طريقي في امريــكــا ... وقفة بعد مرور سنـــــــة ... الدروس والعــــبر ...

[saadtom]

لربما يكون هذا خبرا على شكل مقال ، او مقالا على شكل خبر فبعد اطفاء الشمعة الامريكية الاولى ، هناك الكثير الكثير مما تغير في حياتي وقد تعلمت في بلاد العم سام الكثير ، ورأيت العجيب والغريب ، استميحكم عذرا اخواني الاعزاء فلربما قد لا تكفي هذه السطور لسرد كلما واجهته هنا ... لحظات الامل ولحظات اليأس ، لحظات الفرح ولحظات الحزن ، لحظات الاحباط ولحظات العزيمة والاصرار ...
فعند وصولي بعد رحلة طويلة مثل هذا اليوم بالضبط قبل عام ، استقبلني الكفيل على مضض وقد احسست من اللحظة الاولى انه لن يكون مسؤولا عن مساعدتي في اي شيء ، فكانت المشكلة في ذلك الحين هي تكملة اوراق السوشل نمبر وباقي الاوراق بالاعتماد على نفسي رغم انني لا اعلم شيئا عن هذا البلد ولا امتلك سيارة ولا احدا يساعدني في الذهاب والاياب وبعد مدة قصيرة تركت بيت الكفيل للانتقل الى سكن مع شاب عراقي كان حاد الطباع ويحاول افتعال المشاكل لاي سبب كان ...
بقيت 5 اشهر بلا عمل ولا اي تقدم يذكر وبعدها انتقلت للسكن مع شاب ذو اخلاق رفيعة وبسكن ملائم ووجدت عملا يكفي لسد نفقاتي الشهرية واصبحت لدي سيارة والان اقوم بالتحضير لدراسة الماجستير في العام المقبل
تجربتي الشخصية وخبرتي مع المجتمع الامريكي
1. المجتمع الامريكي مجتمع مسالم عموما وهو شعب كل ما يفكر به هو العمل وصرف ما يجمعه من العمل على عطلة نهاية الاسبوع او بالذهاب الى شاطئ البحر او قضاء اوقات ممتعة مع الاصدقاء في تناول المشروبات الكحولية ، فهم لا يفكرون مثلنا نحن العراقييون ببناء مستقبل او بجمع المال كونهم لم يعيشوا الظروف الصعبة التي عشناها نحن ...
2. الحياة الامريكية متعبة عموما كونك ستفكر بدفع الايجار والقوائم الشهرية للكهرباء والموبايل والتلفون الارضي وتأمين السيارة والبنزين واقساط السفر الى امريكا وغيرها كثير مما يشكل عبئ شهري غير موجود في العراق مثلا
2. الدراسة هي حبل النجاة الوحيد للحصول على عمل راقي وبراتب عالي عدا ذلك فإنك ستبقى طوال عمرك كعامل بذو اجر بسيط وبإمكانيات محدودة جدا
3. في هذا البلد هناك الكثير من الفرص الجيدة التي من الممكن استغلالها والاستفادة منها غير موجودة في بلدنا منها مثلا ان الشهادة في هذا البلد ذات قيمة ولا تضيع هباءا وهي الضمان لمستقبل افضل ، ومنها ايضا فرصة بناء الكردت وبعد بضعة سنوات من الممكن الحصول على قرض لفتح مشروع معين    
4. بالمقابل ايضا فهناك الكثير من السلبيات في هذا البلد والتي من الممكن ان تسبب الضياع ، على سبيل المثال فهناك الكثير من الشباب العراقيين الذين ينساقون خلف الملاهي الليلية وخلف علاقات غير نزيهة مع فتيات مكسيكيات ... وهناك الكثير ممن ادمن على الذهاب على كازينو القمار ... وللاسف الشديد فهؤلاء ليسوا بقلة ... رغم ان هناك الكثر من العراقيين الذين يعملون بجد ليلا ونهارا من اجل مستقبل افضل
5. في هذا البلد الاجراءات بسيطة وغير ومعقدة واينما ذهبت فهناك من يساعدك لتكملة اوراقك بكل سهولة وبساطة والكثير من المعاملات تتم معالجتها عن طريق البريد ، اما في العراق فالامور الرسمية بغاية التعقيد قبل فترة اتصلت بالسفارة العراقية في واشنطن للحصول على بدل ضائع لجوازي الجي فابلغوني انه يجب ان ارسل للخارجية بذلك وان اذهب للسفارة بموعد علما انني بكاليفورنيا وان الجواز لا يتم ارساله عن طريق البريد غير ان موظفة السفارة كان اسلوبها بالهاتف خشن واقفلت الاتصال بدون احترام حيث قالت " ما اكدر اطول وياك عل الخط ... ؟؟؟ "
شكرا اخواني الاعزاء واعتذر عن الاطالة وانا حاضر للاسئلتكم واستفساراتكم ...
المبرمج العراقي
كاليفورنيا

