اقتراب انتهاء صلاحية الفيزا SIV شنو الحل اريد مساعدة .............

[reemobillal]

اني استلمت فيزا اس اي في بتاريخ 4 سبتمبر (قبل اسبوعين تقريبا) , وهاي الفيزا صادرة من يوم 25 جولاي يعني لمن استلمتها جانت الاكسباير مالتها بيها شهر ونص ,هذا التأخير صار بسبب انه زوجتي جانت حامل ف بين ما جابت وسويت الجواز وروح وتعال للسفارة الى ان اخذت الفيز , طبعا اني مقدم على المساعدات من قبل ,دزيت للرابسنت وكلتلهم يابا ترة اني عندي فيزا بيها شهر ونص فكالولي دزلنا الفيز واحنا راح نعمل الممكن عمله لكي تسافر قبل الاكسباير وبأقرب وكت ممكن ,المهم بنفس اليوم دزيت الفيز وورا عشر ايام انطوني اي زي نمبر وكالولي احنا الان نعمل من اجل تحويل قضيتك لمنظمة اعادة التوطين ولمن نكمل احنا راح نكلك ,علما بانه اني اعطيتهم عنوان صديقي بأمريكا ولحد هسة ما متصلين بيه ,شسوي بعد شهر ويومين تصير الفيز اكسباير ,اني حاير وما اعرف شسوي ,انتظر ام ماذا  ,ارجوا المساعدة

[BaghdadGhost]

اخي العزيز ,.,,,,,

بالاضافه للي ذكرتلكيا على الخاص ,,,, و حته تكون مرتاح و مامن على الموضوع ,,,, حاول تتصل بالسفارة الامريكيه حالا قبل فترة انتهاء الفيزا و تشرحلهم الي صار و التخوف الي انته بي حاليا ,,,,, و اكرر اتصل بيهم هالفترة لان بيهه هواي حسابات و اعتبارات و ان شاء الله همه المفروض منهم يصدرولك فيزا جديدة بتاريخ انتهاء جديد ,,,,,,,,, و ان شاء الله الي بي الخير يقدمه رب العالمين ,,,,,,

[رشا بنت بغداد]

اي لا تفكر تحول على اللجوء حرامات سنة يلة تاخذ الكرين كارد تتصل بالقنصلية وتطلب تجديد الفيزا وراح تدفع رسوم الفيزا مرة لخ الا اذا اعترفوا هذا خطاءهم بس ما اعتقد بس الاحسن تجدد الفيزا وتخسر فد 500 ولا سنة يلة تاخذ الكرين كارد

امنياتي بالموفقية

[العربيد الأزرق]

اخي العزيز مثل ما فهمك زميلنا شبح بغداد لا زم تتصل بالسفارة و حرامات اتحول على اي او ام لأن اولا اطول هواية و بعدين مثل ماكالو الأخوان شبح بغداد و رشا بنت بغداد ورة سنة يلة اتحصل على الكرين كارد

[blackwater]

حبي لا تخاف بعد عندك وقت طويل..ان شاء الله ما ينسوك ...

انت دزلهم ايميل للتذكير اسال عن القضية ..

[reemobillal]

يمعودين الشغلة مالتي ما الها علاقة بال تحويل لل اي او ام اني الفيزا مالتي اس اي في بس مقدم اني بنفت وجماعة البنفت من اول ما استلمت الفيزا كلتلهم ترة عندي بس شهر ونص كالوا اوكي دزلنا الفيز واحنا راح نعمل الممكن علمود تسافر قبل الاكسباير ,بالمناسبة اني من البدايه فهمت السفارة الامريكية على هذا الموضوع وكالولي احنا معلينا المهم احنا طلعنالك فيزا  وكدامك شهر ونص تلحك تسافر وما فبلوا على موضوع التمديد ولا التجديد , اني سؤالي يكووول هل انه اكووووووو واحد اس اي في مقدم بنفت وخلصت الصلاحية ومسافر بعده ؟؟؟؟

