معلومات عن مدينة بورت لاند رجاء رجاء

[تايكر]

السلام عليكم/
تحياتي لكل عضو في المنتدى احب اعلامكم بانه تم الاتصال بي قبل قليل وابلغوني بموعد سفري يوم 7/12 الى بورتلاند،
ارجو من الاخوان التفاصيل والمعلومات التي يحتاجها الاجئ وخاصة الموجودون في امركا ،ارجو قبول شكري وتقديري لكل الاخوان وانا منتظر ردودكم الغالية.
تايكرـ بابل ..

[osama5477]

اخوية العزيز ،

اذا كان قصدك مدينة بورتلاند في ولاية اوريكان ، فهية نفس المدينة الي محدديه الي ، ومدينة جميلة ، والمطر بيه 20 يوم بالشهر ، الجو بصورة عامة بارد وصيفه معقول مو حار ، اني عندي اقاربي اهناك ، العمل موجود لكن قليل جداً ويحتاج معارف ياله ، الايجارات تتراوح بين 550-650 شقة غرفة وحدة وحمام ومطبخ وغرفة جلوس ، و 700-850 غرفتين نوم وحمامين ومعيشة ومطبخ ، بالمناسبة مدينة بورتلاند تعتبر ثالث افضل مدينة بأمريكا من ناحية نسبة الجريمة بيها يعني مدينة ممتازة ، وان شاء الله توصل بالسلامة واذا اني وصلت قبلك ان شاء الله نتشاوف ، اني حالياً بأنتضار الموافقة الامنية من عمان

[Revolver]

اخويةالعزيز ,

هاية معلومات عامة لكيتلكياها من ردود الاخوة الاعزاء


بواسطة: الك وحشة

وكي اني راح انطيك تفاصيل الولايه .الولايه طبعا احلى ولايه بامريكا هذا كلام الكل مو كلامي وكلام الامريكان ولايه جميله بمناظرها الخلابه وهيه تقع عل المحيط الهادي يعني يمك حبيبي البحر وبيها نهر
وبيها عراقين قليل .

بواسطة: الوحيد الغريب

مدينة بورتلاند تحتوي على نهرين يلتقيان في وسطها
الجو كلش حلو
تقريبا مثل جو بيروت
الثلوج تنزل لمدة شهر واحد فقط في الشتاء
رخيصة
لايوجد بها ضرائب
او اهم شي نسبة البيض 83%
نسبة السود1.6%
نسبة العرب1%
نسبة الاسيوين 3%

بواسطة: الذكي

هي ولاية كلش حلوة احلة من كل الولايات واامن من كل الولايات ومابيها ضريبة بي العيب الوحيد البيها انه هي تقريبا افقر من بقية الولايات وشغلها تعبان هذا اللي شفتة اني صارلي 8 اشهر هنانة وشوف تكدر تستفسر اكثر من اخونا زاك يمكن يكدر ينطيك معلومات اكثر عن الموضوع بس هي شي علة شي ولاية حلوة وامينة ها وخليها بالك ولايتنا يومية مطر تزغ من الصبخ لليل وتستمر لمدة اسبوع عشر ايام متواصلة فاذا انت متحب المطر راح تصير عندك كابةهةةةةة

بواسطة: الك وحشة

والله الي الشغل انته اذا ناوي تشتغل ومخلي الشغل بالك راح تعمل وثق باقل وقت بس الي يكلك ماكو شغل هذا اكيد اربعه وعشرين ساعه نايم ومامفكر بالشغل هذا اكيد ماسال
وانته اذا لغتك انشاء الله زينه انشاء الله باسبوع تشتغل وحتى المنظمات الي مسئوله على الاجئين يريدون يشغلون ناس ..

ريفولفر

[ابو محمود]

ابني تايكر

السلام عليكم ..
اذا جنت تقصد بورتلاند-اوريكن ... فأخوانك قد اجابوا مشكورين عنها ... اما اذا كنت تقصد بورتلاد-ميين, فهي اكبر مدينة في ولاية ميين وهذا الرابط قد يساعدك ببعض المعلومات :
http://en.wikipedia.org/wiki/Portland,_Maine

عمك ابو محمود

[تايكر]

السلام عليكم/
شكري واحترامي لكل الاخوة الذين قاموا بالرد، لكني احب ان اوضح بانه تم الاتصال بي وحدوا يوم 7/12 وقالت الموظفة بان المدينة هي بروتلاند ،اسف لازعاجكم ورجائي بطلب معلومات اكثر تفصيلية وخاصة من الاخوان الذين هم الان في امريكا ** مع التقدير لكل.
تـايكـر ـ بـابـل .