عبسي وامتحان اللغة في كندا

[عبسي]

شلونكم اخواني واخواتي اعضاء المنتدى اسف جدا على عدم تواصلي بصورة مستمرة مع المنتدى واكيد راح تسامحوني لان هسة تشوفون شلون الاشهر الاولى بعد السفر ولا راح تفرغون

اليوم حبيت احطكم بصورة امتحان اللغة وتقييم المستوى في كندا اللي يختلف اختلافات بسيطة عن اميركا
اول شي هنا اللي يتابعنا والمفروض يحل مشاكلنا مو منظمات بمعنى المنظمات الموجودة باميركا ولكن شبيه لها من حيث انه هاي المنظمات توجهك شلون تندمج بالمجتمع شلون تكتب السي في مالتك(يسمى في شمال اميركا بالريزومي)ويحاولون يترجمون شهاداتك واوراقك وعدة شغلات يساعدوك بيها بس ما عليهم بالمساعدات المادية وهاي المنظمات بدون مقابل ومو بي للاجى ولكن للمهاجر ايضا
المهم نبدي بموضوعنا اول شي تحدد انتة شخص يكون هوة الاستشاري مالتك راح يخابرلك على المدرسة وياخذلك موعد تقييم ويجي يطبعلك الموعد وخريطة المكان وساعة الامتحان
بالنسبة الي كان يوم 21 اكتوبر(تشرين الاول حتى لا يزعل الفريدو ويكول ماكو هيج شهر )هنا عدهم عادة مع انه الشغلة شغلتك لكن يخابروك قبل يوم يذكروك بالموعد ويتاكدون راح تجي لو لا فيوم 20 خابرتني صوت ملائكي ناعم لو تبقة تحجي وياه ساعات ما تضوج  ;)اكدتلي الموعد بس اني ما عفتهة شذكرت اسئلة سالتها حتى بس اطول التلفون ترة لا تصدون دا اشاقة
المهم نجي للزبدة(لعد الحجي الفوك كله جان شنو)كعدت الصبح بثمانية ونص ركبت الباص وصلت لمكان الاختبار مكان مرتب وحلو سجلت اسمي وعبالك يعرفوني صار سنوات شلونك عبسي وشنو اخبارك وشلون كضيت الويك اند المهم اجة موعد الامتحان وكان كالاتي
اول شي تسالك اسئلة بسيطة على اسمك وعنوانك وشغلك السابق ونبذة عن حياتك حتى تختبر سلاسة الحجي عندك وخزين مفرداتك
بعدين تكولك راح اشغلك على الكومبيوتر 3 مقاطع صغيرة كل واحد 3 دقايق عبارة عن محادثة بين اثنين وراها تسالك بالتفصيل عن المحادثة وشنو اللي دار بيها
بعدين ترويلك مثل الصور الكرتونية المتسلسلة عن قصة معينة(بالنسبة الي كانت عبارة عن شخص رايح للعيادة واجة للسكرتيرة وبعدين دخل للطبيبة.........الخ)وتطلب منك تحجي تفاصيل القصة اللي دتشوفها
بعدين تجي مرحلة الامتحان التحريري اول شي ينطوك ساعة وينطوك بيها اربع مقاطع مكتوبة كل مقطع حوالي صفحة يحجي عن موضوع معين وبعدين على كل مقطع يسالك 8 اسئلة حوالي وطبعا الاسئلة هم يكون بيها فيكات واستنتاج من المقطع هذا الجزء لاختبار قدرتك على فهم ما تقرا
بعدين امتحان اخر لمدة ساعة يختبرون قدرتك على الكتابة مثلا يكولولك اكتب رسالة الى صديق اخبره فيها انك تريد الانتقال الى مسكن جديد مضمنا لماذا تريد الانتقال ومميزات البيت الجديد وهكذا
او اكتب ملاحظة لصديقك تخبره فيها انك سوف تتاخر خارج المنزل مع ذكر الاسباب
او تكتب رسالة تترجم فيها نتائج جدول معين الى شرح
وطبعا تبدي الاسئلة والمتطلبات تصعب شوية شوية

