قرار وارجو المشوره منكم اخوتي كافه

[عمار البصري]

اخواني واخواتي الاعزاء
اليوم اريد ابشركم واخذ رايكم بخطوه ما ادري اريد اقتراحاتكم وافكاركم عليهه وهذا لان اعرف بيكم اتحبون الخير للكل وانا اثق بيكم واحب اخذ رايكم جميعا فلا تبخلون علي احبائي
اولا.... اتصلو بيه امس المنظمه وقالو بان المحلف وافق عليكم طبعا والله يشهد الفرحه مال خبر راحت بسبب المشاكل والمعانات و الضغوط اليوميه التي نتعرض لها انا والعائله واعتقد كلكم اتعرفون وجاي اتمرون بيهه فرديت عليه كتله الموافقه الامنيه كال لا بعدهه كتله يعني اشكد كالي لا تسأل لانها بعلم الغيب
وعلى هذا الاساس انا افكر جديا بالرجوع الى العراق ونقل ملفي الى بغداد رغم معرفتي بالتاخير الذي راح ايصير بس اكو شغلي اكدر ارجعله واعيش منه لحين اتمام كافت الاجراءات
احبتي احبتي
المطلوب منكم لاخيكم النصح والمشوره لله واذا كانت اكو هيج حاله سابقه ارجو ذكرها منكم ان امكن وكيف كانت وانا في انتظار ردودكم فلا تقصروا على اخوكم المحتار بزمانه
اريد اوضح شي كلش مهم ترى انا مو متعافي ولا بطران حتى لا يكلي واحد انته متعافي انا بركبتي عائله وطفل بالطريق فارجو ان تكون الردود على قدر المسؤوليه اخوتي
وشكرا مقدما ..........وانا في انتظاركم

اخوكم عمار البصري

[القرش الاسود]

اخوية عمار اول شي  الف مبروك  وثانيا ما انصحك اتحول الى بغداد  خليك اهنا  وربك ان شاء الله يسير امروك  بسرعة بجاه محمد وال بيت محمد وراح اني ادعيلك الله يفرج عليك وعلى كل اخونا العراقيين يارب



اخوك

القرش الاسود

[alfaras]

اخي عمار البصري السلام عليكم احب اكلك الله يكون بعونك لان الي كاعد تمر بي كلنه مر بينه والي كاعد تفكر بي كلنه فكرنه بي بس المشكله انة انته لازم تستحمل اذا كان عندك هدف للسفر والاستقرار  وبعدين كثير من اصدقائنه انرفضو لان راحو للعراق سبب موافقة المحلف انة انته مهجر ومضطهد في بلدك رجوعك للعراق راح ياخرك كثير لان عندي احد الاصدقاء في مصر ايضا رجع للعراق واخذ معاه مستمسكات من ال un بس لحد الان وصارلة اكثر من سنه ماتحركت قضيته  ارجو من الله ان يسهل امرك ولك كل الاحترام
اخوكم
alfaras

[ethan texas]

اخوية العزيز اول شي الف الف الف مبروك  وانشاء الله بالخير والبركة يارب


اخوية العزيز شوف  الله يحفضك وين ماتكون وباي بلد يارب

شي ثاني اذا انتة تكدر اتقاوم هلمدة الباقية بالمكان الي انتة بية ابقى

واذا فد دورة يعني ارجع للعراق وانقل ملفك للعراق بس طبعا ضمن القصة الي كايلهة

لان اذا ناتة كايل اني متهدد بالعراق اشون رح ترج للعراق وتنقل ملفك للعراق وشي ثاني كلشي ايصير وذولة ترة ايريدون بس حجة بسمار جحى  يعني اكو ناس هنا عادولهم المحلفيين من دون اي سبب  فة يا اخي والله اني ما انصح ترجع للعراق بصراحة

والله ايوفقك يارب واكيد القرار ايعود الك

والاخوى مرح ايقصرون

اخوك جوزيف

[البحار68]

أخوية عمار ... أنت من اخذت الموافقة اخذتها بناء على قصتك الي اكيد انت ذاكر بيها انه انت متهدد ..الخ  فأذا رجعت لبغداد او طلبت نقل ملفك الى بغداد تتصور مراح يأثر عليك هذا الشي ؟؟
ارجو أن تتأكد من هاي النقطة لان حسب معرفتي انه انت راح تنسف كل قصتك الي على اساسها اخذت موافقة محلفين ...
والرأي رأيك بالاول وبالاخر مع دعائي لك بالموفقية والنجاح في مسعاك

امنياتي الحلوة

[محمد زيونه]

نصيحتي  ماترجع

اتحملها  شلون مجان  لحد  ما الله  يفرجها  علينا  وعليك

مابقالك  الا القليل

أصبر  وأن شاء الله  ربك  راح  يفرجها

[نودي]

اخي عمار الكريم
الف مليون مبروك ويارب يوم السفر قريب
انت مو الوحيد الي كاعد هنا بدون عمل والله اذا احجيلك الي صاير وياية تكول اني بالف نعمة
نصيحتي وبرأيي المتواضع تصبر (راح الكتير وبقى القليل )
والله ولي التوفيق
اختك قيد الدراسة _ نودي _ دمشق _ قدسية .

