سؤال؟هل ينقطع الفود ستامب و الميدكيد للاجئين و جماعة siv بعد ثمانية اشهر ام يستمر اذا لم تجد عملا او

[George W. Bush]

سؤال؟هل ينقطع الفود ستامب و الميدكيد للاجئين و جماعة siv بعد ثمانية اشهر ام يستمر اذا لم تجد عملا او وجدت عمل بسيط لا يكفي؟

اتمنى من الاخوان بامريكا يبلغونا لأن تضاربت الاراء على هذا الموضوع ناس صارلهه اكثر من سنة و تكول مستمر و دائرة الفود ستامب يكلولي تنقطع بعد ثمانية اشهر من الوصول
نورونا الله يخليكم لأن اني صارلي اربع اشهر و ما ادري شراح يصير
اكو واحد صارلة اكثر من ثممانية اشهر و لم تنقطع عنه الفود ستامب و المديكيد؟
دائرة الفود ستامب بلغوني انه حتى الطفل ينقطع عنه كل شي بعد ثمانية اشهر لأنه ليس مواطن امريكي و اني سامع انه الطفل مينقطع عنه اي شي الى ان يبلغ 18 سنة جاوبونا الله يخليكم شنو الفلم؟!!!!
علما اني من جماعة siv


اخوكم George

[angie-dawood]

اخي العزيز انت معليك بالي يكولون الناس الي هسى ديروحون لانهم بعدهم ما يعرفون كلش زين عن القوانيين ولا يعرفون شلون يتفاهمون وي الكيس وركر المسؤول عن الفائل مالك مال مساعدات اخي العزيز ماكو من يكول انه المساعدات تنقطع عنك بعد مرور 8 اشهر وانت بعدك ما مشتغل وجماله عندك اطفال مستحيل الحكومة الامريكية تعوف شخص بدون مساعد وهو عنده اطفال وعاطل عن العمل بابا ماكو هيجي شي انتوا قبل ما تنتهي المساعدات اخر شهر يسون مقابلة وياكم يسموها هنا انتر افيوا راح يقابلك صاحب الكيس الي مسؤل عن فايلك الولفر راح يشوف انت بعد ما تنتهي المساعدات شلون تعيش اذا انت لكيت شغل راح يطلب منك شنو دتشتغل وكم ساعة بالاسبوع اذا دتشتغل 40 ساعة راح تتوقف المساعدات واذا 20 ساعة راح تتوقف بس فلوس الكاش لو يمكن ينقصوها ويبقى الفود ستام والتامين الصحي واذا نهائيا مدتشتغل راح تبقى المساعدات كلها مثل قبل وماراح ينقطع عنك اي شي الى ان تشوف شغل او هما يدورون الك شغل هواي الناس الي راحوا ما يعرفون انه من تنتهي المساعدات الهم الحق يقدمون مرة اخرى وخصوصا اكوا اطفال كل شي يبقى والطفل راح يستحق التامين الصحي والمبلغ الي هو 180 دولار الى ان يصير عمره 18 سنة هذة بكل الولايات موجودة بس قسم من الناس ما يعرفون هاي الشغلات والجنسية مالها علاقة بالمساعدات الجنسية بس الاشخاص الي ياخذون تقاعد اذا صارت 7 سنوات وهما دياخذون تقاعد وبعد سبع سنوات اذا ما عدهم جنسية امريكية راح ينقطع عنهم التقاعد بس هذا القانون لاصحاب التقاعد بس مو للاشخاص الي ياخذون مساعدات العادية  واي سوال اخر اني بالخدمة

[Abo Andrew]

لا ينقطع اذا العائلة بيها اطفال تحت ال 18 سنة

يستمر الفود ستامب والمديكال والكاش ايد ايضا بعد ال 8 اشهر اذا توفرت الشروط في هذه العائلة واللي هية وجود اطفال اقل من 18 سنة

وحتة في حالة احد افراد العائلة اذا وجدعمل وكان الدخل اقل من مستوى الفقر سيؤدي الى تقليل الفود ستامب او الكاش ايد مع بقاء المديكال كما هو
وبما انه انت SIV تاخذ نفس المساعدات اللي ياخذهة اللاجئ
معليك بالحجي اللي ايكول انه ورة ال 8 شهر وينقطع حتة لو عدهم اطفال ماكو هيج حجي

