البارحة قابلت المقابلة الاولى بالمنطقة الخضراء وأسرد لكم القصة

[السومري]

اخواني الاعزاء .بعد التحية والسلام على اهل النتدى جميعاً.. أول البارحة قابلت المقابلة الاولى بالمنطقة الخضراء .. وكنت غير مؤمن بالقضية الا ان شاهدت اسمي مكتوب في الاستعلامات وعائلتي فردا فردا وسوف اسرد لكم القصة ..
اولا رحنه وكنا الساعة بال 6 صباحا هناك وكان هناك عوائل عراقية تنتظر بالباب يم ساحة النسور وبعدين شفنا حراس عراقيين اه ..اه وكم لمست الفرق بينهم وبين الحراس الاجانب اللي شفناهم بعد دخولنا الباب الاول فجماعتنا باقية عدهم نفس الروح العنجهية ماعدا الطيبين منهم اوقفونا بأسلوب غير جميل وكانهم مانين علينه ونحن لسنا ببشر هذا ماحدث معي انا لااعرف مارأه الاخرين واتكلم عن نفسي هنا فقط وما اذكره هنا يخصني فقط وقد اكون مخطئاً .. يعني انا وعائلتي ومعي اطفال طبعا كنا قد اصابنا العطش يم حراسنا العراقيين طبعا وهمه جابو قناني ماء بس شيسون ايظمونه  خاف نطلب منهم ..واحنا ماطلبنه منهم شيء انا هنا لا اريد ان اتجنى عن طيبة العراقيين بل العراقيين هم اهلي وهم كلهم كرم وشيمة واحترمهم ولكن هذا مايحدث في بعض دوائر دولتنا منذ الازل وهذه هي معاملتنا للاخرين ( اذا اكو معاملة يم موظف او حارس او مدير ) اتشوف العجب ولا كأن احنه اخوان او الانسانية تربطنا .... المهم ما اطوله عليكم طبينا باول باب وبدأ التفتيش ( اجراءات احترازية لابد منها للظرف الامني الراهن ) ومن مشينا درب التفتيش طبعا هو درب طوله حوالي فرعين بالطول وبيه حوالي 5 سيطرات تفتيش منها بالسونار ومنها تفتيش كلاب وتفتيش يدوي ..المهم اول ما ودعنا السيطرة الاولى قام ابني  بالتأشير على قناني الماء بجنب فتاتين امريكيتان وفورا رأيت الامريكية تقول تريد ماء وذهبت واعطت ابني 3 قناني ماء بارد وشكرناها وابتلت عروقنا من الظمأ واحسست على الفور الفرق بالشعور الانساني ومدى اهتمامهم بنا برغم التفتيش وتطبيق قانونه وصرامته فهناك ابتسامه على شفاههم وترحاب ومداعبة الاطفال من قبلهم وعندما اكملنا التفتيش والتقينا بممثل لجنة الهجرة اخذنا سيراً نحن و10 عوائل عراقية لان المكان جدا قريب من نقاط التفتيش وكان ممثل اللجنة مصري جازاه الله خيرا لترحابه بنا واسلوبه الرفيع بالكلام وادبه وبعدها التقطو لنا صور وثم صاحو باسمائنا وجاء الينا رجل لبناني طيب اللسان وبكل ادب طلب منا ان نذهب معه لغرفته وقام بطرح الاسئلة علينا .. ماهي اسماء افراد عائلتك ومواليدهم وأبوك وامك وهل لديكم احد من الابوين متزوج مرتين والتحصيل الدراسي وعملك وهل خدمت بالعسكرية واين وهل لدى احدكم مرض مزمن ومن هذه الاسئلة وطبعا بس هو وحده اللي قابلنة المقابلة كلها بدون وجود اي امريكي وبعدها اخذنا استراحة ومن ثم نادانى مرة اخرة ولكن كل واحد على انفراد وبدأ يسأل سبب طلبنا الذهاب الى امريكا وهل حصل معكم اي تهديد هنا وماهو وكيف كان بالموبايل ام ورقة ومن هاي الاسئلة وبعدها اكملنا واوصلنا لباب الخروج وودعنا بكل لطف وكان هذا بالساعة 12 والنصف ظهراً ورجعنا ونحن متفألين والحمد لله .. واثناء تواجدي هناك شعرت باني مسافر وليس بالعراق وكاني بامريكا واحسست ولمست التعامل الانساني الجيد بحيث يشعرك بانك موجود ويوجد اهتمام بك وحقيقة هذا شجعني كثيرا للسفر لأني بالحقيقة كنت اعيش مرحلة قلق مستمر وكيف وكيف سأترك العراق وانا لم اسافر ابد من قبل وكيف سأتغرب واترك ناسي واهلي وعاداتي وحقائب موروثاتي وكيف وكيف ولكني بعد هذه التجربة ايقنت باني لابد من ان اسافر والتوفيق من الله لي ولكم جميعا ادعوها من كل قلبي للجميع ... وهاهي هيه القصة وانا بالخدمة لاي سؤوال عن المقابلة (لفائدة الجميع) ...اخوكم السومري

[القرش الاسود]

اخويه العزيز

                   اتمنى لك كل التوفيق والله سهل امرك

[abu shahed]

الف الف مبروك اخي العزيز السومري انشاء الله تخلص من كل المقابلات ونفرح بسفرك اللهم امين




                                                                                      اخوك 79 النرجس

[abomagid]

الله يسهل امرك وانشاء خير وانت بعدك بداية الشغله بس احتمال تطلع كبلنا لان امساله كلها حظ وانشاء الله حظك من ازينيين

