الامم المتحدة في لبنان شلونها ويا العراقيين ؟

[ابو الحسن]

عمي الله يساعدهم حبيابي
شلونكم ان شاء الله بخير
عمي اكتب الكم اليوم واريد المشورة
عندي اخت ام الحسن وابنها مجبروين لازم يتركون العراق
وخابروني وكالو شلون الامم مال ماليزيا فقلت لهم
لا والف ومليون لا
وكلت لاتدوخون راح اسال خبرائنا هنا بالمنتدى حبايبي ما يقصرون
الامم المتحدة بلبنان شلونها ويا العراقيين
اكو عراقيين ما مشتغلين ويا الامريكان وطلعوا توطين ؟
تطول شغلتهم؟
هم مثل ماليزيا درب الصد ما رد؟
والله العائلة حايرة واني كتلهم راح اجيب الكم الخير اليقين
يلة عمي دوختكم بس وين اروح بس الله وانتو عندي حبايبي
الف شكر مقدما
ابو الحسن - ماليزيا

[ابو عبد الله التكساسي]

اخي ابو الحسن
السلام عليكم مشتاقين والف هلا بيك وانشاءالله يجيك الرد اليقين
حبييب
اكو هوايه ناس طلعوا توطين بلايا ميشتغلون ويا الامريكان بمصر وسوريا والاردن وما اعرف شي عن لبنان
وان شاءالله الي يعرف ايكلنه

[ابو خالد]

هلا عمي ابو الحسن بالنسبه للقبول مو شرط انه يكون يعمل مع الامريكان انا واحد من الناس لم اعمل مع الامريكان والف الحمدلله حصلت الموافقه ولكن حسب معلوماتي ان لبنان جيده من ناحية التقديم واسرع لكن البلد غالي يعني سوريا والاردن ارخص والله يسهل امرهم انشالله

[عكعك التطوى]

عمي ابو الحسن الغالي عمي انشاءالله الاخ باسل بلالوا والاخ ابو فهد السباح يفيدوك بالمعلومات

تحياتي وتمنياتي لكم بالتوفيق

[angie-dawood]

اهلا ومليون سهلا بعمنا الغالي ابو الحسن ربي يطول بعمرك ويخليك لعائلتك
عمي ابو الحسن ابن خالي كان بلبنان من تاريخ التقديم لي يوم سافر الى جورجيا المدة كانت سنة واربع اشهر وهو لا مشتغل وي الامريكان ولا شي بس كان عنده اخوه مخطوف ومقتول هاي كانت قصتة وانشالءللة اقربائك ما يطولون هل مدة اذا راحو لبنان وربي يوفقهم ويوفقك ويارب يوم نسمع موعد سفرك الف هلا بيك عمي ابو الحسن

[ابو الحسن]

عمي الف شكر حبايبي والله يطولي عمرك
بلكي حبايبنا بلبنان يدخلون ويردون عليا
والف شكر مرة اخرى للكل
وربي يبارك بهاي اللمة
ابو الحسن - ماليزيا

[vincenzo]

ما اعرف شي عن لبنان غير من اعضاء المنتدى Sassy اللي هسه بولاية واشنطن وكم عضو اختفوا بعد ما سافروا لامريكا
بس رأي ماجلان جدا مضبوط احسن واسرع شي من ناحية الامم المتحدة هو تركيا

واهم شي حبيت اسلم عليك واسأل عالغيبة الطويلة واخر التطورات

[الفهد السباح]

عمي ابو الحسن السلام عليكم

عمي بالنسبة لليو ان بلبنان هي زينه وخوش ناس ومتعاونين


واكو هواية ناس طلعو من لبنان من غير الي يشتغلون ويه الامريكان


والشغلة حسب القصة والاثباتات  وانت سيد العارفين


وتطول الشغله من سنة الى سنة ونص


بالنسبة الي اني دخلت بيروت شهر الرابع وهسه بانتضار تلفون من السيد المحلف

وتحياتي الك ياغالي


 واي سوال اني حاضر وخادم للطيبين

[Anwar Al-ardiny]

السلام عليكم
اني بتركيا هسة
و صارلي سنة و شهرين و اجاني رفض
هسة تركيا مو مثل قبل
يعني صحيح اللي جايين قبلي ما طولوا  6 اشهر و سافروا و اكو جماعة 4 اشهر و سافروا ، بس هسة لا  ، الشغلة دا تطول .
و اكو حالات ما دا ينطوهم ورقة اللجوء من اليو ان ، بس ورقة حماية و هاي شغلتها تطول اكثر ...
اضافة الى غلاء الايجارات و اللغة و الغرامات كل 6 اشهر و البرد القارس و تكاليف التدفئة اللي تكسر الظهر.
اني رأي لا تجي لتركيا و بعد بكيفكم و ان شاء الله الاخوان الموجودين بتركيا هم ينطون رأيهم بالموضوع .
و بالتوفيق مقدما ان شاء الله .

