سؤال ألى الاخوان الي بأمريكا

[زيد المدفعجي]

كيفكم أخوان أنشا الله تكونون مرتاحين.
أخوان آني محتاج أستشارتكم. وهي أنو آني مهندس وأستاذ بالجامعة وأشتغل بشركة وعندي بيت وسيارة وطفل  واحدوالحمد لله بس آني ما عاجبتني حالت الفوضى وعدم الاستقرار في العراق وأفكر بأبني وعائلتي وأخاف عليهم ومقدم على الIOM و SIV ودا أنتظر منو أحسن ألي. أخوان تنصحوني أجي لأمريكا لمصلحتي ولمصلحتي عائلني لو لا؟ وأذا تنصحوني أجي لأمريكا فأي ولاية تنصحوني أقدم عليها بحيث بيها عمل وشويه مناسبة من حيث الاسعار؟
ولكم مني جزيل الشكر وبالموفقية للجميع.
أخوكم زيد المدفعجي.

[مهاجرين بلا حدود]

صدك حيرة

[WRONGED]

قراءه الملفات الكثيره في هذا المنتدى يوميا شويه لمده اسبوع تغنيك عن اي اجابه لان اكو تفاصيل كثيره تفيدك على الولايات ميكدر واحد يكولهه كلهه بجواب فنصيحتي يوميه تقره شويه بالارشيف وكلشي واضح وشكرا

[زيد المدفعجي]

مشكور أخواني على مشاركاتكم بس آني أريدكم تحمسوني. لأن آني عندي واهس يا أخوان والله عراقنا ماكو أحلى منه بس للأسف أكبر مشكله بالعراق هو أحنه العراقيين مع أحترامي للطيبين.

[WRONGED]

حبيبي كلمه وحده بس اطلع وابني حياه لطفلك او اطفالك هاي انت اذا من النوع الي تحب تتعب وتشتغل رح تعيش احلى عيشه وتامن مستقبل اطفالك
اسف كتلك هيج لان اكو  بعض الناس بالمنتدى يكولون موزينه لان المساعدات متكفي ويريدون همه بس ياخذون مساعدات طول العمر
اما المثقفين مثلي ومثلك ومثل كل اعضاء المنتدى الحلوين  مقتنع انو يشتغل واطفاله بالمدارس واحسن تعليم ويتعب الاسبوع كله والويك اند يطلع يفتر ويعيش حياه طبيعيه وبامان ومحد يكله انت منو ولا سيطره توكفه
حبيبي كلنا وياك

[rafid82]

استاذي الكريم

هذه حياتك انت  تختار طريقك لان بصراحة  اكو ناس راحت وتقول الامور بخير واكو ناس تقول لا

فهاي الشغلة يمك رأيي الشخصي  واكرر رأي الشخصي وبما انه اهلي كلهم هناك يعني بس اني باقي بالاردن منتظر المحلفين   الامور هناك عايشين ومرتاحين  واني عائلتي هناك
تشمل اخي وزوجته صار سنتين هناك
اختي وزوجها سنه هناك
الاب والام وخواتي الصغار هناك سنه  وثلاث اشهر
والامر الاخير الك
طبعا امر كلش مهم خلي ابالك  لاتتصور اول ماراح تروح تشتغل بشهاتك  و تبقى انت  وهدفك بأمريكا هناك موفق
اخوك رافد

[بغداد بقلبي]

استاذي العزيز تكدر اتروح واتجرب اذا عجبك الوضع ابقه واذا لا ممكن ان ترجع للعراق واحسب احسابك انك راح تبدا من الصفر بمعنى الكلمه بكل شيء بحياتك وبالنسبه لراي ابقه بالعراق اذا مرتاح ومراح ايظل هيج الوضع للابد والله ولي التوفيق

[WRONGED]

صح مرح يبقه الوضع هيج انشاله فد 20 سنه يبدي يتحسن الوضع من يصير عمرنه 50 ومن جهالنه يخلصون المدراس والكليات التعبانه بالعراق
مو صارلنه عشر سنين نكول رح يتحسن وكلشي ماكو هذا اكبر درس النه كافي نضيع من عمرنه ولو عمرنه ضاع نلحك على عمر جهالنه

[haitham40]

استاذي العزيز توكل على الله واتخذ القرار وانشالله تجد كل ما يسرك هنا ومستقبل الى طفلك وعائلتك الكريمة ..وخاصة انت استاذ جامعي وفقك الله ستجد هنا من يقبل يديك وجه وكفه  وتحتظنك جامعاتهم ومعاهدهم..وهنا الجامعات في جميع الولايات وحسب اختصاصك وتآكد من اختصاصك يكون يدرس في جامعة الولاية التي سوف تقصدها ..والتوفيق من الله

[بغداد بقلبي]

اخي العزيز  WRONGED الاستاذ وضعه يختلف عني واعتقد عنك وبعدين ماعنعده اي تهديد لحياته والحمد لله وثق بالنسبه لموضوع الامان  محد يكدر يهرب من الموت اذا اجت ساعته وبالنسبه اله هو استاذ جامعي يعني اولاده ان شاء الله الهم مستقبل بالعراق وهو حاليا مرتاح واموره ماشيه ليش ايروح ويبدي من الصفر

[WRONGED]

حبيبي بغداد قلبي هيه هم وجهه نضر منطقيه بس اني الي يقهرني الوضع الثقافي والعلمي بالعراق كلش انقهر
والتوفيق للجميع
وتبقه مثل ما كلت كل انسان وضروفه ولله حجيك هم صحيح

[زيد المدفعجي]

أخي العزيز بغداد بقلبي تره وضعنه مو مستقر لأن باجر عكبه لا سامح الله يصير شي وعلى غفله ومع الاسف خلي نكون صريحين تره الضروف خلت ناسنه أغلبيتهم فوضويين ومنيين تجيب مدارس رصينه ومنيين تجيب جامعات رصينه ومنيين تجيب جواز محترم والناس تحترمك يا أخي واحدنه لو صار نيوتن لو أنشتاين مادام جوازه عراقي الكل ميريده وللأسف ينظرله موخوش نضره هذا واقع وأحنه ندري بهذا الشي الشي لأن أحتكينه وياهم بشغلنه وتره العراق عمره ما أرتاح وأتوقع 90% بعد مايرتاح.