[alusha1]

فعلا اخ عمار ماقصرو الاخوة وياك بردودهم ونصيحتي ايضا ان تتحمل ولو التحمل صعب احيانا بس ليش تتأذون أكثر ببقائكم بعدين بفترة اطول في بغداد وتعيشون حالة القلق والانتظار بلأضافة الى الظروف الموزينة في بغداد والخدمات صدك اللي عاش بأي دولة برة العراق صعب من يرجع للعراق يعيش ويرجع يتذكر مآسي بغداد
فأن شاء الله يسهل عليك موضوعك والله يفتحهة بوجهك وتحمل وان شاء الله الله يرزقك ويهتم بيك أحسن اهتمام لحد ماتسافرون وتوصلون بأمان
تحياتي علوشة

[angie-dawood]

واني هم انصحك ما ترجع اتحمل وانشاءاللة مابقى شي مثل ما تحملت من البداية كمل الباقي احسن ما تندم بعدين وربك هو المعين وادعو من الرب ان يفتحها بوجهك باقرب فرصة ربي يوفقك

[Boney M]

أخي العزيز:
أولاً ألف مبروك وإنشاء الله يوم السفر...
ثانياً إذا انت ما مشتغل مع الأمريكان بالعراق فنهائياً لا تفكر بالرجوع للعراق لأن قضيتك راح تنرفض 100% لأن المعاملات من داخل العراق جاي تنقبل فقط للي اشتغلوا مع قوات التحالف وهذا معروف للجميع.
أما إذا انت مشتغل معهم فآني أضم صوتي لضوت جميع الإخوان اللي نصحوك بأن تتحمل وتصبر بالغربة ومترجع لأن أكيد هذا راح يأثر على طول المدة بشكل مو بصالحك.
أرجو من الله أن يوفقك ويصبرك.
تحياتي

[عمار البصري]

اخواني الاعزاء
القرش الاسود
alfaras
 جوزيف
البحار68
محمد زيونه
 نودي
alusha1
AnGie  
مشكور جدا على سرعه الرد وعلى النصح والله يقدم ما بيه الخير انشاء الله
شكرا
اخوكم عمار البصري
 

[hussein5582]

اخويه انته قبل المقابلات و المحلفين تم منحك صفة اللجوء او وضعم صار انوا انته لاجئ متكدر ترجع لبلدك علمود هيج سوللك المقابلات ويطلعوك لبلد توطين ,, انته هنا اذا رحت لبغداد راح تنقذ الاتفاق الي بينكم و راح يكون اكوا احتماليه انوا يخلوك تقابل محلفين مره لخ ويسالوك سبب رجوعك واذا مقتنع بيك المحلف ممكن ترفض .

اني ادري انته تريد ترجع اتلم كم فلس علمود يفيدوك بالغربه بس افضل انوا تبقى حتى لا تخسر الاول والتالي

[Baghdady73]

الاخ عمار
تحية طيبة

الاخوان والاخوات الاعزاء ذكروا اغلب الامور المهمة التي ممكن فقدانها في حال عودتك للعراق ولكن انا الحقيقة لاول مرة اسمع بامكانية نقل الملف الى بغداد عن طريق الاي او ام, وفي حال كنت قد عملت مع القوات الامريكية او المنظمات المدعومة من قبل الحكومة الامريكية فهذا شيء اخر ولكن سؤالي هنا كما اورد هل تضمن سلامتك الشخصية وسلامة عائلتك ونحن مقبلون الان وكما تعرف على الانتخابات التي بانت تباشيرها..يقول اللمثل مضى الكثير ولم يبق الا القليل كما ان موضوع الموافقة الامنية ليست بهذا السوء, صحيح ان هناك حالات كثيرة في انتظار الموافقة منذ فترة ولكن هناك الاف الحالات التي تم قبولها بظرف زمني بسيط جدا لهذا حضرتك صبرت ورايي ان تكمل المشوار على خير افضل من حدوث مفاجات لا يحمد عقباها في حال عودتك قد تؤثر سلبا على ملفك ومصداقية كلامك وعذرا على الاطالة.
بغدادي

[Wingo]

