مؤتمر صحفي لرئيس الاتحاد السرياني في مركز الحزب
مراد: نرفض الغبن ونطالب بوزير ونائبين
وطنية: 1/11/2009 (سياسة)
عقد رئيس حزب الاتحاد السرياني ابراهيم مراد مؤتمراً صحافياً في مقر الحزب في سد البوشرية استنكر فيه الغبن والتهميش اللاحق بالطائفة السريانية وطالب بإعطاء الطائفة التي قدمت 1132 شهيداً كل حقوقها ان في الوظائف الادارية او كمدراء عامين او نواباً في البرلمان.
وحضر المؤتمر ممثلة رئيس حزب الكتائب اللبنانية عضو المكتب السياسي فدوى يعقوب، ممثل رئيس الهيئة التنفيذية للقوات اللبنانية ادي ابي اللمع، رئيس بلدية الجديدة البوشرية السد السيد انطوان جبارة، رئيس الرابطة الاشورية رويل رويل، وعدد من ممثلي المؤسسات السريانية .
في البداية القى مراد كلمة اعتبر فيها ان الطائفة السريانية ترفض تسميتها اقليات لأن لها اسمها وتعد على لوائح الشطب 28 الف صوتاً من هنا تؤكد ان لديها حقوقاًُ في النظام اللبناني الطائفي وهي التي قدمت 1132 شهيداً وهذه الحقوق هي:
وظائف ادارية
مدراء عامين
مقعد وزاري
مقعدان نيابيان
وسفير في السويد لان السريان هم اكبر جالية في السويد ولديها وزراء ونواب ورؤساء احزاب ورؤساء بلديات
اضاف" نحن هنا وبعدما اثبتنا قوتنا وتمثيلنا على الارض نقول انه في حال لم تتحقق مطالبنا سنقوم بعدد من الخطوات التصعيدية منها:
•
أولاً نصعّد تحركاتنا على الارض
•
تانياً التوقّف عن دفع كسريان الضريبة لنظام لا يعترف بنا.
•
تالتاً تحريك مؤسساتنا في اوروبا لتضغط على المرجعيات السياسية في لبنان والعالم لاعطاءنا حقوقنا
•
رابعاً رفع شكوى لدى الامم المتحدة والاتحاد الاوروبي على النظام اللبناني بدعم من مرجعيتنا الحزبية في اوروبا.
وختم مراد: "سنتوجه اليوم بالدرجة الاولى الى الرؤساء الثلاثة كونهم حارسين الدستور وحامين حقوق الجميع نطالبهم بجواب عن سبب الغبن والتهميش والاستيغاب لطائفتنا" مؤكدين اننا لن نسكت ولن نستسلم بل سننتفض ونستنكر ونعتصم".
بعد ذلك ادلى ادي ابي اللمع كلمة جعجع فأكد على دعم حقوق الطائفة، وبعد كل الوعود التي اطلقت دون اي فعل او مبادرات وتمنى على المسؤولين التعاون لاعطاء الطائفة حقها.
ثم تحدث عضو المكتب السياسي في حزب الكتائب اللبنانية فدوى يعقوب بإسم رئيس الحزب امين الجميل فأكدت ان الكتائب هي اول من دعم مطالب السريان بكل جدية.
اضافت: نحن اول من طالب بدعم الدستور لتأخذ الطائفة السريانية والطوائف المسيحية حقها بعدما اصبحت كلها من الاقليات.
واخيراً تحدث رئيس البلدية جديدة البوشرية السد انطوان جبارة فأكد ان السريان هم جزء لا يتجزأ من لبنان وقدموا شهداء كغيرهم، من هنا يجب ان يأخذوا حقوقها كلها.
بعد ذلك انطلق مسيرة من مركز الحزب في البوشرية باتجاه غاليري خباز ورفعت شعارات تؤكد "على حق الطائفة في اخذ حقوقها وترفض كل انواع الغبن".
كلمة رئيس حزب الاتحاد السرياني ابراهيم مراد
خلال المؤتمر الصحفي والتظاهرة
الاحد 1 تشرين الثاني 2009
استنكاراً للغبن والتهميش اللاحق بالطائفة السريانية
يا رفاق ويا احبا،
دعينا اليوم لمؤتمر صحفي وتظاهرة، تَنطلق نحنا ابناء الطائفة السريانية صرخة ألم وقلق، لأنو نحنا عم نعاني من غبن وتهميش واقصاء وابعاد مقصود عن المشاركة بمسيرة بناء الوطن من قبل القيّمين على النظام الطائفي بهالبلد من عهد الاستقلال لليوم.
عم نطلق هالصرخة كسريان لانو نحنا منعتز ومنفتخر بتسميتنا الحقيقية. ومش كأقليات اللي هنّي ممثلين اصلاً بالمجلس النيابي حالياً بمقعد واحد وانشالله بجهود بعض يللي بسمّو حالن قيادات الاقليات بصيرو عشر مقاعد.
اليوم نحنا صرختنا كسريان بيعدّو بلوايح الشطب الرسمية اكتر من 28 الف صوت هيدا اذا اعتبرنا سن الاقتراع فوق 21 سنة،،،،
نحنا بنرفض وبنرفض تسمية اقليات معنوياً وعددياً وبنعتبر انو اي مؤسسة او شخصية سريانية بتطالب بحقوقنا ضمن تسمية اقليات بتكون شريك بالغبن والتهميش اللاحق فينا.