[ابو عبد الله التكساسي]

اكلك خويه شنو الموضوع شو اني كلشي ما افتهمت ؟؟؟

[BaghdadGhost]

اخي العزيز المبرمج العراقي ,,,,,

كل عام و انته بالف خير و يارب الاستقرار اكثر و تحقيق الاماني المرجيه ,,,,,,

عاشت ايدك على التفصيل و السرد الجميل لما مررت به في السنه التي قضيتها في اميركا ,,,,,, الصراحه استوقفتني بعض الكلمات و العبر في سطروك القليله ,,,, ولكنها شجعتني على اتخاذ قرار انا في صدد اتخاذه في حياتي ,,,,,,

اشكرك مرة ثانيه و ان شاء الله استلام الكرين كارد عن قريب ,,,,,,,,,

[اهلي ياعراقين]

الله يبارك بيك اخويا ويفتحهه بوجهك ويوفقك ويرزقك

[ريم عبد]

شكرا اخي وعاشت ايدك على رغبتك مشاركة زملائك بتجربتك بعد مرور سنه
لان بعد السنه اتكون التجربه اكثر تبلورا والنتائج اكثر وضوح
ونتمنالك كل الموفقيه بمسيرتك
اختكم ريم
 

[toofy]

بارك الله بيك على الشرح الحلو ....الله يسهل امورك ويفتحهه بوجهك
بس اذا ممكن سؤال حضرتك ذكرت الماجستير ...يعني انت عادلت شهادتك البكلوريوس واعترفو بيهه بحيث قدمت عالماجستير لو انت خلال هذه الفتره درست لو شلون بالضبط لان اني هذا الموضوع اثار اهتمامي ويا ريت تطلعنه عالتفاصيل ولو بصورة عامه
امنياتي لك بالتوفيق
تحياتي toofy

[البحار68]

جميل جدا ما تفضلت به اخي الكريم وان شاء الله الموفقية والنجاح في مسعاك
طبعا انا مدرك لكثرة التفاصيل خلال هذه السنة ويا حبذا مزيدا منها ( التفاصيل ) فهناك الكثير في بالنا يحتاج للاجابة وبما اني ان شاء الله متوجه الى سان فرانسيسكو فسأكون شاكرا لاجابتك على تساؤلاتنا وهواجسنا ....
وفرة الاعمال البسيطة من عدمها ؟
الاجارات ؟
متطلبات الحد الادنى للعائلة من ناحية الدخل ؟
الاستقرار ( التكيف الاجتماعي ) ؟
وطبعا هناك الكثير الذي لا يحظرني .. ولكن ما تعتقده مفيدا لنا فارجو رفدنا به
أرجو سعة صدرك الكريم لاننا نثقل عليك بتساؤلاتنا ( أذا صاحبك حلو لا تاكله كله .. بس شنسوي كاعدين ونفكر )
تمنياتي لك بالاستقرار الدائم

امنياتي الحلوة

[ابو عبد الله التكساسي]

