سؤال بسيط الى الاخوه افيدوني رجاءا

[انيس80]

مساء الورد ,,,,,
تحية الى كل اعضاء المنتدى الطيب وخصوصا اخوي الطيب شوقي شمران صاحب المواقف الخالدة ولايهونون اخوتي الاعضاء,,,,,عندي سؤال اذا ممكن تجاوبوني علية
هسه اني دا اشتغل بالمعاملة مال ال sivبس ردت اعرف المسؤول مالتي شنو يكتب بالتوصية يعني التوصية شنو موضوعها وتدور حول اي جانب ,,,,,,,
والشغلة الثانية يردون كتاب تهديد شنو يعني اكتبة بيدي لو شنو ؟ وشنو اكتب بية اذا ممكن ساعدوني الله يساعدكم,,,

[ابو عبد الله التكساسي]

الله يساعدك انيس
اخي الرساله الي يكتبهه مسؤلك تكون بالبساطه التاليه ولا يعقدهه
انه يعرفك ومشتغل وياك وهو مسؤلك المباشر
انه يؤيد سمعتك واخلاقك وحرصك في عملك 
انه انت ما تشكل اي خطر على الامن القومي الامريكي - هاي اهم نقطه -
يذكر بيهه اسمه و درجته الوضيفيه
يذكر ايميله ورقم تلففونه او اي وسيله اتصال بيه شخصيا
وبس . طبعا اسمك وشتشتغل ومن هاي الملاعيب ما يحتاج اذكرك بيهه

هسه نجي على  يردون كتاب تهديد شنو يعني اكتبة بيدي لو شنو
هاي تجيبلك قصه من عندك تكتبهه بوورد وتكون عندك نسخه تحتفض بيهه تذكر بيهه انه انت حياتك راح اتكون في خطر في حاله بقائك بالعراق وشنو السبب
وابوك الله يرحمه

ابو عبد الله التكساسي
واي تحتاج اني يمك اغاتي

[انيس80]

الله يساعدك ابو عبد الله التكساسي تاج راسي شلونك ,,,,,,, اشكرك على جوابك الشافي وفهمت المطلوب وماتقصر خويي النشمي ,,,,,,,,,,, الله يجازيك بالخير عني

[الحياوي]

اخي العزيز
اضف الئ ذلك انه تكون  قصة التهديد تكون  تهديد مباشر ومستمر
ولايزال وانك في خطر مباشر ومستمر
لاحظ التاكيد علئ مباشر ومستمر
ونشالله خير

[queen777]

اخي العزيز انيس دزلي ايميلك على الخاص حتى ادزلك رسالة تهديد تكللهم انك لكيتهة مشمورة عندك بالكراج مال البيت و الله يسهل امرك

اخوك مصطفى

[ابو عبد الله التكساسي]

اخي العزيز انيس دزلي ايميلك على الخاص حتى ادزلك رسالة تهديد تكللهم انك لكيتهة مشمورة عندك بالكراج مال البيت و الله يسهل امرك

اخوك مصطفى

هع هع هع هع هع هع
حلوه هاي ابو اصوف والله حلوه ههههههههههههه
موتتني ضحك
الله يجازيك بكل خير [/size]

[queen777]

حبيبي ابو عبد الله ههههههههه صدك عندي لان اني تهددت بيهة و خلي افيدة للرجال همين لعد شيسوي و نقدم مساعدة بسيطة لان ما بيدنة شي بس انتة و النعم منك اني كثير احبك رغم اني ما اعرفك لان طيب و تساعد من كل قلبك انتة و الورد ابو اندرو و انجي و الله يوفقكم

اخوك مصطفى

[ابو عبد الله التكساسي]

عمي والله لو تشوف الاعضاء الي كبلي
ايخبلون اني ما اصير قطره يمهم
وعلى كولتك
شوف انجي وانت احكم
اني وين وهيه وين هيه نجمه بالسما
تحياتي الك وين انت موجود