وهذا اللي صاير وياية هنانا بكالفورنيا

اما اذا العائلة ما بيهة اطفال فينقطع كلشي بعد ال 8 اشهر ما عدا الفود ستامب يبقى كما هو



تحياتي

[hussein5582]

اخي العزيز شغله وحده حطه ابالك مدام انته عندك سوشيال وداخل للبلد قانوني فانته معاملتك حالك حالالامريكي بالحقوق والواجابات و ماكوا اختلاف بينك وبين اي شخص الا بالوظائف الامنيه الي تحتاج جنسيه وهذا مو موضوعنا
اما بالنسبه للفود ستامب فمتنقطع اذا انته الدخل الشهري لافراد العائله الي اقل من حد الي مقرر للولايه
و من الممكن انوا  تتقلل اذا لكيت شغل حتى لو بسيط يعني اذا دخلك 1000 بالشهر تقل الفود ستامب بنسبه تتناسب ويا هذا الدخل
واكو قائمه بمكاتب ومواقع الفود ستامب بيه اذا عدد الافراد 2 مثلا شكد حد الراتب الشهري علمود تنقطع

اما التامين فتامين االلاجئين ينقطع وره 8 اشهر  وغير قابل للتجديد و يتحول بعده على تامين الديبارتمنت اوف هيومن سيرفسس الي نفسه يصدر الفود ستامب

[George W. Bush]

شكرا اخوان على الردود المطمأنه الأخت انجي و الأخ ابو اندرو و الأخ hussien5582
اخواني اني اليوم رحت لدائرة الفود ستامب و قابلت لأن فترة الفود ستامب مالتي انتهت فدزولي رسالة كلولي لازم تملي ابلكيشن مرة اخرى و من قابلت الموضفة هي الي كلتلي هالكلام و طلعتلي القانون الي يخص الSIV كما مكتوب عدهم و كالت بعد ثمانية اشهر من الوصول ينقطع عنكم كلشي و حتى الطفل ينقطع عنه لأنه مو مواطن امريكي و هذا نص كلامهه لذلك اني حيل خفت لأن لحد الان اني هستوني اشتغلت بارت تايم و الدخل الشهري يا دوب يكفي الايجار

[Abo Andrew]

اخي العزيز
هاي الموظفة دتثرم براسك بصل
الا في حالة وحدة حجيها صحيح اذا كان كل ولاية قانونهة شكل
اخي صديقي كاعد بعد مجمعين من عدنة صارلة سنتين جاي وبالبرنامج الاول مال SIV
اللي مجان بي اي مساعدات
 قدم وانظو مساعدات ولحد الان مستمرة وكلشي ما مكطوع علية

شنو الطفل مو امريكي شنو هالخريط
زين يرحم والديك من جنت يمهم ليش مسالتهم اللاجئ هم يعتبر الطفل مالتة مو مواطن امريكي لعد ليش تستمر المساعدات للاجئين؟؟؟

اخي العزيز لو انت ما مفتهم منهة لو هية محششة روح راجع مرة لخ واسال ترة هذولي الامريكان بيهم هواية ناس محششين

ولعلمك اخي احنا دنشتغل بارت تايم وكلشي ما مكطوع وهذا ثالث شهر بعد ال 8 اشهر مستمرة المساعدات والكاش ايد

تحياتي

[angie-dawood]