هسه افتهمت هههههههههههههه
سوري

[عاشق تراب العراق]

تسلم اخوية على المعلومات و ان شاء الله السنوات الجاية تكون احلى بس شوية شغلة الشهادة اكيد تكون صعبة على صاحب العائلة ما ادري توافقوني الرأي لو لا اقلها اول كم سنة حسب اعتقادي و بعد مندري الظروف الله كريم

[tiger-ALtlkefy]

الاخ سعد انشاء الله تعادل شهادتك وتحصل الماجستير
وانشاء الله الايام القادمة تكون الى الافضل

تحياتي

[saadtom]

الاخوة الاعزاء
الشكر الجزيل على مشاعركم الطيبة وتمنياتكم لي بالتوفيق ...

بالنسبة لدراسة الماجستير فالامر يحتاج معادلة الشهادة العراقية لدى احدى منظمات المعادلة واجراء امتحان التوفل وال Gmath وسوف اتحدث لاحقا بتفصيل اكثر في موضوع اخر ...

بالنسبة  للدراسة فاكيد صاحب العائلة بحكم مسؤوليته راح تكون المهمة عليه اصعب لكن ماكو شي مستحيل وهذا ما يمنع وكلشي بالعزيمة والاصرار ممكن يتحقق ...

بالنسبة لتفاصيل الحياة والايجار والمدخول فهي تختلف من حالة الى اخرى حسب العائلة ، لكن اقول عموما انه بالبداية لازم الواحد يقبل بشغل بسيط ومن ثم يفكر بالانتقال الى وضع افضل واحسن ، المهم في امريكا انه الواحد يشغل عقله اكثر من جسمه ، وايضا مهم جدا الانتقال من وضع الى وضع احسن ، ارنولد حاكم ولاية كاليفورنيا اجا للامريكا وعمره 25 سنة من النمسا وبقى يتطور الى وصل الى مركز حاكم ولاية ...
واني حاضر للاي استفسارات مع جزيل الشكر
اخوكم
المبرمج العراقي

[vincenzo]

صديقي المبرمج الله يساعدك
شلونك
شنو هالغيبه مكانك خالي
كلش حلو موضوعك الى درجة انه هم ساعدني على اتخاذ قرار مهم مثل اخوية الشبح
انت لخصت كلش هواي شغلات باقل كلمات ممكنة وبطريقة روعة
بس اهم شي اني لكفته هو انه الحل والعلاج لمعضم مشكلة التكيف والنجاح هي الدراسة وتحصيل شهادة امريكية مرتبة
والاهم انه انت ناوي تدرس ماجستير علوم حاسبات وراح ادوخك بكم سؤال على هالسالفة بالتحديد:

1- اختيار الجامعة ؟؟ هل يكون حسب الاقرب لسكنك لو حسب الارخص لو حسب اللي ينطيك سكولارشيب او فيلوشيب مضبوطة لو شلون عموما تختار المكان؟؟ ويا حبذا اللنكات او ملاحظات عامة

2- اللي بعده ما مسافر واول شي يريد يسويه او اهم شيه يفكر يسويه هو الدراسة فشنو يكدر يسوي قبل ما يسافر ؟؟ يعني ممكن يقدم ؟؟ وتنصح بتحديد الولاية على هذا الاساس ؟؟ طبعا عدى كاليفورنيا لان اصلا ولاية مدري شلونهه ومخالفة ولو جامعة بركلي من اهم الجامعات بالعالم

3- شنو تاثير الكرين كارد (للاجئين او جماعة الاس اي في) على القبول بالدراسات العليا او الحصول على المساعدات المالية للدراسة ؟؟ وشنو عموما الاشياء اللي تحتاجهه الجامعات on average حتى تقبل الواحد من عدنه بالدراسات العليا

