اخي الغالي طبعا من اتسجل بمكتب المفوضيه الساميه لشؤون اللاجئين وتستلم وثيقه اثبات طلب اللجوء ممكن ان اتراجع مكتب المفوضيه واتكل للحارس الي بالباب اريد خدمه اجتماعيه طبعا لازم اتكون الساعه ب 8 الصبح لان اكو اهواي ناس وارقام السره مال مقابله موظفه من قسم الخدمه الاجتماعيه تكون محدوده ولمن يجي سراك تدخل للموظفه وتشرحله ظروفك المعاشيه وهيه بدورها راح اتسالك بعض الاسئله ومن خلال اجابتك ممكن ان اتحطك بالسره مال الكشف المنزلي من اتحطك بالكشف المنزلي تنتظر من 3 شهور الى 5 او مرات 6 يجون موظفين ايزورون بيتك ويطلعون على البيت ويسالوك هل انته مريض امراض مزمنه او يوجد اية اعاقه وكم ايجاركم ومن هاي الاسئله وهمه طبعا ايقيمون وضعكم وايكتبون تقيرير بالحاله مالتكم وايرفعوه للموظف المسؤول والموظف يطلع عليه وايقرر طبعا اكو حالات موجودة بالاردن اذا انته اتشوفها تحزن حزن عميق اكو ناس طاعنين بالسن وعندهم امراض وساطنين اب اماكن بس البزازين ايعيشون بيها اتخيل وما امحصلين يعني لاتتصور انه الشغله اهنا اتكول للشيء كن فيكون يعني اني واحد من الناس سنه وثلاث اشهر من 2007 اللى 2998 يله استلمت مساعده واسمها مساعده مو راتب المهم لمن ايقرر الموظف ان تستحق ايصرفولك مساعده ولمن يجي فصل الشتاء مجرد انه ايزيدون المبلغ الي ينطوك اياه خمسين او اربعين دينار ايكلك هاي بدل محروقات وهذا المبلغ ما ايسوي اي شيء لان اهنانه قنينه الغاز اب سبعة دنانير والنفط جدا غالي وبالذات لمن ترتفع الاسعار العالميه على السريع ايزيدون المحروقات هسه تجي واتشوف لاتتخيل انه الوضع وردي وان كلشي تمام اكو ناس اهنانه ادمرت وحتى اذا ينطوك شيء اتموت يله تحصل عليه مو بسهوله
