مثل المستجير من الرمضاء بالنار ( حسافة وحرامات )

[echo 9]

اخوية العزيز ابو اندرو
مساء الورد والعود والعنبر على جنابك المحترم
بالله الكريم يا اخي ما قريت اي تعليمات بس من خلالكم نصحوني الاخوان اقدم على الاس اي في لان عندي سنة خدمة وما زلت مستمر وانا والله كنت عمياوي رحت راسا ارسلت نفس النسخ اللي انا اصلا مرسلهن لل اي او ام ارسلتهن لل اس اي في وكله كوبي بيست من غير ما اعرف شنو اللي يصير من المايصير
على العموم انا اليوم ارسلت ايميل للاثنين اس اي في و اي او ام وابلغتهم انه عندي بنت متزوجة واسم زوجها وجنسيته وعقد الزواج مالتهم واللي بده يصير يصير
على فكرة انا والله يا اخي مو عارف ليش جماعة استراليا اخذوهم وياهم من غير اي او ام او اس اي في واحنا جماعة الامريكان يشلعون كلبني بهالطريقة والاخطاء تحصل اذا يحاسبوني على الغلط من اولها لا اريدهم ولا اريد امريكتهم يعني الواحد من اولها يظل يحسب حساب لكل شي لا صايرة ولا دايرة
شنو هاي الواحد اريح له يدفع له شدة ونص لواحد من المهربين ويصبح عدهم وغصبا ما عليهم يقبلونه شنو هالمذلة هاي ما مجبورين عليها انا مدوخ روحي من البارحة لليوم اخف من النتيجة خو ما كو شي بس هم ايضا مابيهم صوج الصوج صوجنا وصوج ابونا ( الحكومة ) لان برايي الحكومة هي الاب لكل ابناء الشعب والشعب ما شاء الله مهجول بهالدول
اعذرني اخوية بس والله طكت روحي ما متعود على مثل هاي المواقف . اعذروني اخواني اللي بالمنتدى والجايين تقرون موضوعي بس والله العظيم ثلاثة انا من قدمت كنت اظن الاقي كل الترحيب منهم مو هاي المعاملة التشلع القلب جيب الفورم ورد الفورم ال IOM  ارسلوا لي ولا 10 رسائل كل وحدة يكولون بيها ارسل الجناسي وانا والله يشهد ارسلتهن اكثر من 5 مرات بعدين قمت ما ارد عليهم يعني مطنشهم لانهم الظاهر مال واحد يطنشهم شنو جاي يبيعونا بضاعتنا المغذيات هاي شغلتنا الظاهر تعلموها من عدنا والا بشرفكم شنو معنى الواحد يطلبون منه اثبات انه متهدد وحياته في خطر ويظلون يشتلونه سنة واكثر شنو هاي يعني اللي مهدده ينتظره على ما يطلع لامريكا لو عزرائيل متقاول ويا الاي او ام
انا على فكرة قدمت بشهر العاشر ما صار لي اسبوعين تقريبا بس احس ان الموضوع هذا راح يدمر اعصابي النوب ازعجت الناس الباقين كل شوية فزعتكم والحكوني خو ماكو شي انا عندي خدمة وياهم والضوابط تشملني ليش ما يفضوها ويانا احسن
انا اسف مرة اخرى لكم جميعا وما اريد اضوجكم بس هذا احساسي وشعوري بهاي اللحظة احس اني مثل المستجير من الرمضاء بالنار


اخوكم
Echo 9

[angie-dawood]

هسى وين المشكلة اخي طبعا كلشي ما يجي بالساهل وخصوصا احنا العراقيين كلشي بالتعب وطلعان الروح حشاكم يلى نوصل اليه المهم اخي ربي يصبرك وانشاءللة تكمل معاملتك باسرع وقت لعد اللة يساعدهم الي صارلهم خمس سنوات ينتظرون مثل اخوتي وغيرهم وغيرهم شجان سويت اللة كريم ربي يوفقك باي بلد كان

[Abo Andrew]