4- هل تنصح حضرتك انه الواحد يخلص اول كم شهر يلله يمشي بشغلة الدراسة حتى لا تروح عليه مساعدات اللاجئين مال اول كم شهر (اذا اكو اي تعارض بيناتهم)؟؟ وشكد احتمال ان نحصل على عمل اضافي في الجامعه يساعدنه ماديا اذا كنا ندرس ماجستير او دكتوراه لان اني شخصيا ما اعتقد انه الجامعات توفر اعمال جزئية لكل طلاب الدراسات العليا بيهه كمحاضرين او مساعدين باحثين او اشياء مشابهه


اكو هواي اسالة مثل هاي بس تعتمد على اجوبة هاية الوجبة الاولى
ارجو منك ان تبحثلنه عن الاجوبة حتى اذا ما تعرفهه حاليا لان هي تفيدك مثل ما تفيدني ومعضم الاعضاء

[مهند هادي]

شكرا" اخوية على هذا الموضوع الجميل وبارك الله بيك وان شاء الله الموفقية في الحياة اما بخصوص الشباب الذين يذهبون الى الملاهي الليلية هي مجرد وقت ويصحون ويرون عملهم خاطىء اعذرهم نحن العراقيين عشنا ضروف قاسية جدا" ولو غير انسان يعيش في العراق صدقني يصير بي شي ويتخبل لن الشفنا موقليل فهذا كله من جراء الكبت وعدم التفس والله يكون بعونهم

[saadtom]

الاخ  vincenzo 
اشكرك على مشاعرك الطيبة وعلى الاطراء وبارك الله فيك اما بخصوص اسئلتك :
1 . اختيار الجامعة يتم حسب توفر الدراسة المطلوبة فهنا لا تحتوي كل الجامعات نفس الاختصاصات ، هنا في سان دييكو يوجد 4 جامعات لكن فقط واحدة كانت تتضمن اختصاصي وهو ماجستير علوم حاسبات

2. بخصوص سؤالك على الكرين كارد اقول انه بدون وجود الكرين كارد لن تتمكن من الدراسة والحصول على المساعدات الدراسية ، لهذا يجب مرور سنة على الاقل قبل البدء بالدراسة او انتظار الكورس المقبل بعد الحصول على الكرين كارد كما في حالتي قد تختلف بعض التفاصيل من ولاية الى اخرى ، لكن انا تحدثت عن ولاية كاليفورنيا

3. بخصوص الاعمال الجزئية في الجامعة فاني قد سمعت عن ذلك مسبقا لكن ليست لدي اية تفاصيل عن ذلك الموضوع وتقبل تحياتي



الاخ العزيز مهند هادي
شكرا جزيلا على مداخلتك وانا اوافقك الرأي كون الشباب دائما في حالة من الاندفاع والانبهار بكل ماهو مغري والنفس امارة بالسوء اخي العزيز لكن نسأل الله ان يرشدنا للطريق الصحيح وتقبل تحياتي

[show]

الاخ العزيز sadtom  ارجو ان تكون  very happy tom   الان

شكرا لرجوعك لنا من جديد و مشاركتنا تجربتك في الولايات المتحده

منور برجوعك

بالتوفيق للجميع

[vincenzo]

1- يعني اذن انت اختاريت الاقرب الك (لان شغلة الاختصاص منتهين منهه) بعد ان وصلت لاحدى الولايات
واتوقع عندك اسباب خاصة تمنعك من تغييرهه واللا جان قدمت لغير جامعات بغير ولايات.

زين شلون عرفت انه وحدة من الجامعات الاربعة بيهه اختصاصك والباقيات ما بيهم؟؟؟
هل عن طريق انه رحتلهم وحدة وحدة وسألت ؟؟
لو عرفت اسماءهم ودورتهم بالانترنت وراسلتهم وهمه جاوبوك ؟؟

وشلون وية اللي بعده اصلا ما واصل للولايات المتحدة ؟؟ (علما انه ابو الاس اي في مثل ما جنابك تعرف يكدر يختار الولاية ويكدر رأسا يبلش بالدراسة لان راسا يحصل كرين كارد)
يعني قصدي الخيارات راح تكون كلش هواية لان اكو الاف الجامعات بامريكا ككل فمنين نبدي ؟؟؟

2- سؤال الثاني اصلا ما جاوبتني عليه (حول التصرف للي ما مسافر بعده).