اخي مو بكيف الموظفة هذا قانون وخصبا عنهم ينطوك حالك حال اي امريكي انت اطلب من المسؤول الكبير عدهم انه يغير الكيس ولكر مالتتك كول اريد غير موظف يكون مسؤول عن الفايل مال مساعدات عندك الحق لانه قسم من الموظفين عبالك دينطون راتبهم الك كلشي يكولون ممنوع احجيلك سالفة مال والدتي هي تاخذ تقاعد والفود ستام مالتها كان مدة سنة ينطوها بس عشر دولارات والباقين الي ياخذون تقاعد ياخذون 150 دولار فود ستام كل مقابلة اوكلها ليش امي تنطوها بس عشر دولارات فود ستام كالت المسؤولة عن فايلها هي امج بس تستحق هلكد كتلها ليش بس هلكد مع انه غيرها هم ياخذون تقاعد تنطوهم 150 دولار فود ستام ليش ما تكون حالها من حالهم تكول لا امج بس هلكد تستحق كتلها اوكي اريد اقابل المسؤول الكبير هنا هسى اريد اقابلة اني ما اريدج تكونين مسؤولة عن فايل امي كالت اوكي هسى اصيح المسؤول صاحت السؤول وسوو اجتماع ويانا كال شكو شنو المشكلة ليش تريدين تغيرين المسؤول عن فايل امج كتله كيت كيت ليش بس امي تنطوها 10 دولارات فود ستام وغيرها نفس الشي ياخذون 150 دولار شنو السبب
المهم حجه وكال اني اشوف شنو الموضوع ورى اسبوعين دزوا جك لامي وكارت الطعام جديد وبيه الف و200 دولار مال كل الفترة الي كانت تاخذ 10 دولارات وهم غيروا الموظفة صاحبة الفايل من هيجي اكول تكدرون تغيرون صاحب الكيس اذا ما كان متعاون وياكم وكلشي بالقانون ماكو من يكول الك انت ما تستحق لانه انت مو مواطن امريكية لعد انت شنووووووو انت من تاريخ انقبلت للجوء تعتبر مواطن امريكي خصبا عنهم

[ammar_eng]

تسلميين اخت انجي العزيزة الراقية على هذا التوضيح الراقي

الاخ ابو اندور يسلمو على التوضيح المفيد وبارك الله بيك

[George W. Bush]

شكرا اخوان على التوضيح و انا راح ارد و اجيك وياهم بلكي هاي الموظفة محششة
الاخ ابو اندرو اني مفتهم الكلام كلش زين و اكدت عليهه اكثر من مرة و كالت نفس الكلام ومن لحيت عليها كالت اني راح اجيك وي المسؤولين و اذا كلامك صحيح راح نتصل بيك و نبلغك
هو اصلا القانون مال اللجوء و الهجرة الخاصة مبهم يعني يكولون الك مساعدات ثمانية اشهر و بعدين طلعت لا تستمر المساعدات اذا ملكيت شغل زين نصدك منو القانون لو الواقع
الموظفة من كلمتني كانت لازمة بايدها ورقة بيهه القانون الخاصة بينه و بالافغان طبعا الأفغان مساعداتهم 6 اشهر مو 8 و هي كلمتني حسب القانون
و ما ادري بعد

[Abo Andrew]

جان كتلهة اتسويلك نسخة من الورقة اللي جانت بيدهة لو هو بس حجي

بالمناسبة ترة هية متدري والدليل شوف شكايلتلك

و كالت نفس الكلام ومن لحيت عليها كالت اني راح اجيك وي المسؤولين و اذا كلامك صحيح راح نتصل بيك و نبلغك

معناها لو متاكدة جان مكالت هالحجي مو اكلك محششين

اخي روح كلهة ال SIV كلهم يستلمون مساعدات ورة ال 8 اشهر
واذا كلتلك لا
سوي مثل مكالت الاخت انجي كلهة اريد احجي وية السوبر فايزر مالتج وفهمة الوضع كلة هاي وين صايرة واحد عندة اطفال ومتساعدو؟؟
بس ممكن اتكلي انت بيا ولاية ؟؟؟

تحياتي

[George W. Bush]

الاخ ابو اندرو
انا بولاية ميزوري و الكلام كان موجود بورقة كدامهه و كلتلي اني مفتهمة القانون هالشكل و اذا اكو اله تفسير ثاني راح اسأل بيه المسؤولين
و هو لو ترجع لقانون المهاجرين الاس اي في صحيح نفس الكلام المساعدات لمدة ثمانية اشهر فقط و هذا موجود الكلام ببرنامج الاس اي في و اعتقد هذا الي بلغوا بيه الجميع انه المساعدات ثمانية اشهر