[shaklawe]

اي اخي اني اشوف تسافر هسة و طز بالمساعدات

اهناك من توصل اشرحلم اللي صار وياك و يكملولك المعاملة مال مساعدات
بس يمكن فد شهر تصرف على حسابك

احسن من هل القلق النفسي و اب اي لحظة العراق ينهار و كل شي يروح عليك

هذا راي الشخصي و كل انسان اعرف باموره

[silver_d]

مرحبا شباب  انشالله تكونون بأحسن حال اخويه العزيز اذا  الفيزا مالتك راح تخلص  الصلاحيه مالتها  اني  نصيحه مني الك انته هسه زين اخذت فيزا والف الف مبرووك  لعد احنه الي  صارلنه اشهر مقدمين بعدنه بمرحله الاولى ومضامنين نطلع ولا ضامنين ناخذ ال COM لان صايره صعبه فنصيه مني الك وهاي النصيه الاخ الي قبلي مجاوبك انو اطلع ولتهتم عالمساعدات صدكني المساعدات الي انتو اتفكرون بيها بالحلم هاي المده الي يساعدوك بيها هيه فقط 3 شهوور لان يعرفون الي مترجم خوش فلوس مسوي على سنتين لو الي يشتغل مقاول لو الي يشتغل منضمات لو شركات تدعم الجيش الامريكي  عنده خووش مبلغ من يرووح فميفكروون يساعدوك الك المساعدات بس على الي طالع من سوريا ولبنان وعمان وتركيا لان بدون شغل همه طالعين اغلبهوم محتاجين ,,,,,, اخويه اطلع على حسابك واطلع على تركيا مناك اخجز على امريكا احسن مما تنتضر منيه مال المنضمات متكلفك 1800 دولار وبالمناسبه للمساعدات الي راح يقدموها الك والطيران الي راح يودوك على حسابهوم كلها اتسويا بيها كوبيالات ولازم تدفعها بعد فتره همه يحددوها الك فأتوكل على الله وعلى حسابك الشخصي احسن الك هاي نصيحه لتتأخر حته لتصي حجه الهوم واصلا مراح يجددوها الك


نصيحه من اخووك سلفر (سافر)

[vincenzo]

الشي الوحيد اللي راح تخسره اذا باجر حجزت وسافرت هو اجرة الطيارة اللي هي قرض مو منحة
وانت اعرف بضروفك
بس حاول تسوي مثل ما كالك شبح بلكي ينطوك فيزا لخ لان عدنه عضو اسمه PRICELESS جدد الفيزا بس يكول ميحقله بالفيزا مال التمديد يقدم على مساعدات وميقبل يحجي تفاصيل لان هواي حاولت وياه والله اعلم

[mustafa75]

اخي الكريم
اعرف حالة شخص  نفس حالتك  و دزللهم  اكثر من ايميل  حتى دز ايميل لل اي او ام نيويورك اللي همه مسوولين على التحويل لل اي او ام عمان
 و كان جوابهم اله  انه  همه دا يحجزون للي فيزتهم راح تنتهي صلاحيتها لانه عدهم زخم كبير   و اكو هواية  الهم الافضيليه بالحجز  ( للي اقل من 3 اسابيع و تخلص ) و كالوا انه  قبل 3 اسابيع من انتهاء الفيزا  يبدون بالحجز و اللي المفروض هسه و الله اعلم
بكل الاحوال  اذا  مصارت من يمهم و مكدرت تمدد مثل ما تفضلوا الاخوان اعتقد لازم تحجز انته و تسافر
 
و حاول كل يوم تبعث ايميل للجماعة و شوف
تحياتي

[عكعك التطوى]

اذكر احد الاخوه نفس حالتك وكان باقيله شهر واحد على انتهاء صلاحيته وسافر قبل المده متخلص ولكن يحتاج منك متابعه مثل مذكر الاخ مصطفى