الوكاله العامة شنو المطلوب ؟؟؟

[rafid82]

السلام عليكم
اخواني اريد اعرف ماهي الاجرائات لعمل الوكالة العامة المطلقه  من السفارة العراقية في عمان

واريد اعرف شنو المطلوب من وثائق  لان ماعندي لابطاقة سكن ولا بطاقة تموينية ؟؟

بس عندي الجناسي و شهادة الجناسي والجوازات
وهل يطلبون الجنسية للشخص اللي راح اعمله الوكالة لو لا ؟؟

وهل اطول الشغلة  يعني تخلص بيوم واحد وأريد عنوان السفارة العراقية ؟؟

ومشكورين جدا اخوكم رافد

[ام فائز]

اخونا رافد
الحقيقه القوانين تتبدل من يوم الى يوم
انا قبل حوالي ست اشهر عملت وكاله لاخي في بغداد ماكان مطلوب اي وثيقه للشخص الذي اوكله بس جنسيتي وشهاده الجنسيه الي  والجواز طبعا
 حسب ما سمعت حاليا المطلوب نسخ من شهاده الجنسيه والهويه وصور لكلا الطرفين الموكل والموكل له
واحسن شي اذا السفاره قريبه عليك اتروح وتسال اهل المكاتب هناك فهم يعرفون كل شي وهذا اقصده ابعمان
عاد ما اعرف ابسوريا او مصر
 وان شاء الله الي يعرف احسن يجاوب

[bee bee]

أخوية .. تحية طيبة

الوكالة تخلص بنفس اليوم بس لازم تروح من الصبح لأنه من تصير الساعه 11 بعد محد يستلمها

المطلوب من صاحب الوكالة في عمان هو:
نسخة جواز سفر ساري
نسخه هوية الأحوال المدنية
نسخة من شهادة الجنسية
ثلاث صور
سند العقار في حالة بيع عقار ... نسخه طبعا منه أو من القسام الشرعي
سنوية سيارة في حالة وكالة بيع سيارة

المطلوب من الوكيل في بغداد:
نسخة من : جواز سفر ساري أو هوية أحوال أو الجنسية
ثلاث صور للوكيل
عنوانه الكامل : محافظة ، المنطقة ، زقاق ، محلة ، دار

والسفارة العراقية بعمان هي موجوده مابين الدوار الأول والثاني
وأي أبو تكسي يعرفها ..

وأكو يمها مكتب " بابل " هو يتعامل وية السفارة ويعرف كل المطلوب لكل المعاملات


تحياتي

تحياتي وبالموفقية

[rafid82]

شكرا للردود
بس اني بحاجة لمكتب او الطريقة لنقل الوكالة الى العراق وكم السعر يأخذون علما أريد ادزهه لمحافظة البصرة

[ريم عبد]

عيني رافد
اذا تقصد البريد
تكدر ادزها على الدي اج ال او الفينكس او الاراميكس
واذا وثائق اقل وزن هوه نص كيلو والسعر بحدود الاربعين وال 45 دينار اردني
همه فروعهم الرئيسيه في بغداد وعدهم فروع بالمحافضات الرئيسيه

[rafid82]

الاخت ريم شكرا للرد بس ماكو أرخص كلش غالية  هاي على العموم شكرا لك

[alusha1]

الأخ رافد السلام عليكم ورحمة الله وبركاته
بلنسبة لأجراءات الوكالة مثل مافهموك الأخوان لكن حط في بالك أنه هذه الوكالة لازم بعدهة تتصدق بلعراق من الخارجية والضريبة والبنك في حال كانت الوكالة محتاجهة لعقار وحتى أذا مو لعقار فأيضا لازم تتصدق وتعرف الوضع بلعراق شوية الروحة والرجعة متعبة والروتين مال التصديقات متعب ألة تحطون معقب يكملهة
وشغلة ثانية أذا كان بأستطاعتك المجئ للعراق فتكون اسهل عليك كلش لأن فقط تعمل الوكالة العامة المطلقة بلمحكمة وبدون اي تصديق
أما بلنسبة الى طريق ارسال وثائق رسمية بطريقة رخيصة فتكدر تروح حتى الى أي سايق يروح ويرجع لعمان وبغداد دائما حتى لو شخص ما تعرفة وتنطي كم فلس وتكلة ينتظرك شخص بلكراج تنطيه هاي الاوراق وتاخذ رقم تلفونة وتعرف شلون تتفق وياه ولا تخاف أغلب العراقيين هيج يسوون واحنة منهم سويناهة اكثر من مرة ودزينة وثائق مهمة بهلطريقة وهمة السواق هم مكيفين بهاي الشغلة يسترزقون منهة وياخذون مبلغ بسيط
وأذا تعرف سايق أكيد يكون أأمن ألك حتى ترتاح نفسيا
وان شاء الله اكون فدتك بهلمعلومات
تحياتي اختك علوشة

[bee bee]

اذا عندك أحد، صديق أو أقارب ..  يستلمها من بغداد وهو يدزها للبصرة
فه أكو مكتب " السجال " صاير بجبل الحسين عمارة محمد القاسم ط1
همه يوصلولك اياها لبغداد ويروح واحد ياخذها من يم معرض بغداد الدولي
هذولة امجربهم كلش أمناء وتوصل الرسالة بيومين أقصى شي

ياخذون 20 دينار بس عاملهم ويقبلون ب15 دينار
اني دزيت أكثر من مرة ب15 دينار فقط

تحياتي