[angie-dawood]

اخي صدكني اكو ناس صارلهم 30 سنة ياخذون مساعدات واكو هم لاجئيين صارلهم اكثر من سنتين ياخذون مساعدات هما صحيح يكولون انه 8 اشهر بس انت قدم مرة اخرى راح ينطوك صدكني بعد ظلت بكيفك تكدر تغير المدينة مالتك او الولاية اذا كلش  ما انطوك لانه يجوز ولايتك هيجي قانونها بس بغير ولاية غير شكل هسى احنا هنا بمشكن واللة اكو ناس كل عمرها على المساعدات يشتغلون بدون تكسات ويكولون احنا مدنشتغل وياخذون كل الحقوق من كل شي المهم انشاءاللة ربي يوفقكم اخي

[George W. Bush]

شكرا اخت انجي على النصيحة و الاسلوب الراقي
و اشكر جميع الاخوان الي جاوبوا على الموضوع و اتمنى الكلام يطلع صحيح و راح اجيك ويه هاي الدائرة الغبرة و الله كريم

تحياتي للجميع

[Abo Andrew]

اقرا القانون شيكول

س:   باعتباري عراقي/ أفغاني حاصل على تأشيرة هجرة خاصة، هل أكون مؤهلاً لأي مزايا؟

 ج:   أتاح قانون المخصصات الموحد، 2008 (القانون العام 110-161) الحصول على مزايا إعادة توطين اللاجئين للمترجمين العراقيين والأفغان وأفراد عائلاتهم ممن تأهلوا للحصول على تأشيرة هجرة خاصة سنوياً تصدر بعد 26 كانون الأول (ديسمبر) 2007. يعتبر الحاصلون على تأشيرات الهجرة الخاصة من العراقيين والأفغان مؤهلين للحصول على مساعدة الانتقال وإعادة التوطين ذاتها، والبرامج المستحقة لهم وغيرها من المزايا الموفرة للاجئين المقبولين بموجب البرنامج الأمريكي لقبول اللاجئين. هنالك نص مشابه في (القانون العام 110-242) قد تم إصداره في 3 حزيران (يونيو) 2008، والذي ينطبق على 5.000 شخص عراقى حصل على تأشيرة هجرة خاصة هم وأفراد عائلاتهم المؤهلين كل سنة من السنوات الخمس القادمة.
يجب أن يوضح جميع المتقدمين لبرنامج تأشيرة الهجرة الخاصة ما إذا كانوا يرغبون أم لا يرغبون في الحصول على هذه المزايا من خلال إعادة نسخة موقعة وممسوحة ضوئيا من نموذج اختيار مزايا اللجوء (وهو أحد النماذج التي تتضمنها مجموعة أوراق طلب التأشيرة) إلى المركز الوطني للتأشيرات في أقرب وقت ممكن وفي موعد أقصاه عشرة أيام تالية لتاريخ إصدار التأشيرة، كما هو موضح على التأشيرة ذاتها. ويؤدي عدم القيام بذلك  إلى رفض أي طلب مستقبلي للحصول على مزايا اللجوء التي تمولها وزارة الخارجية. يتوجب على الحاصلين على تأشيرة الهجرة الخاصة ممن اختاروا الاستفادة من مزايا وزارة الخارجية قبول كافة المزايا الآخرى المصاحبة، بما في ذلك السفر الذي يتم ترتيبه من قبل منظمة الهجرة الدولية.

اعتقد اذا انت مقدمت قبل متجي لامريكا خلال 10 ايام من صدور الفيزا فحجي الموظفة صحيح حسب ما موجود اعلاه بس اني اللي اعرفة هذا الولد صديقي صارلة سنتين وبالبرنامج الاول ولي هسة دياخذ المساعدات
المصدر

http://www.wrapsnet.org/RPCWRAPS/FAQ/tabid/75/language/en-US/Default.aspx

اختار

Refugee Benefits for Iraqi and Afghan SIV Translators/Interpreters (FAQ) (Arabic)    

[George W. Bush]

انا مقدم من و انا بالعراق على المساعدات و جيت عن طريق السفرات الي تنظمهه الأي او ام حالي حال معظم الأس اي في

