جماعة بريطانيا

[CYRANO]

                                                        السلام عليكم

  الى اخواني المقبولين لجوء الى بريطانيا اكتب هذا الموضوع والاستفاده للجميع

بالنسبه الي كنت مسافر الى مانجستر فسافرت من عمان ترانزيت الى فرانكفورت بالمانيا وكان معنا جماعه مسافرين على شيفلد ولان هذه المدينه قريبه على مانجستر فكنا بنفس الرحله وبعدين من فرانكفولات الى مانجستر بعد انتظار خمس ساعات الصراحه الرحله متعبه والله يكون بعون جماعة امريكا على طول السفر...بالمطار راح يستقبلوك وراح تستلم رساله القبول والاعتراف بك كلاجى شرعي وياخذوك على بيتك بالباصات.

السكن صغير جدا يتالف من صاله وغرفة نوم ومطبخ وحمام ولا تصور انه مثل بيوتنا بالعراق..لا عيني وخصوصا بيت الشخص العزابي لان المتزوج واللي عنده اطفال راح يكون اكبر.وراح تستلم الاقامه الدائمه في بريطانيا بظرف 4 ايام من وصولك ويخصص لك كيس ويركر يساعدك بكلشي تحتاجه وبالطبع كلشي متوفر بالشقه  بس ما بيها تلفزيون ولا غساله ولا هاتف ارضي هذني انت تشتريهن على حسابك الخاص اذا تريد.وبعدين يخصصون لك طبيب خاص تراجعه بعد اخذ موعد وينطوك البطاقه الطبيه وتراجع الجوب سنتر اتسجل بيه حتى ينحسبلك راتب مال شخص يبحث عن عمل وهو 64 باوند بالاسبوع فقط.اول اسبوعين راح يكون كلشي على حساب الدوله من ماء وكهرباء وغاز وينطوك مبلغ من المال تكضي بيه امورك كهديه وهو 100 باوند وبعدين راح تستلم راتبك ال 64 باوند بالاسبوع ومن هذا الراتب راح تدفع الفواتير والضرائب وهي كبيره جدا هنا في بريطانيا.ثم وبعد عشر ايام يختبرون مستواك باللغه الانكليزيه وتدرس مجانا على حساب الدوله مهما كان مستواك.
بالنسبه لمعادله الشهاده الجامعيه فالبكلوريوس هنا تعادل دبلوم عالي اي لازم تدرس سنتين فل تايم كي تحصل على بكلوريوس بريطاني لان دراسه البكلوريوس 3 سنوات او 4 في بعض الاختصاصات.وهنا اذا اردت الدراسه فل تايم راح ينطوك قرض 10000 باوند هو للدراسه والسكن ولكلشي وبعدين تسدد القرض اقساط في حال عملك وطبعا كلشي تنشال المساعدات اما اذا بارت تايم فالدراسه تصير ثلاث سنوات بدل اثنين والمساعدات تبقى شغاله اما الماجستير فهو على حسابك الخاص سواء كان فل تايم او بارت تايم وهنا اي مجال تقدم عليه يطلبون امتحان ايلتس واقل شي 6 درجات..ولا تتصور تشتغل بمجال اختصاصك الا في حاله معادله الشهاده والخبره... هنا الخبره بالعمل كلش مهمه.

يكثر في بريطانيا اللاجئين والمهاجرين وخصوصا من الهند وباكستان وهنا في مانجستر توجد جاليه كبيره من الباكستان وهناك ايضا العرب والاكراد والايرانيين والهنود والافارقه يعني ما راح تحس بنفسك غريب وسط هذا التنوع وتوجد محلات اللحم الحلال بكثره.
يمكنك التقديم على جواز الترافل داكيومنت الازرق الخاص بالللاجئين متى ما ترغب مع مبلغ 72 باوند من جيبك الخاص ويصل لك في غضون شهر من استلام المعامله بالبريد ولك الحق في السفر الى اي بلد ما عدا بلدك العراق والبلد الذي طلبت منه اللجوء خلال فتره  خمس سنوات.
بريطانيا بلد منظم والقانون يحترم فيها بشكل كبير وطبيعه  جميله بل ساحره الا ان الجو بارد والسماء غائمه طوال اسابيع مستمره..يعني مثل ما نكول بالعراق تحلف بالشمس لان ما تشوفها..ومع ذلك الوضع عادي تعامل بكل احترام في كل مكان  وانت شخص حالك من حالهم بكل شي ما عدا الجنسيه ولكن في كل المناسبات تعامل على انك مواطن بريطاني لك نفس الحقوق وعليك الواجبات ذاتها..مو مثل البلاد العربيه الارهابيه حقك ضايع مثل الزباله الاردن والزعران مالينهم يجيك وكالك انا ابن البلد من تفو على هيجي بلد وشكولات مع احترامي الكم.وانا حاضر لاي استفسار باللي اكدر عليه وتحيه لكل الاخوه بهذا المنتدى الكريم وبالاخص الاخ دموع دجله اكله تعال وعيش حياتك كأنسان ببريطانيا العظمى والعظمه لله وشكرا ويوم الكم ان شاء الله مرفوعين الراس.


