دورة اللغة للاجئيين بامريكا صارت بفلووووس

[اسير الغربة]

السلام عليكم شباب
هل صحيح ان دورة اللغة التي يتم ادخال اللاجي اليها بعد وصوله الى امريكا صارت بفلووووووووس ؟؟؟؟
لان اتصلت باحد الطيبين في مدينة فرنسو  بولاية كاليفورنيا وكال ان الدورة صارة بفلوس وقيمتها 33 دولار للكورس الواحد للشخص الواحد لعد للعائلة اشكد صارت (هجمان اجيوووب) وجمالة بالدولار
هسة لو ترهم بالليرة جان ميخالف
شتكولوون بهاي السالف
شباب الي يعرف شي رجاااااااااااااء خلي يحجي ويكوووول طبعا هذا الكلام الى الطيبيين في تكساس وكاليفورنيا ومننسى مشغان وفرجينيا ..ذئاب المنتدى النشاما اصحاب الخوه والغيرة وبالذات الاصيلة الاخت الغالية على قلوب الجميع انجي المقيمة منذ 18 سنة ولم ولن تنسى عراقيتها واهلها مهما طالت بها الغربة
وطبعا بأستثناء اهــــــــــل ســـــــــــــياتل الأعزاء لان دومهم خاليه سكته( ولا يمهم الحجي بشي ) يابه هم حقهم خطية لان واحدهم يخاف يحجي ليتنكع من المطر .. تمام لو لا
لان ظلت حصرة بالكلب واحد منهم ايجاوب ...كظيته تواسيل بيهم ومحد يكلف روحه ويكول يابه هذا هم خطيه خلي اسولف وييا خلي اشوف شبي مابي شيريد هالمسكييييين... اتكولووون شنو جاييين نشحت منهم
هاي بعدنا اهنا وهذا حالهــــــــــــــم لعد اذا وصلنا اشلوووووووووووووون الله الستار .. يله ربك مايكطع عود نندار على اوختنا الامريكا لان كولوبهم ارحم بهووووووووووواية .. تمام لو لا
صدكوا وامنوا بالله ندمان على هل المدينة لان الربع من هسة كرهوني بيه ولو بيه مجال جان حولنا الى كاليفورنيا اهواااااااااية اشرفلي ..عند الغاليين الي الوحد يعجز عن شكرهم وتقديرهم على جهودهم ويانه الي ماكوا موضوع ما اعطوه حقه من السيارات وشيلا يدك .. جزاهم الله كل خير
شباب هم عذروني من التقصيير والاطالة عليكم شويه ..ونرجوا منكم السماح
اخوكم اسير سياتل ( هذا الجديد ..شتكولون ) احسن من اسير الغربة 

[ܥܲܒܼܕܝܼܫܘܿܥ ܝܘܚܢܢ]

عزيزي اسير الغربة
تقبل تحياتي
انا استغرب من هذا الموضوع بما انك قد اتصلت باحد اصدقائك اخبرك بهذا الخبر اللذي ربما
قد يكون غير صحيح وقمت بشره من غير التاكيد منه على كل حال انا هنا في شيكاغو
مع عائلتي المتكونة من خمسة اشخاص جميعنا نذهب الى المدرسة ومن دون ان ندفع
سنت واحد وحتى ادارة المدرسة يعطونا كل يوم تذاكر الباص للذهاب والاياب
اخوك ابو شذى الوردة

[ناردين]

الف شكر الك اخويا اسير الغربة على الخبر الي هبط معنوياتي للصفر لانه اني وعائلتي بانتظار السفر الى كاليفرونيا فالله يخليكم جماعة كاليفرونيا تنطونا الخبر الصحيح

[كمال الشاطيء]

ببلاش الدروس ولا تنطي فلس ولاسنت

[ethan texas]

 مشكور اخوية العزيز على نقل الخبر   


يمعوديين وضحولنا  لان اني طالع  لا امريكا واذا الكورسات بفلوس يعني هجمان بيوت

 
اخوكم جوزيف 

[Abo Andrew]

نعم بفلوس من اتروح تاخذ كورسات ESL ) English as a second language ) بالجامعة (community college ) هذا المكان اللي تدفع بي فلوس على تعلم اللغة الانكليزية