اخوكم
انور الارادني

[محبكم]

السلام عليكم
------------------
عمي ابو الحسن اشونك واشون صحتك انشاء الله تكون باتم الصحة والعافية ( مشتاقلك والله)

اسمحلي ان اقدم بعض المعلومات التي اتمنى ان تكون مفيدة ولو بجزء يسير

انا اتف مع اخوتي الذين سبقوني فيما قالوه واتفق مع اخي الفهد بما اخبرنا من معلومات

ولكن اذا تسمحولي بصورة عامة عدد اللائجين في لبنان هو اقل بكثير مما هو عليه في باقي دول الجوار كمصر و سوريا والاردن لذلك بصورة عامة فان دراسة الملف ستكون اسرع ونسبة الافضلية في التعاون والاحترام التي تقدمها اليو ان للاجئ في لبنان هي اكثر بكثير من باقي دول الجوار وايضا طريقة التعامل من قبل المفوضية العامة للاجئين مع اللاجئ العراقي هي اكثر ليونة وسهولة وفي لبنان نسبة الحصول على المساعدات هي نسبة جيدة بالنسبة لبقية الدول ففي لبنان تستطيع الحصول على مساعدات مدرسية من الكاريتاس والعلاج المجاني للاجئين اضافة الى مختلف انواع المساعدات الاخرى حسب الحاجة لكل شخ لاجئ وبطريقة ارقى وافضل من باقي دول الجوار

وطبعا ( هذا بالنسبة لطريقة التعامل وبعض الامور الحايتية في هذا البلد) كلنا متفقون بان قوة القصة وامتلاك الدلائل والبراهين بصورة اكبر هو يساعد على الاسراع في القضية
بصور عامة لبنان سريع في انجاز المعاملات ولحد اليوم هناك من هم يقبلون ويقابلون المحلفين في السفارة ومن هم يسافرون منهم من انتظر فترة طويلة لتمت الموافقة عليه ومنهم من انتظر السفر بعد انتظاره للموافقة الامنية مثلا ومنهم من سافر مباشرة ولذلك لا توجد هناك نسبة قياس لسرعو انجاز المعاملات ولكنها وبصورة عامة افضل من دول الجوار

اما بالنسبة الى الحياة اليومية في لبنان فانها وبصراحة حياة جميلة جدا ولكنها صعبة لان لبنان بلد جميل جدا ولكنه بلد سياحي من ناحية اخرى وغالي من ناحية المصاريف اليومية خاصصة ويانة احنة العراقيين منبقي شي بنفسنة اذا ردنا ناخذة لذلك يجب الاحتياط من هذا الامر ولكن بنفس الوقت هناك من يستطيع التاقلم والاقتصاد في المصرف بصورةكبيرة ولكن بشرط محاربة النفس والصبر

طبعا بالنسبة الى الدخول فلا قوانين جديدة واعتقد بانك يا عمي العزيز احد اعلام هذا المنتدى وتستطيع بكل سهولة ان تفتش في الارشيف الغزير بالمعلومات عن هذا الامر

عمي الحبيب اتمنى ان استطعت ان اقدم ولو الشئ اليسير للمساعدة واتمنى ان لا تتردد في طرح اي سؤال يخطر ببالك وانشاء الله لن اتاخر في الرد

اعتذر عن الاطالة

[volca]

اخوان الاعزاء
حجيكم على تركيا صحيح بس هذه جان قبل مو هسه
اني عندي اصدقائي صارلهم سنه و شهرين وبعدهم ممقابلين المحلفين لان تركيه هم صايره تعبانه
بس حبيت اوضحلكم هذه الشي لان الصراحه تركيا مو مال لاجئين لان العيشه صعبه و غاليه هناك

تحياتي

[ابو الحسن]

عمي السلام عليكم حبايبي
الف الف الف شكر ووفيتو وكفيتوا
والله يطول لي عمرك ويفتحها عليكم ويسهل عليكم ويجفيكم شر بني ادم
ابو الحسن - ماليزيا

[زيد]