اخي العزيز المحترم

تحياتي الك واتمنالك راحة البال والهدوء والاستقرار وين مجنت

اخي العزيز ماكو داعي الى كل هذا القلق والخوف والتشويش

اني اتمنى اسالك سؤال بصراحة

انت ليش اتريد تجي امريكا ؟؟ هل انت متخذ هذا القرار لو على واهس الاعضاء هنانا؟؟

اخي ترة اذا اتظل بهاي الوضعية مراح تتحمل اتعيش بامريكا لان هذا البلد ايريد ناس تتعلم بي تصبر كلش هواية يعني مثل مصبرت سنين بالعراق على هواية امور

نصيحة من ابنك الصغير لان انت مبين رجال جبير وبمقام والدي طول بالك انت بعدك بالبداية واللي سويتة انت ما بي اي شي غلط واني هسة دا افكر اذا انت هيج خايف لعد من اتقابل المحلف شراح ايصير بيك؟؟

واخي العزيز خلي في بالك ترة الشغلة اطول كلش هواية اني اهلي قدمتلهم العام الماضي في شهر الثامن ولي هسة همة بعدهم مجايين لان عدهم هواية اعداد

تحياتي

[echo 9]

اختي انجي الله يخلكي ويحفظك شنو يعني احنا العراقيين الله كاتب علينا هالمصايب . قبل نكول النظام ومصايب النظام هسه النظام تغير اشبيهم ذوله الجدد تسودنوا علينا والله السالفة هاي تخبل هسه الناس مرتاحة كل واحد ببلده بين اهله وناسه واحنا بس يا الله جنطنا على ظهورنا ومن بلد لبلد شنو هاي الحياة؟؟؟
النوب اليطلع وانا اول واحد اتمنى اطلع من العراق مكيف ؟؟؟؟ شنو هاي بالله جاوبوني بحياتكم سمعتوا عن واحد كويتي او سعودي او اماراتي تهجول هجولتنا شنو يعني هاي الناس احسن من عدنا لو دولهم اغنى من دولتنا !!!!!! بس هو عمي ذيك ناس الله راضي عليها احنا وبكل صراحة الله غاضب علينا والا شنو يعني اللي يصير بينا .
شوكت الواحد يخلص من هاي الشدة
وبعدين عمي الله يصبر اخوتج 5 سنوات شنو هذا قبل احنا نستغرب من اخواننا المصريين اشلون يصبرون عن اهلهم 5 و10 سنوات هسه احنا صرنا اضرب منهم
والله مشكلتي مع العراق مو مشكلة مادة !!! المادة موجودة وتوب والحمد لله تعالى بس الواحد ما يعرف يصبح عليه الصبح وصاير وذرة وذرة من ورى الانفجارات والمفخخات والقناصة والخطف والقتل .
لو الواحد يبات مليونير ويطلع عليه الصبح وهو حافي مفلس لان الجماعة خاطفين ابنه لو بنته ويريدون املاكه كلها فدية ؟؟؟؟؟؟

المهم اللي عنده صبر نصيحتي له يفلت ما دام بيها مجال للفلته وانا امري لله اصبر واتحمل واشوف ما دام الصبر والتحمل مكتوب على العراقيين وبس
echo 9

[بغداد بقلبي]

السلام عليكم اخي الغالي اصبر والله كريم بس انته حاول لاتفكر بالموضوع اهواي وان شاء الله تفرج عليك باسرع وقت واريد اكلك فد شي بس لاتزعل مني خفف من العصبيه

[كمال الشاطيء]

لسلام عليكم اخي

الله يعينك ويعين كل منتظر وان شاء الله تفرج عليك وعلى الجميع

ومثل مااتفضلوا اخوتي الي ردوا عليك قبلي تره الشغله اطول مو سهله

واني ابسط مثال كدامك قدمت يوم 7/9 / 2006  وسافرت الامريكا يوم 29/9/ 2009

وهاي الحمد لله اني بامريكا صارلي شهر وهم صبرنه وضجنه وعصبنه واتمرضنه واعصابنه تعبت وتلفت لكن الحمد لله الواحد يتحمل ويصبر الى ان يجيه الفرج

فاصبر اخي وان شاء الله تنول حق صبرك ويفرجها عليك رب العباد باذنه تعالى

اخوك كمال

[echo 9]