3- ما سولفتلي عن الاشياء اللي تطالبنه بيهه عاة الجامعات الامريكية حتى ننقبل بالدراسات العليا ؟؟
يعني مثلا جامعة بغداد عدنه تطلب امتحان كفاءة لغة وامتحان قبول بالاختصاص ومعدل بالدراسة القبلهه وعمر اقل من فد رقم معين
بلكي شكد ما تكدر تفاصيل بهالسالفة

4- بلكي تدبرلنة تفاصيل اكثر عن فرص العمل داخل الجامعة اذا ممكن وشكد برأيك المفروض الواحد بجيبة فلوس يلله يفكر يفوت هيجي فوته ؟؟ (يعني انت مثلا شكد عندك فلوس حتى ناوي تدس ماجستير بهالاختصاص وشلون حسبتهه ماديا وية المساعدات؟؟)

وما كتلي اكو تعارض بين مساعدات المنضمات بالكم شهر الاولى وبين التقديم عالدراسة؟؟ يعني اكو احتمال يقطعوهه

[Mark_usa]

شوف اخوية بالنسبة الى الدراسات العليا،
 معظم الناس هنا تروح للجامعات القريبة عليهم او الي ينقبلون بيها والي مستواها اعلى من البقية بس بعض الشباب يروحون على جامعات بعيدة حتى يتفرغون للدراسة وبنفس الوقت يقضون وقت ممتع بعيداً عن العائلة والبيت ام الفئة الثالثة فذلوة ناس عباقرة ويريدون جامعات طاكة مثل ستانفورد هارفرد ييل او او فيرجيناتك او ماساتشوسيت  ...الخ الخ (اذا تريد تعرف مستويات الجامعات باي اختصاص لكل سنة راجع مجلة يو اس نيوز او جيك الانترنت)،
طبعاً اسعار الجامعات للكردت الواحد تختلف وتزداد بالجامعات القوية، كل الجامعات بيها مواقع على الانترنت نيت وهي تنتهي بالاكستينشن edu. وبيها كل الاقسام المتوفرة واكو مواقع تدورلك على الجامعات الي بالك من ناحية الاختصاص وفد مية خاصية لخ انت تحددها مثل
http://collegesearch.collegeboard.com/search/index.jsp
http://www.searchuniversity.com/
http://www.google.com/options/universities.html

واذاشفت فد جامعة ببالك في راسلهم بالايميل كل الاتصالات هسة بين الاساتذة فيما بيناتهم وللطلبة والي يريدون يقدمون تكون بالايميل. (والاوراق والخطابات الرسمية تكون تحصيل حاصل في النهاية)، هناك مستشارين في كل جامعة (كونسيلر) راسلهم ايضاً للاستفادة.

هسة شتحتاج حتى تقدم على دراسات عليا، تحتاج الى خمس امور:
- شهادتك الاصلية وترجمتها.
- معدل جيد للدراسة السابقة (بعد ان تقيم شهادتك باحدى مراكز التقييم)، بالمناسبة تكدر تقيم شهادتك بالبريد على ECE في ملواكي/وسكانسن قبل ما تجي لامريكا لانها لاتطلب منك رقم سوشيل نمبر.

- امتحان توفل تكدر تاخذة لمن تجي او في دول الجوار اذا متوفر.
-امتحان GRE للاختصاصات العلمية (او GMAT للبسنس) ابحث في الانترنت عنها (عدا المجموعة الطبية)
-رسالتين على الاقل ريكومنديشن لتر من اساتذة مدرسيك: يزكوك للدراسة العليا، ويذكرون بيها تقييمهم لك مثلا من ناحية مثابرتك واندفاعك في مجالك، وقدرتك على العمل الجماعي والفردي، قدرتك التعبير عن افكارك شفهياً وتحريرياً، قدرتك على الحكم الموضوعي على الامور وغيرها.

