فيزة الى عمان ارجو الدخول

[اسد النهرين]

اخوان اخيرا كملت كل متعلقاتي واستلمت الجوازات وصفيت كل اموري والحمد لله ... المشكلة اريد اسرع طريقة للحصول على فيزة الدخول الى عمان ناس قالوا على الملكية الاردنيه وتطلع باسبوع او على شركة الضلال العراقيه وتطلع ايضا تقريبا اسبوع ... اذا ممكن احد ينطيني خبر اكيد او اذا اكو غير طرق ؟؟؟؟

وشكرا
اسد النهرين

[Revolver]

اخوية العزيز الف مبروك واتمنالك الموفقية, وان شاء الله يجون اهل الاختصاص ويجاوبوك .

ريفولفر

[ام فائز]

اخونا اسد النهرين
 شد حيلك وقدم على الملكيه الاردنيه
 الكل يقول انها ما اتطول اكثر من اسبوعين
ما عندي معلومات عن الظلال
بس شويه دير بالك شوه الاردنيين يتنحسون من العائله ابكاملها اتقدم على الفيزه فانت شوف قدم الك يوم وقدم الاهلك بعد كم يوم
واكو طريقه اذا اكو احد عندك اخ اب  يقدملك من عمان  ولو هاي شوه ليكون يطلبون كفاله مثل ما صارت ويا احد الاخوان
 بالموفقيه

[اسد النهرين]

شكرا اخواني الاعزاء طبعا الكفيل ميفيد لان ما اكدر كلشي اسوي . اي حركة تنحسب على الكفيل خطيه .. يمكن الملكيه احسن شي بس يكولون التكت رايح جاي هل من الممكن ابيع تذكرة الرجوع ؟ ناس يكولون يصير ابيعها بمطار عمان وناس يكولون متنباع والله حيرة !!!!

[y.a.r.a]

اخي اسد النهرين
اكيد اذا حصلتها بدون كفاله احسن لان الكفاله  اذا مرجعت خلال شهر يتغرم 5000دينار اردني يعني مو شقه
اما بالنسبه للبطاقه هيه طبعا متنباع بس اتروح على مكتب الحطوط الاردنيه اترجعها وتسترد فلوسك
يس اسالهم الاردنيه الي ابغداد لان اذا كاتبين عليها متترجع الا في البلد الي اتصدرت منه
بهاي الحاله دزها لاحد ابغداد ايرجعلكياها ويستلم فلوسها والافضل ايكون احد من اهلك او وكيل رسمي عنك

[المحب للحرية]

اخوي العزيز اسد  النهرين انا خادمك وتدلل ...........واخذها مني واسال مجرب ولا تسأل حكيم ........انا نفس الشي رحت للضلال ورحت للملكية اثنينهم .............اسرع طريقة لطلب الفيزا هو الملكية الاردنية لان شركة الضلال حاليا عليها زخم كلش جبير واحتمال تجي الفيزا ورة شهر الى اربعين يوم او اصلا ما تجي.............ومن ناحية التكت تكدر تسترد المبلغ مالت الاياب من توصل لعمان تروح لمكتبهم ودكلهم ااريدكم تلغون الاياب للتذكرة مالتي وهنا تكدر تسترد المبلغ .........او عندك طريقة ثانية تجي لمكتبهم بالبصرة وتروح لمكتب الملكية الاردنية وهمه عدهم خيارين يعني بكيفك تريد تذكرة ذهاب  لو تذكرة  اياب او تذكرة ذهاب واياب وهذا مكتبهم موجود بشارع الجزائر ببدايته واسم الشركة شركة طيران البصرة ..سعر تذكرة الذهاب (410$).وتكلفة الفيزا (50$)......وعزيزي حتى الفيزة من مكتب الملكية بالبصرة اسرع من كل مكان بالعراق اخذها مني ما تطول اكثر من 10 ايام او اقل  ..اما سفرك كلهم اريد سفري يصير من مطار بغداد وهمه ما يكولون شي ...ونصيحة مكتب الملكية فرع بغداد استغلالية  يجبروك الا تكص تذكرة ذهاب واياب ب 9 ورقات فلا تروح الهم هواي احسن...... وانشاء الله السفر وتروح بالسلامة ............خادمك المحب للحرية

[اسد النهرين]

الف شكر يا صديقي المحب للحرية على هاذي المعلومات المفيدة ورحمة الله على والديك ياورده

[اسد النهرين]

اخوان اخيرا حطيت رجلي على اول الطريق اليوم رحت وقدمت على الملكية وكالوا انتظر اسبوع الى 15 يوم ونتصل بيك على الفيزا ادعولي ان تطلع الفيزا بسرعة وشكرا الكم