سؤال حساس و مهم جدا؟؟

[SALEM HMODE]

مرحبا
تحية طيبة الى ادارة المنتدى و اعضاؤه المحترمين و اشكرهم على هذا المنتدى الجميل و الرائع .
اود السؤال عن حالة معينة و هي اني قابلت هيئة المحلفين خلال شهر 5 هذا العام و استلمت الموافقة في 11\7\2009 و اكملت الفحوصات و الدورة التثقيفية و بانتظار الموافقة الامنية و موعد السفر لكن المشكلة اني مضظر للسفر الى العراق لوحدي و بدون زوجتي لظروف اقوى مني و لتصفية بعض المتعلقات الخاصة فهل هذا يؤثر على ملفي او اجراءات السفر .علما اني موجود في الاردن .
ارجو التكرم بالرد على سؤالي بصورة واضحة و دقيقة لاهمية الموضوع .
اشكر تفضلكم بالرد على موضوعي .

[عكعك التطوى]

والله يا اخي المنظمه متنصح بذلك ولكن لا تجزم بنفس الوقت واعرف جماعه رجعوا للعراق وسافرو ولكن تبقى العمليه بيها مخاطره ولا تصدك واحد يكدر ينطيك اجابه واضحه لان الحظ يلعب دور بالعمليه

[angie-dawood]

اخي انت ما دام كملت كلشي ودتنتظر الموفقة الامنية والسفر ليش هل السفر هسى الى العراق  راح يسالوك ليش تسافر وانت قصتك بيها تهديد شون  ترجع اعتقد مو بصالحك السفر  حاليا الى تقدم سبب كلش مقنع اعتقد بحالة وحدة ما يحجون لا سامح اللة الف مرة بحالة الوفاه لشخص مقرب بس هيجي سبب مال تصفي امورك او تبيع الممتلكات مو سبب مقنع يمهم بس انتظر ردود الاخوة شيكولون واذا تريد تبيع تكدر تبيع اي شي حتى لو انت بالخارج هسى اغلب العراقيين الي عافوا بيوتهم ماجريها لناس او اقربائهم ساكنين بيه ويريدون يبيعوها كلهم هسى ديبيعون وهما بالخارج ويستلمون الفلوس هم هنا بامريكا ومو شرط تروح ترجع تبيع بالعراق انشاءللة السفر القريب والاستقرار

[ام عبداللة العراقية]

اخي المحترم انصحك ما تروح بلذات اذا انت ذاكر بقصتك انك حاليا مهدد لان هذا الشي صار مع ابن عم زوجي هو بلاردن ومكمل كل شي تقريبا وراح للعراق يودع اهله وهم يصفي اموره (يظرب عصفورين بحجاره)
ف ال iom دزت عليه وقالتله انت مرفوظ والسبب انت تقول اني مهدد فانت شلون سافر فرفظوا
فانصحك يا اخويه المحترم لا تروح اجل كل امورك وا خلي احد قريب عليك يصفيلكيا وابقى على اتصال معا لانه الكل يعمل هذا الشي
وان شاءالله نسمع عنك كل الاخبار المفرحه

[SALEM HMODE]

اني ممنون جدا و اشكركم جزيل الشكر على هاي الردود الوافية
المشكلة هو شحة الفلوس و اريد ارجع لبغداد حتى اصفي متعلقاتي و احولها الى فلوس حتى اقاوم انا و عائلتي اطول وقت ممكن لحد متوصل الموافقة الامنية
اشكر الاخ عكعك و الاخت انجي المحترمة و ام عبد الله على اهتمامهم و اتمنى الكم الموفقية و راحة البال
اخوكم سالم حمودي

[Safaa Alkhrkhy]

أخي العزيز .......... حالتك اتذكرني بموقف لشخص في سوريا وبوقتهة نصحتهة ان يسوي احد الامرين :
الاول اما انه ايطلع جواز ثاني ويدخل للعراق بي ويبقهة جوازهة الاول اللي عند المنظمة مابي تاشيرة دخول للعراق.
والثاني وهو الاسلم والافضل انه ايسوي وكالة لزوجتهة بالسفارة وهية تروح تتصرف بالاشياء على ضوء الوكالة
طبعا هوة سوة الاختيار الثاني ومشت امورهة
نصيحتي انه لاتجازف وترجع ... لاتضيع الفرصة منك خصوصا انه انتة ماشي خوش مشية بيهة


تقبل تحياتي    صفاء الكرخي

[bee bee]

دير بالك ترجع أخوية
حتى زوجتك هم لاترجع
الشغلة بيها مخاطرة واحتمال قوي لرفض معاملتكم اذا رحتوا للعراق
أنصحك بتوكيل أحد الأقارب أو الأصدقاء الذين تثق بهم
وهمه خلي يتصرفون بشغلاتك ويدزولك المقسوم
حتى لو كان المبلغ شوية أقل مما انت مقدره لمتعلقاتك
أحسن من تروح انت وتخسر الأكو والماكو

تحياتي لك

[Revolver]

اخوية العزيز زين متكدر اتسوي ( توكيل عام ) الاحد الاشخاص الي تثق بيهم ثقة عمياء 

ريفولفر

[SALEM HMODE]

اشكركم جزيل الشكر على هذا الاهتمام و روح المساعدة الي هي مو غريبة عليكم
اشكركم جدا لانكم نوروتوني و نصحتوني و اني جدا ممنون من ردودكم الحلوة
المشكلة المتعلقات الي عندي لا يمكن تصفيتها عن طريق وكيل حتى لو كانت زوجتي بس بعد نصائحكم اني
لغيت الفكرة نهائيا و لازم اشوف اي حل بديل لحين ميجي الفرج من رب العالمين و نخلص من هاي المعاناة
اليومية
اكرر شكري و اعتزازي بحضراتكم و اتشرف ان اكون احد اعضاء المنتدى

[عيني بغداد]

السلام عليكم

أحد الاشخاص اللي اعرفهم بعد ما كمل مقابلات طلب من اليو ان السفر للعراق لتصفية أمور شخصية وانطوه موافقة.
يفضل اذا ترغب بالسفر الى العراق ابلاغ المنظمة بسبب مقنع للسفر للحصول على موافقتهم.

تحياتي
عيني بغداد