بالنسبة الى العمل في الجامعات فلا تعول عليه فمعظم الاعمال المتوفرة للطلبة هي بائع في احد اسواق الجامعات ...الخ وهذه ممكن ان تقدم عليها لكن يتنافس فيها الكثير من الطلبة، اما من ناحية التدريس فهذا صعب الا اذا كان عندك دكتوراه وبدرجة استاذ مثلاً فممكن تجرب لكن اعتبره كله زايد خير.

اي مساعدات المدرسية تحصلها مالها علاقة بمساعدات الاجئ المادية والصحية والعكس صحيح. (وهي راح تكون بمعدك الفين دولار سنوياً  كحد اقصى اذا انقبلت) والبقية على حسابك، وماكو تأثير اذا كان عندك كرين كارت اولا على القبول طالما انت مقيم شرعي في الولايات المتحدة.

بالنسبة الى اسعار الدراسة للدراسات العليا فهي تتراوح بين 500-1000 للكردت الواحد (تحتاج حتى تكمل ماجستير اقل شي 32 كردت وللدكتواره اقل شي 48 كردت وحسب الاختصاص)، اخذاً بنظر الاعتبار ان تسعيرة الجامعات للمقيمين في ولايات غير ولاياتها تكون اغلى بثلاثة اضعاف لمن هم من المقيمين في نفس الولايات (تعاملها معاملة طلاب البعثات الدولية).

بالنسبة الى ما تكدر تسويه وانت خارج الولايات المتحدة فتستطيع ان تعمل مايلي:
1. حاول تعادل شهادتك بالبريد في مؤسسات لاتطلب رقم سوشيل نمبر (ECE مثلاً معترف بها جداً وغيرها)
2. اذا تكدر تاخذ توفل معترف بيه.
3. ادرس وابحث في الانترنت على GRE لتستعد له.

وبالتوفيق.

تحياتي

[storm2]

انت مثال للانسان المجتهد المواضب المحافض تحياتي لك وتمنياتي بالنجاح والتوفيق الدائم

[ShadowMan]

عاشت ايدك يا مبدع ....

ابو يوسف

[مازولا]

احلى شي هوه هاي النقطة اللي ذكرها الاخ saadtom

1. المجتمع الامريكي مجتمع مسالم عموما وهو شعب كل ما يفكر به هو العمل وصرف ما يجمعه من العمل على عطلة نهاية الاسبوع او بالذهاب الى شاطئ البحر او قضاء اوقات ممتعة مع الاصدقاء في تناول المشروبات الكحولية ، فهم لا يفكرون مثلنا نحن العراقييون ببناء مستقبل او بجمع المال كونهم لم يعيشوا الظروف الصعبة التي عشناها نحن ...

هاي ملاحظة مهمه انو الاميركان ميفكرون هوايه بقضيه شلون يجمعون فلوس حتى تفيدهم بالكبر مو مثلنا نبقه طول عمرنه نجمع حتى نشتري بيت و حتى نضمن عيشه اولادنا و يمكن اولاد اولادنه ... يمكن احنه لازم نبدي نفكر مثلهم حتى الواحد شويه يرتاح و يخفف الضغط اللي عليه ... اصرف ما في الجيب ياتيك ما في الغيب ... بس عاد نكدر احنه نفكر هيجي ... ما اعتقد ... اخوكم مازولا

[vincenzo]

اشكرك جدا صديقي مارك عالاجوبة الحلوة وما اعرف ليش اخونا المبرمج ما جاوبنا بس مو مشكله النقاش كلش حلو وعاشت ايدك

بالنسبة لاختيار الجامعة يكون قبل لو الحصول على تمويل للدراسة اول ؟؟ والممول (غالبا الحكومة) يتدخل باختيار الجامعة ؟؟ او على الاقل يعني يحددون القرض او المنحة الدراسية فالواحد اصرفله ان يختار جامعة رخيصة ومستواهه مو كلش

