عندي سؤال حول تحويل الراتب التقاعدي من عمان او العراق الى كاليفورنيا سان ديغو

[ABU DAVID]

الرجاء كل من له معلومات او من الافضل كل من حول راتبه التقاعدي الى امريكا-ناليفورنيا سان ديغو  من عمان او العراق  كيف فعل ذلك و ما هي الوثائق المطلوبة مني و هل يؤثر هذا الراتب على المعونات المستلمة من امريكا مثل الويلفار او الفود ستامب و كيف يتم عمل شهادة الحياة المطلوبة لهذا الغرض اكون ممنون جدا من الي عنده معلومات اكيدة ان يعطيني ايميله حنى اراسله لغرض اخذ المعلومات التفصيلية منه  ______ شكرا جزيلا مقدما

[رشا بنت بغداد]

أخي العزيز
لازم تسوي تخويل لاحد اقرباءك او اصدقاءك باستلام راتبك سواء من بغداد او من من عمان تستطيع الاستفسار من دائرة التقاعد عن المستمسكات الضرورية وبدورة الكفيل سيقوم بارسال راتبك طبعا الاحسن الك يجمعة ويدزة لان فلوس التحويل هية هية اذا الف واذا 10 الالاف يبقى لازم من توصل لامريكا بالسلامة تفتح حساب وتسال بولايتك شكد لللاجيء يحق يحط حساب بالمصرف وعلى هذا الاساس تحول الفلوس ولازم ما تحول فوك المبلغ المحدد حتى لا تنكطع المساعدات  .

اختك رشا بنت بغداد

[BaghdadGhost]

اختي رشا بنت بغداد .,,,,,,

شكرا جزيلا للمعلومات ,,,, الصراحه اني فادتني همين لان صديقي دايخ بهاي السالفه ,,,,,,

[مراد علم دار]

سلام عليكم ياخ ابو ديفيد ماطول وصلت الى امريكا ليش دايخ بل تقاعد روح شوف حياتك وشتغل انت عفت عراق لنك مامرتاح اهناك شتسوي بفلوسه يااخي سلام

[الدكتور هندسه]

السلام عليكم
لماذا يا اخ مراد علم دار يترك اخونا راتبه التقاعدي بعد سنين التعب والبهذله في دوائر الدولة واتنصحه بترك راتبة التقاعدي مع احترامي لرايك هذه مو خوش نصيحة من اخ لاخوه يعني انت ممكن ان تقول لاصحاب الشهادات بعد انت سافرت بعد ليش تاخذ شهادتك وياك ثانيا هذا حق اخونا ABU DAVID ليش يتركه ولمن
اخي العزيز ABU DAVID اذا اتريد تحصل راتبك التقاعدي يجب عمل وكالة لشخص موثوق به ثم تروح وياه لتحويل هوية التقاعد من هوية بها صورتك فقط الى هوية تحمل صورة الوكيل ايضا ثم تعمل البطاقة الذكية حتى يستطيع ان يستلم راتبك ويرسله لك فيما بعد اما عن شهادة الحياة فاني خلا ل الاسبوع القادم سوف اذهب الى المقر الرئيسي للبنك واسئل بالتفصيل عن ما هي متطلبات شهادة الحياة
سلامي لجميع الاخوة

[شكوماكو]

السلام عليكم
 اذا اردت الحصول على شهادة الحياة من الاردن فالمطلوب هو  الجواز  والرقم التقاعدي واسم المصرف الذي يمنح التقاعد لك لان هذه المعلومات يجب ان تكتب في طلب الشهادة  ويتم اصدارها بحضور الشخص المعني لكي يوقع الطلب امام الموظف المسؤول في السفارة لا ان يكلف شخص آخرللحصول عليها لانه لايجوز وارسالها الى الشخص الموكل من قبلك لايداعها في المصرف ولا تصرف الرواتب بدون شهادة الحياة اطلاقا.