                                              اخوكم سيرانو من مانجستر

[اينشتاين العراقي]

تسلم اخويه على تواصلك على الرغم من وصولك
والمنتدى محتاج لمواضيع برطانيا لقلتها ان لم اقل عدمها
والحقيقه برطانيا فيها مميزات كثيره للاجيء وهي احسن من كثير من دول اللجوء
وفيها جاليه عربيه واسلاميه كبيره
وانشالله تستقر بوطنك الثاني
وكل التوفيق الك اخويه العزيز
بس عندي سؤال هل انت طلعت عن طريق اليو ان؟؟؟
واذا عن طريق اليو ان هل تم رفضك من غير دوله لو رأسا تحولت لبرطانيا؟؟
وهل عملت معى القوات البرطانيه في العراق؟؟؟
وشكرا اخي ولو ضوجتك بالاسئله
وتقبل مروري
اخوك اينشتاين

[CYRANO]

 مرحبا اخويه انشتاين العراق انا طلعت عن طريق اليو ان  بالاردن وما انرفضت لان انا رأسا مقبول على بريطانيا كوني عملت مترجم مع القوات البريطانيه بالبصره بس   كان اكو جماعه هواي مقدمين تقديم عادي على الامم والاولويه للي عند اقرباء او اهل ببريطانيا.


                                   وبالتوفيق لكم جميعا وانا حاضر لاي سؤال.

[Revolver]

أخوية سيرانو الف الحمدلله على سلامتك وان شاء الله فاتحة خير عليك وتشوف مستقبلك هناكة وتسمعنة الاخبار الحلوة دائماً, الف الف الحمدلله على سلامتك, ومثل مكال اخونة انشتاين ياريت اتكون متواجد من يصيرلك مجال لأن صدك منتدانا الحبيب مابي ذيجي المواضيع على بريطانيا وان شاء الله متقصر وية كل الاعظاء

امانة ابركبتك بس اتروح الـ تشيلسي اتسلملي على اهلهة لأن اموت عليهم  خاصتاً الـ بلوز

تحياتي

ريفولفر

[القرش الاسود]

الاخ سيرانو الف الحمد لله على السلامة واتمنالك الموفقية ومشكور على هاي المعلومة واكيد راح اتفيد الكل

[CYRANO]

  شكرا اخواني الاعزاء ريفلوفر والقرش الاسود والله الصراحه انا دائما موجود بالمنتدى بس ما عندي معلومات عن امريكا خصوصا ان 95 بالميه من المنتدى عن امريكا بس حبيت اكتب عن تجربتي حتى افيد اخواني بالمنتدى اللي مقدمين على بريطانيا عن اي استفسار وانا بخدمتكم...اخ ريفولفر انا بمانجستر كلش بعيد عن تشيلسي اللي بلندن بس اذا اجوا لعبوا هنا بمانجستر راح اسلملك عليهم   

                                                 اخوكم سيرانو

[Revolver]

ههههههههههههههههه حبيبي سيرانو انت, اتمنالك كل الموفقية ان شاء الله وياربي تبني مستقبلك اهناكة ومتشوف غير الخير ..

وبلنسبة لتواجدك ياريت والله ياريت تتبنى انت موضوع المساعدة بخصوص الاخوة الي يحتاجون توضيحات حول التقديم على اللجوء للمشتغلين وية القوات البريطانية, ولتنسى من دل على خير فله اجرى واجر من عمل به الى يوم القيامة, يعني همتك اخوية انت والله يبارك بيك .. واتمنى متقصر  وياهم ..

