الى الاخت العزيزة ✿AnGie

[ام يحيى]

السلام عليكم ان شاء الله تكوني بالف خير
ولو اثقل عليكي شوية بموضوعي لكن من خلال تصفحي للمنتدى وجدتكي خير معين للجميع من خلال نصائحكي المفيدة للكل
اختي الغالية  نحن عائلة مكونة من زوجي وانا وخمسة اطفال اكبرهم بنت عمر 17 والثانية 15 والثالث13 والرابع 9 والصغير سنة (معوق منغول)تحول ملفنا على اي او ام انا بصراحة اشوية خايفة لان تعرفين عائلتي كبيرة واخاف من المجهول اللي احنا راح نروح له مع العلم الاولاد من المتفوقين جدا في مدارسهم ولغتهم الانكليزية قوية جدا
وعدنا اصدقاء ب سياتل سان فرنسيسكو وميشكن ديترويت بماذا تنصحينا ؟
ثانيا ابني الصغير المريض يلتزموا في امريكا من حيث وضعه الصحي
اعرف ثقلت عليج بس انتي اختنا الغالية بهذا المنتدى ماتبخلين على احد بردودج الحلوة
ودمتي ذخر لهذا المنتدى الرائع والتوفبق للجميع

[angie-dawood]

مرحبا اختي الغالية ام يحيى كيف الحال انشاءاللة تكوني انتي والعائلة بالف خير
حبيبتي ام يحيى بالنسبة لولاية سان فرنسيسكو  ما عندي علم بيها من ناحية المعيشة والمساعدات والايجارات بس احاول ادور بالارشيف اشوف بلكن احد الاعضاء كاتب عن هذة واحاول انقلها هنا بنفس موضوعج وبنسبة لمشكن من ناحية المعيشة والايجارات والمساعدات للي عدهم اولاد دون سن 18 سنة زينه والايجارات هم احسن من غير الولايات مثلا شقة غرفتين وصالة بسعر 600 دولار وباحسن منطقة وبنسبة ايجار البيت طبعا حسب المنطقة منطقة جيدة بيت ايجاره اربع غرف نوم وصالتين وحمامين بسعر 11200 ومنطقة وسط هم تقريبا زينه بيت ثلاث غرف نوم وحمامين بسعر 750 دولار والمساعدات هي طبعا 8 اشهر قابلة للتجديد اذا رب العائلة ما شاف شغل وبنسبة لحالة ابنك طبعا راح يتحول الى التقاعد ياخذ تامين صحي وراتب 674 شهريا وكارت الطعام ايضا وبنسبة للخدمة والمدارس اكو هنا كل الرعاية لحالة لا تهتمين من ناحية ابنك واولادك الي راح يكونون طبعا يدرسون راح يخصصون الهم راتب شهري حوالي 180 دولار لكل واحد منهم واي سؤال اخر تدللي اني بالخدمة ولا تنسين اذا تجين لمشكن اني موجودة راح اساعدك كثير ولا تهتمين من هاي الناحية     تحياتي

[angie-dawood]

طبعا اني مدينه سياتل اول مدينه ازورها بأميركا وهي محطة لقائي بأهلي كما قلت لكم سابقا وانشاءالله اتوجه الى واشنطن بعد أسبوعين انشاءالله احب ان اتكلم عن مدينة سياتل انا الان قي مدينة kent كنت وهي على جنوب شرق سياتل وسوف اتكلم بشكل عام عن سياتل
انك سوف وترى الجنه بام عينك لانك ستاتي الى اجمل المدن الامريكيه على الاطلاق وهي تعتبر العاصمه الصيفيه لامريكا.....
كل شي من حولك رائع وجميل وكما تعتبر نسبة الجريمه في الولايه من اقل النسب في امريكا .الناس مسالمون جدااااا هنا ....الجو رطب ممطر وفصل الشتاء والربيع يستمر لحد الشهر الخامس بعدها ياتي شهر الصيف الرائع من شهر 6 ولغاية شهر 9 . هنا وصلت كان الجو ممطر وبارد ولحد لان الجو بالنهار جميل فيه مرات حراره بس جيده وباليل بااااااااااارد
الولايه تحتوي على مصنع شركة بوينك للطائرات كما فيها مقر شركة مايكروسوفت ، والعديد من البنايات ناطحات السحاب او لا مكتوب عليها مايكروسوفت
بالنسبه للسكن داخل مدينة سياتل غير نافع لانها مدينه تجاريه عملاقه واغلب الناس يفضلون السكن بالمدن الصغيره المحيطة بالمدينه وذلك تجنبا لارتفاع سعر الايجار والضجيج والصخب .
سعر شقه غرفتين وصاله بحدود 800-900 دولار شهريا تستطيع اضافة 150 دولار تسديد فواتير الماء والكهرباء والهاتف.
العراقيين الموجودين بشكل واضح ومن اختلاف الجنسيات من الاتراك و.....،
العمل صعب وجوده بس ممكن تلكي الناس طيبين للغاليه بس الصبر وماكو اكثر من صبر العراقي
احب ان انصح اخواني وخواتي القادمون الى اي مدينه في اميركا ان يتعلموا اللغه الانكليزيه هسه بفتره الانتظار مو يجي ويتعلم علمود من يجي تكون اله دافع اقوى على لاقل يشوف نفسه يعرف كم كلمه ساعده وتخلي عنده جرئه وثقه بالنفس.
انا من اشد المعجبين في هذا البلد العظيم كلشي بي نظام انت حالك حال اي مواطن بعد حصولك على السوشل سكيورتي يعني تكول مواطن مو شرط تحصل على الكرين كارت علمود تكون مطمأن انت مجرد حصولك على السوشل سكيورتي انت صارت حقوقك حالك حال المواطن الامريكي من كافه الحقوق والواجبات.