بالمناسبة منين المنح او المساعدات الدراسية عموما ؟؟ ونكدر نسوي اي شي بخصوصهه قبل الوصول لامريكا ؟؟

بالنسبة للعمل بالجامعة اني سمعت انه كلش سهل طالب الدكتوراه ينطوه وضيفة مساعد بروفيسور ويدرس اول سنه يعني ال juniors وما اعرف الناس اللي سولفولي هيج همه اساتذة امريكان يعني يجوز متفائلين اكثر من اللازم ؟؟ الله اعلم

بالنسبة لل ECE فخدماتهم بفلوس لو ببلاش ؟؟
لان اذا بفلوس ما اعرف شلون راح ادفعلهم ؟؟

اذا المعدل بالعراق ضعيف (ال GPA) مالة الماجستير مثلا فهل اكو طريقة للتغلب على هاي المعضله ؟؟
ممكن مثلا (اني افترض) انه اكو امتحانات او كورسات يكدر الواحد يسويهه حتى يقوي درجاته السابقة
شنو رأيك؟؟

[Mark_usa]

شوف اخوية فينشنسو،
اختيار الجامعة مالة علاقة بالتمويل (ذولة بس الطلبة الاجانب الي يطلبون فيزة دراسة مطلوبة منهم كاثبات)، بالنسبة الى المقيمين حالهم حال المواطنين، تكدر تقدم على اي جامعة وتحصل قبول (القبول يعتمد على النقاط الي ذكرتلكياها) وما عليهم هم منين راح تجيب فلوس انت. حتى تكدر مرات تدخل بصف كم مرة قبل ماتسجل بيه (بس ما تكدر تمحتن الا ان تسجل بيه ضمن الوقت الاقصى للتسجيل)، وحتى لمن تسجل بالدرس وينطوك وصل اكو جامعات متاخذ فلوس منك مباشرة وتكلك انت روح داوم واحنا عود نزلك بيل (فاتورة).

هسة نجي انت لمن توصلك البيل (الفاتورة) ورة فترة من الدوام (طبعاً كحد اقصى قبل امحتانات نهاية الكورس) شلون تدفع:
1.فاينانشل ايد (اذا قبلوك اكثر شي ينطوك فد 2000 +/- اذا سجلت فول تايم)
2. تكون مرتب فد قرض من البنك (وهاي الها سالفة بوحدها)
3.كاش من جيبك تكمل الفضالة.

الفاينانشل ايد لازم تكون موجود هنا حتى تقدم عليها وحجو عنها هوايا ناس هنا بالمنتدى وبيها موقع بالانترنت راجع ارشيف المنتدى وبيها معلومات هواية عليها وعن موقعها بالانترنت وشلون تقدم.(وكذلك القروض البنكية)

بكل جامعة بيها مكتب مال فاينانشيل ايد ورة ما تقدم بالانترنت للتروح الى هذا المكتب بالجامعة ويسولك مقابلة فد ربع ساعة ياخذون منك الاوراق الاصلية مالتك ويتأكدون منها (الاقامة، الهوية ..الخ) وبعدين هم يحولون الفلوس على الفاتورة الي طالعتلك نتيجة الدروس الي مسجل بيها. وابوك الله يرحمة.

بقية المنح والمساعدات تكون اكثرها على الدراسات الاولية (وقسم منها يتطلب جنسية)
ECE خدماتهم بفلوس ولا تصدك اكو شي بلاش هنا، فوت على الموقع وراسلهم وشوف شنو اختياراتك.