مرحبا اخوية انور الارادني شلونك اني زيد ومن تركيا ودأسأل عنك شنو سبب الرفض جتك رسالة تأخير او لا اني صارلي سنة و3 اشهر جتني رسالة تأخير من شهر السابع ولي حد الان ما اعرف شنو ردهم والي اجوي ويانا وقبلنا طلعو دمرونا ما خلونا اعصاب بينا كلي هسة رفضوك شسويت وين راح تروح عند مصاريف بعد تبقى هنا ما يتامنون هذولة الامريكان ما عدهم رحمة بقلبهم بس نخليها على الله ونشوف الرد

[ابو الحسن]

عمي الفهد ولا يهونون الجماعة كلكم طيبين وعلى راسي
عمي هاي هي جماعتنا راح يتوكولون على الله ويروحون للبنان
وعندي يم الله ويمكم مجموعة اسئلة ولو طوختها :
1- الجماعة بالعراق ؟شلون الفيزة ؟
2- شلون السفر ؟طيران مباشر؟
3- السكن شلون لشاب عمره 24 سنة وواالدته عمرها 65 سنة ؟
4- المعيشة شلون غالية ؟اكل وشرب وكهرباء وماي ونت ؟
5- طبعا ما راح تكون عندهم اقامة بس ورقة الامم فهاي الورقة تاكل ويا الشرطة اللبنانية اذا اجد وكفهم باالشارع لو مفرزة مثلا ؟لو ماكو مفارز يمكم ؟
6- ملخص لاخر اخبار الحياة هم جماعتنا يستفادون بي وهم يبقى مصدر لحبايبنا هنا بالمنتدى
خير الناس من نفع الناس واالف رحمة على والديكم عمي على صبركم على سوالفي
ابو الحسن - ماليزيا

[محبكم]

السلام عليكم
-------------------
العم الطيب ابو الحسن اشونك انشالله بخير
اسمحلي ان اجيب عن اسئلتك ( بحدود المعلومات اللي امتلكها )

- الجماعة بالعراق ؟شلون الفيزة ؟ يمكن التقديم على الفيزا عن طريق السفارة اللبنانية في بغداد في باب المعظم قرب الجسر الحديد ( شنو الفيزة اللي دينطوهة هسة ما اعرف بس اللي اعرفة اغلبهة سياحية ) وبصراحة اني لا انصح باخذ الفيزة من السفارة لان هي نفس الشروط نفس الشروط

لذلك رح اشرح بصورة مبسطة عن الطريقة الافضل للسفر
طبعا من الممكن الذهاب لاي مكتب سياحة في بغداد او اي مكان اخر والطلب منه سفرة سياحية حرة الى لبنان ( من غير اجروب ) فالمكتب بهالحالة سوف يحجز على خطوط طيران الى بيروت وايضا يحجزلكم بفندق لمدة من 7 ايام الى 10 مدفوع منها ليلة واحدة او ليلتان وبعدها السفر بصورة طبيعية من المطار الى مطار رفيق الحريري في بيروت وهناك لازم كل شخص منهم شايل ويا 2000$ والدخول هو بحجة السياحة ( خلي ياخذون فيزا ام الشهر وليس ام ال 15 يوم لاجل التجديد فيها لشهرين ثم شهرين اخرين ) طبعا لان همة شاب ووالدته فانشاء الله الفيزا استحصالها من المطار هو اسهل لانهم عائلة مو بس شاب زكرتي ( لان اشوية يتخوفون من الشباب )
وطبعا بس يطلعون ياخذون تكسي للفندق اللي بي مكان الحجز وطبعا بصورة عامة هذه الفنادق هي غالية نوعا ما توصلبيهة الليلة الواحدة الى100$ او اقل هسة لان الموسم السياحي انتهى تقريبا
ولذلك خلي مباشرة ياجرون شقة مفروشة لمدة شهر حتة تستقر امورهم وهاي الشقق موجودة بمنطقة الحمرا وهي منطقة سياحية ولكن تكثر بيهة الشقق المفروشة لان بعدهم ميندلون وهي بنفس الوقت قريبو من الامم وهم بعد اسعار الايجارات حاليا من 400$ الى 700$ ممكن تتحصل ( طبعا هاي فترة انتقالية بس ليضيعون وقت بالفندق اللي اجوي بي اول ليلة لان كتلك اجار الغرف بي غالي شوية
بعدين ممكن بهالشهر يتعرفون على المناطق وممكن ان يروحون للامم وهم يسجلون وممكن ايدورون على شقق ارخص تصل فيها السعر الى 150 - 200 $ ولكن نادرا ما تلكي غير مفروش ( طبعا اني دا اتكلم حاليا ابصورة عامة وانشالله منقصر بس يكملون اول مرحلة ويجون ) .


