جماعة IOM بغداد --- رايكم بهذا الايميل

[المهندس سيوفي]

السلام عليكم

طبعا مثل مايعرف بعض الاعضاء انه قضيتي وية الجماعة نامت عليها طابوكة بالضبط لان اني مقدم اوراقي ووياية عائلتي بتاريخ 5/9/2008 اي صارلي سنة وشهرين من قدمت ولحد الان كلشي ماكو لامقابلة ولاشي
اني ظليت مستمر وياهم الجماعة وماقصرت وكل يوم همة بحجة وسالفة جديدة ومغذي جديد --- بس بالفترة الاخيرة او بالشهرين الاخيرة تحديدا ظلوا يتحججون بسالفة انه احنا الان دنتحقق من سالفة الوظيفة مالتك وكلما اراسلهم يكولولي هاي السالفة --- البارحة دزيتلهم ايميل وكتلهم شنو الفلم يمعودين؟  جاوبوني اليوم وكان الجواب كالتالي :

Dear Sir/ Ma'am,

Thank you for your email.
                                     
We have checked your case, and it’s in progress.

Please be informed that your employment documents have been verified.

Please expect to be contacted in the future once you are scheduled for an interview.

We appreciate your patience.

Kind regards

Baghdad Info Center

شنو رايكم بهذا الايميل اللي يكولن بيه انه احنا تحققنا من سالفة وظيفتك وخلصت ان شاء الله ---- اني بصراحة اعتبرها مغذي من نوع بسيط لان لحد الان هم ماكو اي موعد مقابلة !!! سؤالي هو هل اجاكم هيج نوع من الايميلات قبل موعد مقابلة او شي؟ يعني هل اكدر اتوقع انه مقابلتي عن قريب جدا لان روحي بزعت؟

وممنون من ردودكم مقدما ----- ها بالمناسبة ترة اني عندي IZ نمبر ولكل فرد من عائلتي هم من شهر السادس الفات وهم كلشي ماكو

تحياتي
المهندس

[Revolver]

أخي العزيز,

ولو اني كلشي ماعرف عن الـ IOM بس حبيت اوضحلك شغلة بلأيميل وماعرف يجوز منتبه عليها انت او لا . وهية :

Please expect to be contacted in the future once you are scheduled for an interview

يكلك اتوقع بلمستقبل راح نتصل بيك علمود المقابلة, يعني ايميل الخ يجوز ينطوك موعد مٌقابلة .


ريفولفر

[show]

صديقي العزيز
هذا نفس الايميل الذي استلمته قبل المقابله ب 4 اشهر  تقريبا
نعم انت تجاوزت مرحله التاكد من الوضيفه و الان انت على جدول المقابلات

بالتوفيق للجميع

[AbU.SaRa]

 صديقي العزيز أنشاء لله الأيميل الثاني تحديد موعد مقابلة بس أصبر وخليها على الله وأنشاء الله تفرج عن قريب لا تستعجل....

[المهندس سيوفي]

اشكر كل اللي ردوا عليه
وبالاخص اخوية Show انلطمت على حلكي من صدك ---- يعني بيها 5 اشهر لخ  يبوووووووو يالله --- ولو هي يم ربك واشكرك على ردك وهاي الحقيقة بالفعل وكلشي اتوقع منهم الجماعة


تحياتي
المهندس

[Abo Andrew]

اي هذا خوش خبر المفروض تفرح

انشاء الله خير

[vincenzo]

اخوية سيوفي
يمكن اني طارحلك موضوع الاس اي في سابقا
ويمكن هسه تكول وية نفسك شكد يلح عبالك يحسبولة كوميشن لكل واحد يقدم
بس صدكني هي الحل الامثل للي ما مستعد ينتضر سنة وسنتين
وهاي للعلم اني راح يصيرلي خمس اشهر وحتى الكوم ابروفال ما مستلمه
بس حالتي مو قياس لان الظاهر مكيسة لسبب ما
بينما بالاي او ام صار 8 اشهر وبس BGD
وكدامك اخوية SHOWورى ما طلعت روحة من الاي او ام قدم اس اي في وراح يخلص ما بقالة شي
وانته بكيفك بعد
اما اذا ما مشمول فانكول ان شاء الله متصير حالتك مثل حالته وتخلص بسرعة
اهم نصيحة انه متفكر بيهه وتنساهه ومتحس اللا مكمل المقابلتين

[show]

صديقي المهندس
ساعتين ابحث عن موضوعي القديم(شبيه موضوعك هذا )
هسه يله حصلته حتى اتاكد من تاريخ استلام الايميل والوقت الذي استغرقه موعد المقابله الاولى
الاميل كان بتاريخ 20\4\2009
و المقابله كانت بتاريخ 11\8\2009
يعني بالضبط 3اشهر و 21 يوم  مو 5 اشهر مثل مذكرتلك سابقا
راح اعدل التعليق الاول حتى اكون دقيق
وهذا رابط موضوعي القديم
 
http://www.ankawa.com/forum/index.php/topic,291672.msg3801077.html#msg3801077
بالتوفيق للجميع

[alawi the tiger]

السلام عليكم

ابشر بالخير اخوية المهندس ترة اني نفس الحالة بالضبط ورة ما صار عندي احباط ويأس من الانتظار في يوم 15/9/2009 بالتحديد اجاني نفس هذا الايميل ويوم 24/9/2009 اجا ايميل المقابلة الاولى ويوم 10/10/2009 قابلت والله كريم ويارب تفرج على الجميع


اخوك علي

[المهندس حمودي]

مسالة جدا طبيعية اخوية المهندس سيوفي

وانت هسه زين يعني ماشية امورك ( بلا حسد يعني )

وانشاء الله المقابلة الاولى والثانية وتخلص وربي يوفقك انشاء الله . وانشوفك هناك بامريكا

تحياتي

اخوك

المهندس حمودي