[مهند هادي]

اخوية العزيز السومري


ألف الف مبروك على المقابلة وكل اللي حجيته صحيح واني نفس الحالة بس هاي موالمنطقة الخضراء هذا يسموة قصر الازدهار وجان سابقا" يسموه قصر السجود بس مااعرف انته يابرنامج IOM لو SIV وشوكت قدمت



اخزك مهند هادي بغداد

[السومري]

شكرا اخوان على ردودكم وتمنياتك ( القرش الاسود والنرجس وابو ماجد ومهند هادي ) اشكركم اخوتي والله يسهله عليكم وعلى الجميع ونلتقي هناك ونكون اصدقاء وانا أمقدم على iom

[ShadowMan]

مبروك على اتمام المقبلة الاولى وان شاء الله اتكمل المقابلة الثانية  باقرب وقت......

[زيوس]

الف مبروك على اتمام المقابلة و نتمنى ان تنتهي من كل المقابلات وتسافر وتحقق جميع احلامك والله يوفقك ويوفق الجميع ...

زيوس

[alusha1]

مبروك اخونة السومري وان شاء الله كل التوفيق واللي حجيتة هو سبب تفكيرنا بلذهاب الى دول غربية لأن عدهم حقوق للأنسان وتفكير بحاجاتة واهتماماتة ومع الأسف عكس اللي شفناه بحياتنة بلعراق حيث تعلمنة هنا على غير طرق وغير عادات وغير تقاليد احيانا بيهة شئ من الخطأ
المهم ان شاءالله التوفيق الك وللكل بلمنتدى
بس سؤال شوكت اول ايميل دزيتة لل iom?
ومتى حصلت على الكيس نمبر؟
تحياتي علوشة

[الفريدو]

الف مبروك تجاوزك المقابله الاولى وانشالله تكمل المقابلات وتسافر وتعيش حياة جديده

وتحقيق كل امانيك بعيد عن الخوف وبداية حياة جديده وسعيده انشالله







اخوك : الفريدو

[ريم عبد]

مبروك اخي السومري على انهاء اول خطوه وان شاء الله قريبا اتخلص الباقيات
والمبروك الاقوى على قدرتك اتخاذ القرار المناسب والابتعاد عن التشتيت لان التردد  والتشتيت هوه اكثر ما يؤذي الفكر
وان شاء الله راح تترسخ قناعتك باتخاذك القرار الصائب والي الله كاتبلكياه
والله ايوفقكم بمقابلة محلفين قريبه
وان شاء الله فتح من الله وسفر قريب
اختكم ريم

[suzie83]

مبروك  اخوية   ..بس  ممكن  نعرف ومن  شوكت  قدمت   ؟

[درة]

مبروك اخونة العزيز علة اجتياز المرحلة الاولى ويارب الجايات كلهة سهلة وتسافرون بالسلامة

[angie-dawood]

مبروك اخي العزيز السومري انشاءاللة ربي يوفقكم بكل المقابلات وانشاءاللة يوم تكتب لنا عن موعد سفرك باذن الرب ربي يكون معكم دائما وابدا بالتوفيق

[العربيد الأزرق]

الف الف مبروك اخوية العزيز و هذولي الحرس احنه شفنا منهم هواية ناس حشا القراء ما عدهم حياء و لا انسانية على العموم الله يوفقك

[شكوماكو]

                  بالتوفيق ان شاءالله.

           اخوك
        شكوماكو

[عكعك التطوى]

الف مبروك وبالتوفيق انشاءالله

تحياتي

[ابو عبد الله التكساسي]

مبروك
وحضر نفسك لعد للحراس مال مطار بغداد ومطار عمان
وشوف الفرق بينهم وبين حراس شيكاغو
الله عليك لاتنساني بهذا الموقف
بس كول وين ابوعبدالله والله صدك فرق
هههههههههههههههههههههههههههه
بالتوفيق عمي وشايف الخير

[queen777]

اخواني الاعزاء
الي يسافرون من بغداد ليش ما يجون ترانزيت على دبي ليش يرحون عن طريق الكلاب الاردنيين راح تشوفون الفرق كبير جدا و سهولة ما شايفيهة

حتى لو الاي او ام يحجزولكم طلبو منهم على السفر عن طريق دبي لانهم اوادم مو حيوانات مثل الاردنيين و بالترانزيت ما تحتاجون فيزا

شكرا

[AbU.SaRa]

الف مبروك انشاء الله تكمل كل مقابلاتك وتسافر وتوصل بالسلامة.....

[Ross son of iraq]

مبروك حبيبي المقابلة وان شاء الله السفر, اني موضوعك لحد الان قريت تقريبا خمسة عشر سطر من عندة ولحد الان انت بس تحجي عل عراقيين وعل الحراس, اريد افتهم لو مخلي عنوان موضوعك تحليل لنفسية الجندي العراقي وشلون ايضم الماء عن الاطفال!!!!!! اني رديتلك وهسة راح ارجع اكمل قراية الموضوع مالتك. تقبل مروري اخوك روس ابن العراق

[Bobby]

اضم صوتي الى صوت كوين
يمكن السفر للولايات المتحدة من العراق عن طريق دبي (ترانزيت) وهناك شركتان من شركات الطيران واسعارهما اقل من اسعار الاردنية وهما شركة طيران الدلتا  وشركة طيران اليونايتد
delta.com
united.com
كما ويمكن السفر عبر شركة طيران الخليج (ترانزيت في البحرين) وهذا موقع الشركة guilfair.com
وشكرا