و بحثت بالنت و لكيت انه نص كلامهه صحيح و لنص الاخر غلط بالنسبة للي فوق 18 سنة صحيح ينقطع الفود ستامب و غير قابل للتجديد
بس بالنسبة للأطفال تحت 18 فيستمر عليهم

اقرا هاي الدوكيومنت

http://www.fns.usda.gov/fsp/rules/Memo/2008/032008.pdf

[Abo Andrew]

شوف اخي العزيز
اني عندي مقولة وكل يوم دا اشوفهة كلش تنطبق على حال هذا البلد واللي هية حكومة غبية وقوانين اغبى

اني قريت الفايل وحتى القانون هو نفسة اللي ذكرتة الك فيما يخص المساعدات واللي هو القانون العام 110-161

من صفحة ايكولون ياخذ المهاجر نفس الميزات ومن صفحة بالفايل اللي انطيتني ياة كايلين غير شكل
بس اني اللي اعرفة اللي عندة اطفال تستمر المساعدة الهم والاطفالهم وهذا حال اللي اعرفهم هنانا وجايين SIV

يعني هية منطقيا اخي العزيز

راح ايساعدون اطفالك وانت وزوجتك لا ؟؟
اني مدا اتخش بعقلي

بالمناسبة ترة الفايل اللي انطيتني ياة يخص قضية الفود ستامب فقط
متشمل الكاش ايد او المديكال

هذا يشرح عن الفود ستامب فقط

وشنو رايك صديقي اجة قبل 6 اشهر وبالبرنامج الاول ورفض التقديم من بغداد واجة على حسابة الخاص ومن اجة امريكا قدم على المساعدات وافقولة راسا وهو بويسكنسن


على اية حال انت لا تذكرلهم هاي الفقرة مال كبار بلكت همة ايشملوكم بالمساعدة كلهة والله كريم

تحياتي

[storm2]

اخي العزيز انت بيا ولاية ممكن اعرف

[Aram2003]

الاخوة الاعزاء
انس\ي سمعت من صديق لي عايش في ولاية تكساس انو حتى بعد ايجاد عمل لثاحب العائلة فقط تنقطع المساعدات عنه شخصيا ولكن يستمر لعائلته واطفاله  مثلاوهووعائلته ثلاث نفرات 500دولاركمصاريف شخصية و500 دولار ايجار الشقة اي الف دولار




                                    لايؤمن احدكم حتى يؤمن لاخيه مايحب لنفسه

[ابو شهد]

الاخت العزيزة على قلوبنا جميغا بدون استثناء انجي السلام عليكم عندي استفسار وياريت الجواب واكون جدا ممنون منج اختي الغالية

هل بعد مرور او انتهاء فترة المساعدات الي معدلها خنكول 4 اشهر واللاجئ كان ما عنده عمل وان المنظمة لم تجد له عمل هل سوف ان الاجار للشقة رغم الظروف الي شرحتها سوف ينقطع عنه الاجار ام هناك شيئ اخر ارجو التوضيح واني ممنون منج مقدما


اخوج ابو شهد .............

[Alawi]

بس حبيت اتدخل من رخصتكم - اني ابولاية كولورادو وعندي صديق امريكي اتعرفت عليه وهوة سايق باص وعنده فود ستامب سالته كتله ليش كلي لان دخلي الشهري اقل من المحدد وهوة امريكي وسائق باص بالار تي دي- فاشلون احنه يقطعون الفود ستامب علينه يا عيني - لا تهتم اكيد راح يبقه اذا دخلك الشهري اقل من المحدد والدخل قيمته الدنيا اتحدهه الكاونتي مالت كل ولاية واتقبلو مروري.