شكرا للاخوان كمال الشاطئ والاخ بغداد بكلبي واله وبكلبي انا همين واختنا العزيزة انجي كلامكم اثلج صدري وبرد اعصابي بس والله انا مو ضايج من الانتظار لا بالعكس الانتظار يمكن بيه محاسن الواحد ياخذ راحته انا ضايج من اللي يصير بينا ووضعنا بالعراق . الله يخليكم ويعافيكم ويسهل اموركم .
حبيبي واخوية وابن اخوية ابو اندرو
ترى انا مو كلش جبير انا بالاربعين وكذا يعني بعز الشباب بس اتزوجت من وكت واعجبك اخوك فحل خلفت 8 اولاد الكبيرة 20 والصغير سنتين وانت احسبها تلاكي خالك ما يطوف
والله يا ابو اندرو انا نفسي ومنى عيني اغادر العراق هسه الليلة على الضيم الشفته
تشتغل ويا الامريكان يكولون عليك عميل يشتغلون هم يسمونها مصلحة وطنية
تبوك مثلهم يسمونك حرامي يبوكون هم يسموها الحفاظ على المال العام
تغادر العراق الى غير رجعة يسمونها انهزمت وعفت البلد يطلعون هم يسموها نضال وجهاد
يعني يا ماي عيوني من صوبهم غفور رحيم ومن صوبنا شديد العقاب
اعذرني انا الليلة منفعل شوية لان والله لو تعرف قضيتي من سقوط النظام مثل ما يسموها لهسه تدوخ انت من يمك
ولو تعيش الحرب اللي عشتها انا والانكسارات الحصلت لي كان والله تكول لي انه انا استاهل اروح لجوء سياسي مو بس هجرة
يا اخي صارت عدنا مثل الرطينة كلشي ما نفتهم منها تبات الليلة باعلى السلم يطلع عليك الصبح وانته ماكلتك الحية وصاير بقاع الدرج
شنو هاي
الصبر والله موجود عندي بس هي مسالة تعود لا اكثر ولا اقل
ادعي لك بالموفقية لان كلامك برد اعصابي
اخوك عمك خالك اللي تريده سميني بس قيس عمري على عمرك وانطيني النتيجة
الشاب الشايب
Echo 9
حبيبي ريفولفر اشو ماكو الليلة بس كون المانع خير ان شاء الله. سلامي وتحياتي لك ريفو

[Revolver]

اخوية العزيز echo,

الله يريح بالك ان شاء الله ويحفظك ويحفظ عائلتك ويسعدكم طول العُمر, بس والله مقهور كلش من الي قريتة, وماعرف داأحس نفسي اني سبب " الحيرة " الي انت هسة بيها , وان شاء الله بأسرع وقت اتمر ويتبدل هذا الشي ويتحول الى الطمأنينة والصبر الجميل بأذن الله ياربي .

بلنسبة للبلد فأحب اكلك اخوية العزيز اذا انضل انفكر بي مراح نستفاد اي شي صدكني, البلد انباع وراح ومراح يتصلح, والحل بقة بيدينة, والحل هوة الحفاظ على اهلنة واولادنة وزوجاتنة من الي ديصير بهل البلد . ونحاول انقصر على نفسنة وانضحي بكلشي في سبيلهم , حتى يعيشون حياة مستقرة ودائماً يندعولنة بلخير . لأن بلعراق صدكني صدكني . مراح اتحصل منة شي غير الهم والغم والقلق . يعني ابسط شي اذا اتأخر احد من اهلك التلفونات اتصير ركع لأن كلشي نتوقعة بهل البلد . ( سلامتك وسلامة اهلك ان شاء الله )  صح لو لا ؟

فيا اخوية العزيز, احب اطمنك من سالفة اللجوء او الهجرة الى اميركا . لأن صاحب العائلة والي عندة اطفال صدكني اكو شغلات اتساعدة على المعيشة وانت كلت عندك طفل عُمرة سنتين ( الله يحفظهم كلهم ان شاء الله ) فأكيد الضمان الصحي موجود الهم والفود ستامب مستمر و و و الخ من الشغلات الي اتساعد اللاجئ او المهاجر على العيش بصورة عادية .. وياريت من اخوية ابو اندرو او اي احد يذكر الشغلات الي اتفيد اللاجئ او المهاجر اذا عندة اطفال ..