عم نطلق هالصرخة اليوم تتوصل لكل لبناني وطني شريف بيهمو مشاركة كل فئات المجتمع اللبناني بالتركيبة السياسية اللي بيتميّز فيا لبنان ويللي هو وطنا كلنا سوا ومش وطن عاقياس بعض الزعما....
يا بيكون وطنّا كلنا او ما بيكون في وطن.
وكلنا شفنا يا رفاق شو صار بالوطن لمن البعض جرّب يلغي غيرو... ما بدنا تتكرر المعاناة ........
بدنا نطلع من دوامة محاولة الغاء بعضنا البعض.
هالصرخة اليوم عم نطلقا لحتى توصل لكل لبناني ولكل قيّم عالنظام الطائفي بلبنان لنقلَن انبح صوتنا ونحنا عم نجرّب نوصّل صرختنا ومعاناتنا اللي ما حدن بدو يسمعا او يعيشا. معاناة عم نعيشا كل يوم وبدنا نذكّر الكل انو لمّن بعض اللي بنسميّن كبار تآمرو عا أمن البلد ودعمو المحتل بفترة الحرب اللبنانية كنّا نحنا السريان عم نستشهد على الجبهات دفاعاً عن حرية واستقلال لبنان وقدمنا 1132 شهيد تيبقى لبنان. نعم 1132 شهيد من طايفة وحدة صغيرة مقارنة مع الطوايف الكبرى بلبنان. يعني قدمنا النسبة الاعلى من الشهدا.
وبالرغم من كل هالتضحيات ما حدن بدو يعطينا حقوقنا ،،،، حقوقنا الكتيرة:
حقنا بوظايف ادارية....
حقنا بمدرا عامين
حقنا بمقعد وزاري
حقنا بمقعدين نيابيين
حقنا بسفير اقله يكون السفير اللبناني بالسويد سرياني لأنا اكبر جالية بالسويد هي الجالية السريانية وعنّا هونيك وزراء ونواب ورؤساء احزاب ورؤساء بلديات
حقنا بأخد رأينا بكافة الامور السياسية والوطنية
وحقنا نرفض بعد اليوم دفع "الجزية" اللي بيسمّوا ضريبة بهالايام لأنو نحنا حاسين انّا بعدنا عايشين بظل النظام العثماني.. وعم ندفع الجزية حتّى ما نندبح او نضطّر نغيّر ديننا.
بطّلنا نفهم ليش حقوقنا مهضومة بظل نظام ديمقراطي توافقي طائفي ... ما عم نفهم شو طبيعة هالنظام !!
كيف بعض الطوايف يللي منحترما عدد ناخبيها اقل بكتير من عدد ناخبي طايفتنا بتتمثل بالمجلس النيابي والوزاري ونحنا ما منتمثل، هيدا شو؟ مش تمييز واضطهاد؟
حقنا بلبنان برأيكن بس 4 مقاعد بمجالس بلدية و4 مقاعد اختيارية؟
منشان هيك نحنا اليوم كحزب اتحاد سرياني فاعل وناشط على الارض من اربع سنين لحديت اليوم، وبعد ما قمنا بكل التحركات السياسية المتوجبة علينا وقصدنا كل الجهات المعنية والمرجعيات الروحية والسياسية اللي اكدت حقنا بالمشاركة بمسيرة بناء الوطن، وبعد كل الوعود من قبل كتار، وبعد مشاركتنا بالانتخابات النيابية بقوة ما يستهان فيا باعتراف الجميع، وبعد ما أثبتنا قوتنا وتمثيلنا على الارض، بعد هيدا كلو جينا اليوم لنقول للكل اذا ما حصّلنا حقوقنا المعترف فيا رح:
•
أولاً نصعّد تحركاتنا على الارض
•
تانياً نبطّل ندفع كسريان الجزية اي الضريبة لنظام ما بيعترف فينا.
•
تالتاً نحرّك مؤسساتنا باوروبا لتضغط على المرجعيات السياسية بلبنان وبالعالم لتعطينا حقوقنا
•
رابعاً نرفع شكوى لدى الامم المتحدة والاتحاد الاوروبي على النظام اللبناني بدعم من مرجعيتنا الحزبية باوروبا.
وطبعا في طرق تانية بنقدر نستعملا لحتى ما يموت حقنا.
بنتوجه اليوم بالدرجة الاولى للرؤسا الثلاثة كونُن حارسين الدستور وحاميين حقوق الجميع .... لنقلن بدنا منكن جواب ليش هالغبن والتهميش والاستغياب لطايفتنا... بدنا جواب واضح وصريح اذا نحنا مرتزقة وعملا لاسرائيل خبرونا ما بقا نسكت عصمتكن.
بنقول للكل هيدي الخطوة اليوم هي أولى الخطوات التصعيدية اللي رح نقوم فيا لنزيل التهميش اللاحق فينا ولنشارك بالقوة اذا مش بالرضى بالشأن السياسي بهالبلد.... يا كلنا بنشارك او بنبقى بمزرعة من دون وطن.
نقسم بدماء شهداءنا، ما رح نسكت عن الظلم والقهر بعد اليوم، ما رح نرضَ نكون ذميين، ما رح نرضَ نكون غربا بوطننا.
رح ننتفض، ونستنكر، ونعتصم، ونشارك...
بــــــــس مـــا رح نســـتســلـــم
الكاتب