2- شلون السفر ؟طيران مباشر؟نعم الطيران المباشر هو الطريقة الافضل والوحيدة تقريبا

3- السكن شلون لشاب عمره 24 سنة وواالدته عمرها 65 سنة ؟ اعتقد شرحت اشوية فوك

4- المعيشة شلون غالية ؟اكل وشرب وكهرباء وماي ونت ؟ بالنسبة للمعيشة فخلي يكون بالعلم ان العملة اللبنانية هي الليرة وسعرها مقابل الدولار هي 1500 يعني تقريبا نفس العراق بالنسبة للاكل والشرب اذا رح ايصير بالبيت فلا تتوقع زيادة كبيرة عن العراق لان العراق بالفترة الحالية هم غالي بس هي الزيادة موجودة وممكن تكون ال 200 - 350 $ بالشهر اكثر من كافية واصلا زايدة عليهم بس بشرط الاقتصاد ومو الاكل كلة من برة لا لازم تطبخ الحجية بالبيت ( ولا تنسى تعزمنة ) لذلك لا تشيل هم من هذه الناحية بس خلي يكون فد معلومة اصغيرة وهسة انشالله بس يوصلون يحسون بيهة وان لبنان بلد سياحي وجميل ومغري جدا وممكن خلال ساعة تصرف اكثر من 2000 دولار على اشياء كمالية حتة متحس بيهة لذلك يجب الحذر وعدم الاسراف ( وبصراحة هاي مشكلتنة العراقيين لان متعودين على الخير ومنخلي شي بنفسنة وحتة لو ماكو شي بجيبنة الا شي قليل هم نشتري بي اذا عجبنة شي )
5- طبعا ما راح تكون عندهم اقامة بس ورقة الامم فهاي الورقة تاكل ويا الشرطة اللبنانية اذا اجد وكفهم باالشارع لو مفرزة مثلا ؟لو ماكو مفارز يمكم ؟ عمي الحبيب مفارز ماكو والاقامة اول 6 اشهر مضمونة وحتة وراها هم نكدر نضمنهة باكثر من طريقة ممكن اشرحهة مفصلا في حينها لذلك لا خوف من هذا الموضوع والاقامة لان داخلين بالمطار فلا يخافون
6- ملخص لاخر اخبار الحياة: طبعا الامان الحمد لله موجود بس بصورة عامة لبنان هو بلد طائفي وكل طائفة متمركزة بمحل لذلك من الافضل عدم التكلم في السياسة والانحياز من طرف الى اخر
اما بالنسبة للنقل فهمة هنا ماعدهم هالباصات والتاتات مثلنة بس عدهم شغلة حلوة وان تاخذ تكسي بس بصفة سرفيس او كوستر يعني ياخذ قطعي على الشخص والسرفيس الواحد تقريبا 2000 ليرة اي ما يقارب 2000 عراقي او دولار و33 سنت

طبعا بس يوصلون ويتعرفون على الحياة اهنا اهواية امور رح تتسهل وهم اكو هواية مخارج ولا خوف مبدئيا
عمي العزيز انشالله اكون شرحت بصورة جيدة واتمنى ان اكون افدتك بهالمعلومات على محدوديتها وانشالله يوصلون بالسلامة
اعتذر عن الاطالة واذا اكو اي سؤال انشاء الله اني حاضر ( وهم اذا جنت بلبنان لان اني كثير التنقل فمودائما هناك واحتاجوا همة مساعدة ساكون بالخدمة انشاء الله )

[الفهد السباح]

عمي ابو الحسن السلام عليكم

1-بالنسبة للفيزة يرحون اي شركة سفر وسياحة او للخطوط الجوية العراقية

2-لازم يحجزون فندق اقل شي 3 ايام ووياهم شايلين كل شخص اقل شي 2000 $

3 والطيران مباشر من مطار بغداد الى مطار بيروت

4-بالنسبة للسكن ياجرون شقة حسب اكو من 200 دولار الى 400 دولار

5- والمعيشة اشويه اغلى من بغداد بالنسبة للماي ادفع كل شهر 8 دولارات والكهرباء كل شهر 20 دولار والنت 25دولار

6- بالنسبة اول ميدخلون مطار بيروت ينطوهم فيزة لمدة شهر ب35 دولار وبعد ميخلص الشهر يراجع اي مكتب امن يجدد شهرين مجانا وبعدين يمشي بورقة الامم واهنا بيروت محد يسالك على الهوية اذا انت متسوي مشاكل وتروح وترجع بطريقك

7-واهنا بيروت يكدر هذا الشاب الي عمره 24 سنة يشتغل لان اكو شغل ببيروت

مع تحياتي بالموفقية للجميع