 اخوكم
شكوماكو

[ethan texas]

 عاشت ايدكم كلش فادني هذا الموضوع لان اليوم جنت ناوي اكتب هيجي موضوع

لان بيبتي  كذالك اتريد اتحول راتبهة التقاعدي للا امريكا


بس سئوال الله ايخليكم يعني  هية هسة وكلت واحد بالعراق وصدق كلشي وسوة الهوية ورح يستلم الراتب


زين هناك با امريكا بيبتي لازم تفتح حساب بالبنك واشونا يصير التحويل من بنك الي تستلم منة الى البنك الي مسوية بية حساب بنكي با امريكا لو اشون


ومشكور جدا على المساعدة

اخوكم جوزيف

[angie-dawood]

اخوان اذا فتحتوا حساب بالبنك هنا داخل الولايات المتحدة راح يبين انه عدكم فلوس تجي من مصدر اخر وطبعا المساعدات راح اما تنقطع او تقل لا تنسون هذا الشي لازم يكون المبلغ الي بالبنك على كد الي مقرر لكل لاجئ الي يستلم مساعدات اي مبلغ زايد راح ياثر على المساعدات وخصوصا كان من خارج الولايات المتحدة لانه والدتي نفس الحالة صارت بيها فلوس التقاعد تحولت على البنك باسمها وكانت فوك المبلغ المقرر طبعا صارت مشاكل سيم وجيم من وين جبتي هاي الفلوس وانتي تاخذين تقاعد واني مكنت اعرف كتلهم من التقاعد الي بالعراق كالت ممنوع انتي تاخذين فلوس التقاعد من العراق وهم من هنا وطبعا قطعت عنها التقاعد وبالطلعان الروح يلى كدرت ارجع التقاعد مال والدتي وكالت اريد ورقة من البنك بانه اي مبلغ ماكو يدخل من غير الولايات المتحدة بالبنك فكونوا حذرين مجرد ردت انبهكم لانه صارت بوالدتي تحياتي لكم

[ethan texas]

 ممكن نعرف اشكد المبلغ المسموح بية للاجئي ولك جزيل الشكر
 
 


اخوج جوزيف

[angie-dawood]

بالبنك لازم يكون فقط 2000 دولار مسموح للاجئ هنا بمشكن بغير ولايات بصراحة مااعرف

[الحديقه]

ابو ديفيد هذا موقع بنك الرافدين بعمان الرسمي تكدر تدخل عليه وتعرف شنو الاجراءات المطلوبه الازم تسويه لتحويل راتبك ولشهادة الحياة اذا انت جنت بعمان وتكد من خلال الموقع هذا تشوف راتبك كل شهر اذا نزل بالبنك وهذا الموقع يشمل بنك الرشيد والرافدين:-


http://rafdbank.piczo.com/?g=29360564&cr=3


اما بالنسبه لتحويل المبلغ لاميركا لازم يكون اقل من 2000$ لا اكثر عن طريق الوستن يونين وكل ولايه شكل بخصم العموله للحواله .

ولازم حسابك بالبنك باميركا دائما اقل من 2000$ حتى المساعدات متنكطع عليك هذا حسب معلومات من صاحبي والله الاعلم.

[MAGGIC]

اخواني الاعزاء

اخر معلومات عن الراتب التقاعدي
بداء العمل بنظام البطاقه الذكيه ومن شروطها
1- صاحب التقاعد يجب عليه الحضور بنفسه للمصرف المحدد له لاجراء معامله البطاقه وليس الوكيل ( مايقبلون )
2- اخذ بصمات اليد والعين من صاحب الشان
3- وبقيه القلاقيل من الاوراق المعروفه بالعراق التي ( وين متروح تاخذها وياك )

بعد ذلك اذا عندك وكاله لشخص ما يجب تثبيتها بالمعامله ( معامله البطاقه ) وبعدها هو اي الوكيل يستطيع ان يسحب شهريا الراتب

هذة طلبات التقاعد الجديد اما بالنسبه لامريكا وكيفيه التحويل فماقصرو الاخوان بالنصيحه والشروط للتحويل

تقبلو مروري

[ABU DAVID]

شكرا لكل الأخوات و الأخوة على امعلومات القيمة و شكرا للدكتور هندسة صحيح  اذ  لا يمكن التفريط   

 باكثر من25 سنة خدمة في العراق ولو من الناحية المعنوية .