الله يصبرك اخوية العزيز  والله كلش ضل بالي من قريت مقالك وضليت ساكت ولا كدرت اجاوب الى ان سألت علية .

اخوك

ريفولفر

[echo 9]

حبيبي ريفولفر ( حبيتك بالله ولله )
اخوية العزيز اولا نورت المنتدى وثانيا انت والله ما الك اي دخل بموضوع عصبيتي الليلة وانفعالي وثانيا انت ما اخطات بشي من نصحتني بالتقديم وسهلت لي هواية امور ربي يسهل امورك . بس تعرف انا من موضوع البنت المتزوجة الحصل معاي اليوم الصبح رحت للمحكمة قلت بلكي اغير التاريخ اصولي خاطر تبين الشغلة انه زواجها او بالاحرى توقيع العقد مال الزواج لان ليهسه ما متزوجين فعلي ان شاء الله زواجهم الاسبوع القادم قلت بلكي اقدر اغير شي
واذا بقوانين البلد كلها يطبقوها براس ولا كانه فلاح السوداني طلع بكفالة 50 مليون وهسه مدري وين صار يمكن بامريكا عن طريق ال اي او ام .
لو تشوف شصار بحالي
قررت ارجع للبيت واكتب حقيقة ما جرى لل اي او ام والاس اي في وفعلا كتبت الهم بكل شي واللي يصير يصير
انا الله ممكني اطلع باي وقت اريده لامريكا ولغيرها بس اليكسر ظهري عائلتي ما اكدر اعوفهم ورا ظهري فقلت اقدم على الاي او ام والاس اي في مادام الشروط مالتهم تنطبق على حالتي اشو النوب طلعت ام احين
بس على فكرة اخوك ابو اندرو ما قصر وياي هو وبقية الاخوان والاخ انجي ويارا استلموني استلام ذمة لحد ما خلوني اتجمد مو بس تبرد اعصبي وهسه انا راجع وياكم وحالي من حالكم ونصبر سوية لو نعبر سوية لو ماكو ماكو
وهي الحياة معركة واحنا ولله الحمد قضيناها معارك وما نظل بالعمر شي يسوى

[Revolver]

تاج راسي echo,

الله ينور عليك ان شاء الله وعلى عائلتك ياربي يحفظكم و يحميكم, صدكني الشغلة مالتك على الـ IOM راح اتكون سلسة ان شاء الله ومابيهة اي صعوبات, صدكني حتى متعرف اذا اطول اكثر من الـ SIV او لا, كلمن وحظة ولتنسى الموافقة الامنية الهة دور جبير بهل العملية, فياعيوني لدير بال ولتشيل هم وابقى اتواصل وية الـ IOM لأن الحمدلله ديمشون زين وديجاوبون كل الايميلات الي ديستلموهة, اخوية العزيز اريدك اليوم راسك بارد وتقرة ايات قبل النوم وتنام براحة . والله يريح بالك طول العُمر,  صدكني ماكو شي يدعي للقلق, لأن سالفتك عادية كلش بلنسبة للـ IOM مُجرد تحديث للـ Case مالتك . وراح يمشون بي .

وبلنسبة للأخوة الاعزاء ابو اندرو والاخت انجي ويارااا وكل الاخوة الي ديساعدونة, فبارك الله بيهم وهذا الي همة معودينة عليه, حُب المُساعدة .