[arch.s]

الحمد لله  على  السلامة  اخي سيرانو 
ان  شاء الله بداية  حياة جديدة واستقرار وامن
اخي ياريت  مثل ما  تفضلوا  الاخوة  الي قبلي
انه  تكتبلنة عن تجربتك
شكد طولت  وياك  من اول  ما قابلت  مقابلة التوطين  وخلوك على بريطاينا
وشلون تفاصيل المقابلات  ووين رحت .. ؟؟؟ والفحوصات  والجنط ؟؟؟ هل  يحطون  الشخص او العائلة  بنفس المنطقة الي ساكنين بيها اقاربهم  ؟؟ ادري طولت عليك  بس بالفعل  المعلومات  بخصوص بريطانيا جدا  شحيحة عدنا  بالمنتدى
علما انه  احنا  بعدنا ما تحدد اي دولة توطينا بس الواحد هم  يسال  والعلم  بالشيء ولا الجهل به
وان  شاء الله يحددولنا دولة زهكنا من  الانتظار

[الحبايب]

شكرا الك اخي وحبيبي سيرانو على المعلومات الحلوة على بريطانيا واني كلش احترم الانسان اللي يتمثل بروح التعاون لان هذا دليل على حسن اخلاقة وثقافتة العالية واحنة بحاجة ماسة لمثل هذه المعلومات لان المنتدى يفتقرالى عدد اللاجئين الموجودين في بريطانيا فنحن وغيرنا يستفاد من هذه المعلومة شكرا لك مرة اخرى متمنيا لك ولجميع العراقيين في بريطانيا او غيرها كل التوفيق والسعادة وان تكون كل ايامهم خير وسلام.


   

[دموع دجلة]

الف الف الف مبروك اخوية سيرانو والله فرحتلك خوش خبر هذا.
شلونك اخبارك ان شاء الله تتوفق بحياتك الجديدة آمين.
 
أما بالنسبة لشغلتي فهي على حطة ايدك لا خابروني ولا اي جديد ولا حتى اعرف شوكت يجي الوفد البريطاني... جنت انت الله ينطيك واخوية البصراوي تنطوني اخبار الوفد شوكت يوصل هسة ماعندي اي احد ينطيني خبر ياريت اذا يصير اي خبر عندك تخبرني بي يعني اذا عندك اتصالات ويه اخوانك المترجمين اللي بعمان ويكولولك بموعد مقابلاتهم اكون كلش ممنون منك....
وان شاء الله تنكتبلي واجي واشوفك ان شاء الله
 بالموفقية والنجاح دائما ان شاء الله

[abu shahed]

الف الف مبروك والحمد الله على السلامه اخي الكريم اتمنى لك الحياة السعيده والاستقرار يارب امين




                                                 اخوك
                                              79 النرجس

[arch.s]

مرحبا  اخواني
للاسف  كنا نتمنى  تطلع النا  بريطانيا
بس مصرين  الاخوة  يحطونا على  امريكا
لا حول ولا  قوة  الا  بالله
وحسبي الله  ونعم  الوكيل
ولتكولون بطرانين  بس الله  الي يعلم  بالحال
.............
والف  مبروك لكل المقبولين على بريطانيا او اي دولة  ثانية
ويسهل رب  العالمين للجميع

[show]

صديقي العزيز CYRANO
شكرا على طرحك للموضوع في المنتدى و ارجو تواصلك الدائم هنا وتسليط الضوء على اجرائات السفر و ما بعد الوصول للملكه المتحده .
اتمنى لك النجاح و الاستقرار الدائم و تحقيق حلمك الابدي

بالتوفيق للجميع

[بغداد بقلبي]

الف الف مبروك اخي الغالي ورحمه الله والديك لانك وبصراحه بطرحك  هذا الموضوع صدك غيرت لون المنتدى واضفت اله لون جديد وبالموفقيه

[CYRANO]

                 
                  السلام عليكم اخواني

 اشكركم جميعا على هذه الردود الحلوه وهذا دليل على اخلاقكم وذوقكم واخلاقكم العاليه والله تستاهلون كل خير وان شاء الله كلكم على سفر قريبا واتمنالكم التوفيق والسعاده بحياتكم...بالنسبه للوفد البريطاني حسب ما سمعت انه راح يوصل عمان شهر 11 بس ما متاكد واذا احصل اي خبر مؤكد راح انقله للمنتدى باسرع ما يمكن... واي استفسار انا حاضر.

