مقترح ( حظر مشاركة )

[echo 9]

انا اخواني تعذروني لان جديد على هاي المواضيع مال المنتديات ولولا حبي واحترامي للاخوان ريفولفر وابو عبدالله التكساسي وابو انرو  وماجلان وشو والاخوات يارا وانجي والبقية الصالحة المحبة لنفع الناس ودفع الضرر عنهم ما كان ادخل اصلا للمنتدى وايضا لفائدتي الشخصية ( خاطر اندل دربي )
عندي مقترح للادارة والمشرفين
اكو امكانية لحجب الردود الجارحة للاخرين او مثل رد ابو الطناجر اللي يصنف على الناس الخيرين واللي هدفهم مساعدة واسعاد الاخرين لو ماكو لو هاي تتعارض ويا حرية الراي والراي الاخر ما اعرف ؟؟؟؟
اذا الامكانية هاي موجودة خللي نسوي اجتثاث لهاي الناس اللي جاي تخرب علينا
Echo 9

[بغداد بقلبي]

السلام عليكم اخي بالنسبه للموضوع الذي طرحته ,طبعا بالمنتدى اخوان مشرفين قديرين واكو قوانين للمنتدى, والمنتدى طبعا يتميز بحريه التعبير وسماع الراي الاخر والنصيحه, وبالنسبه للافعال والكلام الغير مقبول فطبعا واكيد انه الاناء ينضح بما فيه ,,واحنا انشار ك بالمنتدى علمود الناس الي مثل ما اتفضلت ايريدون يندلون دربهم وليس لغرض الاجتثاث وغيره وارجوا منك تقبل مروري

[echo 9]

شكرا لمرورك اخوية بغداد بقلبي
رايك على عيني وراسي من فوك وانا اسف لاستعمالي كلمة اجتثاث لانها وبصراحة كلمة تعبانه شوية بس بصراحة انغثيت من رد الاخ الجارح والمستهزئ بفكرة اخونا ريفو اللي كان قصده خدمة الاخرين لا اكثر ولا اقل
انا اسف مرة اخرى واعتذر واسحب كل كلامي . وفعلا من الحرية الراي وتقبل الراي الاخر بس بحدود ادب الطرح
اخوك
Echo

[ابو عبد الله التكساسي]

والله عمي اني حبيتك لله بالله لان انت مثلي تحجي جلفي بغدادي كرخاوي كطع النفس
حياك الله وكل اهل بغداد
وانشاءالله كلنا اخوه واصحاب

اخوك ابو عبد الله التكساسي