يعني احنه عدنه السلام ال الله تمام!! بس محد يسلم على احد والله شنو اني ماعرفه بس هنا تلكيهم الكل سلم عليك ومحد يعرفك وطبعا يبتسم بوجهك انت لا اراديا تكون مرتاح نفسيا كلشي نظام كلشي ترتيب بس يحتاج تتكيف على هذه الانظمه مالتهم

الرايح وعنده عائله يتبنون الطفل متنكطع عنه الغذاء ولا العلاج ومصرفه ماشي الى عمر ١٨ سنه والمدارس مجاني، الام الحامل عنايه ١٠٠٪ هي والطفل من كل النواحي حتى الغذاء والفحص والعلاج الطبي الى ان تولد ورى ٤٠ يوم تنكطع عنها حتى مستلزمات الاساسيه للطفل ينطوها.

انت كلاجئ ممكن دور شغل تبيع بسوبر ماركت سايق شاحنه مترجم مدرس اي شي اخر بصعوبه تحصل بس تلكي لازم دور بكل مكان حتى بالانتر نيت مرات ينزلون اعلان شغل او يحددون مقابلات انت السيفي مجهزه واكثر من نسخه وجوه ايدك. طبعا هنا الاخوان العراقيين الموجودين الطيبين الخيرين الجايين قبلك من تلكيهم كلهم ينصحوك وشدون من عزمك وكلهم نخوه وشهامه يمكن تنزعج من ناس بس مو كل اصابيعنه سوى،

اخي العزيز انت من معاناتك بلدك ومعاناتك بلدان العربيه رح تشعر بالامان بهذا البلد تحس بالاستقرار على الرغم بعدك ممشتغل بس شعورك انت انسان محترم ومقدر والك اهميه هذا الشعور محسيته اله واني هنا بأميركا هذا الحجي مخصص بس للي عانه من بلده وبالبلد العربي مو العاش ملك بالبلدان العربيه.  يحتاج الصبر ثم الصبر لان النتيجه تكون بأذن الله خير وانت ترتاح وتستفاد وتفيد عائلتك

اهم شي تستغل من اول يوم يطلع السوشل سكيورتي ينطوك المدكل كوبون ان تسجلون بدورات الانكليزي وتسون فحص شامل طبي يعني تستغل هذي الفرصه لان هي فرصه لازم تستغلها من البدايه متخلي شي بيك متفحصه لو صحتك ١٠٠٪ زينه جيك مخسران شي.


اكيد رح اقدم موضوع عن واشنطن بمجرد ان اوصل وأستقر وافتهم شكو ماكو بهذا البلد الحلو.


اسفه للاطاله
تقبلوا تحياتي
ساسي

[angie-dawood]

حبيبتي ام يحيى هاي نقلت الج موضوع عن مدينة ستايل من الارشيف مال الاخت ساسي انشاءاللة تستفادين منها وطبعا القرار الاول والاخير الكم واي شي تامرين بيه تدللي

[angie-dawood]

http://www.ssa.gov/multilanguage/Arabic/arabic.htm
هاي المعلومات تفيدك للضمان الاجتماعي بالنسبة لحالة ابنك وهي مكتوبة بالعربي تكدرين تقريها حتى تعرفين كلش عن الضمان الصحي وارجو ان اكون قد وفيت بالاجابة على سؤالك  تحياتي

[ام يحيى]

لساني عاجز عن الشكر والتقدير لشخصك الكريم والمحب لمساعدة الاخرين وفقكي الله لما فيه الخير لكل الناس وان شاء الله المراتب العالية دائما
ويفتحها بوجهج وين ماترحين بالتوفيق

[كمال الشاطيء]

بارك الله بيج ياملاك المنتدى الله يعطيك العافيه

[★AbN✰BaGhDaD★]

جميع كلمات الشكر والثناء قليلة بحقك يا ملاك...شكرا لجهودك السباقة والمميزة والرائعة لخدمة ومساعدة جميع الناس  ..وفقك الرب وبارك لك جميع خطواتك

تحياتي
ابن بغداد
 VA