تجارب النجاح والفشل على مستوى العمل لأصحاب IOM , SIV

[رارنج]

اخواني واخواتي الأعزاء رغم اني متقدم على برنامج آي او ام بغداد وتمت مقابلتي الأولى لكني لحد الأن لم احسم موضوع السفر بسبب قلقي وخوفي من مسألة العمل هناك وصدقوني يشترك معي في هذا كثير من المتقدمين لهذا البرنامج حيث اننا(مجموعة مهندسين) نسبيا للوضع الموجود في بغداد نتمتع بعمل لابأس به والخوف من اننا سنندم اذا لم نستطيع تحقيق نفس الشي او شي مقارب في حالة سفرنا الى هناك.
الذي احاول معرفته هنا تجارب الأخوه العراقيين ممن ذهبوا الى هناك على المستوى العملي السنة الأولى او السنتين الأوليتين ونصائح للذين لم يذهبوا حول كيفية ايجاد العمل المناسب وما هي الفرص المتاحة لعل هناك تجارب ستشجعنا لحسم القرار والذهاب الى هناك.

[Revolver]

اخوية العزيز ولو اني بلعراق العظيم بس كل الي عرفتة حسب خبرتي القليلة بلمُنتدى, الي انكليزيتة زينة يلكي شُغل وهمة الممنونين, والي انكليزيتة ضعيفة راح اتصير عليه كلش صعب ايجاد فرصة عمل .. وان جان برفسور او دكتور او مهندس او عامل تنظيف, الكل سواسية هناكة . واكيد اول شغلة راح تشتغلها مالها علاقة بتخصصك وبدراستك .


ريفولفر

[عكعك التطوى]

اخويه التوفيق من رب العالمين وكلمن وضروفه اخي ان شاءالله توصل وتشوف بعينك حينها الخيار لك تبقى او ترجع

تحياتي

[George W. Bush]

اخي العزيز ما اريد اسوي عندك احباط بس اكلك انه انت اذا طلعت لأمريكا انسى شهادتك او تخصصك
و توقع تشتغل زبال حمال عامل بسيط مع احترامي لهذه الأعمال لكن هي المتوفرة فقط هاي طبعا اذا جنصت
تشتغل حتى تسد الأيجار و الفواتير
اني مهندس كومبيوتر و انكليزيتي جيدة جدا و عندي خبرة بالعمل وي الامريكان لكن قدمت مئات الابلكيشنات و محد قبلني مو بس اني هواي وياي مهندسين و اطباء و كفائات و نفس الوضع فأذا تريد تطلع لامريكا عزيزي انسى شهادتك او تخصصك على الاقل للكم سنة الأولى في امريكا و بعدها انت و حظك و توفيق رب العالمين

اخوك جورج و اسأل مجرب و لا تسأل حكيم

[رارنج]

جميع الأخوة الي تفضلو بالردود الكريمة اكول شكرا جزيلا وممنون حيل للتعاون والموفقية للجميع ان شاء الله

[vincenzo]

صديقي لالنكي
اكو عدة proceduresتكدر تسويهه حتى تتجنب ان تنزل لمستوى هاي الشغلات اللي وصفهه اخوي العزيز جورج دبليو بوش
اذا عندك خوش مدخرات وما متزوج او متزوج مهندسة مثلا واثنينكم تفضون التوفل والجي ار اي من العراق قبل متسافرون فاول ما توصل تقدم على دراسات عليا او تعادل شهادتك وتقوي خلفيتك بدورات وامتحانات معترف بيهه وخصوصا بالحاسبات وباختصاصك وراهه دور شغل محترم
اما اذا انت تريد تروح مفلس او عندك عائلة عملاقة انت معيلهه فراح تتعذب بهاي الشغلات التعبانة يجوز سنين يلله تشوف دربك
بس شلون ما تصير اكيد زبال امريكا احسن من وزير العالم الثالث
موووو؟؟؟

[eng.a7med]

الاخ رارنج تحياتي الك

موضوعك مهم و اتفق وياك 100%100 و نفس مشاعرك المشكلة العمل و الانسان الي تعب على نفسة و عندة شهادة راقية يلكة نفسة كانما ما دارس و لازم يبدي من الصفر و الله مشكلة
تحياتي الك و تقبل مروري

[volca]

اخواني
الي ايريد شي ايعوف شي
وماكو شي صعب بس يرادله صبر وتعب الصراحه اني مهندس سيطره و نظم الجامعه التكنلوجيه
وحاليا اعمل ع خبرتي لان الصدفه لعبت دور ويايه والحمد لله وهوه توفيق من رب العالمين


تحياتي

[رارنج]

اتفق ويه الجميع انه الموضوع يحتاجله صبر واني مو من الناس الي يريدون كلشي جاهز وعلى الحاضر والدليل مستوى عملي الحالي ما اجاني على الجاهز تعبنا هواية وصبرنا يله بدينا نقطف ثمار هذا التعب فأذا الموضوع موضوع صبر نصبر ونتحمل بس اهم شي اكو فرج وره هذا الصبر وشكر وتقدير لجميع الأخوان الي خجلوني بأهتمامهم وترحيبهم وتفاعلهم ويه الموضوع وبصراحة هذا المنتدى فد شي خرافي ومينوصف وشكد مفيد يعني الأعمى يفتح عيونه بهاذا المنتدى والموفقية للجميع.