حتى ا لكفيل يجب ان يبرز شهادة الحياة للمتقاعد في بداية كل سنة و الا يقطع الراتب السؤال التالي هو هل

 يمكن عمل وثيقة شهادة الحياة من الولايات الامريكية على سبيل المثال من سان ديغو في كاليفورنيا و هل

 يوجد قنصلية او عن طريق الانترنيت .

[angie-dawood]

اكو شخص يمك بكلفونيا يمكن يسويها خلي اخابره وراح انطيك تلفونه اذا يسويها

[angie-dawood]

اوكي اخي ابو ديفد هذا رقم الشخص الي يسوي معاملة قيد الحياة ومعاملة تحويل التقاعدة من العراق الى كلفونيا وهو طبعا عربي يعني يتكلم اللغة العربية اسمه ريمون برنوا
هاتف بدالة 1619 هاتف 4419920 خابر وهو راح يساعدك بطلبك   تحياتي هو بكلفونيا سان دياكو

[Abo Andrew]

ابو ديفد

اذا انت في عاصمة العراق ال 19 ايل كاهون الشغلة سهلة وقريبة منك وقبل فترة رحت وية بنية قدمت الابوها على شهادة الحياة حتة يستلم راتبة التقاعدي وشنو المطلوب منها ادز للسفارة العراقية وخلصت كلشي

اكو منظمة كلدانية اتساعد الاجئين بكل هاي الشغلات واللي منها شهادة الحياة اتروح عليهم صايرين بالمين ستريت وهمة ايكلولك بالظبط شتسوي
همة شغلتهم ايساعدون الاجئيين حتة ايمشون معاملاتهم بكل شي

واذا خابرت احد وكلك جيب فلوس(يعني من برة المنظمة) عوفة لان الشغلة ترة كلش سهلة ومتحتاج فلوس بس مراجعات و اكو مكان بالداون تاون اتروحلة هو كاتب العدل همة بعدين ايدلوك علية
 موقع المنظمة هو

Chaldean & Middle-Eastern Social Services

343 E Main St
El Cajon, CA 92020-3942

(619) 631-7400

تحياتي

ابو اندرو

[Mark_usa]

طريقة عمل شهادة الحياة للذين يرغبون بعملها بانفسهم:

1. تحميل وملىء استمارة شهادة الحياة من موقع السفارة العراقية
http://www.iraqiembassy.us/consulate-Arabic.htm

2. تصديق الاستمارة من اي كاتب عدل (Notary Public) في منطقتك،

3. بعد ذلك تصديقها من احدى مكاتب سكرتارية الولاية secretary of state التي توفر خدمة التصديق State Seal .

4. ارسالها بالبريد المسجل الى القنصلية العراقية في واشنطن مع صورة مع ارفاق ضرف فارغ مرجع مدفوع الثمن مثبث فيه عنوان المرسل مع ارفاق حوالة مالية 5 دولار money order.

للمزيد من المعلومات والتأكد تستطيع الاتصال على السفارة العراقية على ارقامهم في الموقع اعلاه.

ملاحظة:
- بالنسبة الى خدمة الكاتب العدل notary public فالكثير من البنوك توفرها مجاناً اذا كان عندك حساب معهم، عدا ذلك ممكن ان تجد هذه الخدمة في محلات بيع الانشورنس او فيدكس او UPS مقابل اجر معين ، وفي المراكز الثقافية العربية والكلدانية في منطقتك (ان وجدت)، واخيراً يمكنك البحث عن خدمة الكاتب العدل المتوفرة قرب الزيب كود مالتك في گوگل او يلو بيج.

- بعد ذلك عليك تصديقها في سكرتارية الولاية في منطقتك وقد لا تتوفر خدمة التصديق في جميع الفروع، لذلك عليك السؤال عن اقرب فرع عليك يوفر هذه الخدمة.

- ليس الغرض من عمل المعاملة بنفسك توفير المصاريف فحسب بل الفائدة من التعلم والاختبار والمساهمة في رفع رصيدك المعرفي في حياتك الجديدة وهو الاهم.

تقبل تحياتي