سؤال لذوي الخبرة عن السفر من والى امريكا

[Abo Andrew]

مرحبا اخوان وخوات

اريد استفسر عن موضوع بس اريد اجابات اكيدة وصحيحة من الاخوان وعن خبرات حقيقية

بصراحة همة اسئلة مو سؤال واحد ؟؟

1- هسة اني لاجئ عندي كرين كارد وجوازي الجي لا يزال ساري المفعول لحد سنة 2016  وردت اروح زيارة لاحد الدول الاوربية مثل السويد او المانيا او هولندا شنو اللي احتاج اسوي حتة اسافر ؟؟ هل يحتاج اسوي الترفال دوكيمنت (جواز السفر المؤقت) او جوازي الجي يفي بالغرض ؟؟ وهل احتاج ابلغ دائرة الهجرة والجنسية على هذا الموضوع ؟ وهل يحتاج طلب فيزا من البلد الاوربي اللي اريد اروحلة ؟؟؟

2- هسة بالعكس الشخص الحاصل على الجنسية الاوربية من اي دولة كانت شلون يكدر يجي زيارة الى امريكا؟؟

هل يحتاج ايقدم على فيزا زيارة ؟؟ لو امريكا تسمح للاوربين بدخول اراضيها بلا فيزا ؟؟

3- زين الشخص الحاصل على جنسية امريكية هل يحق له الذهاب الى اي بلد اوربي او عربي لو هم يحتاج ايقدم الى فيزا ومن هاي السوالف ؟؟

ارجو من ذوي الاختصاص ان يكرمونة بالمعلومات اللي عدهم

تحياتي

[alwismy]

حلو خوش موضوع

انا اجاوبك على الفقرة الثالثة بحكم اصدقائي يجون من امريكا لدول الخليج من ضمنها الامارات

فهم ياخذون الفيزا بالمطار وعلى مااعتقد مدتها 3 شهور قابلة للتجديد
 

واترك الاجوبة للاسئلة الباقية للاخوان في المنتدى

اخوك
alwismy

[Abo Andrew]

شكرا اخي العزيز على الاجابة

بس هذا يشمل الجزء الاول من السؤال الثالث اذا كان البلد عربي .. زين شلون في حالة البلد الاوربي ؟؟؟

تحياتي

[Abo Andrew]

اضافة سؤال اخر


هسة اني لاجئ عندي كرين كارد وجوازي الجي لا يزال ساري المفعول لحد سنة 2016  وردت اروح زيارة لاحد الدول العربية شنو اللي احتاج اسوي حتة اسافر ؟؟ هل يحتاج اسوي الترفال دوكيمنت (جواز السفر المؤقت) او جوازي الجي يفي بالغرض ؟؟ وهل احتاج ابلغ دائرة الهجرة والجنسية على هذا الموضوع ؟ وهل يحتاج طلب فيزا من البلد العربي اللي اريد اروحلة ؟؟؟

[Revolver]

أخوية العزيز ابو اندرو,

ياريت ان شاء الله لمن تجمع المعلومات الكافية والوافية والصحيحة ان تتبنى هذا السؤال وتحولة الى "موضوع " لأن كلش مهم وموضوع صدك جديد على الساحة ويحتاج بي النصيحة والمنُاقشة .


اخوك

ريفولفر

[haitham40]

اخي الدول العربية ما عدا سورية لا تسمح لك في الدخول الى اراضيها في الكرين كارد .... وبالنسبه الى الاوربيه اعتقد تسمح لك الدخول بالكرين كارد .... عندي صديق سافر الى الدنمارك بالكرين كارد بي امكانك مراسلة السفارات الاوربيه والاستفسار من ذالك

[haitham40]

وبالنسبه الى تبليغ دائرة الهجره فلا اعتقد يحتاج الى ذالك ولا دخل لهم في حياتك انت الان لا تتبع الى اي جه حر طليق

[Mark_usa]

كونك تمتلك الگرين كارت لايجعلك مواطن امريكي، وبناءً عليه ستعامل معاملة المواطن العراقي عند الدخول الى الدول العربية، كل دولة وحسب متطلباتها فاذا اردت الذهاب الخليج فيتطلب ذلك الحصول على احدى انواع الفيز المتاحة حالك حال اي مواطن عراقي بدون گرين كارد النقطة الوحيدة المختلفة هو انهم الان يعرفون محل اقامتك الدائمية، وانك لن تطلب لجوء مما يسهل اصدار الفيزا ان صح التعبير، وقد لن تطلب منك بعض الدول كفالة لضمان خروجك من بلادهم ...الخ من اجراءات جانبية ان وجدت عدا ذلك فانك تعامل معاملة العراقي في بقية الامور. اتصل او ادخل على مواقع قنصليات الدول (العربية او الاجنبية) التي تريد زيارتها في الولايات المتحدة.

