح ادخل على الموقع اساعد بالي اكدر علية والاخ صاحب الاستفسار اذا عندك اي سؤال اخر اني حاضرة 

[سيوف الليل]

شكرا رشا وشكرا روس

بيني وبينكم شوية ضجت وخرب واهسي تدرون ليش ......لان جاي ادور بالنت على كولرادو شو احسهه منطقة قديمة وما بيها تطور ........ما اعرف شو صار عندي هيج احساس مو مثل تكساس او غيرها طبعا اتمنى اكون غلطان............

طبعا ما اريد اضوجج رشا رحمة الله والديج على المساعدة بس انت شكد بقيتي هناك اريدك هواي ؟ تسولفيلي طبعا بالمناسبة اني حددو لي مدينة دينفر ..........الجو شلونه هناك حارة باردة لو بردهم قارص .........اكو بيها كوارث طبييعة .......اكو اعمار وحركة بيها ..........بالاضافة هل هناك اسواق خاصة بالعرب وخاصة الاكل المذبوح على الطريقة الاسلامية وغيرها من هاي التفاصيل ............رحم الله لوالديج بس والله العظيم دايخ دوخة بس الله يعلم بيها.شكرا

[رشا بنت بغداد]

أخوية العزيز
بس لا خرب واهسك من ورية ان شاء الله لا  طبعا دنفر العاصمة حلوة وبيها down town الي بيها البنايات العالية والمطاعم الراقية يعني حلوة والباصات متوفرة هناك ومو غالية بدولارين لمدة ساعة حتى لو تصعد وتنزل ب 10 باصات وجوها عموما كتلك بالشتا ثلج ومرات تمطر بالصيف ومن ناحية الامان طبعا حالها حال باقي الولايات اكو مناطق امينة واكو مناطق خطرة هذا شي عادي بس يعني هية مو تعبانة الولاية بس خوما تقارنها بنيويورك لو الولايات الغالية  كلشي بفلوسة يعني اذا تروح لنيويورك الشقة ام الخمسمية تلكاها ب 5 الالاف بس حلوة وناسها طيبين وبيها مطاعم شرقية ومحلات حلال متوفرة ولو سمعت الشيوخ الي بامريكا دا يفتون على اكل الدجاج واللحم من المحلات العادية الله يرسيك على الاختيار الصحيح ان شاء الله

[storm2]

ولو الموضوع ميخصني بس عندي معلومات قد تكون قليلة لكن وافية انشالله حبي كولرادو تعتبر من اجمل الولايات منطقة جبلية سياحية غالبا هذا الموقع ينطيك معلومات شاملة عن المنطقة اكتب كود المنطقة الي راح تكعد بيها وراح نطيك معلومات تفصيلية معقدة عن المنطقة http://www.city-data.com/


عندي ولد صديقي اميركي كاعد هناك اذا تريد انطيك ايميلة واتصل بي اذا تحجي انكليزي واسالة



تقبلو مروري

[Aouss]

منو عنده معلومات عن كاليفورنيا اني احب الجو يكون حار لان ماحب البرد يعني مثل جو العراق وبعد محددولي داحاول من يحددولي اغير لكاليفورنيا فاي معلومات ممكن تساعدوني بيها

اخوكم اوس

[رشا بنت بغداد]

اخوية اوس
اني ناوية تحول لكاليفورنيا كاليفورنيا ما بيها ثلج وجوها حلو وبيها شمس طبعا بس اني مو من سكنة كاليفورنيا حتى احددلك المنطقة الرخيصة للمعيشة بس اني حروح لسكرمنتو العاصمة واجاراتها واسعارها مناسبة
ارجو ان يكون الرد كافي