             

                          اخوكم سيرانو

[CYRANO]

                            السلام عليكم

  اخي arch.s بالنسبه الي انا كنت مقبول مباشره على بريطانيا لكوني كنت مترجم.اول ما اجاني القبول سافرت الى الاردن وسجلت بالمفوضيه ثاني يوم وهو 31 شهر 3 وبعد اسبوع قابلت مقابله اولى وبعدها هم باسبوعين مقابله ثانيه وبعد انتظار بسيط قابلت الوفد البريطاني يوم 3 بشهر 5  وبعدين يخابروك على فحص في الخالدي بلازا دم وادرار واشعه للصدر وطولك ووزنك والضغط وهاي الامور وبقيت انتظر هاي الفتره حتى يوم 1/10 خابروني الاي او ام وكالوا تجي تستلم طلب الفيزا ورحت لهناك سلموني الموافقه على الفيزا لبريطانيا وبعدين بنفس اليوم رحت للورد برج سنتر بشميساني وهي الجهه اللي تصدرلك فيزا لبريطانيا ياخذون جوازك وصوره الك وبصماتك وينطوك ورقه ترجعها للاي او ام.

  وبعد كم يوم يتصلون بيك الاي او ام على مود دوره تثقيفيه وقبل السفر بيوم تروح تاخذ حبايتين بالخالدي بلازا على مود السفر,وهاي الحبابي على مود تقتل الديدان حتى لا تتخربط بالسفر لا اكثر ولا اقل...وتروح للمطار ويجي واحد موظف بالاي او ام يسلمك الجواز والفيزا اللي هي ورقه بوحدها يعني ما تجي على الجواز  والفحص مالتك اللي سويته بالخالدي بلازا وكلها بكيس ابيض مكتوب عليه الاي او ام بالانكليزي حتى يتعرفون عليك بالمطارات في فرانكفورت او في بلد اللجوء وتنتظر الطائره.الوزن هو 30 كيلو والهاند باك 5 كيلو بس انت تكدر تسوي الهاند باك 10 كيلو وتكدر تخلي كيلو  او كيلوين زياده مو اكثر فوك ال 30 كيلو...لا تخلي بالهاند باك سوائل او كريمات او شامبو او اي اسلاك اي وايرات هاي الشغلات كلها خليها بحقيبة السفر لان يصادروها اذا لكوها بالهاند باك.

هم طبعا ما يخلوك بنفس المنطقه اللي بيها قرايبك لان هم عندهم مناطق محدده لايواء اللاجئين بس بالمستقبل ورا ما  تستقر تكدر تروح تسكن بأي مكان يعجبك.

احنا يمكن شغلتنا خلصناها بسرعه بس اذا كنت مقدم تقديم عادي على الامم فأتوقع بعض التاخير.

                                   وبالتوفيق الك ولكل اخواني بالمنتدى....اخوك سيرانو

[مرتضى البدري]

السلام عليكم   اخي العزيز سيرانو وشكرا لك على هذه المعلومات وتعاونك الذي يدل على شخصيتك الخلوقه  اخي العزيز انا موجود بالعراق وامنيتي هي الحصول على اللجوء لبريطانيا علما اني لم اعمل مع القوات البريطانيه لكن يوجد لدي اقرباء في بريطانيا (خالي) ويحمل الجنسيه البريطانيه  فهل يستطيع مساعدتي  ارجو ان تفيدني باي معلومه في هذا المجال  وشكرا جزيلا لك

[CYRANO]

 اهلا وسهلا بيك اخ مرتضى وشكرا على سؤالك بالنسبه لشغلتك تصير بس يرادلها  وقت وصبر واول شي لازم تسافر للاردن او سوريا ومناك تقدم على الامم المتحد تقديم عادي يعني انت وحظك ولازم ادبرلك فد قصة محبوكه على اساس انت متهدد او كذا او كذا بحيث يقتنعون بقصتك وشغلة الاقرباء يفضل لو كان من الدرجه الاولى مثل زوجتك او احد ابناءك ابوك امك وبعدين يجون اخوانك وخالك ممكن يشفعلك اذا صدكوا بقصتك وحولوا ملفك الى التوطين على بريطانيا...

           وبالتوفيق الك وللجميع...اخوك سيرانو.......

[arch.s]

شكرا  اخي سيرانو  على  المعلومات
وما  قصرت  اخي الله  يسهلك امرك
وامر الجميع  والكل  يسافر  ويستقر  على خير  وسلامة