[زيد المدفعجي]

يا أخي الواحد عبالك مدا يشتغل بدوله عبالك بشركات أهليه للمدراء كله محسوبيه وواسطات ورشاوي وطائفيةوأذا أعذروني على هاي الكلمه أذا ما تصير"" لوكي"" شغلتك محد يمشيهه ها تره آني عمري 29سنه يعني بعدني ببداية مشواري.
أنتظر ردودكم.

[بغداد بقلبي]

اخي العزيز WRONGED واستاذي الفاضل زيد المحترم انا حجيت وجهة نظري واني هم وياكم اب حجيكم  وبقة القرار عندك استاذ وان شاء الله تتوفق بحياتك وتحياتي لك اخي العزيز WRONGED

[زيد المدفعجي]

أخوان ممكن أيميلاتكم علمود نبقه على تواصل وآني أتشرف بمعرفتكم.
علماً أنه أيميلي هو zayaad_zayaad@yahoo.com

[مهاجرين بلا حدود]

اخي الكريم هل انت مستعد لقبولك لادنى الاعمال وقبولها عند وصولك ,,,وخاصة في السنة الاولى ؟؟

هذا القرار يعتمد على مدى قوة صبرك وتحملك للغربة والبداية من الصفر

واذا كنت غير مقتنع بحياتك الان ,,,, فمن حقك ان تبحث عن الافضل (ايضا قرار شخصي )

(((((اخي الكريم التوطين هو هدية الادارة الامريكية لما تبقى من الشعب العراقي على قيد الحياة .. وهدية لكل من خدم معهم وضحى بحياته من اجلهم ))))))))

دانش نفسك وانت تعرف الجواب يا صديقي  العزيز

واذا كنت متردد ,,,لاتتعب نفسك بالتفكير ,,,, واذا كنت غير متردد فتوكل على الله ولاتعتبرها حتى ((سياحة ))بل هدف يستحق المجازفة لربما  يأتي يوم وتندم لانك لم تذهب ... وربما العكس

وكلها 50 سنة ويستعدل البلد ,,, وبيد الله

تحياتي لك

[ريم عبد]

اخي العزيز زيد
حضرتك ضمنيا مقتنع
وانت دتنطي الاسباب الصحيحه الي خلتك اتفكر بالتقديم على برنامج الهجره واللجوء
محد راح ايكلك اتوكل وحضر جنطتك وسافر لان كل شخص هوه اعرف بوضعه
وهوه العيب مو بامريكا ولا بوضعها الاقتصادي او الاجتماعي
وانما هوه العيب بينا فيما اذا احنا نكدر نتاقلم او لا
والاجدر مانسال شلونها امريكا وانما نسال نفسنا احنا شنو اعدينا لهاي الرحله وشنو امكانياتنا لخوض هاي التجربه
فأذا كان هدفك مستقبل اولادك فهذا المكان الصحيح الي تطمح ان تربيهم بيه
واذا كان تخوفك من الوضع في امريكا فأنت شنو اعديت من عده لمواجهة هذا الوضع من ناحيه ماديه وثقافيه ونفسيه وامكانيات شخصيه
ادرس تجارب الاخوان قبلك وشوف انت تكدر تتجاوزها
وياربي اينورلك بصيرتك وتهتدي للجواب الصحيح
واتمنالك الموفقيه
اختكم ريم

[ريم عبد]

الظاهر الاخ زيد اقتنع بسرعه وخلانه نحجي  وحدنا وسافر

[Abo Andrew]

مشكور أخواني على مشاركاتكم بس آني أريدكم تحمسوني. لأن آني عندي واهس يا أخوان والله عراقنا ماكو أحلى منه بس للأسف أكبر مشكله بالعراق هو أحنه العراقيين مع أحترامي للطيبين.


اخي العزيز

الاخوة ما شاء الله مقصرو وياك

انطوك اجابات كافية

بس احب انوه على نقطة انت ذكرتهة بالرد اعلاه
انه مشكلة بالعراق هية العراقيين؟
يعني المفهوم من كلامك انه انت اذا جيت امريكا متكدر اتعيش وية عراقيين

لذالك نصيحة اذا قررت تجي امريكا لا اتروح ولايات بيهة عراقيين لان راح اعتقد هذا اياثر عليك ومراح اتحس اي فرق بين امريكا والعراق


وخاصة مشيكان وكالفورنيا اللي هية مليانة عراقيين واخص بالذكر مقاطعة سان دييكو مدينة ايل كاهون

لذللك حاول تسال اذا قررت تجي امريكا شنو الولايات اللي مبيهة عراقيين واتكل على الله (ولو هسة امريكا انملت) بس دور على النسبة الاقل


عندي سؤال اروحلك فدوة؟ انت تستغل بدوائر الدولة اللي كلهة محسوية ورشاوي لو ية الامريكان؟
اني اللي اعرفة ال IOM , SIV ميسفرون الا المشتغل وياهم مو المشتغل بدوائر الدولة؟؟؟

تحياتي