اذا حصلت على وثيقة السفر الامريكية فعلى الرغم من وجود بعض الدول الاوربية التي ستسمح لك بالدخول بدون فيزا (اذا كانت وثيقة السفر صادرة لللاجئين وذات مدة نفاذية سنة واحدة)، لكن معظم الدول قد تطلب فيزا مسبقة قبل السفر اليها، لاحظ ان معظم الدول العربية لا تعترف بوثيقة السفر الامريكية من الاساس وستحتاج الى استخدام جوازك العراقي (او الامريكي اذا كنت مجنس) للدخول اليها. ايضاً اتصل او راجع قنصليات الدولة في واشنطن التي تريد السفر اليها مسبقاً لمعرفة تعليماتهم الخاصة بهذا الخصوص.

وستبقى كندا والمكسيك مفتوحة لحاملي الگرين كارد سواء بالجواز العراقي او بوثيقة السفر او حتى بدونهما.

اذا حصلت على الجنسية فستعامل معاملة المواطن الامريكي في السفر والكثير من دول العالم ستعطيك فيزا بالمطار اثناء الدخول. وستضل بعض الدول تطلب فيزة مسبقة للدخول.

بالنسبة الى مواطنين معظم الدول الاوربية وبعض الدول الاسيوية المشتركة ببرنامج visa waiver لايتطلب منهم الحصول على فيزة مقدماً للدخول الى امريكا ويتم اعطائهم I-94W عند نقطة الدخول بالمطار (لونه اخضر) لمدة ثلاث اشهر +/- بكل مرة يدخلون بها امريكا مع احتفاظ الولايات المتحدة بحق رفض دخول اي شخص غير مرغوب او طلب فيزا مسبقة من اي شخص ولاسباب متعددة.

تحياتي

[AbU.SaRa]

 صدك موضوع حلو وبارك الله بيك ....لأن هواي ناس ما يعرفون هاي المعلومات وأذا حصلوا عالكرين كارد يكدرون يسافرون بحرية أو لأ ..............

[عكعك التطوى]

فيزا الى فرنسا لمقيم دائم عراقي في الولايات المتحده الامريكيه

http://france.visahq.com/requirements/Iraq/resident-United_States/

فيزه الى فرنسا لمواطن امريكي

http://france.visahq.com/

فيزه الى الولايات المتحده الامريكيه لمواطن اوربي

http://united-states.visahq.com/requirements/France/

ومن خلال الموقع يمكن التحكم بنوع الفيزه والدول حسب قوانين كل دوله

[Safaa Alkhrkhy]

اني اللي اعرفهة ومتأكد منهة انه كل الدول العربية تطلب منك فيزا على وثيقة السفر الامريكية (وبضمنها العراق ) ماعدا سوريا حيث تستطيع دخولها بدون فيزا (تاخذ التاشيرة بالمطار) ولمدة 3 اشهر قابلة للتجديد وتذكر انه اذا اردت دخول العراق بوثيقة سفر امريكية فسوف تطالب بتاشيرة دخول صادرة من السفارة العراقية باي بلد اخر ولن يدخلوك حتى لو طلعتلهم مية جنسية والف شهادة جنسية عراقية وعشرة الاف بطاقة تموينية ومليون هوية مال احزاب لأثبات عراقيتك!!!!!!!!! ولكنك تستطيع الدخول بجواز سفرك العراقي فقط .... بالمناسبة وثيقة السفر هذه تسهل موضوع حصولك على الفيزا لبقية بلدان العالم وخصوصا اللي مدتهة سنة والتي تمنح للاجئين حيث انك تعتبر اصلا لاجيء ومعروفة اقامتك .......وها دير بالك اتطلعلهم الجواز العراقي الاخضر!!! ترة ايشمروا عليك وحتهة يمكن ماراح ايلزموه بأيدهم ايخافون منهة!!!!! وتقبل عظيم تحياتي ابو اندريو .........ها بالمناسبة ترة داعيك بدة على الشحن وقيد الدراسة...................

[MAGGIC]

اخي العزيز ابو اندرو

تحياتي الك

اؤيد كلام الاخوة اعلاة من حيث اسنحصال الفيزة  كل دوله حسب  قوانينها وبعض الدول يطلبون مبلغ من المال موضوع في المصرف باسمك

سلامات عيوني ابو اندرو شنو تريد تسافر لغير دوله  وبطلت من امريكا  ههههههه


تقبل مروري

[Abo Andrew]

لا يمعود بالعكس مستقر والحمد الله

بس دا افكر اذا ردت ازور اقاربي اللي عندي منهم بالسويد المانيا هولندا وووو

شلون ما اشوف شغلة عاوية خل همة يجون احسن