ريفولفر

[Abo Rami]

اخي العزيز انت ليش مستغرب هذا الشي قابل انت الماني لو عراقي اذا الماني بحث اخر واذا عراقي فما جبت شي جديد ياهو الي علينه ابن بلد لو غريب ياخذ حصة بينه  هذا اولا ثانيا احنا كلنا حالنه من حالك اني مثلا صار اكثر من سنة واربعة اشهر على SIVوهم هسه راح تلحكه كم شهر لاني باقي الان بس على المقابلة والفحص الطبي يعني زايد ناقص فد 3 اشهر عدل وكبل والكه نفسي في بلاد العم سام بعد ما جيب اوراق وودي اوراق واني فعلا كانت في تجارب بعض الاخوة في المنتدى الكرام خير سلوى الي بالصبر لانه على مايكول المثل العراقي واخواني كلكم تعرفوه (الي يشوف بلوة غيره تهون عليه بلوته ) واحنا العراقيين كلنه هموم وبلاوي --- وياعراق الى الوراء در
اخوكم ابو رامي

[ام فائز]

اخونا العزيز
تره العراقيين يعلمون الناس شلون يصبرون فاني دا استغرب انو انت بعد ما بديت راح وخلص صبرك كول يا الله وتره احنا كلنا صابرين  يعني اتصور الي صابرين على الموافقه الامنيه بس صارلهم اكثر من سنه هذوله شيكولون وطبعا هما اكلوها اكله امصخمه من ورا يوم مقابله توطين ويوم مقابله محلفين ويوم اعاده محلفين ويوم نتيجه ويوم فحص وبعدين هم اعاده محلفين وويا كل خطوه الواحد حيله ينهد
كول يا الله وتوكل عليه هو وحده الي يقرر مصيرنا تره لا محلفين ولا حكومه عراقيه ولا امريكيه

[echo 9]

شكرا حبيبي ريفولفر
شكرا اخي ابو رامي
شكرا للاخت ام فائز
شكرا للجميع
التوتر الصار عندي امس والانفعال الظاهر الكل مارين بهيج حالة ببداية تقديمهم للهجرة وعلى هذا الاساس نصائحكم لي كانت بمحلها بالصبر وانه اخللي اعصابي بثلاجة اذا اريد استمر
انا اخذت بنصائحكم وهسه الاعصاب كلها كومتها بالمجمدة مو بالثلاجة
جزاكم الله خيرا عني وعن كل الاخوان اللي دا يمشون عمياوي مثل حضرتي وبارك الله بيكم وبجهودكم
بس انا عندي مقترح صغيرون يا ريت تتبناه ادارة المنتدى وهذا الشي لمسته من خلالكم
الاقتراح يكول
تشكيل جمعية انسانية بامريكا للاستشارت والمساعدات يكون كل كادرها وادارتها من العراقيين الاعضاء والمشاركين بمنتدى عنكاوا وخصوصا الذين غادروا العراق لامريكا بعد 2003 ياريت
لان الموضوع مال الهجرة بيه كفالات وامور اخرى لا اعرفها مثل ما صار مع اخونا انيس عندما غدر به كفيله الامريكي وتدخل الاخ ابو عبدالله التكساسي وعرض عليه انه هو اللي يكفله ويكفل شكو واحد رايد كفالة من عدنا
يا ريت الموضوع يدرس من جنابكم
اخوكم
Echo 9

[y.a.r.a]

الاخ العزيز echo 9
ان شاء الله اليوم ايكون وضعك احسن من البارحه
احنا هنا بالعراق وضعنا والحمد لله هوايه احسن من الاخوان في بلد الجوار على الاقل بس اندز ايميلات واحنا كاعدين ببيوتنا وشغلنا ماشي حسب الاصول وكلها مقابلتين انروح الحمد لله معززين مكرمين بس شويه تفتيش مزعج وهاي هيه وتخلص
بس انضل نصفن هوايه وانفكر هوايه ونصبر كلشششششش هوايه وبس ونحمد الله ونشكره من انشوف هموم غيرنا
وبعدين شغلة بنتك المتزوجه مو فد مشكله حتى لو العقد تاريخه قبل التقديم لان همه يبدون ايسجلولك من اتروح اول مقابله راح ايسوولك سجل كامل وبالتواريخ ومراح تتعرض لمسائله وميحتاج لا اتغير تاريخ ولا تتلاعب بالعقد خلي الامور طبيعيه
وراح اتابع ويه الاخوان بالمنتدى اي شي ايصير وياك وتلكي منهم كل مساعده
وان شاء الله بالايام الجايه راح نسمع منك ناطيك رقم او وراها محدديلك مقابله
والله ايسهل امرك واتصير سوالف
اختك يارا