بالنهاية تجي ساعة الحقيقة يشرحولك درجاتك وشنو نقاط ضعفك وشلون تعالجها
بالنسبة الي اني المدرسة لزمتني على صفحة وكالتلي عيوني عبس(هيج ادلعني)انتة نتائجك كالاتي
القراءة 8من8
التحدث 7من8
الكتابة7من8
فانتة عبوسي الورد بيضتها ورفعت راسنا ما تحتاج مدرستنا كل اللي عليك انه تستمع للتلفزيون والاذاعات حتى تطور قابلياتك طبعا هذا ومثل ما كال الاخوة الاعضاء هاي المدارس اسمهاlinc
واكو مدارس شوية اكثر تطورا اسمهاeslراح ادخلها ان شاء الله لان اني هدفي هوة امتحان التوفيل لان يفيدني بمعادلة شهادتي واي اسئلة اني حاضر
اخوكم عبسي من كندا

[عكعك التطوى]

بالنسبه الي مراح اسامحك على الغياب
والشي الثاني نريد نعرف شدار بينك وبين الصوت الملائكي من حديث
ونريد نعرف القصه مال السكرتيره والدكتوره والطلي
وبعدين  يوم 21 اكتوبر تشرين الاول وين اكو هيج تاريخ

ومبروك عبوسي على اجتيازك الامتحان وتبيض وجوهنا

تحاتي وتمنياتي لك بالتوفيق وسلامي للاهل جميعا والحجيه خصوصا

[يمتى الفرج]

أخي عبسي
شكرا على المعلومات وما ذكرتة عن الامتحان يشبه الايلتز IELTS بس الايلتز اصعب شوية

[angie-dawood]

مبروك اخي عبسي انشاءللة دائما التوفيق بكل مراحل حياتك الجديدة ربي يوفقك دائما وتحصل على اعلى الشهادات

[بت بطوطة]

الف مبروك عالنجاح عبسي انشالله ايامك كلهة نجاح وموفقية ((وملائكة))

تحياتي

[روزماري]

موفق عبسي كل التوفيق بالأنكليزي وتجتاز جميع الأمتحانات ويسهل طريقك بقوة الله

تحياتي وتقبل مروري

[الفريدو]

حبيبي عبسي شلونك انشالله بخير والله اشتاقيتلك وشلون البرد عدكم ؟؟

عبوسي حبيبي عكعك وصاني اجيبلك كم طلي بس كلي الطليان هم يصيحن مااااع بكندا لو عدهم لغه ثانيه؟؟

حبي عبسي تسلم على هذا الشرح بس ليش نجحت ؟؟ اخاف يكصون المساعدات عليك ؟؟ مو صح

وبصراحه اني حفظت الشهور يعني اكتب اي شهر واني راح اعرفه بسرعه بس ( مايس ) ماراح انساه ابد

والله يوفقك وييسر امرك حبيبي


اخوك : الفريدو

[مأسي]

اخوية الغالي عبسي مبروك على انجاح بالامتحان واتمنى لك النجاح دوماً في حياتك
اختك مأسي / سوريا

[اسيل من مصر]

الف مبروك عبس على الدرجات الممتازة وصدك رفعت راسنة

[Revolver]

مبروك عيوني عبسي وان شاء الله نسمع الاخبار الزينة منك بلمستقبل

[شجرة الدر]

مبروك والف الف مبروك عالنجاح اخونه عبسي وبالتوفيق ان شالله وين هالغيبه يمعود والله اشتاقينالك     اختكم شجرة الدر

[اينشتاين العراقي]