اذا GPA ضعيف: هو لهذا السبب مسوين امتحان اسمة GRE لانه الجامعات درجاتها مو استاندرد فالامتحان راح يأشر على مستوى الطالب حاول تراسل جامعات وتطلب منهم منشورات على GRE.
وبالمناسبة هذا الكلام بيه اخذ ورد وتكدر تناقشة وية الجامعة الي تريد تروحلها وتتفاوض وياهم. (لاتستغرب من كلمة تتفاوض)

للاسف ما تكدر تغير شهادتك، الا اذا تاخذ شهادة من جد وعتيك، وهاي سالفة طويلة وماتفيد، خصوصاً للماجستير لانه مابيه تكملة (مو مثل البكالوريوس) يعني لو تاخذها كلة من جديد لو تستعمل شهاتك (اذا كان عندك وحدة)
بس لاتدير بال القبول بالدراسات العليا هنا سهل عموماً. واكو ناس عندها عدة شهادات ماجستير ودكتوراه بنفس الوقت لانه ماكو تحديد هنا وبكيفك تكدر تاخذ شكد ماتريد بس جيب خلك وفلوس.

[عكعك التطوى]

تسلم اخي العزيز وبارك الله بك على شرح تجربتك والنقاط التي اشرت اليها لكي يستفيد منها الجميع واتمنالك التوفيق والنجاح انشاءاله

تحياتي

[angie-dawood]

تسلم اخي على الشرح بالحياة في بلاد الغربة انشاءاللة ربي يوفقك بكل امورك وتحصل على كل ما تتمناه ربي معك دائما ويفوفقك بحياتك الجديدة

[أبن خير]

مشكور عيني أخونا سعد وبارك الله فيك على هذا الموضوع الجميل
ربي يخليك ويوفقك .. تحياتي

أبن خير

[saadtom]

الاخوة الاعزاء شكرا على ردودكم واتمنى لكم الموفقية والنجاح

[vincenzo]

اشكرك جدا استاذ سعد لرجوعك النه
واحنا بانتضار الاجوبة

[koka75]

الشكر للاخوان الاعزاء في توضيح الامور اكثر واكثر ولكن ياريت اكو احد يجاوبني علسؤالي ولو يمكن معلوماتي عن المساعدات والحياة في امريكا موكلش جيدة ولكن تعرفون ان لكل انسان اسالة ويفكر كثيرا بالعيشة   والمصروف حيث وكما سمعت ان المنضمة راح تنطيك المساعدات لمدة 8 اشهر او اربعة اشهر وحسب كل منضمة وكل ولاية وبخلال هاي الفترة راح يجيبولك شغل او يكولوك اشتغل هيجي وحسب ماسمعت انه اذا مقبلت بالشغل الي هوة طبعا كله شغل متواضع المهم اذا مقبلت باي شغلة فراح يشيلون ايدهم من المساعدات فاني سؤالي هوة وخاصة لابو العائلة  وصاحب اطفال وخاصة اذا مثلي اربع اطفال فطبعا راح تصير العيشة صعبة ومتكدر تستمر تدفع من جيبك بدون شغل ولاعمل واكيد الشغل الي راح نلاكيه مراح يكفي المصرف هاي اكيدة المهم اني داريد اسالك هل في امريكا تكدر تفتح شغل لحسابك مهما كان نوعه يعني اكو شغل اكو بحيث خلال فترة دراستك تكدر اطلع مصرفك من هذا العمل ومصرف الدراسة ولكي اكون صريح مثلا وهذا مثلا  اذا كان عندك ولنقل 100 الف دولار تكدر تلاكي شغل بهيجي مبلغ يطلع مصرفك يعني شغل شخصي تفتحه لحالك وهل استطيع ان احول هيجي مبلغ لان هنا في السويد لديهم قانون يسموه من اين لك هذا واكو مرات اهنا بالسويد وهم حسب ماسمعت يعني ممتاكد من الحجي انه ياخذون منك ضريبة عالمبلغ الي تريد تشتغل بيه وارجو ان لااكون قد اطلت عليك وللعلم انا اختصاصي او شهادتي  بكلوريوس علوم حاسبات من كلية الرافدين الجامعة وشكرا لجميع الاعضاء