مقابلة المحلفين في IOM وتفاصيلها ...

[المهندس حمودي]

اخواني الاعزاء

انا في انتضار مقابلة المحلفين عن قريب انشاء الله . فاذا ممكن اصحاب الخبرة يعني بس كم سوال ..

1. شنو تفاصيل المقابلة ؟؟ يعني شنو نوع الاسئلة صدك صعبة مثل ما يكولون ؟؟ او هيه شي اعتيادي ؟؟
2. شنو يطلبون مني من مستمسكات مثلا الاصلية والاستنساخ وياها ؟؟
3. قل ولا تقل ؟؟ (ولو سوال غريب ) . بس يعني شنو المفروض ما اكولة وشنو المفروض الي والواحد يحجية؟
4. قصتي وسالفتي ؟؟ اسولفها بالمختصر ؟؟ لو هم اعيدها من جديد عليهم ؟؟
5. يعني بعد شنو شغلات ما اعرفها ؟ الي مار بهذه الامور ويعرف بيها . خلي يفيدنا بيها ..

تحياتي للجميع

اخوكم
المهندس حمودي

[drlexa]

مرحبه اخويه....
اني ولو قابلت محلفين من زمان بس رح احاول انطيك المعلومات العندي واتمنى ان تساعدك.
بلنسبه للاسئله فاني مقابلتي ما كانت شي صعب...يسالوك اسئله عن قصتك بس اهم شي تكون حافظ التواريخ زين والاحداث وميصير اختلاف بلقصه عن المقابلات السابقه.
بلنسبه للمستمسكات فاخذ وياك كلشي موجود...ماتصور يريدون منك نسخ...اذا رادو يحتفظون بشي فهمه يستنسخوه عدهم جهاز استنساخ.
جاوب على كد السؤال لانه يضوجون اذا واحد يحجي زايد
بلنسبه للقصه ما اتصور لازم تحجيهه من جديد لانه المقابله حتكون عباره عن اسئله همه يسالوهه مو مثل المقابلات الي قبلهه تعال وسولفلي من طقطق لسلام عليكم
واكو موضوع كلش حلو ومرتب الاخ عكعك مشكور كاتبه اقراه كلش رح يفيدك.
هذا الرابط مالتهhttp://www.ankawa.com/forum/index.php/topic,294296.0.html
بلتوفيق
اختكم من عمــّــان drlexa

[سامسونغ]

أخي خليك طبيعي وعندك ثقه بنفسك لأن يسألون باللي انت كايله بالمقابله السابقه وعن حياتك العسكريه وعلاقتك بالنظام السابق ودرجتك الحزبيه وجميع مستمسكاتك والوثائق اللي سبق وان اعطيتهه في ملفك وهناك اسئله استفزازيه لمعرفة ثقتك بنفسك  والرد باقل الكلام لأن ماقل دل لأن كلما تكثر بالكلام تفتح على نفسك أبواب أنت في غنى عنها وبعد ماياخذون المعلومات العامه من عمر وسكن وسبب خروجك وعدم عودتك للعراق يطلعون العائله ويسئلونك عن تفاصيل القصه مالتك  والتواريخ حاول تكولهه تقريبا  حتى لايكولون انك دارخهه وخليك طبيعي لأن أكثر من مره يحاولون أستفزازك وتغليطك بالمعلومات حتى يعرفون انك متأكد من معلوماتك وبعدين يستدعون الزوجه ومعرفة معلوماتها واذا كانت هناك تضارب بين اقوالكم فخليها طبيعيه ولا تزيد وتنقص على اللي كلتوه سابقا لأن همه يعتمدون على المكتوب عدهم والتسهيل من رب العالمين وبالتوفيق .

[ام عبداللة العراقية]

اخويه المحترم
اولا الله ان شاءالله يسهللكم المقابله ويسهللكم السفر
ثانين اخويه خليك جدا اعتيادي واهم شي لا تكون مرتبك لانه مثل ما تعرف المستشاره الي تقابلك
هي دكتوره نفسانيه فيعني تنتبه على الشخص وتعرفه ان كان مرتبك او لا
بلنسبه للاطاله مو مشكله يعني ما يهتمون بس لازم الاطاله تكون بخصوص القصه مالتك وقوللهم اي شي جدد بقضيتك
وبلنسبه للمستمسكات اخذ كل شي عندك وكما اخذ وياك ادله اذا انت عندك ادله وكنت مراويه بلمقابلات المضت
واذا كان عندك جواز قديم ومو موجوده النسخه الاصليه وكان عندك مستنسخ اخذه وياك
وبلنسبه لا جاوب لا للي بس انت تحسه ياثر على قضيتك ويعطل السفر
واهم شي التواريخ ضروري ضروري تحفظهم (مثل ما تحفظ اسمك) لانه شكلهم يموتون على التواريخ
وبعدين اخويه صدق انو المقابله جدا سهله ولا صدق بلي يقلك صعبه
احنه هم قالولنه صعبه والمستشاره الي تقابل تعرف الانسان ان كان صادق او لا من عيونه
وكل هذا الكلام مو صح لانه احنه قابلنه مرتين مره اني وزوجي ومره اني وزوجي وابني
والله ان شاءالله يسهلك كل شي ونسمع عنك كل الاخبار المفرحه