اخوكم علاوي
دنفر- كولورادو

[George W. Bush]

الأخ ابو اندرو اني صحيح هاي الدوكيومنت تتكلم بس عن الفود ستامب و هو اني اقصد الفودستامب اكثر شي لأنه حيل مهم

و اني هم لمست تناقض هواي بكلامهم بغير دوكيومنتس يكولون المهاجر اله حق بالفود ستامب و بهاي الوثيقة حاسبين الSIV ملة وحدهم لا هم مهاجرين و لا هم لاجئين

اما بالنسبة للكاش ايد فاني ما مستلم كاش ايد و لا اعرف انه اكو شي اسمه كاش ايد للمهاجرين
هنا اذا انت مو مواطن امريكي مينطوك كاش ايد هذا الي اعرفه لأن اقاربي متجنس امريكي و جاب زوجته و بنته لم شمل و لمن قدم الهم على فود ستامب و تأمين صحي ما انطوه الهم لأنهم مهاجرين و ليسوا مواطنين و هذا كان جوابهم
و خاف تكولي ما سألهم و ما غير الكيس ووركر راح اكلك سألهم و سوه هوسه وياهم لأن انت تعرفنا العراقيين ما نتنازل عن حقوقنه
و كانت النتيجة هيه هيه ما الهم فود ستامب لأنه مهاجرين صحيح يجوز هاي القضية تختلف لأنه هم جايين لم شمل
بس النتيجة وحده هو انه هم مهاجرين حالهم حال اي مهاجر

[angie-dawood]

الاخت العزيزة على قلوبنا جميغا بدون استثناء انجي السلام عليكم عندي استفسار وياريت الجواب واكون جدا ممنون منج اختي الغالية

هل بعد مرور او انتهاء فترة المساعدات الي معدلها خنكول 4 اشهر واللاجئ كان ما عنده عمل وان المنظمة لم تجد له عمل هل سوف ان الاجار للشقة رغم الظروف الي شرحتها سوف ينقطع عنه الاجار ام هناك شيئ اخر ارجو التوضيح واني ممنون منج مقدما


اخوج ابو شهد .............

[angie-dawood]

اخي ابو شهد من تخلص المدة المقررة لكل لاجئ من مساعدات اكو نظام يسون مقابلة وي الاجئ وغير الاجئ كل 6 اشهر يسون هاي المقابلة حتى لاهل التقاعد يسموها هنا هاي المقابلة ( انتر افيو ) راح تقابلك الموظفة او الموظف الي مسؤول عن فايلك من بداية التقديم نسميها هنا ( كيسس ولكر ) هذة او هذا الموظف راح يقابلة بعد ما تنتهي المساعدات او اخر شهر من المساعدات راح يسالك انت اشتغلت بهذة الفترة لو لا عندك فلوس بالبنك لو لا شنو هو الوارد الشهري الي يدخل بيتك وشكد تدفع ايجار وهم لازم تودي وياك عقد ايجار وشنو تدفع من مصاريف للبيت من قائمة كهرباء لو ماء لو هيت لو اي شي تاخذهم ويالك للمقابلة الي نسميها ( انتر افيو ) يعني اعادة فتح ومراجعة الفايل او الكيس المهم بعد ما تسوي مقابلة اذا انت بعدك ما شايف شغل وهي تسالك اذا احنا شفنا الك شغل تشتغل اي شغل اذا كلت نعم اشتغل راح تستمر عادي المساعدات واذا تكول لا اني ما اشتغل اي شغل راح تعتبرك انت تريد تعتمد عليهم ويجوز تستمر المساعدات او لا اخي الموظفة الي بالدوائرة مال ولفر  هما قسم منهم متعاونين وي الناس كلهم مو بس الاجئيين وقسم منهم حيل مكروهين عبالك دينطون الك راتبهم وكل واحد وحضة وي الموظف الولفر انت من ينقطع عنك المساعدات روح قدم مرة اخرى واكعد احجي وي الموظف الي مسؤول عنك اذا تعرف لغة خير على خير واذا ما تعرف لغة اكو فقرة بالاستمارة من تمليها تكول تحتاج مترجم اكتب بيها نعم حتى يكون المترجم وياك بالمقابلة احسن هو يعرف شلون يتعامل وياهم ولا تكول ماكو هيجي شي هنا مستحيل بكل الولايات اكو مساعدات للاجئيين ولي اصحاب الدخل المحدود وربي يوفقك دائما وابدا واي شي تحتاج شرحه تدلل اخي العزيز ابو شهد  تحياتي لشخصك