وطبعا غصبا على كل لاجئ بعدة السنة لازم ايروح ياخذ هاي الكورسات لان التعليم البلوشي اللي موجود هو كلش تعبان (بس هم ايفيد ) ولا اتخافون اكو  Financial aid  يعني هم مراح ادفعون من جيبكم

اما اذا اتريد تبقة على ال Adult school حتة تتعلم انكليزي فهذا بس بالاحلام
 
بالمناسبة من تجي امريكا الحكومة راح تتوسل بيك اتروح تتعلم لغة وراح ايجبروك شئت ام ابيت انت اتروح تتعلم لغة والا تحلم اتشوف مساعدات من عدهم ولا اتخاف اول متجي هاي كلهة الدروس مجانية بس الحالة اللي ذكرتهة اعلاه
تحياتي

ابو اندرو
كاليفورنيا

[الذكي]

دروس اللغة الانكليزية بامريكا كلها مجانية اول متوصل لامريكا يدخلوك مدرسة لغة عدهم اجبارية حتى تتعلم اساسيات اللغة وهي مجانية طبعا وبعدين اذا يعجبك تروح تدرس بالكلية يسموها كليات المجتمع المدني  وهاي بفلوس يعني الكورس الوزاحد 30 دولار او 33 دولار بس انتو لاجئين واللاجئ مازال يستلم فود ستامب وعندة كارد يدرسوه بلاش يعني الفود ستامب يعوض ال30 دولار يعني حتى بعد متفوت سنة عليك واذا عندك فود ستامب ماشي دروسك بلاش عزيزي هاي اللي دا اشوفة بولاية اوريغون ما اعرف بغير ولايات شنو قوانينها عدنا جماعة صارلهم سنتين جايين بس يستلمون فود ستامب يروحون للكلية بلاش والله اعلم

[fady azir]

    السلام عليكم اخوان

  هذا الكلام غير صحيح بالنسبه لاجور التعليم  انا والعائله بالكامل انروح على التعليم في سان دياكو  ال كاهون   بدون فلوس  وازيدكم علم  مدرسة اولادي  راح ياخذوهم سفره هم ابلاش واما  المدارس الثانويه
كلها ابلاش والاكل ابلاش يعطوهم موز او بيتزا  او حليب ثلاثة وجبات ولي عندا اولاد اقل 18 راح ايقبلوهم بالمتوسطه والثانويه  بدون شهاده من العراق فقط على العمر وهذه المداس مختلطه امريكان وعراقين طلبتهم
او تعالو او شوفو  ديتعلمون اللغه خلال شهرين العراقين او جدا فرحانين او متونسين الاولاد  وانشالله يوم التوصلون بالسلامه او تفرحون  او بعد ليصير عدكم اي احباط  ترى الاحباط بس للكبار ايفكرون اشويه لان ماكو هذاك الشغل القوي ولي ايريد يشتغل هم اكو شغل ويعيش ملك  .......او ليضل بالكم

               الله ايسهل امركم والجميع يوصلون

                            اخوكم ابن العراق
                                  من سان دياكو

[سامسونغ]

أرجو من الأخوان اللي بأمريكا يوضحولنا مدة الكورس للفرد والعائله المدفوع إذا طول الواحد ولم يتمكن من أتقان اللغه

[ورد]

 تقريبا شهرين هنا  الكورس يمنا (ولاية يوتا) ومن تكمله يسولك اختبار اذا نجحت واخذت درجة النجاح يزحفوك الى الصف الي بعده يعني الصفوف تبدي من صف الاول الى السادس وهكذا وانت اذا لغتك زينة مثلا ورحت للمدرسة وخلوك بلصف السادس تكدر بكيفك تنزل للصف الي تريده مثلا الزوج الي بصف الخامس وزوجته بصف الثالث يكدر ينزل لهذ الصف ويبدي منه وهكذا حتى يداومون سوية ويمتحنون سوية ...........