السلام عليكم اخويه عبسي
طبعا اني جدا اشكرك على هالمعلومات الجميله
بس حبيت اسألك على نقطه
اني عندي شهاده ثانويه (قسم شرعي) من العراق ومكمل وراها اداب عربي من الاردن
زين شنو المطلوب مني حتى اكدر اعادل شهاده الثانويه هاي اذا ممكن ان تتعادل؟؟
واني عندي شهاده الكليه اصليه ومصدقه كل التصديقات
بس شهاده السادس اعدادي ما عندي الاصليه بس مستنسخه
وهم مصدقه كل التصديقات
يعني لازم اجيبهه اصليه لو تمشي المستنسخه
وشنو المطلوب ويه الشهاده حتى اكدر اعادلهه
واذا متتعادل ممكن امتحن امتحان يعادل الثانويه العامه بكندا وشيسمو هذا الامتحان؟؟
وتسلم اخويه العزيز
اخوك اينشتاين

[dodo micheal]

الف مبروك اخ عبسي وانشالله كل مجالات حياتك تتوفق
الله يكون معك

اختك
دودو مايكل

[Alawi]

الف مبروك عبوسي ويارب نسمع اخبارك الطيبة واتمنالك الموفقية والنجاح من كل كلبي
ويارب المزيد
اخوك
علاوي

[اريد وطن]

مبروك اخونى عبسي على النجاح

عمي لاتحجي هوايه على علاماتك ترى نحسدك

موفق وبارك الله بيك على كل المعلومات ومثل ماعودتنا من كل شي جديد واي معلومه هي اكيد مهمه لاي شخص قادم الى بلد اكيد بيها اختلام عن البلاد اليعايشين بيها

اخويه عبسي احنى سمعنى حاضن الصوبه وكاعد خفنى عليك كلنه اذا تريد بطانيه علمود دنزلك

مبروك ويارب موفق بحياتك وتحصل على كل امنياتك واقدم شكري الجزيل على كل معلومه تقدمه وهذا ليس غريب عنك واكيد عن اخوانا الباقين اليذكرون تجاربهم اول باول منهم اخونا الفريدو والاخت كندا والى جميع الاخوان اذا نسيت احد

اخوك / اريد وطن

[شكوماكو]

اني اعتبر اعصابك كلش قوية لان اشلون كدرت توفق بين هذا الصوت الملائكي والنجاح الباهر بس احتمال هذا الصوت نطاك حافز للنجاح لذلك كلما اتريد تمتحن ضروري تسمع هيج صوت. حبيبي عبسي بالتوفيق

[اريد وطن]

اخويه عبسي

هي سويت هسى الربع تركوا المعلومات وركزو على الصوت الناعم والله خويه اخاف هاي مو وحده ويلع واحد 

عمي اني اذكر انته خاطب اذا مو غلطان يعني  شكلها الخطيبه متعرف على هذا المنتدى ولاهذا السبب ماخذ راحتك

اي اي ادري مو رجال ميخاف من مرته يعني اني مرتي حترفض تروح لكندا علمود النسوان بس بعدين كالت عمي هذول الدول حدهم حقوق النوان يعني النسوان وبس يعني اذا ضاجت منك او زعلته اتصال على 991 اذا مو غلطان وتروح بيها دربالك عمي اني كتلك وبعد بكيفك


اخوك / اريد وطن بس ماريد كساعه متصله المره بالشرطه ارجع للعراق وانكتل احسن  لو انعلس احسن

[القرش الاسود]

مبروك اخ عبسي وان شاء الله دائما نحو الافضل واتمنالك كل الخير وموفقك بعون الله

[احمد الغريب]

الف مبروك اخ عبسي وبالتوفيق ان شاء الله . تحيات اخوك من مصر أحمد الغريب

[عبسي]

 اخي العزيز درة المنتدى عكعك الورد شكرا لتمنياتك ودعواتك وما اكولك بالنسبة للصوت الملائكي دمرتها شعرف سوال بالانكليزي سالتها بس الي عتب عليكم يعني انتو اعلام المنتدى كلشي علمتونا عن الغربة والهجرة بس شلون نكبل ما كلتلونا يعني شنسوي نشمر الرقم لو شلون وهاي قصتي وية السكرتيرات راح انزلها بكتاب و اوعد المنتدى انه انزل حلقات ملخصة كسبق صحفي للمنتدى قبل ما انشر الكتاب(ترة دا اشاقة اني كلش فقير)