[Abo Andrew]

اخي العزيز
الفود ستامب اهم شي؟؟

كلش غريبة
اخي العزيز الفود ستامب هذا لا شي مقارنة بالتامين الصحي واللي ايكلف الالف الدولارات هاي غير الادوية

الكاش ايد هو انت متستلمة هسة الا بعد 8 اشهر او 6 حسب الولاية

الكاش ايد راح ايسمو بعدين Calwork  وهذا تنطي الحكومة مو المنظمة اللي هسة دتساعدك

ويما انه عندك اطفال ايحقلك اتقدم حتة لو مهاجر مثل ما هواية ناس مهاجرين مقدمين

اخي العزيز انت ما اعرف ليش مدا تستوعب انه عندك نفس ميزات اللاجئ


بالمناسبة عندي عم اجة قبل 6 سنين هم لم شمل وعمي الجبير سحبهم يعني مهاجرين
صارلهم 6 سنوات مجلبين برب المساعدات


تحياتي الك يا وردة

[ابو شهد]

مشكورة اختي العزيزة


اخوج ابو شهد ..............

[Abo Andrew]

الاخت انجي

هاي معلومة جديدة ممكن اتفيدج خاف احد يسال عليهة

هنانا بكالفورنيا بعد ماكو كيس وركر Case Worker  على مزاج الشخص او اللاجئ
واني لاحظتة من قدمت قبل 3 اشهر انه كل موظفي دائرة الولفير يشتغلون على الكيس مالتج
بعد ماكو شخص محدد ايكون مسؤول عن ملف اللجئ وهذا الشي صار بسبب انه الناس كامت تتذمر فلان مو زين وفلان هيج
ورحنة قبل فترة دنراجع على شغلة وكنالهم انريد نحجي وية المسؤول عن ملفنة وهمة فهمونا هيجي وكلونا بعد ماكو شخص محدد هسة راح اندز رقمكم واي واحد فارغ راح ايجاويكم وايكون وياكم
عاد اذا بعدين اتغيرت وانطونة كيس وركر ممكن اصحح هاي المعلومة بس هاي حسب مصار ويانة اخر مرة

فهمة ديعرفون شلون يتعاملون وية العراقيين مو عبالج احنا بس نشلع كلبهم
همة همين

تحياتي

[Boney M]

أخي العزيز أبو أندرو وأختي العزيزة أنجي:
تحية إجلال لما تقدمانه من مساعدة لإخوانكم في هذا المنتدى الرائع بكل شئ.
أود أن أسأل سؤال وأرجو من الأخ صاحب الموضوع أن يعذرني على المقاطعة. فقد أكملت والحمد لله الدورة التثقيفية ونحن بانتظار السفر. وقد أخبرونا خلالها بأن المساعدات هي لمدة شهر واحد إبتداءً من تاريخ دخولنا لأمريكا وعندما اعترضنا على كلامهم وقلنا لهم أن لدينا معارف في امريكا وقد أكدوا لنا أكثر من مرة على أن المساعدات تستمر 8 أشهر لأصحاب العوائل ولا تنقطع إذا ما وجد الشخص عملاً يتخطى به حاجز الفقر فقالوا لنا وأكدوا ذلك بأن المساعدات هي لشهر واحد فقط سواء وجد العمل أم لا مما أثار فوضى وحيرة العوائل بل العزاب كذلك في القاعة.
لذا أرجو الإفادة أكثر فيما لو كان كلامهم غير دقيق أم ماذا؟
تقبلوا تحياتي واحترامي

[angie-dawood]

اخي العزيز اهلا وسهلا بك
واخي العزيز صاحب الموضوع اخونا جورج اسفة منك لاني ارد في موضوعك على اسالة الاخوة ارجوا المعذرة

اخي العزيز بوني
اولا انت باي ولاية انشاءاللة سوف تتوجه حتى اعرف ما نوع المساعدات المقدمة بهذة الولاية لانه يااخي كل ولاية بيها قانونها الخاص وحتى مرات نفس الولاية بين مدينة ومدينة القانون يختلف ارجو ذكر الولاية مع الشكر

[Boney M]

بس سؤال يطرح نفسه: يعني إذا كان كل ولاية إلها قنونها الخاص بيها يعني أكو هيج شي أنه كل شي ينقطع بعد شهر واحد بس!!!!!!!!!!!!!!!!