  ورد

[جاك جيك جكجكه]

اعزائي  انتو ليش هيجي خايفين 

اذا الكورس مدته شهرين  وب 33 دولار     يعني الشهر الواحد 16 دولار ونص 

الله عليكم كلكم يلي موجودين بدول الجوار     مو نروح انذب اكثر من هذا المبلغ على توافه الامور 

يعني قيمة كورس لمدة شهرين بهذا المبلغ ما يسوى الواحد حتى يخاف من عنده او يحجي بيه 

بس الظاهر اكو ناس اتريد اتكضيها كلها ببلاش  وهذا الشئ ماموجود بامريكا    اللي يريد بلاش خلي

ينتظر اوربا اعتقد اتفيده بهيجي امور 

مع تحيات  اخوكم

جيك جاك جكجكه

[hussein5582]

يعني اخوان والله عجيبه كل واحد قبل ميجي موقع انوا يسدد قرض السفر اقل شي 2500 دولار مفكرتوا بيه كورس مال لغه 30 دولار صارت هجمان بيوت
توكلوا بالله و استهدوا بالرحمان ,, كبروهه تكبر صغروه تصغر

[تايكر]

السلام عليكم وعلى كل عراقي ساكن داخل وخارج العراق العزيز اودشيء افوله وهو الشخص الذيي يذهب من مكان الى اخر يحتاج اقل مايمكن 100 دولار داخل البلد فكيف ببلد مثل امريكا واي موضوع
(تعلم اللغة) انه مشروع ترصد له المبالغ وييسر امورك في بلد الغربة اعزائي المبالغة في مناقشة الامور غير لائقة الرجاءاعطاء النقاشات جدية اكثر لانه اعرف ناس يتوقون لمعرفة مثل كذا معلومات تقبلوا احتراماتي       تايكر بابل 

[Haider 67]

مازالت ببلاش في لوس انجلس / كاليفورنيا

[angie-dawood]

تعليم اللغة ببلاش للاجئيين وحتى اكو باصات يودوهم  ويرجعوهم هم ببلاش

[fady azir]

   
الاخ حيدر  كيف حالك 
الحمدلله والشكر استقرينا في سان دياكو  والامور اوكي  انا رديت على  التعليم بدون فلوس وكذالله الاخت انجي ردت بدون افلوس اشو مااعرف منين ايسمعون هاي الاخبار  يعني ايهبطون معنويات الناس الي في طريقها الى امريكا.................. عمي بلاشششششششششششششش
والدوره اضل اتروح الى ان تتعلم اوكي او لضوجون نفسكم

سلامي وتحياتي لك وللعائله الكريمه

                                       اخوك
                                      فادي

[الذكي]

حبيبي الغالي فادي ليش صاير عصبي  ومغثوث هو منو جاب سيرة الفلوس كلها كالت مجانية واني واحد منهم ماعدا الاخ ابو اندرو كال الدورات مجانية من تفوت سنة عليك بس هو مديدرس دورات مال esl الابتدائية هو ديدرس دورات مال enl دورات متطورة مال انكليزي وهاي مو مجانية كلها بفلوس مع جزيل الشكر

[Abo Andrew]

اشكد انحب البلوشي احنا العراقيين

عمي كولو يا الله
ترة كلشي بالدنيا تدفع علية فلوس زينة تاخذ شي زين

اخي كاتب الموضوع لا ادوخ

اول متجي اكو مدارس اتعلم ابلاش ويا مكثرهة بس يوصلون  وياك الى مستوى معين وخلص بعد متحس بتطور مو مثل مكال الاخ العصبي فادي عازر انه الى ان تتعلم

اما بخصوص اللي اعمارهم بالمدارس فهذولي لا اتخاف عليهم راح ايدخلون مدارس وهناك التعليم كلش راقي يعني مو مثل التعليم اللي ينطي للالجئين الكبار بالسن
عاد انت اذا حاب بعدين اتروح تدرس دراسة اكاديمية بالجامعة اهناك دروس الانكليزي  اتخليك تحجي بطلاقة لان كلش راقية

وحتة هاي الدروس ممكن اتصير مجانية لان راح اتقدم على مساعدة مالية اذا انت مستحق وتدرس على حسابهم

اخوك ابو اندرو من محافظة العراق ال 19 ايل كاااااااااااااااااااااااهوووووووووووووووووووووووون

[fady azir]

           احونا الذكي على كيفك هم اخوك فادي او لدفع بعد ههههههههه

المقصود مو انت الي كال بفلوس  واحتمال هذا خبر سمعا خطاء يله احسبها عليا او مره ثاتنيه ماسويها

بس لضوج او خلينا حبايب

           تمنياتنا لك بالموفقيه

                         اخوك ابن العراق

[القرش]

                                 السلام عليكم

اخي العزيز بالنسبه لشيكاغو الدوره التدريسيه مجانيه (ببلاش) ويزودوك بكارت للباص شهري وكل راس شهر تستلم كارت جديد .

ابو انس
شيكاغو