اخواني واخواتي فرسان المنتدى يمتى الفرج و ملاك المنتدى انجي و بت بطوطة الغالية واختنا العزيزة روزماري الف شكر ومحبة لتواصلكم  

حبيبي الغالي الفريدو
ترة البرد هنا لحد الان مو كلش يخوف ولعلمك بالبيت او بالشقة كلة لبس صيفي يعني كثر من هدوم البيت الصيفية لان التدفئة تسوي البيت كلش دافي وبالنسبة للمساعدات محد يكطع شي عنك باول سنة ولا يدرون بيك شسويت ما سويت لان اول سنة من الحكومة الفيدرالية على شكل صكوك تجيك للبيت وهاي سالفة الطليان اطالب وبشدة بتشكيل هيئة للنزاهة داخل المنتدى لان لحد الان تكولون دزينالك الطليان وكلشي ما وصل 

اخواني واخواتي ماسي(ان شاء الله يصير اسمج افراح وعذريني على عدم الرد عن تساولج لان بصراحة معلومات دقيقة عن سوريا ما عندي وما حبيت اجاوب اي شي بدون دقة) و اسيل من مصر العزيزة المنتدى بحاجة لمشاركاتك والله يسهل عليج  واخي العزيز revolver واختي العزيزة شجرة الدر ممتن جدا لمروركم الجميل

اخي انشتاين الورد
معلومات دقيقة عن معادلة الشهادة ما عندي بالضبط وراح اسالك بس نقطة هامة لازم تتوضح مثل ما تعرفون سوق العمل بالدول الغربية سوق حر يعتمد بالدرجة الاساس على ما تثبته عمليا من مهاراتك بمعنى انه في العديد من الاختصاصات ورقة الشهادة ليست بتلك الاهمية ولكن خبرتك العملية وكيفية مساعدتك في زيادة ارباح المكان الذي تشتغل فيه هو العامل الحاسم

شكرا جزيلا اختي دودو  وان شاء الله يوم تحديد موعد المقابلةوشكرا اخي علاوي الورد وتسلم ابو شهاب عكيد المنتدى بس ترة اني ما رفضتني اميركا راسا تحولت لكندا
و حبيبي شكو ماكو مثل ما تفضلت من سمعت هذا الصوت كلت فشلة اذا ما اجيب درجة زينة


الغالي اريد وطن
مثل ما نوهت للاخ الفريدو هدوم البيت تقريبا لازم تكون مو ثخينة لان الجو بالداخل حيل دافي وليش هيجي هيجت الذكريات عن الصوبة اريدكم تجيبولي صوبة علاء الدين وجليكان نفط لان عندي كستنة ما اعرف وين اشويها   يابة المرة بعدها بعمان ونايمة الطابوكة على موافقة امها الامنية فشوية هسة اني ماخذ راحتي

اخواني ماجلان الوردة والقرش الاسود الوردة واخي العزيز احمد الغريب تسلمولي على دعواتكم الحلوة

[Wingo]

ألف مبروك عيني عبوسي
الله يوفقك و يسعدك
و ديربالك من النسوان الكنديات ترى بعدين تتورط هههه

[كندا]

مبروك اخ عبسي........
 ان شاء الله تجتاز امتحان التوفل وهذا هو المهم ...

اما مسأله( الكستانه)اني اشتريت وحرت بيها وبعدين دخلتها للفرن ....ومانسمع الا انقلاب بالفرن والمطبخ كلت هاي ماكو الا احتلوا كندا   ولكن الله ستر.... وكانت النتيجه جيده جدا....جربها وعلى مسؤوليتي...

كندا من كنداااااااااااا

[arch.s]

مبروك النجاح  بالامتحان اخي عبسي
وان  شاء الله  يوم  تنجح بأمتحان التوفل وتتيسر كل امورك
وتلقي الشغل  الزين وتعيش الحياة  الكريمة

وان شاء الله  الموفقية للجميع

[lionofiraq]

بالتوفيق عبسي و الله ينصرك على علام