أولاً ألف مبروك حصولك على الموافقة و هذا اهم شي
ثانياً و الله يا أخي الله يكون بعونك ، المشكلة أنه كلما يمر الوقت تزيد الحيرة و تزيد المصاعب و القلق و التفكير و الهموم
الله يفرجها عنك و عنا
أنا برأيي أنه تتوكل على الله و تتحمل بقاءك في الأردن إلى ان الله ييسر سفرك ، لأن الوضع أصلاً ما يتحمل بعد مغامرات و إضافة عراقيل، و سفرك للعراق فيه مغامرة
أكيد أنت أعرف بوضعك و بظروفك ، بس هذا رأيي الشخصي و إن شاء الله يكون صائب
صلي إستخارة لرب العالمين و إسأله عز و جل أن يهديك للطريق الذي فيه خيرك و خير عائلتك
و الله يقدم لكم كل الخير و التوفيق

تحياتي
wingo

[باسل بلالو]

اخى العزيز مرحبا بيك واتمنى ان تكون بخير ومبروك على الموافقة وتستاهل كل الخير ان شاء الله اود ان اضم صوتى الى كل الاخوة وانصحك بعدم العودة الى العراق وان تصبر وتتحمل لان مشوارك وصل الى النهاية وارجو منك التفكير بمستقبلك وحياتك الجديدة وعائلتك تحياتى الك اخوك باسل من لبنان

[koka75]

اخي العزيز انا اضم صوتي لصوت جميع الاعضاء الذين نصحوك بعدم الرجوع الى العراق ولو اني انشالله حجزت عليوم 14 بشهر العاشر مباشر الى بغداد وايضا لانه ضروفي صعبة ومداتحمل اهنا الوضع بس اعتقد وحسب سؤالي لعدد من الاعضاء بمااني مقدم عال اس اي في فكالو انه نشالله ماتصير وياية مشاكل بس انت وضعيتك تختلف لانه مقدم عالي او ام فاكيد راح تاثر وياك وانت حقك واكيد ضروفك انت ادرة بيها بس تدري اني حجزت ودارجع نشالله على يوم 14 بهالشهر ومع  اني في بداية التقديم ووراية مثل ميكولون حصبة وجدري لان لحد الان الكووم ما حصلته فاني يوميا اجيك النت بكل وقت الصبح والضهر والعصر وبالليل لان انتضر النتيجة منهم اي انتضر الكوووم والي هوة اول خطوة بالتقديم واكول بيني وبين نفسي بس يجيني الكوووم ابطل وماارجع علمود اريد فدشي يصير بقضيتي
ابطل الرجعة عالاقل يسويلي واهس بالانتضار  والصبر والباقي على رب العالمين فنصيحتي لك انه لاترجع وانتضر لانه انشالله ماباقيلك شي اسف عالاطالة وتحياتي لك ولجميع الاعضاء
اخوووكم
ابو محمود

[ابو خالد]

اخوي العزيز عمار البصري ارجو ان تتحمل كما قالو الاصدقاء بهذا المنتدى لان رجوعك راح يأثر عليك وانشالله ربك يفرجها عن قريب وترى مو شرط تتأخر عليك الموافقه الامنيه وهذا الي جاوبك وكالك بعلم الغيب ترى ماعنده اي معلومات وبلكت رب العالمين يسهلها عليك وتحصل موافقة المحلف باسرع وقت انشالله وكلنا صابرين وجاي نمر بظروف بس ربك انشالله يلطف بحال الجميع

[العربيد الأزرق]

اخي العزيز النصيحة الي اريد اقدها الك هو ان تبقى في البلد المتواجد بي حاليا و لا اتفكر ترجع للعراق و خصوصا انه معاملتك وصلت الى مرحلة متقدمة يا اخي اتحمل العراقيين كلهم الي بالغربة تعبانيين و خصوصا الي بالدول العربية و اذا ترجع للعراق راح قضيتك اما تتعرقل او تلغي لأن انت اصلا قابلت المحلفين و حجيت القصة و انتهيت منها و ان شاء الله تجيك الموافقة الأمنية

[القرش]

                                السلام عليكم

اخويه العزيز مااكولك غير (راح الهوايه ومابقى الا القليل ) يعني يااخويه الي صبر كل هاي المده مايصبر هل جم شهر ..واذا رجعت راح تخسر كل شي وبعدين مايفيد الندم ...كلنا مثلك انتظرنا وملينه من الانتظار بس اخيرآ الله القدير فرجها علينا وسافرنه وهاي تصير سوالف ...اصبر يااخي وانتظر وان شاء الله قريبآ تفرج عليكم .اتمنالك الموفقيه وكل الخير ؟

ابو انس
شيكاغو

[نخله عراقية]

اخي لا تجــــــــــــــــــــــازف ..عصفور باليد خير من عشرة على الشجرة هاي اذا اكو عصافير على الشجرة اصلا...اخي الله يساعدك ويكون بعونك بس والله حرامات ما بقى شي والله يسهلك امورك ويصبرك على الايام الباقية وهاي جاي تشوف كلنا هشكل...والله كريم ...
الله يحفظكم ويوفقكم ويجزيكم كل خير على كلماتكم الطيبة يا عائلة عينكاوا
نخلة عراقية
عمان