ماهي الخطوات للمقبولين على السويد

[الفريدو]

اخواني اخواتي السلام عليكم

ممكن تفيدوني عن الخطوات للمقبولين على السويد من مفوضية الاردن ؟؟

عندي صديق مقبول على السويد ومايعرف راسه من رجله !!!!

اريد توضيح من اصحاب الخبره كم مقابله للوفد السويدي واين موقع المقابلات وكم المده بين كل مقابله ؟؟؟ ارجو الشرح بالتفصيل واكون شاكرا لكم ردودكم



اخوكم : الفريدو

[اينشتاين العراقي]

ها عيني الفريدو
شنو مليت من كندا وكلت خلي احول على السويد ههههههه
والله اذا فكرت هيج ما الومك من ورى خلك كندا الطويييييييييييييييييييييييييل
وبالنسبه للسويد ما اعرف التحويل عن طريق اليو ان شنو خطواته
بس اعرف كلشي عن القجغ لان نص كرايبي راحو قجغ وهسه رجو لان منقبلو
اخوك اينشتاين

[الفريدو]

والله ياخويه اينشتاين تعبنه وملينه وكلنه بلكي تظبط شغلة السويد 

والله عندي صاحبي مقابل مرتين على السويد مقبول  ومايعرف راسه من رجله يريد يعرف كم مقابله للوفد السويدي والمده يعني تفاصيل اجراءاتهم ؟؟






اخوك : الفريدو

[بغداد بقلبي]

السلام عليكم اخي العزيز الفريدو  بالنسبه للوفد السويدي اني قابلتهم بتاريخ 21\5\2009 طبعا في مبنى المفوضيه وكالوا بان النتائج سوف نبلغ بها من بعد عشرين يوم وبالفعل اكو حجيه وياي وره عشرين يوم بالضبط  خابروها المفوضيه وكلولها جيبي وياج جوازك وصوره شخصيه عدد واحد سلمتهن ووراها اب يومين اتصلت بيها منظمه الهجره وكلولها عندك سفر يمكن كان بتاريخ 8\7\2009 المهم راحت للهجره والدوره يوم واحد وسافرت واكو واحد هو واخته هم كان ويانا بس هذا اشويه اتاخر وسافر يمكن قبل شهرين وما معلوم اذا سافر للسويد لان ماكال واختفه فجاءه مقابلات الوفد السويدي مره واحده فقط بس كلش المحققين مالتهم مزعجين وشايفين وعايفين لاجئين عراقيين وايعرفون كلشي وملمين بكل القضايا المهم اني طبعا انرفضت بوكتها والحمد لله

[اريد وطن]

اخويه الفريدو

يمعود هذول قصتهم اصعب واعقد من كندا

خويه ياسويد يا نحول هذوله شغلتهم اصعب واعقد ومن العام الماضي سدو اللجوء همه اصلن الةاصلين يمهم كجق كاعدين يرجعوهم اتصور حالات لم شمل يصير بس غير هيج صعبه جدا

يالله كاعدين كاعدين خلي ندور ونشوف وين  توصل

اخوك اريد وطن

[وين اروح]

  الاخ العزيز الفريدو . انا قابلت الوفد السويدي يوم 25/5/2009 واخذو مني جميع
 الاوراق الي تخصني واستنسخوها لاكن كان عندي ورقه ناقصه طلبوها مني
 وبعد فتره وديتها الهم ولحد الان ماكو اي شي منهم حتى اني اتصلت باليو ان
 كم مره وكل مره يكولون انتظري قسم التوطين لمن يريدج هو يتصل بيج وهاي
 اني كاعد انتظر حتى مدا اعرف اني مقبوله لو لا ... وماكو كدامي غير الانتظار
 وبالنسبه للمقابلات كانت في نفس المفوضيه وحسب ماعرفت من الجماعه
  الكانت ويايه هي مقابله وحده بس ...

[الشاعر الجريح]

السلام عليكم جميعا

انا قابلت الوفد السويدي يوم 17\5\2009 كان يوم الاحد,بعد ما خلصت المقابلة ,كالولي بعد 15 يوم نخابرك..والى حد الان لم يتصلو بي.لا اعرف مالسبب. اتصلت بيهم بشهر 8 كالو ملفاتكم بالسويد مو بالمفوضية
من ترجع همه يخابروكم.

بالمناسبة ماخابرو ولا واحد من جماعتي اللي اعرفهم قابلو معي

ننتظر رحمة الله

تحيتي للجميع

وأدعو الله ان يسهل على الجميع

[الفريدو]

اشكر مروكم الكريم على المعلومات القيمه

اشكر اخويه العزيز اينشتاين وانشالله نسمع خبر منك ونفرحلك بموعد سفرك

اشكر بغداد بقلبي وياربي التوفيق وتسهيل جميع امورك

اشكر اخويه اريد وطن وانشالله تستقر بالوطن الي ترتاح بيه

اشكر وين اروح وانشالله نسمع خبر موافقتك وترتاح من الانتظار

اشكر الشاعر الجريح وانشالله يتصلون بيك وترتاح والله يوفقك


الله يوفق جميع الاعظاء وياربي نسمع اخبار سعيده وتفرحونا


اخوكم : الفريدو