السلام عليكم ورحمة الله وبركاته للكل
عمي خلي اعرفكم ابنفسي اول شي لان هاي اول مره اني اطب بيهه للمنتده ويمكن اخر مره وبعد ما اطب وراها لأن صار لي اكثر من 9 شهور أطب ويه ابني لان ما اعرف استعمل الحاسبه ، أطب اشوف المكتوب واستفيد من المعلومات واطلع وماعندي سؤال اسئله لان الناس الطيبه كلهه سئلت الاسئله اللي نحتاجهه وماكو شي بعد اسأل عليه فيعني ماعندي سؤال لذلك ما طبيت وما صرت عضو .. بس هالمره طبيت لان عندي سالفه اريد اسولفهه واطلع واللي يعجبه ياخذ ابسالفتي واللي ما يعجبه هوه وضميره ورب العالمين.
ارجع واكول خلي اعرفكم ابنفسي شويه .. عمي اني عمكم ابو عدنان عمري صار68 سنه وعندي 7 ولد وبنات كلهم زوجتهم وما باقي عندي غير اخر العنكود ابني حارث عمره 21 سنه .. واني من اهل الله ورجال على كد حالي وربيت كل ولدي وبناتي على اللي يرضاه الله ورسوله وما عندي شهاده مال تعليم ولا جامعه بس الدنيه خرجتني من مدرستهه وانطتني شهادتهه .. وجان عندي محل اسواق على كد الحال باب رزقي الوحيد ومنه جنت اعيش واربي ولدي وبناتي بس اتغيرت الظروف وانكتل 2 من ولدي بالاحداث الطائفيه وهمه الله يرحمهم لا بيهه ولا عليهه وجهالهم ايتام ابركبتي واخذتهم كلهم وهجينه هج من البلد وعفنه المال والحلال واتهجولنه أبغير بلد هاي اليوم صار تقريبا اربع سنين المهم يعني اللي اريد اكوله يمكن اني اكبر واحد بيكم هنا وعلى راسي اذا اكو ناس اكبر مني بعد بالعمر بس انتو تره مثل ولدي وبناتي واني اذا مو مثل ابوكم فاني مثل عمكم الجبير واريد افيدكم ابسالفه . عمي اني جنت اطب للمنتده واشوف المكتوب والاسئله والاجوبه واستفيد منهه حالي حال الناس واطلع ، بس عمي تره عركاتكم واحد ويه الثاني ابد مو حلوه يعني على طول اطب واشوف عركه لو هنا لوهنا بحيث اني كمت اتصور اسم المنتده مو عينكاوه لكن كمت اتصوراسمه صارعركه كاوه ..يعني على طول عركات وحجي مو حلو وصايرين اكو بيهم عبالك امسوين عصابه هنا ما عدهم لا هم ولا غم غير احجي على هاذه واتعارك ويه ذاك واتكول عبالك متفقين بيناتهم والعركه كلهه اتصير بوكت واحد عبالك واحد ديخابر الثاني بالتلفون ايكوله اكو واحد خلي نتعارك وياه تعال هسه ابساع ويتجمعون وتعلك وراها.. عمي عيب هاي السوالف اللي دتسوونهه والله عيب ..ولا تزعلون مني تره اني مثل ما كلتلكم اذا مو مثل ابوكم تره مثل عمكم الجبير واريد أفيد جم واحد بيكم لان شفت على طول العركات همه بيهه ..يعني اني قريت الحجي مال هاذه اليسمونه كارت مال الفلوس اللي يشترون بيهه بامريكا وشفت العركه الصارت بيه ابد مو حلوه وعيب هاي السوالف .. وشفت الحجي مال هاي مال نصايح الحاسبات وهم طبعا بيه عركه وهوسه .. يعني الرجال اللي حجه مال الفلوس مال الكارت والرجال اللي حجه بالنصايح مال الحاسبات تره ما كالو شي غلط بس أكو جم واحد كبوا عليهم كب مثل ثار العشاير .. عمي انتو ماجلان وشبح بغداد وتايكروابو اندرو وبعد اكو اثنين ثلاثه ابصراحه نسيت اساميهم اشبيكم واشبلاكم؟؟ عيب عمي هاي سوالفكم وعركاتكم وهوساتكم عمي .. انتو مثل ولدي ودا افيدكم عمي انتو يعني هيج مترهايين على نفسكم وعلى الناس وما عدكم شغل ولا عمل غير العركات والهوسات؟؟ اريد بله اعرف كل واحد منكم اشكد عمره وثخن شواربه اشكثر حتى اعرف انتو صدك زلم وتفتهم لولااء ؟.. عيب عمي هاي السوالف والله عيب تره سويتوهه بله ملح ودنضوج انطب للمنتده من وره سوالفكم وعركاتكم اللي كاعد تشعلوهه شعل .عمي تايكر مو انته على اساس مشرف وتفتهم شو صايرعمي مثل الفاس على الراس هوه هيجي المشرف ايصير؟؟ يعني بدل ما اتهدي النفوس واتكول للناس يا ناس صلوا على النبي النوبه اتكوم اتذب بانزين على الحطب عمي؟؟ واذا اليوم انته مشرف بس باجر لو عكبه اذا الاداره طردتك او غيرتك او بدلتك زين ابيا وجه راح تحجي هنا بعد ؟؟ زين شو المشرفين الباقين محد يحجي بس أنته شايل سيفك عمي؟؟ شنو عمي صايرين انتو عصابه هنا؟؟ يعني ما خلصنه من العصابات بالعراق النوبه نجي هنا حتى انطيب اجروحنه وانداوي حالنه نلكاكم امسوين عصابه هنا هم بعد؟؟ بعدين اريد اسألكم سؤال بالله عليكم شنو اللي راح تستفيدونه من هاي العركات ؟؟ يعني اللي يتعارك هنا هوايه هوه اول واحد راح ايودونه لامريكا؟ لو اليتعارك هوايه الناس اتصفكله واتكوله عفيه انته صدك زلمه؟؟ لو اليتعارك هنا هوايه من ايروح لامريكا راح ايكعدونه وايعيشونه احسن من الناس؟؟ لو اليتعارك هنا هوايه ينطونه راتب زين؟؟ كولونه عمي حتى اذا اليتعارك هنا هوايه ياخذ هيجي امتيازات حتى انصيرمثلكم وهم نتعارك ؟ شو اليحجي على اي شي تتعاركون وياه .. عيب عمي امسوين مثل هاي العصابه .. الكل هنا مثل اخوتكم واخواتكم بدل ما تتساعدون وياهم وتتعاونون وياهم واتطيبون كلب على كلب واتخلون المحبه بين الكل واتصفون النفوس كاعدين مثل نسوان كبل من جانن يكعدن بالباب ما عدهن شغل ولاعمل غير كالت ام فلانه وحجت ام فلتانه وهاي اتحرك هاي على ذيج .. عيب عمي سوالفكم هاي بعدين اريد اعرف شي ثاني انتو كلكم انشاءالله اتروحون لامريكا يعي هم راح تتلاكون هناك بالله عليكم ابيا وجه راح اتلاكون الناس هناك؟؟ يعني ما فكرتو لما اتروحون لامريكا راح اتصيرون ابلد غريب وتحتاجون بيه اولاد بلدكم واخوتكم العراقيين حتى ايساعدوكم؟؟ ابيا وجه راح اتلاكوهم وانتم هنا بس تتعاركون وياهم؟ عمي تره ما تسوه وانتو هيجي ابهاي عركاتكم تره محد بعد يحترمكم لا هنا ولا بامريكا ولا باي مكان فليش اتسوون ابنفسكم هيجي واتخلون حالكم مثل حال اللي تكرهه كل الناس؟؟ ليش عمي ليش؟؟ استهدوا بالرحمن وخلو حجيكم حلو وصيرو ويه باقي اخوتكم وخواتكم هنا كلب على كلب وماكو احلى من الكلام الطيب بين الناس والكلمة الطيبه تكسب بيهه اجر وثواب بس العركه اشراح تكسب منهه؟؟ عمي اني هاذ عمري والله وكيلكم ومحمد كفيلكم اليسبني ويشتمني حشاكم تدرون شكوله؟؟ اكوله رحمة الله على والديك انته ورب العالمين واسكت ما اجاوبه اكثرمن هاي .. عمي شوفو حجي اخوتكم واخواتكم هنا وشيسألون وشيكولون واستفيدو منه بلا عركات وهوسات عجبك حجيهم كوللهم رحمه الله على والديكم وان ما عجبك حجيهم عوفهم عمي ولا تحجي ازيد واتسويلك عركه وتشعل بيهه النار بين الناس ..
وتره انتم كلكم مثل ولدي وبناتي الله شاهد والاسامي الي كلتهه ماجلان وتايكر وابو اندرو وشبح بغداد هم مثل ولدي وبناتي وماجنت اريد اكول اسم اي واحد بس الصدك شفت هاي الاسامي على طول تتكرر بالعركات والهوسات اللي كاعد اتصير .. ورحمه لوالديكم ما اريد واحد منكم ايجاوبني وهم ايسويله عركه ويايه تره ما بيه حيل عمي اني رجال جبير وكل همي ولدي وبناتي بس حجيت وياكم هاذ الحجي لان انتو هم مثل ولدي وبناتي وعمري مثل عمر والديكم رحمة الله عليهم كلهم واريدكم اتبطلون هاي السوالف التعبانه والعوجه مال العركات والهوسات واريدكم بلا عصابات تره كلبنه هم وجعان وهم خلصان من هاي السوالف, ويمين الله عليه ما اطب بعد للمنتده ابد .. هاي اول مره واخرمره اطب بيهه لان مثل ما كلت المنتده صار اسمه مو عينكاوه صارعركه كاوه .. ما اطب بعد ابد ولا حتى ازوره ابد. وجان عندي حجي بعد بس ابني تعب من الكتابه لان اني ما اعرف اكتب بالحاسبه فخليته هوه يكتب واني احجي واللي يشوف الحجي مالتي صحيح اكوله رحمة الله على والديك واللي يشوفه غلط هوه وضميره ورب العالمين..
واشوفكم بالخير انشاء الله وأتمنى الله يوفقكم كلكم والسلام عليكم ..
عمكم ابو عدنان