[Boney M]

هاي شنو؟ توني جاوبت على سؤال الأخت أنجي. وين طار الجواب!!!!!
والله ليهسة ما محددين لنا الولاية وكلما نسألهم عن الولاية يكولون إحنة نكوللكم بعدين.

[angie-dawood]

هو اكو بس مو شهر اقل شي يكون اربع شهور ماكو شهر وينقطع عنك كل شي مستحيل هذا الشي وهم ارجع واكول كل ولاية قانونها شكل بس اكو شي اسمه ترجع تقدم مرة اخر يجوز انت ما افتهمت عليهم جائز يقصدون على المنظمة اي المنظمة تدفع مرة وحدة للاجئ الي هي ملبغ من المال لكل فرد من العائلة 425 دولار لكل لاجئ من يجي للولايات المتحدة هذا الشي صحيح بس مال تكول مساعدات الحكومة اقصد الولفر لا اخي مستحيل ينطون بس شهر ويتركوك نو نو وي

[Boney M]

أشكرج هواية هواية على التوضيح والظاهر آني اختلطت عندي المساعات الحكومية مع المنظمة لأن أخوج أطرش ما يشوف زين 

[abomagid]

السلام عليكم
اريد اسال على الفود استامب شنو الي يشمل من الطعام يعني مشروبات غازيه ومثلا لحم دجاج .... الخ
لان كل واحد يحجي شكل واسال مجرب ولا  تسال حكيم
اخوكم
ابو ماجد
تحياتي

[angie-dawood]

نعم اخي ابو ماجد الفود ستام فقط للمواد الغذائية والمشروبات الغازية مثلا لحم دجاج خضراوات فواكة اي شي تشترية بالفود ستام عدى المشروبات الكحولية

[vincenzo]

عاشت ايد كل اللي كتب بهالموضوع
نقاش بديع

[Mark_usa]

اخوية جورج بوش،

كلام جميع الاخوة صحيح وكلام الموضفة ايضاً صحيح،
والحقيقة هي لا الموضفة دة تثرم براسك بصل ولا الاخوان هنا دي يجذبون عليك،

الشغلة وما فيها انه في حالتك وبعد انتهاء مدة الخدمات لللاجئ (والي هي ثمانية اشهر) اصبحت غير مشمول بهذه الفقرة القانونية (التي تغطي الاعانات لللاجئين)، على ان لايعني بانك غير مشمول بفقرات اخرى تخص المقيمين الشرعيين والمواطنين في البلد، لذلك ممكن ان تشمل بنوع أخر من المساعدات اذا توفرت الشروط اللازمة (وكما ذكر الاخوة وجود قاصرين تحت 18/19 سنة، او بلوغ العمر 65 فما فوق) زائداً الفود ستامب والي هي مالها علاقة بكونك لاجئ ام لا.

بعض الولايات سترسل لك رسالة بعد ال 8 اشهر تخطرك بتوقف المساعدات عنك تحت بند اللاجئين، كل ماعليك فعله هو ان تبداً من جديد وتقدم طلب مساعدات مستقل على اسس اخرى (الاطفال، الدخل القليل الخ.) ومنعاً للارتباك والدخول في جدالات لاتذكر لهم بانك تريد مساعدات الاجئين.
وهذا كل ما في الامر.
للمزيد من المعلومات اذهب الى دائرة الخدمات الانسانية في منطقتك، واقرا التعليمات الموجودة في المنشورات المتوفرة على الطاولات او الجدران واملىء الاستمارات الازمة. ومحلولة انشاء الله.

تحياتي

[Alawi]

تسلم اخونه مارك على هذا الكلام العدل
وانت حجيته ابكلام موزون وقليل ومفيد جدا...
الف شكر الك مرة اخرى

[George W. Bush]

الأخ MARK_USA
شكرا على ردك المطمئن و اشكر جميع من ساعد بالرد على الموضوع


اخوكم George